Yʋʋmd 2010 daar a ye tigis-kãsengã
1. a) Daar a ye tigis-kãsems kẽer d sẽn maan gom-zut la bʋse? b) Wãn to la daar a ye tigis-kãsems sẽn loog sõng yãmb koɛɛgã mooneg wɛɛngẽ?
1 Daar a ye tigis-kãsems kẽer d sẽn maan gom-zut la woto: ‘D bao n bãng bũmb nins sẽn yaa sõma n yɩɩdã,’ ‘Yals-y kãn-kãe ne yam a yembre,’ ‘D ket n kõt sɩdã kaseto,’ ‘Tõnd yaa yagdo, t’a Zeova yaa tõnd Yagda.’ (Fil. 1:9, 10, 27; Zã 18:37; Ezai 64:8) Yãmb gũuda yʋʋmd 2010 daar a ye tigis-kãsengã ne y sũy fãa bɩ? A gom-zugã na n yɩɩ woto: ‘Wakatã lebga bilfu.’ A tika 1 Korẽnt dãmb 7:29 wã zugu.
2. Bõe la y tõe n maan tɩ wilgdẽ tɩ y gũuda tigis-kãsengã ne y sũy fãa?
2 B sã n wa wilg yãmb tigis-kãsengã sẽn na n yɩ raar ningã, bɩ y sɩng n gomd a yelle. Roagdb kẽer gʋlsda tigis-kãsengã daar la teed nins ned kam fãa sẽn segd n tall n kẽngã b zakã kalãndirie zugu, sẽn na yɩl n sõng b kambã tɩ b tẽegd a daarã hal t’a wa ta. Y sã n wa maand y zakã pʋgẽ zaabr Biibl zãmsgã, y tõe n lebg n gesa not rãmb y sẽn da rɩk tigis-kãsems kẽer sẽn loog sasa wã. Y leb n tõe n tika Tirez profit de l’École du ministère théocratique sebrã neng 13-16 zug n segl y mens tɩ sõng yãmb ne y zakã rãmb tɩ y tõog n kelg sõma.—Luk 8:18.
3. Bõe la y tõe n maan sẽn na yɩl tɩ sõssã naf-yã?
3 Tũud-y y sẽn zãmsd bũmb ninsã: Tigis-kãseng fãa poore, d nong n wʋmda nebã sẽn yet tɩ “ad sɩd yɩɩ sõma!” Nin-kãensã bee bʋʋm, bala yaa a Zeova n dɩk segls tɩ d paamd sõssã n kelgdẽ. (Yel. 10:22) Sẽn na yɩl n paam tɩ sõssã naf yãmba, y segd n bʋgsda b zut sẽn na yɩl n da yĩm ye. (Luk 8:15) Tigis-kãsengã sã n wa sa tɩ y kuusẽ, y tõe n sõsda ne y zakã rãmba, pa rẽ bɩ ne neb a taabã bũmb nins y sẽn wʋma zutu. Sõsd-y ne taab bũmb nins y sẽn dat n wa maanã, la yɛl nins sẽn tõe n sõng yãmb koe-moonegã wɛɛngẽ wã zutu. Y sã n maan woto, tigis-kãsengã na n sɩd naf-y-la wʋsgo.—Zak 1:25.
4. Bõe n kɩt tɩ d tõe n yeel tɩ tigis-kãsengã na n naf-d-la wʋsgo?
4 B sã n kõ-d bũmb sẽn tõe n sɩd naf-do, d sũy nooma wʋsgo. D gũuda bũmb nins a Zeova sẽn segl n na n kõ-d daar a ye tigis-kãsengã sasa wã ne d sũy fãa. D kɩsa sɩd tɩ tigis-kãsengã na n naf-d-la d vɩɩmã nens fãa pʋsẽ. D saagdame tɩ d na n paamame tɩ d saasẽ ba a Zeova keng d raoodo, la a zãms-d sẽn na yɩl tɩ d tõog n tʋm tʋʋmd ning a sẽn bobl-dã.—2 Tɩm. 4:2; Zak 1:17.