Bɩ Wẽnnaam daabã maane
1. Yʋʋmd 2012 daar a ye tigis-kãsengã gom-zug yaa bõe, la bõe yĩng tɩ d segd n tags rẽ zugu?
1 Yaa a Zeova raabã yĩng la a sẽn naan tõnd tɩ d beẽ wã. (Wil. 4:11) Dẽnd d sã n pa bao n bãng Wẽnnaam daabã la d maane, d vɩɩmã pa tar yõod ye. Woto tõeeme n pa nana, bala d segdame n mao ne d tʋls-wẽnsã sẽn dat n tus tõnd tɩ d pids d “yĩngã ratem la tõnd tagsgã,” bɩ n maan “neb sẽn ka pʋʋsd Wẽnnaamã raabã.” (Ef. 2:3; 1 Pɩɛ. 4:3; 2 Pɩɛ. 2:10) Sã n pa Wẽnnaam sõngr yĩnga, a Sʋɩtãan tõe n yõk-d lame tɩ d sak yẽ raabã. (2 Tɩm. 2:26) Yʋʋmd 2012 daar a ye tigis-kãsengã na n sõnga tõnd ned kam fãa t’a tʋm tɩ zems ne gomd a Zezi sẽn yeel tɩ be pʋʋsg ning a sẽn wilg a karen-biisã pʋgẽ. A yeela woto: “Tɩ yãmb daab maane.”—Mat. 6:9, 10.
2. Sogsg kẽer b sẽn na n leok la bʋse?
2 Sogsg kẽer b sẽn na n leoke: Y sã n wa kelgd sõssã bɩ y bao sogsg nins sẽn pʋgdã leoore: Wẽnnaam Gomdã kelgr sẽn yãk a toogo, bõe me la d segd n maane? Wãn to la d tõe n baood n bãngd Wẽnnaam sẽn dat tɩ d maan bũmb ningã? Bõe yĩng tɩ d segd n modg n sõng neb buud fãa? Wãn to la d tõe n maan tɩ d vɩɩmã tall barka? Kom-bɩɩse, bõe la yãmb segd n kɩt t’a Zeova bãnge? Wẽnnaam daabã maaneg wata ne bark bʋse? Bõe yĩng tɩ yaa masã la d segd n keng neb a taabã raoodo?
3. Wãn to la d tõe n dɩ tigis-kãsengã nafa?
3 Modg-y n zĩnd kɛlgdbã sʋka, la y kelg sõssã fãa neere. Betɛllã neda, bɩ yel-gɛt a to n na n yɩ sõsd sẽn yaa kaagdã. Y tõe n sõsa ne-a, bɩ ne a pagã t’a sã n tarẽ. Y sã n lebg n kuli, bɩ y ra yĩm bũmb ning y sẽn kelgã ye. Naag-y y zakã rãmb n lebg n sõs bũmb ning y sẽn kelgã zugu, la y ges y sẽn tõe n maan Wẽnnaam daabã n paas to-to.—Zak 1:25.
4. Bõe yĩng tɩ d segd n lʋɩɩs Wẽnnaam raabã maaneg taoor d vɩɩmã pʋgẽ?
4 Ka la bilfu, neb nins sẽn zãgs a Zeova raabã maaneg n maand b mens raabã na n paama sãoongo. (1 Zã 2:17) Woto yĩnga, d sũur yaa noogo, a Zeova sẽn kɩt tɩ b segl tigis-kãsengã sõssã n na n sõng tõnd tɩ d lʋɩɩs a raabã maaneg taoor d vɩɩmã pʋgẽ wã!