SOGSG KOM-BƖƖSÃ SẼN SOKDE
Wãn to la m tõe n kibl m sũur-kasetã?
Bũmb nins sẽn pʋgdã sʋka, bʋg la b tõe n dɩk n mak ne f sũur-kasetã?
torse
nen-gɛtga
zoa
bʋ-kaooda
F tõe n dɩka f sũur-kasetã n mak ne bõn-kãensã a naasã fãa. Sõs-kãngã na n wilga sẽn yaa bũmb ning yĩnga.
Sũur-kasetã yaa bõe?
Sũur-kasetã yaa bũmb sẽn be ninsaal sũurẽ, n sõngd-a t’a tõe n bãng sõma ne wẽng n bake. Biiblã yetame t’a yaa wa tõog sẽn gʋls ninsaalbã sũyã pʋsẽ. (Rom dãmbã 2:15) Sũur-kaset sẽn yaa sõma tõe n sõng-f lame tɩ f bãng f sẽn yãk yam n na n maan bũmb ningã sã n yaa sõma, bɩ f sẽn zoe n maan bũmb ningã sã n yaa wẽnga.
F tõe n dɩka f sũur-kasetã n mak ne torse. A tõe n vẽnega f sorã, n sõng-f tɩ f tõog n gil bũmb sẽn tõe n wa ne yelle.
F tõe n dɩka f sũur-kasetã n mak ne nen-gɛtga. Wa nen-gɛtga, f sũur-kasetã tõe n sõng-f lame tɩ f bãng f sẽn yaa ned ning f sũurã pʋgẽ wã.
F tõe n dɩka f sũur-kasetã n mak ne f zoa. F sã n kelg-a, a tõe n kõ-f-la sagls sẽn yaa sõma, la a sõng-f tɩ f tõog n maan f sẽn datã tɩ yɩ sõma.
F tõe n dɩka f sũur-kasetã n mak ne bʋ-kaooda. F sã n maan bũmb sẽn pa sõma, a kibind-f lame.
Sũur-kaset sẽn yaa sõma tõe n sõng-f lame tɩ f bãng n yãk yam
F sẽn segd n bãnge: F sũur-kasetã yaa bũmb sẽn tar yõodo, n tõe n sõng-f 1) tɩ f bãng n yãk yam la 2) tɩ f bãng tɩ f sẽn maanã pa sõma, la f remse.
Bõe yĩng tɩ f segd n kibl f sũur-kasetã?
Biiblã sagenda tõnd tɩ d kell n ‘tall sũur-kaset sẽn yaa sõma.’ (1 Pɩyɛɛr 3:16) F sã n pa kibl f sũur-kasetã, rẽ maaneg na n yɩɩ toog ne-fo.
“M da pa togsd m roagdbã sɩda, zĩig ning m sẽn da kẽndã wɛɛngẽ ye. M da ket n solgd-b-la yɛl kẽere. Sɩngrẽ wã, m sũur-kasetã ra ningd-m-la taale. La tarẽ-n-tarẽ, m wa n pa le get tɩ m sẽn maand bũmb ningã yaa wẽng ye.”—A Jennifer.
La a Jennifer sũur-kasetã wa n kɩtame tɩ yɩ tɩlɛ t’a togs a roagdbã a sẽn da maand bũmb ningã, la a bas n pa le solgd-b bũmb ye.
Tags n gese: Yaa wakat bʋg la a Jennifer sũur-kasetã sɩng n ningd-a taale?
“F sã n soosd n maand sẽn pa sõma, f namsdame la f maand yɩɩre. F sã n pa kelg f sũur-kasetã sẽn ningd-f taalã n maan wẽnga, a wat n pa na n le keoogd-fo, baa f sã n wa maan sẽn pa sõma.”—A Matthew.
Neb kẽer maanda b toor kae ne b sũur-kasetã sẽn yet-b bũmb ningã. Biiblã yetame tɩ b“basa b mens n na n tʋm nin-yoolem tʋʋma.” (Efɛɛz rãmbã 4:19) Biibl ning b sẽn boond tɩ Wẽnnaam Sebre, b sẽn yiis yʋʋmd 2014 pʋgẽ, b yeelame tɩ “yel-wẽnã maaneg yãnd ka leb n tar-b baa bilfu.”
Tags n gese: Neb nins sẽn maand wẽng n pa tol n maand b bãngẽ wã vɩɩm tara bark sɩda? Zu-loe-bʋs la b pa tõe n gili?
F sẽn segd n bãnge: F sã n dat n tall sũur-kaset sẽn yaa sõma, f segd n ‘minim n tagsdame tɩ kɩt tɩ f mi sõma ne wẽng n bake.’—Ebre-rãmbã 5:14.
