Zak soben dãmba, maand-y tẽebã tʋʋm wakat fãa

¹ Sẽn na maan yʋʋm pi-gĩna, a Daniɛll ra vɩɩ Babilon neb wʋsg sẽn da pʋʋsd wẽn-naands la b ra yaa manesem wẽns rãmb sʋka. La b ra miimi t’a Daniɛll yaa ned sẽn balemd a Zeova “daar fãa.” (Dan. 6:17, 21) Wãn to la a kell n tall a tẽebã kãn-kãe? Biiblã wilgdame t’a ra tara tẽeb tʋʋm na-kẽndr n tũud-a wakat fãa. Wala makre, a ra minim n kẽeda a yĩngr doogẽ wã n pʋʋsd naoor a tãab daar fãa. (Dan. 6:11) Sik kae me t’a ra tara wakat a sẽn yãk n maand tẽeb tʋʋm a taab wala Tõogã kareng ye. Rẽ kɩtame t’a Daniɛll sẽn da wa n paam makr sẽn da na n tũ ne a yõor mengã, a tõog n saka a Zeova ne manesem sẽn ka vigsda, t’a tũnug ne yel-solemd n fãag-a.—Dan. 6:5-23.

² Woto me, rũndã-rũndã, d tog n maoo sõma n ‘nangd pãng n maand a woto wakat fãa.’ (Ef. 6:18, Kãab-paalgã Koe-noogo) Masã dũniyã “bee wẽng soaba nugẽ.” (1 Zã 5:19) Kɩɩsg bɩ makr toɛy-toɛy tõe n puka zĩig pʋgẽ n yɩ makr ne tõnd tẽebã. To-kãsengã wakate, Goog sẽn yit Magoogã na n zaba ne Wẽnnaam sõgen dãmbã zĩig fãa, hal tɩ na n yɩ wala d ka be d sẽn na maaneg n põs ye. Rẽ na n baoodame tɩ d tall bas-yard zãng-zãng ne a Zeova.—Eze. 38:14-16.

³ “Bũmb a yembr sẽn tar yõod wʋsg yaa d kɩt tɩ Biiblã karengo, a zãmsgo, la a zug sõasg yɩ vɩɩm manesem.” Woto la yʋʋmd 1998 darmã gom-zug sẽn da yaa: “Zagsã: Kɩt-y tɩ Biiblã kareng daar fãa yɩ y vɩɩm manesem!” sɩngr goama ra yeta. Darmã sɩngr goam ra kẽnga taoor woto: “Zagsã neb sã n tũud zãmsg na-kẽndr woto n ka vaandẽ, la b maand dẽ ne manesem sẽn kɩtd tɩ Biiblã zãmsg tar pãnga, rẽ na n talla pãn-tusdg sẽn yaa kãseng zakã neb vɩɩm zugu. A paasda tõnd bãngrã. A kengda tõnd tẽebã. Sẽn paase, a leb n kõta tõnd mak-sõma tẽn-kʋdem wẽndẽ pagb la rap sẽn tall kɩs-sɩd wʋsg sẽn base, sẽn tusd tõnd tɩ d teel sɩdã.” D sã n wa vaeesd tẽeb yɛl maaneg na-kẽndr sẽn ka vaandã nens toɛy-toɛya, bɩ zak soben dãmbã bao manesem a yembr bɩ a yiib b sẽn tõe n tũnug ne n maan tɩ b zak pʋgẽ tẽebã tʋʋm na-kẽndrã yɩ sõma n paase.

⁴ Zãmsd-y Wẽnnaam Gomdã daar fãa: “Wẽnnaam Rĩungã sã n wa pa segd kɩɩsg t’a raabã maand tẽng zug wa a sẽn maand saasẽ wã, nin-wẽnse, bɩ rũms menga, pa na n maan ‘wẽng ne sãoong’ ye. (Ezai 11:9; Mat. 6:9, 10)” Gom-kãensã bee D vaees Gʋlsgã daar fãa—2001 wã, bõn-bɩʋʋng rasem 11 wã verse gom-wɛgsdem pʋgẽ. Ad tẽeg-kãngã sɩd kõo belsg menga! Yãmb sẽn yaa zak soabã, yãmb minim n vaeesda Biiblã verse la a gom-wɛgsdem ne y zakã rãmb daar fãa bɩ? Sɩd tara yõod wʋsg tɩ y maan woto. Sã n mikame tɩ yaa toog tɩ y tigim taab yibeoog n maan dẽ, tõe tɩ y tõog n maan woto wakat a to raarã pʋgẽ. Baaba a yembr yeelame: “Zaabrã rɩɩb wakat yaa sasa sẽn zems ne tõnd tɩ d sõs daar verse wã zugu.”

