Wẽnnaam goamã tara pãnga

1. Yʋʋmd 2014 raar a ye tigs-kãsengã gom-zug la bʋgo?

¹ Biiblã tõe n kɩtame tɩ d toeeme, n maneg d tagsa wã la d yel-manesmã tɩ zems ne a Zeova raabã. Ãdem-biisã sẽn yaa pãn-komsem dãmbã pa tar b sẽn tõe n maan n toeem ninsaal wa Biiblã ye. La Wẽnnaam Gomdã pãng taa zĩ-bʋgo? Wãn-wãn la d tõe n maan tɩ pãng ning Wẽnnaam Gomdã sẽn tarã naf-d sõma? Wãn to la d tõe n tall-a n sõng nebã? Yʋʋmd 2014 raar a ye tigsgã na n leoka sogs-kãensã. D kɩsa sɩd t’a na n kenga tõnd ned kam fãa tẽebo. A gom-zugã yaa: ‘Wẽnnaam goamã tara pãnga.’ Tika Hebre dãmb 4:12 goamã.

2. Sogs-bʋs leoor la d segd n bao?

² Bao-y sogs-kãensã leoore: Y sã n wa kelgd sõssã bɩ y bao sogs-kãensã leoore.

• Bõe yĩng tɩ d segd n kɩs Wẽnnaam Gomdã sɩda? (Yɩɩl 29:4)

• Bõe la d tõe n maan tɩ Wẽnnaam Gomdã sɩd tall pãng tõnd mengã zugu? (Yɩɩl 34:9)

• Wãn to la d tõe n maan tɩ Wẽnnaam Gomdã sẽn tar pãngã kẽ nebã koɛɛgã mooneg sasa? (2 Tɩm. 3:16, 17)

• D maanda wãn t’a Sʋɩtãan dũniyã sẽn tar pãngã ra tõog n belg-do? (1 Zã 5:19)

• Kom-bɩɩsã na n maana wãn n tõog n yɩ wẽn-tũudb hakɩka? (Zer. 17:7)

• Wãn to la d maanda, n paamd pãng tõnd sẽn wat n ka pãng wakate? (2 Kor. 12:10)

• Bõe n na n sõng tõnd tɩ d tõog n toeeme, baa d sã n tara zʋg-wẽns la minimd sẽn kaoos ne-do? (Ef. 4:23)

3. Daar a ye tigs-kãsengã sõssã kelgr toor sẽn ka be, wãn to me la d tõe n dɩ a yõodo?

³ Woto bãngr na n naf-d-la wʋsgo! Daar a ye tigs-kãsengã, rasem a yi la rasem a tãab tigs-kãsemsã na n yɩɩ sabab me tɩ d paam n bãng tigims a taab saam-biis la saam-bi-pogse, la d wilg-b d nonglem. (Yɩɩl 133:1-3; 2 Kor. 6:11-13) Woto yĩnga, bɩ y sõs ne y zo-rãmbã, la y sõs ne y sẽn nan pa mi-b rãmbã me. Sõsd ning sẽn yaa kaagdã sã n yaa Betɛllã neda, wall distrik yel-gɛta, y tõe n sõsa ne-a, bɩ ne a pagã. Ad d sɩd tara bʋʋm n na n gũ raar a ye tigs-kãsengã sẽn watã ne sũ-noogo!