Yãmb segla y mens tigis-kãsengã yĩng bɩ?
1. Segl-bʋs la b maand kibs sasa?
1 Kibs maaneg baoodame tɩ f segl f meng sõma. F segd n baoa zẽ-biis la bũmb nins fãa sẽn yaa tɩlae wã. Rɩɩbã pʋɩɩb me baooda seglgo. Sẽn paase, f segd n deng n manega zĩig ning nebã sẽn na n zĩnd n dɩ wã. Sã n mik tɩ sãamb na n yii zĩis a taab n wa, yaa tɩlae tɩ bãmb me segl b mense. Baa ne kibsã seglg sẽn pa nana wã, d sã n wa naag d zakã rãmb la d zo-rãmbã n dɩtẽ, yaa noogo. Ka la bilfu, a Zeova Kaset rãmbã na n tigma taab zĩis wʋsg n maan kibs buudu, sẽn dat n yeel tɩ rasem a tãab tigis-kãseng gom-zug sẽn yet tɩ “Bɩ y gũ!” wã. B zoe n tʋma tʋʋm wʋsg la b segl sõss tigis-kãseng kãngã yĩnga. B boonda tõnd fãa tɩ d wa. Sẽn na yɩl n tõog n kẽng la d rɩ a yõodo, ned kam fãa segd n segla a menga.—Yel. 21:5.
2. Sẽn na yɩl n tõog n kẽng rasem a tãabã fãa, bõe la d segd n maane?
2 D bao n dɩ tigis-kãsengã yõodo: Yãmb zoe n segla y mens n na n kẽng rasem a tãabã fãa bɩ? Sã n yaa tɩlae tɩ y kos y tʋʋmã taoor soab sor n kẽng rasem a tãabã fãa, bɩ y maan dẽ. Y sã n na n toga sor n kẽng tigis-kãsengã, rẽ yĩnga yãmb zoe n segla y so-toakã, la y mi y sẽn na n gãand zĩig ning bɩ? Kãsem dãmbã segd n gesame n sõng koms rãmbã, sẽn kʋʋl-bã, la neb a taab sẽn dat sõngre.—Zer. 23:4; Gal. 6:10.
3. Bõe yĩng tɩ d pa segd n kẽng tẽns-tẽns tigis-kãseng b sẽn pa kõ-d sor tɩ d kẽnge?
3 Zĩis kẽere, b na n maana tẽn-tẽns tigis-kãsenga. D tẽeg tɩ b yãka tigims takɩ tẽn-kãens pʋsẽ, la sãamb sẽn na n yi tẽn-zẽms n kẽnge. Filiyallã maana woto sẽn na yɩl tɩ zaoosã la lotɛll dãmbã seke. D sã n kẽng tẽns-tẽns tigis-kãseng b sẽn pa kõ-d sor tɩ d kẽnge, tõe n kɩtame tɩ nebã sõor yɩ wʋsg tɩ zaoosã pa sek ye.
4. Sẽn na yɩl n segl d mens n kelg sõssã, bõe la d segd n maane?
4 D modg n tat tigis-kãsengã zĩigẽ pĩnd n bao zĩig d sẽn na n zĩnd tɩ tigisgã yaool n sɩnge. Nand tɩ tigisgã sɩnge, d tõe n dɩka minit a wãn n ges sõssã na-kẽndre. Woto na n sõng-d lame tɩ d segl d mens n kelg sõma. (Ɛs. 7:10) Mizikã sã n wa sɩng bɩ d kelgdẽ, la d segl d mens n wa naag n yɩɩl yɩɩllã la d kelg pʋʋsgã.
5. Bõe la roagdbã ne b kambã tõe n maan n dɩ tigis-kãsengã sõssã nafa?
5 Roagdbã ne b kambã sã n naag taab n zĩnd zĩ-yɛnga, b na n tõog n sõnga b kambã tɩ b kelg sõma. (Tõo. 31:12) D fãa segd n lakda d Biibl dãmbã n tũud vɛrse rãmbã karengo. D sã n dɩkd not rãmba, na n sõng-d lame tɩ d yamã ra yũus ye. Tigis-kãsengã poore, d not rãmbã na n sõng-d lame tɩ d tẽeg b sẽn gom bũmb nins yellã. D modg n da sõsd ne taab sõssã sasa, bɩ n yikd n gilgdẽ ye. D sã n tara selilɛɛr me bɩ d ra bas t’a tiis tõnd la neb a taabã sõssã sasa ye. Tigisgã sã n wa sa zaabrã, bɩ y sõsd ne neb a taabã bũmb nins sẽn yɩ yãmb noog tigisgã sasa wã.
