D tall manesem sõng sẽn wilgd tɩ d tũuda Kiristã
1. Bõe yĩng tɩ d tõe n yeel tɩ roandã rasem a tãab tigis-kãsengã gom-zug gomda Wẽnnaam waoogr yelle?
1 Biiblã wilgame t’a Zeova sẽn yaa pãng sẽn ka to Soabã tara naam ne ziiri. (Yɩɩl 104:1) A Zezi goamã la a manesmã pʋgẽ, a ra waoogda a Ba wã la segls nins a Ba wã sẽn dɩkã. (Zã 17:4) “Tũ-y Kiristã” tigis-kãsengã sẽn watã sasa, tõnd ned kam fãa na n paama sor n kɩt t’a Zeova yʋʋrã paam pẽgre, wa a Zezi sẽn maan to-to wã.
2. Wãn to la d tõe n segl d mens n tõog n zĩnd sõssã fãa sasa tɩ waoog a Zeova?
2 D tall manesem sẽn waoogd Wẽnnaam: Tõnd sã n modg n zĩnd tigis-kãsengã a Zeova sẽn segl tõnd yĩngã n kelge, d waoogd-a lame. Rẽ yĩnga, yãmb zoe n bõosa y tʋʋmã taoor soab sor la y segend-y mens n na n kẽng tigis-kãsengã rasem a tãabã fãa baa ne arzũma bɩ? Yãmb segl-a y mens sẽn na yɩl n tõog n ta pĩnd n paam zĩig la y naag y saam-biisã n yɩɩl la y pʋʋs tigis-kãsengã sɩngr wakat bɩ? Yãmb segl-a y meng n na n zã rɩɩb n kẽng tigis-kãsengã n tɩ naag y saam-biisã n dɩ midi vʋʋsgã sasa bɩ? Perzidã wã sã n wa yeel tɩ d zĩnd tɩ mizikã na n sɩngame, sã n mikame tɩ d ra sõsda ne ned bɩ d bas sõsgã la d tɩ zĩndi.
3. Bõe n wilgd tɩ d sã n kelg sõssa neere, waoogda Wẽnnaam?
3 Tõnd sã n maag d yĩng n kelg sõssã neer me, d waoogda d saasẽ Ba wã. Kiba-kɩt a ye sẽn yã a Zeova Kaset rãmbã manesem sẽn yaa to-to b tigis-kãsengẽ wã, a gʋlsame n wilg tɩ neb nins sẽn wat n na n ges b tigis-kãsengã sẽn maand to-to wã sã n yã b “manesem sõngã, tara yamleoogo. Ned kam fãa zĩi sɩɩ n kelgdẽ tɩ wilgdẽ tɩ b sɩd nonga Wẽnnaam goamã.” A leb n goma “kambã wʋsg . . . sẽn da tar manesem sõng la b baood verse rãmbã Biiblã pʋgẽ wã” yelle. Sõssã sã n wa sɩnge, d pa segd n gomd ne taab zaalem, n toond kibay ne selilɛɛr dãmbã, n dɩtẽ bɩ n yikd n gilgd zaalem ye. Kambã segd n zĩnda ne b roagdbã, sẽn na yɩl tɩ b sõng-b tɩ b rɩ sõssã yõodo. (Tõo. 31:12; Yel. 29:15) D sã n modg n maan woto, d wilgdame tɩ d waoogda neb a taabã, la tɩ d nanda zãmsg ning b sẽn kõt tigis-kãsengẽ wã.
4. Bõe yĩng tɩ d segd n maneg d mens sõma n kẽng tigis-kãsengã?
4 D maneg d mens sõma: Rɩẽ tigis-kãsengã sõsg a ye gom-zug yɩɩ “Tall-y yel-manesem sẽn tog ne kiris-ned wakat fãa.” Sõs-kãngã wilgame tɩ Wẽnnaam nin-buiidã segd n modgame tɩ b sẽn manegd b mens to-to wã wilg tɩ b yaa kiris-neba. Neb wʋsg n wilg tɩ sagls nins sẽn da be sõs-kãngã pʋgẽ wã yɩ-b-la noogo. Roandã me, d segd n tũu sagl-kãensã. Tõnd sẽn manegd-d mens to-to wã wilgda tõnd sã n nonga a Zeova la d nand tõnd sẽn paam n yaa a Kaset rãmbã. D segd n wilga wakat fãa tɩ d yaa neb “sẽn sakd Wẽnnaam” ne d sẽn manegd d mensã to-to wã.—1 Tɩm. 2:9, 10.
