Zak pʋgẽ Biibl zãmsgã: Y sẽn tõe n maan to-to t’a tall yamleoog n paase

Berzɩll saam-biig a ye sẽn tar kamb yeela woto: “Tõnd zak pʋgẽ zaabr Biibl zãmsgã sasa, sã n pa maam n wa n yeel m zakã rãmb tɩ d bas woto, b sõsdame tɩ wakatã yõsge.” Zapõ saam-biig yeelame tɩ bãmb sã n sɩnge, wakatã wat n yõsgame t’a bi-riblã sẽn nan tar yʋʋm piigã pa tol n dat tɩ sa ye. Bõe yĩnga? Ad a ba wã sẽn yeele: “Kengda a raood hal tɩ noom-a wʋsgo.”

Yaa sɩd tɩ pa kambã fãa n yaa wa kom-kãensã ye. Sãnda pʋd n pa nong zak pʋgẽ Biibl zãmsgã ye. Bõe n kɩt tɩ b pa nongẽ? Ad roagd a ye sẽn yit Togo sẽn yeele: “A Zeova raabã maaneg pa segd n wa ne yam-yiisg ye.” Sã n wa lebg woto, yɩta sõma tɩ y maneg n ges y sẽn maand zak pʋgẽ Biibl zãmsgã to-to wã sã n pa rat toeengo. Zags rãmb wʋsg bãngame tɩ zãmsgã sasa segd n yɩɩ wa a Ezai sẽn da yeel vʋʋsg daarã wɛɛngẽ wã. A yeelame tɩ segd n yɩɩ “ra-noogo.”—Ezai 58:13, 14.

Roagdb kẽer mikame tɩ b sã n dat tɩ zak pʋgẽ Biibl zãmsgã yɩ noogo, rẽnda b mao tɩ tall yamleoogo. Saam-biig yʋʋr sẽn boond t’a Ralf n tar kom-pugli a tãab la bi-ribl yeelame tɩ bãmb sigla b zak pʋgẽ Biibl zãmsgã t’a yaa wa sõsg b sẽn zĩ n sõsd ne taaba, tɩ pa tolg n yaa wa Biiblã zãmsg ye. Wakat kãnga, ned kam fãa kẽesda a toog sõsgã pʋgẽ. Yaa sɩd tɩ yɩl n tõog tɩ sõsgã yɩ nebã fãa noog tɩ b sak n kẽes b toogã pa mi n yaa nana ye. Pag a yembr yeelame: “Mam maooda wakat fãa n dat tɩ d zak pʋgẽ Biibl zãmsgã tall yamleoog wa m sẽn datã, la yaa toog ne-ma.” Yãmb me sã n tara zu-loe-kãngã, a tɩɩmã yaa bõe?

YƖ-Y WƲMDBA, LA Y TOEEMDẼ

Alemayn saam-biig sẽn tar kamb a yiib yeela woto: “A tɩɩmã yaa d yɩ wʋmda.” Ad saam-bi-poak yʋʋr sẽn boond t’a Natalia n yaa kamb a yiib ma me sẽn yeele: “Sẽn noom tõnd zakã rãmb n yɩɩda, yaa d sẽn na n toeemd d sẽn zãmsdã.” Zags rãmb wʋsg yãka yam n pʋɩ zãmsgã wakat tɩ zemse, n maand bũmb toor-toore. Berzɩll saam-biig yʋʋr sẽn boond t’a Cleiton n tar kom-bɩɩs a yiib wilga rẽ nafa n yeele: “Woto kɩtdame tɩ zãmsgã kẽngd taoor sõma. Sẽn paase, zakã ned fãa tõe n kẽesa a toogo.” Roagdbã sã n pʋɩ zãmsgã wakat woto, b tõogdame n sõng b kambã yembr-yembre, sẽn yɩɩd fãa, b sã n yaa bɛd la bõonego. Yɩl n sõng zakã ned kam fãa sõma, roagdbã segd n wilgdame tɩ b yaa wʋmdba, n yãkd sõssã tɩ zemsd ne biig fãa yɛl la a yʋʋma. Sẽn paase, b tog n bãnga b sẽn na n sigl zãmsgã to-to.

Bõe la zags kẽer neb maand n toeemd b zãmsgã tɩ tar yamleoogo? Sãnda rengd n yɩɩl n pẽga a Zeova. Rẽ wɛɛngẽ, a Juan sẽn yit Megsikã yeela woto: “Yɩɩlã sõngda zakã ned kam fãa t’a segl a yam sõsg ning sẽn na n pʋglã yĩnga. Paasda d tigsgã yamleoog me.” A Juan zakã rãmb sã n na n yãk yɩɩlã, b getame tɩ zems ne bũmb ning yell b sẽn na n gomã.