Wãn to la f tõe n kibl f sũur-kasetã?
Sẽn na yɩl n kibl f sũur-kasetã, f segd n paama f sẽn na n tik n bãng f sẽn segd n maane. Neb kẽer tũuda:
b zakã neb la b rog-n-mikã sẽn yete
b kom-bɩ-taasã sẽn yete
neb yʋy sẽn yi sẽn yete
La noy nins sẽn be Biiblã pʋgẽ wã tũub la sõma n yɩɩda. Rẽ pa lingr ye. Bala Biiblã yaa “Wẽnnaam n vẽneg tɩ b gʋlse.” Yaa yẽ n naan tõndo, la a mi bũmb nins sẽn yaa sõma ne tõndo.—2 Tɩmote 3:16.
Ad makr a wãna:
BIIBLÃ SẼN YETE: D “zã d mens ne pʋ-peelem bũmb fãa pʋgẽ.”—Ebre-rãmbã 13:18.
Wãn to la sagl-kãngã tõe n sõng-f tɩ f kelg f sũur-kasetã, f sã n wa rat n maan zãmb devoaar sasa, f sã n wa rat n solg f roagdbã bũmb, bɩ n zu?
F sũur-kasetã sã n sõngd-f tɩ f zãad f meng ne pʋ-peelem bũmb fãa pʋgẽ, wãn to la rẽ tõe n naf foo masã menga, la beoog sẽn wate?
BIIBLÃ SẼN YETE: “Zoe-y yoobo!”—1 Korẽnt rãmbã 6:18.
Wãn to la sagl-kãngã tõe n sõng-f tɩ f kelg f sũur-kasetã, f sã n wa rat n ges yoob yɛla, bɩ n kẽ ne ned n yaool n pa kẽ kãadem?
F sũur-kasetã sã n sõngd-f tɩ f zoet yoobo, wãn to la rẽ na n naf foo masã menga, la beoog sẽn wate?
BIIBLÃ SẼN YETE: “Bɩ y maand taab neere, n kʋmd taab la y sakd n kõt taab sugri.”—Efɛɛz rãmbã 4:32.
Wãn to la sagl-kãngã tõe n sõng foo, mo-yõsr sã n wa be foo ne f kẽem bɩ f yao sʋka, wall foo ne f zoa sʋka?
F sũur-kasetã sã n sõngd-f tɩ f kʋmd f taabã nimbãaneg la f kõt-b sugri, wãn to la rẽ na n naf foo masã menga, la beoog sẽn wate?
BIIBLÃ SẼN YETE: “A Zeova . . . kisa ned sẽn nong nen-kɛglem tʋʋma.”—Yɩɩn-sõamyã 11:5.
Wãn to la sagl-kãngã tõe n sõng foo, f sã n wa rat n yãk filim f sẽn na n gese, la ze-video f sẽn na n tão?
F sũur-kasetã sã n sõngd-f tɩ f zãagd f meng ne nen-kɛglem tʋʋma, wãn to la rẽ na n naf foo masã menga, la beoog sẽn wate?
KIBARE SẼN YAA SƖDA: “M da tara zo-rãmb sẽn tãood ze-video sẽn naag ne nen-kɛglem tʋʋma. Ma-me ra maanda wa bãmba. M baaba wa n yeela maam tɩ m bas ze-video-kãens tãoobo. La m sã n da kẽng n na n tɩ ges m zo-rãmbã fãa, m tãooda ze-video-kãense. M sã n lebg n wa yiri, m pa gomd rẽ yelle. M baaba sã n da sok maam tɩ bõe n maane, m yetame bal tɩ yell ka ye. La daar ye, m karma Yɩɩn-sõamyã 11:5 wã, la m sũurã sãamame, bala m da maanda sẽn pa sõma. M bãngame tɩ m segd n basa ze-video-kãens tãoobo. La wakat kãnga, m sɩd tõog n basame. M zoa a ye sẽn maan kaset ne rẽ wã, yẽ me basa ze-video nins sẽn naag ne nen-kɛglem tʋʋmã tãoobo.”—A Jeremy.
Tags n gese: Yaa wakat bʋg la a Jeremy sũur-kasetã sɩng a taal ningri, la yaa wakat bʋg la a sɩng a kelgre? Yam-bʋg la f tõe n dɩk a Jeremy kibarã pʋgẽ?
F sẽn segd n bãnge: F sũur-kasetã wilgda f sẽn sɩd yaa ned ninga, la bũmb ning sẽn sɩd tar yõod ne-fã. F sũur-kasetã wilgdame tɩ f yaa nin-bʋg buudu?