Daar a ye tigis-kãseng sẽn yaa zall geelg-n-tʋm paalga

“Ne yam vẽnegre, bɩ y yɩ wa neb sẽn bɩ” la daar a ye tigis-​kãseng sẽn yaa zall ning sẽn sɩngd yʋʋmd 2000 bõn-bɩʋʋng kiuugã tɛkã geelg-n-tʋmã gom-zu-raoogo. (1 Kor. 14:20) Bõe yĩng tɩ na n tall yõod wʋsg tɩ d zĩnd be? Tõnd vɩɩ dũni sẽn pid ne wẽng pʋgẽ. Sẽn na yɩl n mao ne rẽ, tõnd togame n paas d tẽebã yam-vẽnegr sẽn na yɩl n tõog wẽngã ne sõma wã maasem. Yaa rẽ la daar a ye tigis-kãseng sẽn yaa zallã geelg-n-tʋm na n sõng tõnd tɩ d maane.

Sõssã sɩngrẽ, bab-sak sull yel-gɛtã na n sõsa gom-zug sẽn yaa “Sõngr sẽn na yɩl n yɩ neb sẽn bɩ Biiblã võor-wʋmb pʋgẽ” zugu. A na n wilga tõnd d sẽn tõe n lebg neb sẽn vigl kãn-kãe kiris-neb tẽebã pʋgẽ to-to. Sõasd sẽn yaa sãana sã n wa sõsd gom-zug sẽn yaa “Kogl-y y tẽebã ne y yam-welgr tõodã zãmsg maasem,” a na n wilga vẽenega, Biiblã noy tũub sẽn tar yõod to-to sẽn na yɩl n bɩɩs yam-welgr sẽn tar pãnga.

Kom-bɩɩsã me tog n paasa b yam-vẽnegrã. B na n goma rẽ yell sõss nins sẽn yaa “Bõe yĩng tɩ y segd n yɩ wa kom-peels ne wẽnga” la “Kom-bɩɩs sẽn paamd yam-vẽnegr masã” wã pʋsẽ. Kelg-y kom-bɩɩs sẽn togsd bũmb ning b sẽn maand n kengd b mens tẽebã wɛɛngẽ, sẽn na yɩl n tõog tʋlsem buud fãa sẽn tɩ loe ne dũniyã tʋʋm-wẽns bao-n-bãnge, la b gil zu-loeese.

Wãn to la d tõe n paam sũ-noog sẽn yaa kãseng n yɩɩd vɩɩmã pʋgẽ? Sõasd sẽn yaa sãana na n wilga rẽ baasg sõasgã pʋgẽ, gom-zug sẽn yaa “Tũ-y Biiblã noy ne yam-vẽnegr n paam nafa.” A na n kõo makr toɛ-toɛ n wilg tɩ Wẽnnaam Gomdã tũub sõngda tõnd tɩ d welg zu-loeese, d rɩk sardo, la d sɩd rɩ zãmsg ning a Zeova sẽn kõt-dã nafa.

B rãmb nins sẽn tʋll n deeg lisg koomẽ tigis-kãsengẽ wã n mak b sẽn dɩk b mens n kõ Wẽnnaamã segd n togsa yel-gɛt taoor soabã tao-tao. B sã n wa togs daar a ye tigis-kãseng sẽn yaa zallã daar bal bɩ y gʋls-a y kalãndirie wã zugu, la y rɩk segls takɩ sẽn na yɩl n dɩ geelg-n-tʋm kãngã sẽn tar bark wʋsgã nafa. Da bas-y tɩ daar a ye tigis-kãseng sẽn yaa zallã babg ba a ye yõsg-y ye! A na n sõng-y lame tɩ y tõog toog yɛl siglg kãngã sẽn yaa wẽngã pʋgẽ, la y kell n tall y kɩs-sɩdã ne a Zeova.