5. Zaabr sã n ta tɩ d rat n yi n gilg tẽngã, wãn to la d segd n maneg d mens tɩ waoog Wẽnnaam?
5 Rẽ yĩnga, yaa d sã n wa rebd tigis-kãsengẽ wã bal la d segd n maneg d mens sõma bɩ? D ra yĩm tɩ tõnd sẽn na n ning badz rãmbã yĩnga, neba wʋsg na n gesa tõndo. Nebã segd n yãame tɩ tõnd sẽn manegd d mensã to-to wã yaa toor ne bãmba. Dẽnd baa zaabr sã n ta tɩ d rat n yi n gilg tẽngã pʋgẽ, wala makre sõssã fãa poore tõnd sã n dat n tɩ bao rɩɩb n dɩ, d segd n manega d mensã tɩ wilg tɩ d yaa kiris-neb sẽn be tẽngã pʋgẽ n na n kelg tigis-kãsenga. Rẽ n so tɩ d pa na n ning fut wala gĩn dãmba, kɩlot rãmb ne tɩ-sort rãmb n yi n gilgdẽ ye. Tõnd sã n maaneg d mens sõma, na n yɩɩ kaset tẽngã neb yĩnga. Sẽn paas me, a Zeova sũur na n yɩɩ noogo, tõnd sẽn manegd-d mens tɩ wilgd tɩ d yaa a tʋm-tʋmdbã.
6. Tõnd manesem sõngã yõod yaa bõe?
6 Tõnd manesem sõngã yõodo: Tõnd sã n tall manesem sõng d tigis-kãsemsẽ wã, d na n tõog n kõo neb nins sẽn get tõndã kaseto, la d kɩt tɩ b gom tõnd yell sõma. Tigis-kãseng a ye poore, ned a ye n yeel woto: “Tõnd da nan zɩ n yã neb sẽn tar manesem sõng a woto buud ye. Yãmb manesmã buud la Wẽnnaam dat tɩ tõnd fãa talle.” Tõnd manesmã sã n yaa sõma, wilgdame tɩ d nonga taab la d waoogd taaba, la tɩ d waoogda a Zeova me. (1 Pɩɛ. 2:12) Leb n wilgdame tɩ d yaa wẽn-zoɛtba, la tɩ d nanda d sẽn paam tɩ d Ba wã zãmsd tõndã. (Heb. 12:28) Bɩ d modg tɩ “Tũ-y Kiristã!” tigis-kãsengã sã n wa ta bɩ d tall manesem sõng sẽn na n waoog Wẽnnaam.
[Zĩ-gũbri, seb-neng a 4]
Tẽegr dasem a tãab tigis-kãsengã yĩnga
◼ Sõssã sɩngr wakate: Sõssã na n sɩngda daar fãa yibeoog wakat a 9 wã sẽn loog minit 20. Mizikã sã n wa sɩnge, d fãa segd n tɩ zĩnda d zĩisẽ sẽn na yɩl tɩ tigis-kãsengã sɩng sõma. Arzũmã ne sibrã daar tigim-taabã na n saa zaabr wakat a 5 wã sẽn loog minit a 5, tɩ hatã rẽnd sat zaabr wakat a 4 sẽn loog minit 10.
◼ Parkĩngã: Ning-y y badz rãmbã sẽn na yɩl tɩ parkĩngã rãmb bãng-y n welge. Tũ-y parkĩngã rãmb noy sõma sẽn na yɩl tɩ sãmpoag ra wa zĩnd ye.
◼ Zĩisã bĩngri: D pa segd n bĩng ned zĩiga, sã n pa mikame t’a soab tũu tõnd n wa tigis-kãsengã, bɩ a bee zak a ye ne-d ye.
◼ Midi wã rɩɩbã: Zã-y rɩɩb n wa tɩ vʋʋsgã sasa bɩ y ra yi tigis-kãsengã zĩigẽ n tɩ bao rɩɩb ye. D tõe n ninga d rɩɩdã galasɩɛɛr kɩds pʋgẽ n bĩng d zaoogã tẽngre. D pa segd n zã galasɩɛɛr bɛd la teed buud fãa sẽn maan ne vɛɛre, la rãam n wa tigis-kãsengẽ wã ye.
◼ Kũunã: Tigis-kãseng seglg baooda ligd wʋsgo. D tõe n wilgame tɩ d nanda segl-kãens n kõ yamleoog kũun d Rĩungã Roogẽ wall tigis-kãsengã zĩigẽ, sẽn na yɩl n teel tʋʋmdã b sẽn tʋmd dũniyã gill zugã. Burkĩna Faso ka, d sã n na n tũnug ne sɛk n kõ ligdi, d segd n gʋlsa sɛkã zug tɩ Association “Les Témoins de Jéhovah du Burkina Faso.” D bõos tɩ y tɩ yã tigis-kãsengã yel-gɛtb sull n paam kibay a taab n paase.
◼ Sãmpoagã la tɩbsg nins sẽn baood yãgbã: Ned sã n dat tɩbsg ne yãgb tigis-kãsengã zĩigẽ, bɩ y tɩ yã yamleoog tʋm-tʋmd t’a wilg-y neb nins sẽn get tɩbsgã yellã tɩ b sõng-yã. Neb nins sẽn yaa bãad rãmbã segd n tẽeg n zã b tɩɩm n wa.
◼ Sõssã rɩkre: Sẽn yaa post bɩ aparey ning fãa la d rat n tall n dɩk sõssã, d pa segd n tɩ sel-b kʋʋrã wã bɩ sono wã zĩigẽ ye. D leb n segd n gũusame tɩ d sã n na n dɩk sõssã bɩ d ra tiis nebã ye.
◼ Fot yõkre: Y sã n yõgd foto rãmb sõssã sasa, y pa segd n ning flas ye.
◼ Telefõn selilɛɛr dãmbã: B segd n kiisa telefõn selilɛɛr dãmbã tɩ b ra wa tiis nebã ye.
◼ Parfẽ rãmbã la ka-zaeedmã: Zĩis kẽere, b maanda tigis-kãsemsã zĩis sẽn gũbg pʋsẽ tɩ yaa vãntɩlatɛɛr dãmb bal n kõt pemsmã. Woto yĩnga, yɩta sõma tɩ d gũus ne parfẽ rãmb la ka-zaeedem nins yũug sẽn tõe n wa nams neb nins sẽn bẽed vʋʋsmã bãasã.—1 Kor. 10:24.
◼ D tʋm ne Veillez suivre l’intérêt seb-vãoogã: Tigis-kãsengã wakate, d sã n tõog n kõ ned kasetã t’a wilg t’a tʋll n bãnga koɛɛgã n paase, d segd n pidsa Veillez suivre l’intérêt (S-43) seb-vãoogã. Koe-moondbã segd n zãa seb-vã-kãngã a ye bɩ a yiib n wa tigis-kãsengã zĩigẽ. Sẽn get-b tigis-kãsengã sɛb yellã segd n gesame t’a zĩnd sɛbã sʋka. Y sã n pids seb-vãoogã, y tõe n kɩs-a-la sẽn get-b sɛbã yellã, wall y bas tɩ tigis-kãsengã loogr poor bɩ y kɩs-a y tigingã sekertɛɛre.—Ges-y yʋʋmd 2005 wao-fugdg kiuug Rĩungã Tʋʋmde, seb-neng a 6.
◼ Ro-gãasã: Zĩig ning y sẽn na n gãandẽ fãa bɩ y waoog nebã la y wilg tɩ y nong-b lame. Sã n yaa zak pʋgẽ la b reeg-y bɩ y teel zakã rãmb ne b tʋʋmã la ne depãens rãmbã wa y sẽn tõe tɛka. Yaoolem daarã, nand tɩ y loog bɩ y maneg rotã n bas-b yɩlma.