Pẽg-y-yã a Zeova tiging-kãsengã pʋgẽ
1, 2. Rasem a tãab tigis-kãsengã kõt-d-la segb tɩ d na n maan bõe, la wãn-wãn la d tõe n maan rẽ?
1 Yʋʋmd fãa, rasem a tãab tigis-kãsengã yaa segb sẽn pa wõnd a taab d sẽn paamd n pẽgd a Zeova. D tagsda wa a Davɩɩd a sẽn yɩɩl woto wã: “Mam na n pẽga yãmb tiging kãseng pʋgẽ. Mam na n zẽka yãmb yʋʋr kʋʋng kãseng sʋka.” (Yɩɩl 35:18) Rasem a tãab tigis-kãseng ning sẽn watã gom-zug sẽn yaa “Wẽnnaam sakrã,” wãn-wãn la d na n maan tɩ d sẽn lagem taabã sɩd pẽga a Zeova?
2 Pipi, yaa ne d yel-manesmã. Tigis-kãseng a yembr zĩig soaadb yeela woto: “Tõnd yeela tũudum a taab neb sẽn dat n luaas zĩigã tɩ b wa ges a Zeova Kaset rãmbã sẽn sɛgend b tigis-kãsengã sõma to-to wã.” Tõnd ned kam fãa sẽn maneg a meng to-to wã, d sẽn lagemd taab n tʋmdẽ wã la d yel-manesmã pẽgda tõnd Wẽnnaamã wʋsg wa sẽn segdã.—1 Pɩɛ. 2:12.
3, 4. Wãn-wãn la maan-tɩ-zems na n sõng-d tɩ d ges tɩ tigis-kãsengã sasa la a poor bɩ d futã yeelgr zems ne kiris-neba?
3 D mengã manegre: D sã n dat n maneg d mens sẽn na yɩl tɩ pẽg a Zeova, rẽndame tɩ d yɩ maan-tɩ-zems rãmba. (1 Tɩm. 2:9) École du ministère sebrã seb-neng 132 wã yeta woto: “Ned sẽn yaa maan-tɩ-zems soab pa rat n sãam neb a taab sũur zaalem ye. A leb n pa baood tɩ b ges-a ye.” Tẽns wʋsg pʋsẽ, nebã nong n ningda fut sẽn pa sakd gesgo. La a Zeova nanda modgr ning tõnd sẽn maand n na n zã a yʋʋrã tɩ zemsã. (Tʋʋ. 15:14) Baa ne tigis-kãsengã sẽn tõe n maan reem zĩigẽ wã, a rasem a tãabã fãa ket n yaa tõnd “tiging-kãsenga.” Rẽ n so tɩ d sẽn tigimd taab a Zeova yʋʋr yĩngã, d segd n ges tɩ d sẽn na n yeelg d futã to-to wã waoog a Zeova sẽn yaa kãseng n tɩ yɩɩd ãndũniyã fãa pʋgẽ wã.—1 Kib. 29:11.
4 D leb n segd n gũusa ne d sẽn manegd d mens to-to tigim-taabã poor daar fãa wã me. Baa d sã n dat n ning fut a taab pemsmã kokr sasa wall d sẽn wat n na n tɩ rɩ rɩɩbã koosem zĩisẽ wã, d futã la d mengã manegr segd n ket n wilgdame tɩ d ‘sakda Wẽnnaam.’ (1 Tɩm. 2:10) Fuug sẽn zems pa fuug dũniyã neb sẽn pẽgd ye. (1 Zã 2:16, 17) Tõnd sɛbã tara fot rãmb sẽn wilgd pagb la rap fut sẽn zems b sẽn tõe n yeelg zĩis toɛy-toɛy pʋsẽ. D sã n ningd d badz rãmbã n kẽed tẽngã, rẽ me na n tẽegd-d lame tɩ d yaa kiris-neb wakat fãa.—2 Kor. 6:3, 4.
