D kelg n dɩk yam
1. Tõog n kelg tigs-kãsengã sõma baooda modgre. Bõe yĩnga?
1 Yʋʋmd 2013 rasem a tãab tigs-kãsemsã na n sɩnga ka la bilfu. B modga wʋsg n segl sõssã tɩ na n sõng-d tɩ d tõog n moon koɛɛgã dũniyã gill zugu. Yãmb zoe n segla y meng n na n zĩnd tigs-kãsengã rasem a tãabã fãa bɩ? Tigs-kãsemsã sasa, bũmb wʋsg tõe n tiis-d lame. Rẽnd yɩl n tõog n kelg sõma baooda modgre. Sẽn mik tɩ tigs-kãsengã kaoosdame n yɩɩd tigiss nins d sẽn maand Rĩungã rotẽ wã, d sã n dat n tũ na-kẽndrã sõma, rẽnda d sɩd mao. Sẽn paase, d sã n toga sor n kẽnge, yaamsã ne yɛl a taab tõe n tiis-d lame. Bõe n na n sõng-d tɩ d kelg sõma la d rɩk yam?—Tõo. 31:12.
2. Wãn to la d tõe n segl d meng d sũurã pʋgẽ tigs-kãsengã yĩnga?
2 Nand tɩ tigs-kãsengã sɩnge: Y tõe n yãa tigs-kãsengã na-kẽndr tõnd sit wɛbã pʋgẽ, www.jw.org n bãng sõssã gom-zutã ne vɛrse nins zut b sẽn tikã. D sã n deng n tɩ karem tigs-kãsengã na-kẽndr ẽntɛrnetã pʋgẽ, na n sõng-d lame tɩ d segl d mens d sũyã pʋsẽ n wa rɩ sõssã yõodo. (Ɛs. 7:10) Sõs-y bũmb ning y sẽn na n tɩ kelg tigs-kãsengẽ wã zug y zak pʋgẽ zaabr Biibl zãmsgã sasa.
3. Bõe n na n sõng-d tɩ d kelg sõma?
3 Tigs-kãsengã sasa: Nand tɩ tigsgã sɩnge, we-kɛɛng raab sã n be ne-y bɩ y pĩnd n kẽnge. Yɩta sõma me tɩ y kiis y selilɛɛrã, tɩ booll wall mesaaz ra wa tiis nebã ye. Tõe n sõng-y lame me tɩ y ra wa rat n bool wall y tool mesaaz tigsgã sasa ye. Sã n yaa tɩlae tɩ y ra kiis y selilɛɛrã, bɩ y maneg-a tɩ baa ned sã n bool bɩ ra tiis y taabã ye. Y sã n na n tʋma ne aparɛy rãmb a taab me tigsgã wakate, bɩ y gũus tɩ ra tiis nebã ye. Tigsgã sasa bɩ y modg n da rɩtẽ wall y yũud ye. (Koɛ. 3:1) Kelg-y sõsd fãa sõma. B sã n wa yeel tɩ d karem vɛrse bɩ y modg n tũ karengã y Biiblã pʋgẽ. Dɩk-y not-koeese.
4. Wãn to la roagdbã tõe n sõng b kambã tɩ b kelg sõma?
4 D ratame tɩ d kambã me kelg la b rɩk yam. Yelbũn 29:15 yeta woto: “B sã n bas biig t’a maan a yam, a ningda a ma yãnde.” Rẽ wã, yɩta sõma tɩ zakã neb fãa zĩnd ne taaba, tɩ roagdbã tõog n gũus b kambã tɩ b kelg neere, n da sõsd wall b toond mesaaz-rãmba, pa rẽ bɩ b yikdẽ n saad ye. Baa y kambã sã n paood n pa tõe n wʋm sõsg fãa võor sõma, y tõe n sõng-b lame tɩ bãng n zĩnd sɩɩ.
5. Bõe yĩng tɩ yaa sõma tɩ d lebg n tẽeg tigs-kãsengã sõsse, la wãn to la d tõe n maan dẽ?
5 Daar fãa tigsgã baasgẽ: Kul-y pĩnd n tɩ paam n vʋʋs sõma. Tags-y sõssã y sẽn kelgã zug tɩ sõng-y tɩ y ra yĩm ye. Zaabr fãa, yãmb ne y zakã rãmb sã n dɩkd baa yaa minit a wãn n sõsd bũmb ning y sẽn kelgã zugu, na n naf-y lame. Y sã n wa na n kẽng rɛstoorã pʋg n tɩ rɩ ne y zo-rãmba, bɩ y zã y not-rãmbã sebr tɩ sã n tõe bɩ y sõs bũmb a ye wall a yiib zugu. Tigs-kãsengã loogr poore, y zak pʋgẽ zaabr Biibl zãmsgã wakate, bɩ y bao n bãng y sẽn tõe n tũ sagls nins y sẽn paamã to-to. Y leb n tõeeme tɩ semen fãa, bɩ y karem seb-paal nins sẽn yi wã baa yaa bilfu.
6. D sã n kẽng tigs-kãsengẽ wã bala, sekame bɩ? Wilg-y y leoorã võore.
6 Ned sã n kẽng kibs n tɩ pa paam n dɩ, wall a sẽn dɩ-wã sã n pa kẽ-a, kibsã kẽngr pa naf-a ye. Woto me, sẽn na yɩl tɩ d rasem a tãab tigs-kãsengã sẽn watã naf-do, rẽnda d modg n tɩ kelg sõssã fãa sõma, la d mao me n tũ.