⁵ Yãmb sã n zoe n minim n vaeesda daar verse wã ne y zakã rãmba, y zemsa ne pẽgre. Tõe tɩ na n naf-y lame n paase, y sã n kell n karem Biiblã babg a yembr wakat kãnga. Neb kẽer nong n karemda b sẽn yiis daar verse wã sak ning pʋgẽ wã tõre. Neb a taab yãkda Biiblã sebr n karemd a pʋgẽ bilf-bilf n dabd taoore. Biiblã kareng daar fãa na n sõnga yãmb zaka rãmb tɩ b zoe a Zeova wa sẽn segdã, n pa rat n maan sẽn ka noom-a ye, la a kɩt tɩ b tʋll wʋsg n maan a raabã.—Tõo. 17:18-20.

⁶ Yãmb zakã Biiblã kareng na-kẽndr la daar verse wã vaeesg na n nafa yãmb n paas menga, y sã n dɩk minit a wãn n sõs tagsa wã y sẽn vaeesda tũub yõod zugu. École du ministère sebrã sagla woto a seb-neng 60 pʋgẽ: “Y tõe n . . . tũusa verse rãmb a wãn semen fãa Biiblã kareng pʋgẽ, n sõs b võyã zutu, tɩ rẽ poor bɩ y maan sʋgs-kãensã: ‘Sor-wilgr bʋg la m paamd verse kãensã pʋsẽ? Wãn to la m tõe n tũnug ne verse kãensã koe-moonegã wakate? Bõe la b vẽnegd a Zeova la a sẽn maand yɛlã to-to wã zugu, la wãn-wãn la rẽ kɩtd tɩ mam nand-a n paasdẽ?’ ” Tẽeb sõss a woto na n sõnga zakã neb fãa tɩ b “bãng [a Zeova, NW ] yam sẽn yaa bũmb ninga.”—Ef. 5:17.

⁷ Zak pʋgẽ zãmsgã: Bũmb a yembr zak soben dãmbã sẽn tõe n maan n sõng b kambã tɩ b bãng tɩ tẽebã yɛl n wat pipi vɩɩmã pʋgẽ yaa b sẽn na n maand zak pʋgẽ zãmsgã semen fãa n ka vaandẽ ye. Bi-bɩɩg a yembr tẽegda woto: “Wakat ninga, m baaba mii n yii tʋʋm n wa ne yaams tɩ gõeem tar-a menga, la ne rẽ fãa zãmsgã ka vaand ye, la rẽ sõnga tõnd tɩ d bãng tɩ zãmsgã ka reem yell ye.” Kambã me tõe sõngame n kɩt tɩ zak pʋgẽ zãmsgã yɩ sõma. Zak sẽn tar kamb a wɛ neb ra minim n yikda yibeoog wakat a nu n maand b zak pʋgẽ Biibl zãmsgã, bala wakat a to ra ka be b sẽn tõe n maan zãmsgã ye.

⁸ Zakã soab sã n dat t’a zãmsgã yɩ sõma fãa, a tog n ‘gũusa ne koɛɛg ninga yẽ sẽn zãmsd nebã n da bas ye.’ (1 Tɩm. 4:16) École du ministère sebrã yeela woto a seb-neng 32 wã pʋgẽ: “B tõe n sɩd yeelame tɩ zak pʋgẽ zãmsg sẽn yaa sõma sɩngda ne zakã neb raab sẽn ya a soabã vaees n bãnge. Wãn to la yãmb zakã neb bɩt tẽebã wɛɛngẽ? . . . Yãmb sã n moond ne y kambã, yãmb yãame tɩ b sakda nana-nana n wilg b kom-taasã tɩ b ya a Zeova Kaset rãmb bɩ? Yãmb zak pʋgẽ Biibl karengã la a zãmsgã noom-b lame bɩ? B sɩd tũuda a Zeova soayã b vɩɩmã pʋgẽ bɩ? Y sẽn yaa zak soabã, y sã n maag y yĩng n bãng yel-kãensã, na n sõngame tɩ y bãng y sẽn segd n maan bũmb ning n sõng zakã ned fãa t’a tall la a bɩɩs tẽeb zʋg-sõma.”

⁹ Tigingã tigissi: Tigingã tigiss seglg la b kẽngr segd n yaa yãmb semena pʋgẽ tʋʋm kãseng a yembre. (Heb. 10:24, 25) Wakat ninga, yãmb zakã neb tõe n naaga taab n segl tigiss kẽere. Wall tɩ y bas tɩ wa kẽ n bõogã, y tõe n denga pĩnd n segl-b bɩ? Y sã n maand woto wakat fãa, na n paasa yãmb seglgã sõmblem la kɩt tɩ y rɩ tigissã yõod n yɩɩda.—Yel. 21:5.

¹⁰ Tẽeb tʋʋm na-kẽndr sẽn nafd segd n yaa sõma la a yaa bũmb sẽn maand wakat fãa. La yaa wãn to yẽ, yãmb yɛlã sã n kɩt tɩ yaa toog ne yãmb tɩ y segl tigissã fãa? École du ministère sebrã sagla woto a seb-neng 31 wã pʋgẽ: “Gũus-y n da lʋɩ bẽdg ning sẽn yaa karem b sẽn na n zãms bũmb ningã yãg-yãg pʋgẽ, bɩ tolg n da zãms ba a yembre, y sẽn ka na n tõog n zãms fãa wã yĩng ye. Wall tɩ yɩ woto wã, yãk-y bũmb nins y sẽn tõe n zãmsã n zãms-b neere. Maand-y woto semen fãa. Tar-n-tarẽ bɩ y wa paas tigiss a taab y tigissã seglg pʋgẽ.”

