Bɩ f gũus ne f sũur-kasetã

1. Yʋʋmd 2013 daar a ye tigs-kãsengã gom-zug na n yɩɩ bõe, la wãn to la a na n sõng-do?

¹ Daar ne a to fãa, d segda yɛl sẽn tõe n kɩt tɩ d pa tũ d sũur-kasetã ye. Yaa rẽ yĩng la yʋʋmd 2013 daar a ye tigs-kãsengã gom-zug sẽn yet tɩ: “Bɩ f gũus ne f sũur-kasetã.” (1 Tɩm. 1:19) B sigla tigs-kãseng-kãngã sẽn na yɩl n sõng d ned kam fãa t’a tags n ges a sũur-kasetã sã n yaa sõma, bala yaa kũun-kãseng d naandã sẽn kõ-do.

2. Sogs-bʋs leoor la d na n bãng tigs-kãsengã sasa?

² Bao-y sogs-kãensã leoore: Tigs-kãsengã sasa, b na n leoka sogsg a yopoe sũur-kasetã wɛɛngẽ:

• Bõe n tõe n wa kɩt tɩ d sũur-kasetã pa le yaa sõma?

• Wãn to la d tõe n kibl d sũur-kasetã?

• Bõe la d tõe n maan n da wa paam zɩɩm samde?

• D tagsa wã la d manesmã sẽn yaa to-to ne a Zeova noyã wilgda bõe tõnd mengã zugu?

• Sã n yaa yell sẽn be ne ned fãa sũur-kaseto, bõe la d tõe n maan n da wa sãam d taabã sũuri?

• Kom-bɩɩse, wãn to la y tõe n kell n yals kãn-kae, bũmb bɩ ned sã n wa rat n kɩt tɩ y kɩɩs a Zeova?

• D sũur-kasetã sã n paam kiblg sõma tɩ d tũud-a, bark bʋs la d paamda?

3. Wãn to la tigs-kãseng-kãnga sõssã na n naf tõndo?

³ Ne a Zeova sõngre, a Sʋɩtãan pa na n tõog n sãam d sũur-kasetã ye. D saasẽ ba wã sẽn nong-dã tũnugda ne a Gomdã la ne a siglgã n wilgd tõnd sore, tɩ yaa wa a sẽn yet tõnd tɩ: “Ad sore, bɩ y kẽne.” (Ezai 30:21) Tigs-kãnga me yaa bũmb a Zeova sẽn sigl n na n wilg d sore. Woto yĩnga, maan-y y sẽn tõe fãa n tõog n kẽnge. Kelg-y sõssã neere, la y ges y sẽn tõe n tũ saglg fãa to-to. Sõs-y y sẽn wʋmã zug ne y zakã rãmba. D sã n tũud sagls nins d sẽn paamdã, na n sõnga tõnd tɩ d ‘tall sũur-kaset sẽn yaa sõma.’ Rẽ na n sõng-d lame tɩ d ra bas tɩ yõ-noogrã wa kɩt tɩ d maan bũmb sẽn na n sãam d zoodã ne a Zeova wã ye.—1 Pɩɛ. 3:16.