D paamda tẽebã “rɩɩb wakat sẽn zemse”
1. Wãn to la daar a ye tigis-kãsengã sẽn loogã sõng yãmb la neb a taaba?
1 Tõnd sã n kelg daar a ye tigis-kãseng sõss poore, naoor wʋsgo d yetame tɩ “yaa bũmb ning tõnd sẽn da ratã bal kɛpɩ!” Tigims sull yel-gɛt a yembr yeelame tɩ neb kẽer sẽn kelg daar a ye tigis-kãseng sẽn loogã sõssã poore, b yeelame tɩ b na n modg n paasa b koɛɛgã moonego. Yel-gɛt a to yeela woto: “Tigis-kãsengã sɩd sõnga tõnd tɩ d bãng tɩ d sẽn dat n maan bũmb ninsã fãa pʋgẽ, d pa segd n yĩm tɩ d bee yaoolem dayã sasa ye.” A to me yeela woto: “Koe-moondb wʋsg wilgame tɩ sɩd kɩtame tɩ b tags n ges b sã n sɩd lʋɩɩsda koɛɛgã mooneg taoor b vɩɩmã pʋgẽ.” Wãn to la daar a ye tigis-kãsengã sõng yãmba?
2. Gom-zu-bʋs la b na n wɛgs daar a ye tigis-kãseng sẽn watã sasa?
2 Tigis-kãseng ning sẽn watã me sõssã na n yɩɩ bũmb ning tõnd sẽn da ratã bal kɛpɩ. Tigis-kãsengã gom-zugã la woto: “D teeg a Zeova n paam koglgo,” la tika Yɩɩl Sõamyã 118:8, 9 zugu. Ad sõss nins b sẽn na n wɛgsã kẽere: “A Zeova sẽn kogend tõnd to-to toog wakate,” “Sõng-y nebã tɩ b bao koglg a Zeova nengẽ,” “Rɩk-y-yã a Zeova togs-n-taare, n sõngd nebã tɩ b paamd koglgo,” “Kom-bɩɩse, teeg-y-yã a Zeova!” la “Arzãn a Zeova sẽn zoe n sigl tõnd koglg yĩnga.”
3. Wãn to la d tõe n dɩ tigis-kãsengã sõssã nafa?
3 D sẽn na n maan to-to n dɩ a nafa: B sã n wilg tigis-kãsengã daare, bɩ y zoe n segl y menga, la y bool neb nins y sẽn zãmsd Biiblã me tɩ b wa. Sẽn na yɩl n tõog “n wom biis ne sũ-mare,” d pa segd n yĩm d sẽn wʋmã ye. (Luk 8:15) Woto yĩnga, bɩ y kelg sõma, n dɩk not rãmba, la y tẽeg me n gʋls sagls nins y sẽn dat n tũ y vɩɩmã pʋgẽ la koɛɛgã mooneg pʋgẽ wã. Tigis-kãsengã poor bɩ y rɩk sẽk n sõs ne y zakã rãmba, n ges y sẽn na n tũ sagls kẽer to-to.
4. Bõe yĩng tɩ d segd n gũ daar a ye tigis-kãsengã sẽn watã ne d sũur fãa?
4 Wala b sẽn segend rɩ-noog to-to wã, b reng n tagsa sõma n segl daar a ye tigis-kãsengã sõssã tõnd fãa nafr yĩnga. Bɩ a Zeova ning modgr ning y sẽn maand sẽn na yɩl n kẽng daar a ye tigis-kãsengã n dɩ a nafa wã barka, bala yaa tẽeb rɩɩb a sẽn segl koe-moondbã yĩng “wakat sẽn zems pʋgẽ.”—Mat. 24:45.