Wẽnnaam Gomdã bee bark zãmsg yĩnga

1. Yʋʋmd 2014 rasem a yiib tigs-kãsengã gom-zug yaa bõe, la sok-bʋg la b na n leoke?

¹ Ãndũniyã gill zugu, tõnd ‘karen-saam-kãseng’ a Zeova ka to ye. (Ezai 30:20, 21) La bõe la a Zeova tũnugd n karemd tõndo? A kõ-d-la sebr t’a barkã yɩɩd sɛb a taabã fãa. Yaa Biiblã sẽn yaa a Gomdã. Wãn to la Wẽnnaam sẽn karemd tõndã nafd tõnd d vɩɩmã nens fãa pʋgẽ? B na n leoka sok-kãngã yʋʋmd 2014 rasem a yiib tigs-kãsengã sasa. A gom-zugã yaa: “Wẽnnaam Gomdã bee bark zãmsg yĩnga.” A tika 2 Tɩmote 3:16 goamã.

2. Sogs-bʋs leoor la d na n paame?

² Bao-y sogs-kãensã leoore: Sõssã pʋgẽ, y na n paama sogs-kãensã leoore.

• Wẽnnaam sẽn zãmsd tõndã kɩtame tɩ tõnd vɩɩmã yaa wãn-wãna? (Ezai 48:17, 18)

• D sã n modgd n na n toeem d yɛl kẽer sẽn na yɩl n tõog n yɩ so-pakda, d tõe n basa d yam ne bõe? (Mal. 3:10)

• D sã n wa wʋm “koe-sãamse,” d tog n maana wãna? (Heb. 13:9)

• Wãn to la d tõe n dɩk a Zezi togs-n-taare, a sẽn da zãmsd nebã to-to wã wɛɛngẽ? (Mat. 7:28, 29)

• Bõe yĩng tɩ sẽn zãmsd-b nebã tigingã pʋgẽ wã segd n zãms b mense? (Rom 2:21)

• Wẽnnaam Gomdã bee bark bõe maaneg yĩnga? (2 Tɩm. 3:16)

• Wẽnnaam sẽn digimded buudã fãa soolmã kɩtame tɩ nebã maand bõe? (Aze 2:6, 7)

• A Zeova kɩsa sɩd tɩ tõnd na n maana bõe? (Ef. 5:1)

• Bõe yĩng tɩ d segd n modg d pãng fãa n ket n sakd a Zeova zãmsgã? (Luk 13:24)

3. Bõe yĩng tɩ d segd n kẽng tigs-kãsengã, la d kelg a sõssã fãa?

³ Nand t’a Poll togs 2 Tɩmote 3:16 goamã sẽn yaa tõnd tigs-kãsengã gom-zugã, a bilga vɩɩmã sẽn na n yɩ to-to yaoolem dayã. A yeela woto: “Nin-wẽnsã ne zãmb dãmbã na n maana wẽng n paase, b na n belga neb a taaba, la bãmb mens na n paama belgre.” (2 Tɩm. 3:13) Dẽnd sẽn na yɩl tɩ b ra wa belg-do, tara yõod tɩ d kelg Wẽnnaam goamã la d tũ. Bɩ d fãa modg n kẽng tigs-kãsengã, n kelg a sõssã fãa sẽn zems b wakatã.