¹¹ Zagsã neb sã n tat tigissẽ wã pĩnda, rẽ na n sõng n segla b yamã sõma sẽn na yɩl tɩ b pẽg a Zeova la b rɩ zãmsgã a sẽn kõta nafa. Yãmb zakã neb minim n maanda woto bɩ? Rẽ baoodame tɩ b reng n sigl yɛlã neere, la tɩ zakã ned kam fãa lagem n tʋme. Yãmb sã n mikame tɩ zaaba nins yãmb sẽn tar tigissã, seglgã pʋgẽ zaka neb tara zoeese, hal tɩ lebg yɩɩr ne ned kam fãa, rẽ yĩnga y tõe n maana remsg y tʋʋma na-kẽndr pʋgẽ bɩ? Bõn-yood kẽer n be y sẽn tõe n deng pĩnd n maan bɩ? Zakã ned a yembr sã n tara tʋʋm wʋsg tɩ looge, neb a taabã tõe n sõng-a lame bɩ? Rẽ yĩngã yɩɩrã ka na n booge, ned kam fãa sã n tõe n seglame tɩ b kẽng tigissã minit a nu pĩnd n yɩɩda? Yɛlã sã n sigl neere, tõe n sõngame tɩ laafɩ zĩnd zakã ne tigingã pʋsẽ.—1 Kor. 14:33, 40, Sebr Sõngo.

¹² Koe-moonegã: Wakat yãkr koe-moonegã yĩngã bee tẽebã tʋʋm maaneg wakat fãa wã pʋgẽ. Bi-bɩɩg yʋʋr sẽn boond t’a Jayson yeela woto: “Tõnd zakẽ wã, sibr yibeoog fãa d ra moonda koe-noogã. Woto ra yaa sõma ne maam, bala m sã n da moond koe-noogã n paasdẽ, m da nee bõn-sõma nins a sẽn pidsdã n paasdẽ, tɩ woto kɩt tɩ m da nong-a n paasdẽ.” Kaset rãmb wʋsg b sẽn wub Kaset rãmb zagsẽ me yãame tɩ b sẽn da yãk wakat koe-moonegã yĩng semen fãa wã sõng-b lame tɩ b yɩ kiris-neb sẽn bɩt tẽebã wɛɛngẽ.

¹³ Tẽeb tʋʋm na-kẽndr sẽn yaa sõma tõeeme me n sõng tɩ sẽk ning zakã neb sẽn dɩkd n kẽesd koe-moonegã pʋgẽ wã zĩnd sũ-noog la wom biis n yɩɩda. Wãn to la b tõe n maan dẽ? Yʋʋmd 1999, sẽoog kiuug 1 daar Gũusg Gasgã, seb-neng 27 pʋgẽ, b kõo sagl-kãngã: “Yãmb mi n dɩka sẽk y zak zãmsgẽ wã sẽn na yɩl n sõng y zakã neb tɩ b segl semena koe-mooneg yĩng bɩ? Rẽ maaneg tõe n talla nafa wʋsgo. (2 Tɩm. 2:15) Rẽ tõe n sõng n kɩtame tɩ b tʋʋmdã yɩ sõma n wom biisi. Wakat-wakate, y tõe n dɩka zãmsg tõr segl-kãng yĩnga. Naoor wʋsgo, y tõe n vaeesa koe-moonegã nens kẽer sõs-koees pʋsẽ zak zãmsgã baasgẽ bɩ wakat a to semenã pʋgẽ.” Yãmb zakã neb maka woto maaneg bɩ?

¹⁴ Ket-y n bɩt-y tẽebã wɛɛngẽ: Woto, y zoe n yãa zĩis yãmb zakã neb sẽn maand sõma bɩ? Pẽg-y-ba, la y modg n maan tɩ zĩ-kãens yɩ sõma n paase. Y sã n yã zĩis kẽer y sẽn segd n manege, bɩ y yãk zĩig a yembr bɩ a yiib n tʋm b zutu. Y sã n tõog tɩ bõn-kãens kẽ tẽeb tʋʋm nins y sẽn minim n maandẽ wã sʋka, bɩ y tʋm zĩig a yembr bɩ a yiib a taab zut n paase. Tall-y yam-sõng la y yɩ maan-tɩ-zems soaba. (Fil. 4:4, 5, NW ) Tõog n maan tẽeb tʋʋm n ka vaandẽ wã baooda modgr wʋsgo, la seka d na maan modgr a woto, bala a Zeova kõo tõnd bas-m-yam woto: “Ned ninga yel-manesem sẽn zemse, mam na n kɩtame t’a yã Wẽnnaam fãagre.”—Yɩɩl 50:23.