‘Kelg-y n paam yam n paase’

¹ Yelbũn sebrã wilgame tɩ yam moona woto: “Kelg-y-yã-a bala, mam gomda gom sõama. Mam goama yaa tɩrse. Mam gomda sɩda. Saglg ne tõogr yaa mam n so. . . . Kelg-y maam. Ned sã n maan wa mam sẽn yeelã, a na n paama sũ-noogo. Tɩ bõe, ned sã n paam maam, a paama vɩɩm. La a paamda Zusoaba bark me.” (Yel. 8:6, 14, 32, 35) Gom-kãensã bilgda zãmsg ning sẽn gũud tõnd “Wẽnnaam Gomdã karen-saam dãmba” tigims gĩn sull tigis-kãsengẽ wã.

² B vaeesame n bãng saam-biisã sẽn be dũniyã gill zugã raab sẽn ya a soaba, n segl tigis-kãsengã sõss sẽn na yɩl n pids raab kãnga. B na n kõo zãmsg tẽebã wɛɛngẽ la sagls sẽn zemse. D sã n tũ zãmsg la sagl-kãense, na n sõng-d lame tɩ d tall sũ-noogo, tɩ d tall zems-n-taar ne a Zeova, la tɩ d pa vɩɩm sẽn kõn sa wã sor zugu. Sãmbg sẽn ka be, d tara bʋʋm n na n ‘kelg n paam yam’ n paase.—Yel. 1:5.

³ Sẽn deng tigim taabã: Sẽn na yɩl n dɩ bũmb nins b sẽn na n kõ-dã nafa tɩ pidi, d segd n zoe n bee d zĩisẽ, tɩ d yamã gãand sõma tigim taabã sɩngrẽ. Woto baoodame tɩ ned kam fãa sigl a meng yɛl sõma. Bũmb a yembr sẽn tar yõod yaa d sɩng pĩnda. Yʋng bɩ y kẽ gãag pĩnda. Yik-y pĩnda, tɩ y sullã ned kam fãa paam sẽk tɩ sek n segl a meng la a sok a noore. Ta-y tigis-kãsengã zĩigẽ pĩnda, sẽn na yɩl n tõog n yã zĩig la y maan yɛl nins sẽn yaa tɩlae wã tɩ tigim taabã nan ka sɩng ye. Tigim taabã sɩngda yibeoog wakat a 9 la pʋɩ-sʋk daar fãa.

⁴ Tõnd sẽn tigsd taabã pipi bõn-datl yaa sẽn na yɩl n pẽg a Zeova “neb tiging pʋgẽ.” Rẽ n so tɩ tigim taabã segd n sɩng ne manesem sẽn kõt Wẽnnaam waoogre. (Yɩɩl 26:12) Sẽn na yɩl tɩ yɩ woto, b raoonda neba fãa tɩ b zĩnd b zĩisẽ tɩ b nan ka kos nebã tɩ b yik n yɩɩl pipi yɩɩllã ye. Woto zemsda ne Biiblã sagl-kãngã: “La modg-y tɩ bũmba fãa maan wa sẽn segde la ra yɩ yaar ye.” (1 Kor. 14:40, Sebr Sõngo) Woto rat n yeelame tɩ tõnd ned kam maan bõe? Yãmb sã n yã tɩ tigim taabã perzidã tʋg n zĩnda ɛstaraadã zug mizikã wakate, bɩ y me yɩ tao-tao n tɩ zĩnd y zĩigẽ. Rẽ na n kɩtame tɩ y tõog n yɩɩl tigim taab fãa sɩngr yɩɩll ne y sũur fãa, n zẽk y koɛɛg n pẽg a Zeova.—Yɩɩl 149:1.

⁵ Tigim taabã wakate: A Ɛsdras “yãka yam n na n zãms Zusoaba tõodã la a sak-ba.” (Ɛs. 7:10) Wãn to la d tõe n yãk yam n deeg zãmsg ning a Zeova sẽn kõtã? Y sã n wa get sõssã gom-zut sẽn be tigis-kãsengã yɛl na-kẽndr sebr pʋgẽ wã, bɩ y sʋk y meng woto: ‘Bõe la a Zeova rat n tũnug ne sõs-kãensã n zãms maam? Wãn to la m tõe n tʋm ne tags-kãensã tɩ naf maam ne m zaka rãmba?’ (Ezai 30:21; Ef. 5:17) Tigis-kãsengã tõr fãa wakat bɩ y ket n sʋkd y meng sʋgs-kãensã. Gʋls-y tagsa nins y sẽn geend n na n wa rɩk n tʋma. Rɩk-y sẽk n sõs b zut tigis-kãsengã raar fãa baasgẽ. Woto na n sõng-y lame tɩ y ra yĩm tagsa wã n wa tõog n dɩk-b n tʋme.

⁶ Tõe n yaa toog tɩ ned kelg neer n kaoos lɛɛr dãmb wʋsgo. Bõe n tõe n sõng tɩ d modg tɩ d yamã ra wa gõodẽ? Rɩ-y y ninã yõodo. Naoor wʋsgo tõnd yamã yalsda bũmb ning d sẽn getã zugu. (Mat. 6:22) Woto yĩnga, modg-y tɩ bũmb sẽn yɩ pẽra fãa bɩ y ra wẽnemd n ges ye. Get-y sõsda bala. B sã n wa karemd verse fãa bɩ y tũ karengã y Biiblã pʋgẽ, la verse võor wɛgsg wakat me bɩ y ra pag y Biiblã ye.

⁷ Kiris-neb nonglem na n sõng-d lame tɩ d ra tiis neb a taabã tigim taabã wakat ye. (1 Kor. 13:5) Yaa “sĩndim wakat” la kelgr wakate. (Koɛ. 3:7) Woto yĩnga, bɩ y ra gomd la y saad tɩ ka tɩlae ye. Deng-y n maan-y segls pĩnda, n boog y kabinẽ wã kẽn hal wʋsgo. Sã n pa wa bãag n kɩt tɩ yaa woto fãa, da rɩ-y hal tɩ ta wakat ning b sẽn yãk rẽ yĩngã ye. Neb nins sẽn tall telefõn selilɛɛr dãmb la fot rɩkr teed n wa ne wã ka segd n tʋm ne-b ne manesem sẽn na n tiis neb a taabã ye. Roagdbã segd n maana segls tɩ zak neb fãa zĩnd ne taaba, sẽn ya-b kom-bɩɩsã sẽn naage. Woto b tõeeme n ges b kambã yell sõma.—Yel. 29:15.

⁸ Rɩẽ, kãsem soab a yembr sẽn da minim n kẽnd tigis-kãsems na maan yʋʋm pi-gĩn yeela woto: “Bũmb a to me n kɩt tɩ m tagsd tɩ tigs-kãseng kãngã yɩɩ sõma wʋsgo. Kɛlgd fãa la bal ra gʋlsda tagsa wã, kambã sẽn paase. M sẽn yã rẽ wã kõ-m-la sũ-noogo. Sõsdã sã n da kos nebã tɩ b gẽes verse rãmba, b ra lakda b Biibl dãmbã.” Kelg-neer a woto sɩd seka pẽgre. Woto nafda tõnd la neb a taabã sẽn wa tigis-kãsengã. La sẽn yɩɩd fãa, woto kõta Wẽnnaam a Zeova sẽn yaa tõnd Naand la Karen-saam Kãsengã ziiri.—Ezai 30:20.