D tigma taab n na n pẽg a Zeova
1. Tigis-kãsengã gom-zu-raoog yaa bʋgo, la bõe yĩng t’a Zeova zems ne pẽgre?
1 A Zeova yaa pãng sẽn tõe fãa soabã, yam sẽn ka koak soaba, tɩrlem sẽn zems zãng soaba, la a yaa nonglem. A sẽn yaa Naanda, vɩɩm Kõat la ãndũniyã Naab sẽn-ka-to wã, yẽ a ye bal n zems ne tõnd balengo. (Yɩɩl 36:10; Wil. 4:11; 15:3, 4) Rõandã tigims gĩn sull tigis-kãsengã gom-zug sẽn yaa “Pẽg-y Wẽnnaamã” na n kɩtame tɩ d tʋlg sõmb-sõmb n paas n pẽg-a, a sẽn yaa sɩd Wẽnnaam yɛngã yĩnga.—Yɩɩl 86:8-10.
2, 3. Wãn to la seglg neerã na n sõng-d tɩ d rɩ tigis-kãsengã yõod tɩ pidi?
2 Seglg neer yaa tɩlae: D sã n dat n dɩ tẽeb kibs ning a Zeova sẽn segl d yĩngã yõod tɩ pidi, rẽnda d segl neere. (Ef. 5:15, 16) Rẽ yĩngã yãmb zoe n baoo ro-gãagã, n segl so-toakã, la y paam sor y tʋʋmdã zĩigẽ bɩ lekollẽ wã bɩ? Ra bas-y tɩ wa kẽ n bõog tɩ y yaool n maan bõn-kãensã sẽn tar yõod wʋsgã ye. Yãmb sã n pa kos n paam sor y tʋʋmdã zĩigẽ bɩ lekollẽ wã, y tõe n wa konga tigis-kãsengã sẽn yaa sũ-noog sasa wã babs kẽere. Tõnd fãa segd n zĩnda tigis-kãsengẽ wã, a sɩngrẽ n tɩ ta a baasgẽ.
3 Daar fãa, bɩ y modg n ta tigis-kãsengã zĩigẽ pĩnda. Rẽ na n kɩtame tɩ sɩngr yɩɩllã sasa bɩ y zoe n be y zĩigẽ, la sõng-y tɩ y yamã segl sõma sẽn na yɩl n deeg zãmsgã b sẽn na n kõ wã. Ra bĩng-y zĩis neb a taab yĩng tɩ sã n ka y zakã neba, bɩ sẽn tog-b sor ne yãmbã yĩng ye.
4. Bõe yĩng tɩ b baoodẽ tɩ tõnd fãa wa ne a midi rɩɩb tigis-kãsengã zĩigẽ?
4 D kotame tɩ neba fãa wa ne b midi rɩɩb tigis-kãsengã zĩigẽ, n da yi tigis-kãsengã zĩigẽ n tɩ ra rɩɩb midi wã vʋʋsg wakat ye. D sã n yi n tɩ ra rɩɩb kiosg rãmb sẽn pẽ be pʋsẽ bɩ soayã noy rɩ-koaasdbẽ, wakat ninga tõe n wa waa ne bãase, bɩ yɩ sẽk la ligd sãoongo. Yãmb sã n sak sagl-kãensã, tõe n sõngame tɩ bãan zĩndi, la tɩ y paam sẽk n paas n maan tũud-n-taar ne y tẽed-n-taasã. (Yɩɩl 133:1-3) Tẽeg-y tɩ b ka sakd tɩ b wa ne teed sẽn maan ne vɛɛr la rãam tigis-kãsengã zĩigẽ ye.
5. Wãn to la d tõe n sɩng n segend d sũurã tigis-kãsengã yĩnga?
5 Kelg-y n paam zãmsgo: A Ɛsdras segla a sũurã sõma n na n deeg Wẽnnaam gomdã. (Ɛs. 7:10) A basame t’a Zeova zãmsgã kẽe a sũurã. (Yel. 2:2) Nand tɩ d yi d zakẽ wã menga, d tõe n sɩngame n segend d sũurã tigis-kãsengã yĩnga, n bʋgsd tigis-kãsengã gom-zu-raoog zug la d sõsd a zug ne d zakã neba.
6. Bõe n tõe n sõng tõnd tɩ d kelg tigis-kãsengã sõss neere? (Ges-y zĩ-gũbrã.)
6 Zãma wʋsg sʋka, yɛl wʋsg la d tõe n yã la d wʋm tɩ yuus d yam. Yel-tiisdem kãensã tõee nana-nana n maan tɩ d pa kelg sõasdã neer ye. Woto sã n maane, zãmsg sẽn tar yõod wʋsg la d na n konge. Saglsã sẽn be zĩ-gũbrã sẽn naag sõs-kãngã wã pʋgẽ tõe n sõnga tõnd tɩ d kelg neer n paase.
7, 8. Wãn to la d tõe n waoog neb a taabã?
7 Waoog-y neb a taabã: Y tõe n yõga fot dãmb la y tũnug ne kamera rãmb sõssã sasa, la rẽnda y zĩnd y zĩigẽ wã n maan dẽ n da wa tiis neb a taabã ye. Y segd n manega y telefõn selilɛɛr dãmbã tɩ b ra wa sãam neb a taabã kelgr ye. Y ka segd n dɩk y meng teed n sel tigis-kãsengã zĩigẽ kʋʋrã bɩ wʋmbã teed zĩigẽ ye.
8 Sãmbg sẽn ka be, d gũuda wakat kãngã d sẽn na n wa tigim taab n pẽg a Zeova wã! Bɩ d rɩk sard sẽn ka vigsd n pẽg a Zeova. Sẽn na yɩl n tõog n maan woto, bɩ d zĩnd tigis-kãsengẽ wã, a sɩngrẽ n tɩ ta a baasgẽ, n kelgd neere, la d tũ bũmb nins d sẽn zãmsã.—Tõo. 31:12.
[Zĩ-gũbri, seb-neng a 3]
D sẽn na n kelg to-to tigis-kãsemsẽ wã
▪ Bʋgs-y sõssã gom-zut zutu
▪ Gẽes-y verse rãmbã
▪ Gʋls-y tagsa koɛɛg-koɛɛga
▪ Gʋls-y sagls takɩ y sẽn dat n tũ
▪ Lebg-y n ges bũmb ning y sẽn zãmsã