5, 6. Wãn to la d tõe n wilg tɩ d nanda tẽebã rɩɩb a Zeova sẽn kõt-dã?
5 D tall waoogr ne tẽebã rɩɩb a Zeova sẽn kõt-dã: Ãndũniyã fãa Zusoabã maana kibs d yĩnga. (Ezai 25:6; 1 Kor. 10:21) Tõnd sã n nanda tẽebã rɩɩb a Zeova sẽn kõt-dã wʋsgo, d na n modg n zĩnda tigis-kãsengẽ wã rasem a tãabã fãa. Yãmb dɩka segls sẽn na yɩl n paam gãas zĩisi, y sẽn na n kẽng tigis-kãsengã zĩigẽ to-to wã la y kos vʋʋsem y tʋʋmã zĩisẽ bɩ? Y rɩka sẽk tɩ sek n na n segl y mens so-toakã yĩng sẽn na yɩl tɩ y tõog n ta pĩnd n paam zaoose, n sõs ne y saam-bi-taasã la y naag-b n pẽg a Zeova ne tigim-taabã sɩngr yɩɩllã la pʋʋsgã bɩ?—Yɩɩl 147:1.
6 D sã n nand tẽebã rɩɩb a Zeova sẽn kõt-dã, na n kɩtame tɩ d kelg sõssã fãa sõma n da sõsd ne nebã, n da rɩtẽ wall d yikd n saad ye. A Zeova tũnuga ne tʋm-tʋmd sẽn tũud sɩdã sull n kõt-d tẽebã rɩɩb ning d sẽn dat wakat kãnga wã. (Mat. 24:45) Tõnd ned baa a ye pa segd n bas n pa kelg sõssã neer ye. Roagdbã segd n zĩnda ne b kambã n sõng-b tɩ b kelg sõma.—Tõo. 31:12.
7. Sagl-bʋg la b kõt-d midi wã rɩɩbã wɛɛngẽ, la bõe yĩnga?
7 B sagend-d lame tɩ d zã rɩɩb n wa sẽn na yɩl n da wa yi tigim-taabã zĩigẽ n na n tɩ bao rɩɩb midi vʋʋsgã sasa ye. D pẽgda saam-biis wʋsg b sẽn tũ sagl-kãngã neer dɩẽ tigis-kãsengã sasa wã yĩnga. D fãa sã n tũ-a, sɩd na n yɩɩ sõma wʋsgo. (Heb. 13:17) Segl-kãngã kõt-d-la segb tɩ d tõe n maan tũud-n-taar sẽn kengd tẽeb ne d saam-biisã, n paasd d zems-n-taarã pãnga, tɩ woto pẽgd a Zeova.—Yɩɩl 133:1.
8, 9. Tigis-kãsengã sẽn watã leb n kõt-d-la segb tɩ d na n maan bõe?
8 D kõ kasetã wakat fãa: D sã n wa rigd tigis-kãsengã zĩigẽ bɩ d sẽn wat n yit be n kuusẽ wã, d tara segb toor-toor d sẽn tõe n tũnug n pẽg a Zeova ne d noor goama. (Heb. 13:15) D sã n wa tɩ rɩt rɩɩb koosg zĩigẽ wall d sõsd ne lotɛll tʋm-tʋmdb bɩ d bao soay n kõ kasetã. Tõnd yamã la d sũurã na n pida ne tẽeb bõn-sõma nins d sẽn paam tigis-kãsengẽ wã. D taas bõn-sõma kãens neb nins d sẽn segdã.—1 Pɩɛ. 3:15.
9 D gũuda sasa kãngã ne d sũy fãa n na n pẽg a Zeova kʋʋngã sʋka. (Yɩɩl 26:12) Bɩ d lagem taab noor a ye n pẽg a Zeova rasem a tãab tigis-kãsengã sẽn watã. A gom-zugã yaa: “Wẽnnaam sakre.”