Zags kẽer neb yãkda Biiblã babg ning n naag taab n karme. La sẽn na yɩl tɩ karengã tall yamleoogo, b sã n yãka kibar Biiblã pʋgẽ n na n karme, b wilgda zakã ned fãa kibarã ned ning goam a sẽn tog n karem. Roagd a ye sẽn yit Zapõ yeelame tɩ yẽ ne a zakã rãmb mak n na n karma Biiblã woto, la tɩ sɩngrẽ wã, yɩɩ toog ne yẽ. La a paasame tɩ yẽ ne a pagã sẽn naagd b kom-dibli a yiibã n karemdẽ wã nooma kambã. Zags sãnda rãmb mi n yãka Biiblã kibar ning n maan teyatre. Afirikdisiid saam-biig yʋʋr sẽn boond t’a Roger n tar kamb a yiib yeela woto: “Kambã mi n yãa bũmb Biiblã kibay pʋsẽ, tɩ tõnd a roagdbã ra pa yã ye.”

Bũmb a to n tõe n sõng roagdbã Biiblã zãmsg wɛɛngẽ. Yaa b sẽn na n tõog tɩ zakã neb fãa naagd taab n maand bũmb kẽere. B tõe n maka a Nowe koglgã kaabo, wall b bao n me a Salomo wẽnd-doogã buudu. Woto baoodame tɩ zakã neb reng n maan vaeesg Biiblã pʋgẽ, tɩ tõe n yɩ-b noogo. Wala makre, Aazi soolmẽ wã, yʋʋm a nu bi-pugl n da be ne a roagdb la a yaab-poaka. B ra tikda kibay nins sẽn gomd tʋm-tʋmd a Poll so-togsã yellã n maand reem. Zags rãmb kẽer me tikda Yikr sebrã kibay sãnda n maand reem. A Donald sẽn yit Togo n tar yʋʋm 19 wã yeelame tɩ zakã pʋgẽ Biibl zãmsgã sã n toeemdẽ, paasda a noosmã, la noogd zakã rãmb sũuri. Tags-y n ges-y yãmb me sẽn tõe n maan to-to tɩ y rẽndã tall yamleoogo.

SEGLG YAA TƖLAE

Yaa sɩd tɩ y sã n yaa wʋmdb la y toeemd y zak pʋgẽ Biibl zãmsgã, kɩtdame t’a tall yamleoogo. La sẽn na yɩl t’a naf zakã rãmb fãa, yaa tɩlae tɩ b reng n segle. Wakat ninga, yaams tara kambã. Rẽ wã, yɩta sõma tɩ roagdbã reng n tags bũmb ning b sẽn na n zãmsã zugu, la b segl neere. Zak soab a ye yeelame tɩ yẽ “sã n deng n segl sõma, zãmsgã nafda zakã ned fãa.” A to sẽn yit Alemayn yeelame tɩ yẽ rengd n togsa a zakã rãmb bũmb ning b sẽn na n zãms semen nins sẽn watã pʋgẽ. Saam-biig sẽn tar kamb a yoob n yit Bene yeelame tɩ bãmb sã n yãk tõnd siglgã DVD n na n gese, yẽ rengd n segla sogsg a sẽn na n soke. Sɩd me, d sã n dat tɩ Biiblã zãmsg naf zakã rãmba, seglgã yaa tɩlae.

Zakã neb sã n zoe n mi bũmb ning yell y sẽn na n gom semennã pʋgẽ wã, b tõe n deng n tagsda rẽ yelle, la b sõsd ne taaba. Sẽn paase, b ned kam fãa sã n tar bũmb takɩ a sẽn na n maan zãmsgã sasa, na n sõng-a lame t’a kẽes a meng ne yamleoogo.

MODG-Y N DA VAANDẼ YE

Yaa toog ne roagdb wʋsg tɩ b tõog tɩ b zak pʋgẽ zãmsgã ra vaandẽ ye.

Zak-soben-dãmb wʋsg segd n tʋma lɛɛr-dãmba, n paam n ges b zagsã rãmb yelle. Makre, Megsik saam-biig a ye loogda tʋʋm yibeoog wakat a yoobe, n sigd yʋng wakat a nii. Wakat ninga, d tũudmã tʋʋmd ning tõe n kɩtame tɩ yɩ tɩlae ne zak rãmb tɩ b viig zãmsgã.

La baasgo, d segd n maoome n da vaand d zak pʋgẽ zãmsgã ye. A Loïs sẽn tar yʋʋm piig la a ye n yit Togo wã goma bãmb zak pʋgẽ zãmsgã yell n yeel woto: “Baa sẽn mi n wa yaa tɩlae tɩ tõnd viig zãmsgã lɛɛrã, tõnd maanda d sẽn tõe fãa tɩ ra vaal ye.” Yaa woto yĩng la zags rãmb kẽer sẽn maand b zãmsgã pĩnd-pĩnd semennã pʋgẽ wã. Rẽ, bũmb sã n wa kɩt tɩ b zãmsgã raar viigi, b tõogd n maan-a-la raar a to semen-kãng pʋgẽ.

Hakɩka, “zak pʋgẽ Biibl zãmsgã” sɩd naaga bũmb nins d sẽn maand n waoogd Wẽnnaam a Zeova wã. Woto yĩnga, bɩ zagsã rãmb ket n pẽgd a Zeova semen fãa ne b no-goama. (Oze 14:3) La bɩ y mao me tɩ y zãmsgã tall yamleoogo. Rẽ, “sũ-noog ning Zu-soabã sẽn kõ yãmbã na n yɩɩ yãmb pãnga.”—Nehemi 8:9, 10.