Daar a yembr tigis-kãseng ning sẽn watã

Ne vʋʋsem sõngã pãnga, pipi kiris-nebã modga wʋsg n moon koɛɛgã zĩig zãnga. (Tʋʋ. 1:8; Kol. 1:23) Yʋʋmd 2007 wã daar a yembr tigis-kãsengã gom-zug na n yɩɩ woto: “Ges-y Wẽnnaam Gomdã mooneg yell n yɩɩda.” A na n sõnga tõnd fãa tɩ d tõog n dɩk pipi kiris-nebã mak-sõngã togs-n-taare.—Tʋʋ. 18:5.

Rĩm a Davɩɩd ra goma Wẽnnaam goamã yell n yeel woto: “Zusoaba kaset yaa sɩda, n ka viigdẽ ye. A kõta zɩɩlem soab yam.” (Yɩɩl Sõamyã 19:8) Yʋʋm 2007 daar a yembr tigis-kãsengã sõss fãa b sẽn segl sõma wã na n wilga Gʋlsg Sõamyã tall n dems yɛlã yõodo, la sõng-d me tɩ d bãng n pids d koe-moonegã la d zãms nebã Wẽnnaam Gomdã ne yãgbo. (2 Tɩm. 3:16, 17) B leb n na n wilga Biiblã noy tũub sẽn tõe n sõng tõnd tɩ d gil bẽds to-to, b sẽn nafd-d to-to, la d sẽn tõe n tall Wẽnnaam Gomdã n sõng kom-bɩɩsã la nin-paalsã tɩ b bɩ n kẽng taoor tẽebã pʋgẽ to-to.

Modg-y n zĩnd-y tigis-kãsengã sɩngrẽ, la y kelg a sõssã fãa neere. Rɩk-y sõssã sagls nins y sẽn na n tũ wã not rãmba. Wilg-y tɩ y nanda sagls nins b sẽn kõt-dã, la y tũ y sẽn zãms bũmb ningã y vɩɩmã pʋgẽ.

Daar a yembr tigis-kãsengã na n kɩtame tɩ d tall naneb ne Wẽnnaam Gomdã n paase, la a tẽeg-d tɩ d segd n ket n moonda Rĩungã koe-noog ne yẽesem. A leb n na n wilga tõnd d sẽn tõe n sõng neb a taabã me tɩ b maan woto to-to. Woto yĩng bɩ d maan d sẽn tõe fãa tɩ sagls nins fãa a Zeova sẽn na n kõ-d tigis-kãsengẽ wã baa a ye da yõsg-d ye!—Ezai 30:20, 21.