Sõngr zagsã rãmb yĩnga
1. Wãn to la vʋʋsg daarã ra nafd Israɛll nebã ne b zagsã rãmba?
1 Vʋʋsg daarã ra yaa bũmb a Zeova sẽn sigl zagsã rãmb nafr yĩnga. Daar-n-kãngã, Israɛll nebã ra basda b tʋʋmã, n dɩk b sẽkã n tags a Zeova sõmblmã la b zoodã ne-a wã zugu. Roagdbã me ra paamd n zãmsda b kambã a Zeova noyã. (Tõo. 6:6, 7) Vʋʋsg daarã ra kɩtdame t’a Zeova nebã paamd sẽk n tagsd b tũudmã yɛl zugu.
2. A Zeova sẽn da yãk vʋʋsg daar n kõ Israɛll nebã wilgda tõnd bõe yẽ zugu?
2 Yaa sɩd tɩ rũndã-rũndã a Zeova pa yãk vʋʋsg daar n kõ a nebã ye. La Wẽnnaam sẽn da yãk vʋʋsg daar n kõ Israɛll nebã wilgda tõnd bũmb yẽ zugu. Wakat fãa, Wẽnnaam wilgdame t’a ratame t’a nin-buiidã tall zood sõma ne-a. (Ezai 48:17, 18) Rũndã-rũndã, bũmb a ye a Zeova sẽn maan tɩ wilgdẽ t’a rata a nin-buiidã neer yaa a sẽn sigl zak pʋgẽ zaabr Biibl zãmsgã.
3. Bõe yĩng la b sẽn sigl zak pʋgẽ zaabr Biibl zãmsgã?
3 Bõe yĩng la b sẽn sigl zak pʋgẽ zaabr Biibl zãmsgã? Yʋʋmd 2009, yʋʋm-vẽkr kiuugã tɛka, sebrã zãmsgã, Wẽnnaam tʋʋmdã lekollã n paas tʋʋmdã tigisgã maanda zaab-yɛnga. Bũmb a ye sẽn kɩt tɩ b maan woto wã yaa sẽn na yɩl tɩ zagsã rãmb yãk zaabr a yembr semen fãa, n maan zak pʋgẽ zaabr Biibl zãmsgã n keng b tẽebã. B wilgame tɩ zak fãa rɩk daar ning d sẽn da maand sebrã zãmsgã n maan zak pʋgẽ zaabr Biibl zãmsgã, tɩ sã n tõeyã. La b segd n dɩka sẽkã n maag b yĩng n zãmsd Biiblã bɩ n sõsd a yɛl kẽer zugu, la b maand rẽ tɩ zemsd ne zakã neb yɛla.
4. Bõe yĩng tɩ pa tɩlae tɩ d zak pʋgẽ zaabr Biibl zãmsgã yɩ lɛɛr yɛnga?
4 Pĩndã, sẽn na yɩl n kẽng sebrã zãmsgo, d da segd n paama sẽk n segl d mense, la d yi n kẽng tigsgã zĩigẽ. Neb kẽer da rɩkda zaabrã tõre, sẽn na yɩl n kẽng tigs-kãngã sẽn yaa lɛɛr a ye balã. La b sẽn toeem rẽ wã, d tara zaab-kãng n na n maan zak pʋgẽ zaabr Biibl zãmsgo. Woto yĩnga, pa tɩlae tɩ d zak pʋgẽ zaabr Biibl zãmsgã yɩ lɛɛr yɛng bal ye. D segd n tagsa zakã neb yɛl yelle, n bãng n dɩk sẽk sẽn sekd n sõng-ba.
5. Yaa tɩlae tɩ d rɩk sẽkã fãa n zãmsd Biiblã ne taab bɩ?
5 Yaa tɩlae tɩ d rɩk sẽkã fãa n zãmsd Biiblã ne taab bɩ? Zagsã rãmbã, sẽn tar-b kamb la sẽn pa tar-b kambã sã n sõsd Biiblã yɛl kẽer zugu, b kengda taab tẽebo. (Rom 1:12) Kɩtdame tɩ b zakã neb nong taab n paasdẽ. Woto yĩnga, zak pʋgẽ zaabr Biibl zãmsg sasa, b segd n dɩka sẽk wʋsg n sõsd ne taab Biiblã zug n yɩɩda. La zakã ned fãa me tõe n zãmsa Biiblã a toore. Wala makre, b sã n wa sõs ne taab n sa, b tõe n kell n zĩndame tɩ ned fãa maand a meng zãmsgo, wala makre, n segend tigisgã bɩ n karemd periodik rãmbã. Zags kẽer pʋsẽ, b pa pakd televiziõ zaab-kãng ye.
6. Zãmsgã segd n maana wãn-wãna?
6 Zãmsgã segd n maana wãn-wãna? Pa tɩlae tɩ zãmsgã yɩ sogsg la leoor wakat fãa ye. Sẽn na yɩl tɩ zak pʋgẽ zaabr Biibl zãmsgã tall yamleoogo, zags kẽer pʋɩta zãmsgã sẽkã, n karemd Biiblã, n segend tigissã, la b maand mak-n-wilg koe-moonegã yĩnga, tɩ wõnd lekollã la tʋʋmdã tigisgã. Rẽ wɛɛngẽ b kõta sagls a wãn seb-neng a 6.
7. Roagdbã segd n kɩtame tɩ zãmsgã sasa yɩ wãn-wãna?
7 Roagdbã segd n kɩtame tɩ zãmsgã sasa yɩ wãn-wãna? Zãmsgã wakat sã n tar yamleoogo, zãmsgã kẽeda zakã rãmb sõma. Wakat ninga y tõe n yii yɩng n maan zãmsgã. Bãng-y tɩ wakat ninga y tõe n yalsa minit a wãn n lebs n sɩnge. Zags kẽer mi n waa ne bũmb bilfu, tɩ zãmsgã poor bɩ b naag taab n dɩ bɩ n yũ. Roagdbã pa segd n kibind b kambã zak pʋgẽ zaabr Biibl zãmsgã sasa ye. Wakat ninga b tõe n dɩka sẽkã bilf n gom yell takɩ sẽn pak zakã neb yelle. La sã n mik tɩ biig n maan bũmbu, b pa segd n zab-a a taabã sʋk n wa ning-a yãnd ye. Segd n yɩɩ wakat a to. Zak pʋgẽ zaabr Biibl zãmsgã pa segd n yɩ nen-gãneng sasa ye. Segd n yɩɩ sũ-noog sasa, bala Wẽnnaam ning d sẽn tũudã yaa sũ-noog soaba.—1 Tɩm. 1:11, NW.
8, 9. Wãn to la zak soab segd n segl zãmsgã?
8 Wãn to la zakã soab tõe n segl zãmsgã? Zakã soab sã n deng n yãk bũmb ning b sẽn na n zãms zaabr Biibl zãmsg fãa sasa wã, la a tags n ges b sẽn na n maan rẽ to-to, na n nafa zakã rãmb sõma. (Yel. 21:5) A segd n deng n soka a pagã n bãng a tagsg rẽ wɛɛngẽ. (Yel. 15:22) Wakat ning me, zak soben-dãmbã tõe n soka b kambã me tɩ b wilg b sẽn dat tɩ b zãms bũmb ninga. Y sã n maand woto, y na n bãnga bũmb ning sẽn noom-b la sẽn pak-bã.
9 La pa semen fãa la zakã soab segd n dɩk sẽk wʋsg n segl zãmsgã ye. Tõe tɩ zakã neb sã n paam tɩ b yãk bũmb takɩ n maand semen fãa, na n yɩ-b-la noogo. Rẽnd pa wakat fãa la zakã soab segd n bao bõn-paall zakã rãmb sẽn na n zãms ye. Zãmsgã wakate, a sã n yã bũmb sẽn pak zakã rãmba, zãmsgã poor bala, a tõe n zoe n gʋlsame, tɩ b wa ges rẽ yell semen ning sẽn pʋgdã. Zak soben-dãmb kẽer gʋlsda bũmb ning b sẽn na n maan semen ning sẽn pʋgdã n ning zĩig ning zakã neb fãa sẽn tõe n yãẽ. Woto kɩtdame tɩ zakã neb zoe n miẽ, n gũud ne sũ-noogo, la b paam sẽk me n segle, tɩ sã n segdame.
10. Neb nins sẽn yaa b yembrã tõe n maana bõe zak pʋgẽ zaabr Biibl zãmsgã sasa?
10 La y sã n yaa y yembre? Neb nins sẽn yaa b yembrã me tõe n dɩka zak pʋgẽ zaabr Biibl zãmsgã sasa n zãmsd Biiblã. Sasa kãngã a tõe n karemda Biiblã, n segend tigissã bɩ n karemd Gũusg Gasgã la Réveillez-vous ! wã. Koe-moondb kẽer maanda vaeesg me. Wakat ninga b sã n data b tõe n boola koe-moond a to, bɩ zak rãmb tɩ b wa naag-b tɩ b sõs Biiblã zug n keng taab tẽebo.
11, 12. D sã n maand zak pʋgẽ zaabr Biibl zãmsgã, a nafa kẽer la bʋse?
11 Zak pʋgẽ zaabr Biibl zãmsgã yõod yaa bõe? Neb nins sẽn tũud a Zeova ne b sũur fãa wã tara zood sõma ne-a. Sẽn paase, zak rãmb nins sẽn naagd taab n maand zak pʋgẽ zaabr Biibl zãmsgã nonglem ne taab paasdame. Rao a ye ne a pag sẽn maand b zak pʋgẽ zaabr Biibl zãmsgã wilga rẽ sẽn nafd-b to-to. B yeela woto: “Tõnd sẽn yaa so-pakdb n pa tar kambã, d nonga zak pʋgẽ zaabr Biibl zãmsgã wʋsgo. Kɩtdame tɩ d nonglmã ne taab paasdẽ, tɩ d nonglmã ne d saasẽ Ba wã me paasdẽ. Tõnd sã n vẽeg beoog n tẽeg tɩ yaa d zak pʋgẽ zaabr Biibl zãmsgã daare, d sũur yaa noog wʋsgo.”
12 B sẽn yãk zaabr a ye zak pʋgẽ zaabr Biibl zãmsgã yĩngã, sõngda neb nins sẽn pa tar sẽk wʋsgã. Pag a ye sẽn yaa wakat fãa so-pakda, n tar kom-dibli a yiib n wubd-b a yembr yeela woto: “Pĩndã, d ra pa tõogd n maand zak pʋgẽ Biibl zãmsgã sõma ye. D ra vaanda naoor wʋsgo, bala mam mi n yaame. M da pa mi m sẽn na n maan to-to n tõog zu-loe-kãngã ye. Rẽ n so tɩ m gʋlsd yãmb n dat n pʋʋs-y barka, y sẽn yãk zaabr a ye zak pʋgẽ zaabr Biibl zãmsgã yĩngã. Tõnd maanda d zak pʋgẽ Biibl zãmsgã masã n pa vaandẽ, hal tɩ nafd-do.”
13. Bõe n na n kɩt tɩ zak pʋgẽ zaabr Biibl zãmsgã naf y zakã rãmb sõma?
13 Wala vʋʋsg daarã sẽn da nafd Israɛll nebã, zak pʋgẽ zaabr Biibl zãmsgã me yaa kũun d saasẽ Ba wã sẽn kõ, tɩ tõe n naf zagsã rãmba. (Zak 1:17) Vʋʋsg daarã sẽn da nafd Israɛll nebã to-to wã bee ne bũmb ning b sẽn maand daar-n-kãngã wã. Dẽnd zak pʋgẽ zaabr Biibl zãmsgã sẽn na n naf tõnd me to-to wã bee ne d sẽn maand bũmb ning zaab-kãngã wã. (2 Kor. 9:6; Gal. 6:7, 8; Kol. 3:23, 24) Yãmb sã n maand y zak pʋgẽ zaabr Biibl zãmsgã wa sẽn segde, yãmb ne y zakã rãmb na n tõog n yeela wala yɩɩl gʋlsdã. A yeela woto: “Ne maam, mam sã n kolg Wẽnnaam n yaa sõma. Mam geta Zusoabã sẽn yaa Soaalã tɩ b yɩ m zĩ-lilldga.”—Yɩɩl 73:28.
[Goam sẽn tar pãngã, seb-neng a 5]
Zak pʋgẽ zaabr Biibl zãmsgã pa segd n yɩ nen-gãneng sasa ye. Segd n yɩɩ sũ-noog sasa, bala Wẽnnaam ning d sẽn tũudã yaa sũ-noog soaba
[Goam sẽn tar pãngã, seb-neng a 6]
BĨNGI
Sagls kẽer y sẽn tõe n tũ y zak pʋgẽ zaabr Biibl zãmsgã sasa
Biiblã:
• Naag-y taab n karem Biiblã zĩig ning d sẽn tog n karem semennã pʋgẽ wã bilfu. Sã n mik tɩ yaa neb wʋsg goam n be vɛrse rãmbã pʋgẽ, bɩ y pʋɩ tɩ ned fãa reeg a ye zĩig n karem.
• Yãk-y Biiblã zĩig ning d sẽn tog n karmã n maan darm.
• Yeel-y ned fãa t’a reng n karem Biiblã zĩig ning d sẽn tog n karmã, n gʋls sokr a ye bɩ a yiib a sẽn tar rẽ zugu. Rẽ poor bɩ y naag taab n bao sogsgã leoore.
• Semen fãa bɩ y gʋls vɛrse a ye seb-pɛdg zugu, n modg n dɩk ne zugu, la y wilg a võore. Bĩngd-y seb-pedsã, n lebgd n get semen fãa n bãng vɛrse rãmb nins y sẽn tõog n dɩk ne zugã.
• Kelg-y Biiblã kareng ne kasɛte, n tũud karengã y Biiblã pʋgẽ.
Tigissã:
• Naag-y taab n segend tigissã sõss kẽere.
• Naag-y taab n yɩɩl yɩɩll nins b sẽn na yɩɩl semennã pʋgẽ wã.
• Ned sã n tar sõsg Wẽnnaam tʋʋmdã lekoll sasa bɩ mak-n-wilg tʋʋmdã tigisg sasa, bɩ y sõs sagls kẽer a sẽn tõe n tũ zugu, pa rẽ bɩ a maan tɩ zakã rãmb gese.
Sẽn yaa tɩlae ne neb nins sẽn tar kambã:
• Karm-y yɛl kẽer sẽn be Les jeunes s’interrogent sebrã bɩ Écoute le grand Enseignant sebrã pʋgẽ.
• Maan-y mak-n-wilg tɩ sõng kambã tɩ b bãng b sẽn tõe n maan to-to yɛl kẽer taoor lekollẽ wã.
• Maan-y mak-n-wilgi, tɩ kambã reeg b roagdbã zĩiga, n maan vaeesg yell ning zug n wa sõs ne b roagdbã.
Koɛɛgã moonego:
• Maan-y mak-n-wilgi, n bãng y sẽn tõe n moon nebã wɩkɛnnã to-to.
• Sõs-y ne taab n bãng zakã rãmb sẽn tõe n maan to-to n moon wʋsg a Zezi kũumã tẽegr sasa, bɩ vakãas rãmbã sasa.
• Kõ-y zakã ned fãa minit a wãn t’a maan vaeesgo, n bãng a sẽn tõe n leok nebã sogsg koɛɛgã mooneg sasa to-to, la a maan mak-n-wilgi.
Sagls a taaba:
• Naag-y taab n karem sõsg sẽn be periodik paalã pʋgẽ.
• Kɩt-y tɩ zakã ned fãa reng n karem periodik paalã pʋgẽ sõsg sẽn noom-a, tɩ rẽ poor bɩ a wa gom rẽ yelle.
• Wakat ninga y tõe n boola koe-moonda, bɩ saam-biig ne a pag tɩ b wa naag yãmb n maan zak pʋgẽ zaabr Biibl zãmsgã. Rẽ poore y tõe n kos-b lame tɩ b togs kibay b sẽn paam koɛɛgã mooneg pʋgẽ, bɩ sẽn tũ to-to tɩ b wa lebg a Zeova Kaset rãmba.
• Ges-y siglgã video la y sõs a zugu.
• Sõs-y “ Les jeunes s’interrogent ” bɩ “ Apprenons en famille ” sẽn be Réveillez-vous ! wã pʋgẽ wã zugu.
• Sõs-y “ Enseignez vos enfants ” bɩ “ Pour nos jeunes lecteurs ” sẽn be Gũusg Gasgã pʋgẽ wã zugu.
• Karm-y annuaire paallã pʋgẽ kibare, bɩ seb-paall y sẽn paam rasem a tãab tigis-kãseng sasa, la y sõs a zugu.
• Tigis-kãseng poore, bɩ y sõs bũmb ning y sẽn wʋm be wã zugu.
• Ges-y bũmb nins a Zeova sẽn naanã, n sõs ne taab rẽ zug n wilg rẽ sẽn zãmsd tõnd bũmb ning a Zeova zugu.
• Naag-y taab n maan bũmb mamsga, wala a Nowe koglgã, bɩ n maan kart sẽn wilgd tẽns sẽn be Biiblã pʋgẽ, pa rẽ bɩ y maan taablo sẽn wilgd yɛl sẽn zĩnd yʋʋm ninsi.