6. Zu-no-bʋg la d tar tigis-kãsemsã sasa, la wãn to la d tõe n dɩ rẽ nafa?
6 Rasem a tãab tigis-kãsengã yaa zu-noog d sẽn paam n tõe n sõs ne d saam-biisã la d saam-bi-pogsã n bãngd taab n paasdẽ. La dũniyã neb pa tar zu-no-kãngã buud ye. (Yɩɩl 133:1-3; Mark 10:29, 30) Vʋʋsgã sasa, d tõe n sõsa ne neb nins sẽn kɛg tõndã n bãng-ba. Rẽ n so tɩ d segd n tall rɩɩb sẽn pa na n kɩt tɩ d gũs n wa rɩ, la d ra yi n bao rɩɩb n pa paam n sõs ne-b ye. D modg n da kong zu-no-kãngã d sẽn paam n na n keng taab raoodã ye.—Rom 1:11, 12.
7. Futã wɛɛngẽ, bõe la d segd n maane?
7 D futã: A Zeova sẽn da kõ Israɛll nebã noor tɩ b maan zerd n loe ne gĩs sẽn yaa kẽeg haoo n ning b futã noyã pa zaalem yĩng ye. (Sõd. 15:37-41) Yaa sẽn na yɩl tɩ neb a taabã bãng vẽeneg t’a Zeova yãka bãmb toor tɩ b tũud-a. Rũndã-rũndã, tõnd me sẽn manegd d mens sõma la d ningd fũ-sõma tigis-kãsemsã sasa wã, kɩtdame tɩ d yaa toor dũni kãngã pʋgẽ. D sẽn manegd d mens tɩ yaa sõma wã kõta kaseto, baa tigisgã sã n sa tɩ d na n tɩ bao rɩɩb n dɩ me. Dẽnd d segd n tagsa fut nins d sẽn na n ningã yell sõma.
8. Tigis-kãsengã sasa, bõe n tõe n sõng-d tɩ d tõog n kõ sakã rãmb kasetã?
8 D kõ kasetã: D sã n deng n segl d mense, d na n tõog n kõo sakã rãmb kaset tigis-kãsengã sasa. Tigis-kãseng poore, saam-biig ne a pag n kẽng n na n tɩ bao rɩɩb n dɩ. Saam-biigã wilga rɩ-koaasã a badzã la a sok-a woto: “Yãmb pa ne tɩ neb wʋsg ningã badz rãmb wa tõnd sɩda?” Rɩ-koaasã yeelame tɩ yẽ sɩd nee neb wʋsg sẽn ning badz rãmba, la a pa mi rẽ võor ye. Woto kɩtame tɩ saam-biigã paam n sõs ne-a n bool-a, t’a sɩd sak n wa tigis-kãsengã.
9. Bõe la d tõe n maan n wilg a Zeova d mi-beoogo?
9 Yaa sɩd tɩ yaa tõnd saam-biisã n na n wɛgs sõssã, n maan mak-wilg rãmbã la bool-n-sogsã. La yaa d saasẽ Ba a Zeova sẽn nong tõndã n segl tigis-kãseng kãngã tõnd yĩnga. (Ezai 65:13, 14) D sã n modg n kẽng rasem a tãabã fãa la d kelg sõssã sõma, d wilgda a Zeova d mi-beoogo. Yãmb segla y mens n na n tõog n maan dẽ bɩ?
[Zĩ-gũbri, seb-neng a 3]
Tẽegre, rasem a tãab tigis-kãsengã yĩnga
◼ Sõssã sɩngr wakate: Sõssã na n sɩngda daar fãa yibeoog wakat a 9.20. Mizikã sã n wa sɩnge, d fãa segd n tɩ zĩnda d zĩisẽ tɩ tigis-kãsengã sɩnge. Arzũmã ne sibrã, tigisgã na n saa zaabr wakat a 4.55, la hatã rẽnd sata zaabr wakat a 4.00. Sã n yaa ne tẽn-tẽns tigis-kãsengã, lamusã daare, tigisgã na n sɩnga wakat a 1.20 n baas wakat a 4.45.
◼ Parkĩngã: Ning-y y badz rãmbã sẽn na yɩl tɩ parkĩngã rãmb bãng-y n welge. Tũ-y parkĩngã rãmb noy sõma sẽn na yɩl tɩ sãmpoag ra wa zĩnd ye.
◼ Zĩisã bĩngri: D pa segd n bĩng ned zĩiga, sã n pa mikame t’a soab tũu tõnd n wa tigis-kãsengã, bɩ a bee zak a ye ne tõnd ye.
◼ Midi wã rɩɩbã: Zã-y rