Naag-y taab n waoog a Zeova

Seb-kãngã sõnga yãmb tɩ y bãng tɩ sagls wʋsg n be Biiblã pʋgẽ, n tõe n sõng yãmb ne y zakã rãmba. A Zeova ratame tɩ y paam sũ-noogo. A pʋlmame tɩ y sã n lʋɩɩs yẽ raabã taoore, a na n kõ-y-la sẽn yaa tɩlae wã. (Matɩe 6:33) A sɩd ratame tɩ y yɩ a zoa. Modg-y n maan-y bũmb nins fãa sẽn tõe n sõng-y tɩ y lebg a zoa. Bũmb kae n yaa zu-zẽkr n le ta y sẽn na n paam Wẽnnaam zood ye.—Matɩe 22:37, 38.

1 MODG-Y TƖ YÃMB NE A ZEOVA ZOODÃ TALL PÃNGA

BIIBLÃ SẼN YETE: “Mam na n yɩɩ yãmb Ba, la yãmb na n yɩɩ mam kom-dibli la mam kom-pugli. Zu-soabã Sẽn-tõe-a fãa wã n yete.” (2 Korẽnt dãmba 6:18) Wẽnnaam ratame tɩ y lebg a zoa hakɩka. Pʋʋsgã sõngda wʋsgo. A yeelame tɩ d pʋʋsd-a n “da bas ye.” (1 Tesalonik rãmba 5:17) Y sã n togsd-a y yɩɩrã la sẽn be y sũurẽ wã fãa, noom-a lame. (Filip rãmba 4:6) Y sã n pʋʋsd ne y zakã rãmba, b na n bãngame tɩ y kɩsa sɩd tɩ Wẽnnaam sɩd beeme.

Pʋʋsgã yaa sõma, la y segd n kelgda Wẽnnaam me. Y sã n karemd Biiblã la sɛb nins sẽn wɛgsd a goamã, y kelgd-a Wẽnnaam. (Yɩɩl Sõamyã 1:1, 2) Bʋgsd-y y sẽn karemdã zugu. (Yɩɩl Sõamyã 77:12, 13) Y sã n kẽnd a Zeova Kaset rãmbã tigissã me n pa vaandẽ, y kelgda Wẽnnaam.—Yɩɩl Sõamyã 122:1-4.

Y sã n gomd a Zeova yell ne neb a taabã, rẽ me sõngdame tɩ y zoodã ne-a paase. Wɩng-y ne rẽ, tɩ y na n yãame tɩ yãmb ne a Zeova zoodã pãng sɩd paasdame.—Matɩe 28:19, 20.

Y SẼN TÕE N MAANE:

• Daar fãa, yãk-y wakat n karemd Biiblã la y pʋʋsdẽ.

• Modg-y tɩ yãmb ne y zakã rãmb lʋɩɩs Wẽnnaam tũubã taoore, n yɩɩd reemã la pemsmã kokrã.

2 NONG-Y ZAK PƲGẼ BIIBL ZÃMSGÃ

BIIBLÃ SẼN YETE: “Bɩ y kolg Wẽnnaam, la bãmb na kolg yãmba.” (Zak 4:8) Yaa tɩlae tɩ y yãk wakat n zãmsd Biiblã ne y zakã rãmb n pa vaandẽ ye. (Sɩngre 18:19) La rẽ bal pa sek ye. Bũmb fãa pʋgẽ, y tog n tẽegda Wẽnnaam yelle. Modg-y n gomd-y Wẽnnaam yell wakat fãa ne y zakã rãmba, tɩ paas b ned kam fãa zoodã ne-a. Y sã n ‘zĩ y zakã pʋgẽ, bɩ y gomd a yelle, la y sã n kẽnd sor zug me, bɩ y gomd a yelle. Gom a yell y gãandg la y yikr wakate.’ (Tõodo 6:6, 7) Yãk-y yam n maan wa a Zozue sẽn yeelã. A yeelame: “Maam ne m yir dãmbã yẽ, tõnd na n tũu Zu-soabã.”—Zozue 24:15.

Y SẼN TÕE N MAANE:

• Yãk-y wakat zãmsgã yĩnga, la y modg tɩ zemsd ne zakã ned fãa, la ra vaandẽ ye.