[Zĩ-gũbri, seb-neng a 8]
Tẽegr rasem a tãab tigis-kãsengã yĩnga
◼ Tigim-taabã sɩngr wakate: Tigim-taabã na n sɩngda daar fãa yibeoog wakat a 9 wã sẽn loog minit 30. Wakat bilf sẽn deng sɩngrã, b sẽn wat n ning Rĩungã yɩɩllã, perzidã wã na n tɩ zĩnda ɛstaraadã zugu. Wakat kãnga, d fãa segd n tɩ zĩnda d zĩisẽ wã ne manesem sẽn na n kɩt t’a sɩngrã tall waoogre. Arzũmã la sibrã raar tigim-taabã na n saa zaabr wakat a 5 sẽn loog minit a 5, la hatã tigim-taab na n teka zaabr wakat a 4 sẽn loog minit 10.
◼ Parkĩngã: Tũ-y parkĩngã tʋm-tʋmdb noy sõma sẽn na yɩl tɩ sãmpoag ra wa zĩnd ye.
◼ Zaoosã bĩngri: D pa segd n bĩng zaoog neda, sã n pa mikame t’a soab tũu tõnd n wa tigis-kãsengã wall a gãeyã ne-d ye.
◼ Kũunã: Tigis-kãseng seglg baooda ligd wʋsgo. D tõe n wilga tɩ d nanda segl-kãens n kõ yamleoog kũun n teel dũni gill tʋʋmdã d Rĩungã Roogẽ wall tigis-kãsengã zĩigẽ. Burkĩna Faso ka, d sã n na n tũnug ne sɛk n kõ ligdã, d sɛkã zug d segd n gʋlsame tɩ “Association les Témoins de Jéhovah.” D bõos tɩ y tɩ yã tigis-kãsengã yel-gɛtb sull n dɩ moor dẽ wɛɛngẽ n paase.
◼ Midi wã rɩɩbã: Zã-y rɩɩb n wa tɩ vʋʋsgã sasa bɩ y ra yi tigis-kãsengã zĩigẽ n tɩ bao rɩɩb ye. D tõe n zãa rɩɩb ne laag d sẽn tõe n bĩng d zaoogã tẽngre. D pa segd n zɩ rɩɩb laas ne glasɩɛɛr dãmb sẽn bedem tɩ looge, la rãam n wa tigis-kãsengẽ wã ye.
◼ Sõssã rɩkre: D pa segd n tall post buud fãa d sẽn wa ne n na n dɩk sõssã n tɩ sel kʋʋrã wã bɩ wʋmbã teed zĩigẽ ye. D leb n segd n gũusame tɩ d sã n na n tʋm ne-b bɩ b ra tiis nebã ye.
◼ Fot yõkre: Y sã n yõgd foto rãmb tigim-taabã sasa, y pa segd n ning flas ye.
◼ Telefõn Selilɛɛr dãmbã: B segd n kiisa telefõn selilɛɛr dãmbã tɩ b ra wa tiis nebã ye.
◼ Sãmpoagã la tɩbsg nins sẽn baood yãgbã: Ned sã n dat tɩbsg ne yãgb tigis-kãsengã zĩigẽ bɩ y tɩ yã yamleoog tʋm-tʋmd t’a wilg-y sẽn get-b tɩbsgã yellã. Neb nins sẽn yaa bãad rãmbã segd n zã b tɩɩm n wa.
◼ Ro-gãasã: Zĩig ning y sẽn na n gãandẽ fãa bɩ y puk vʋʋsem sõngã biis y manesmã ne nebã pʋgẽ. Yɩ-y nin-sõma, wilg-y nonglem la y waoog nebã. Sã n yaa zak pʋgẽ la b reeg-y bɩ y teel zakã rãmb ne depãens rãmbã wa y sẽn tõe tɛka. Yaoolem daarã, nand tɩ y loog bɩ y maneg rotã n bas-b yɩlma.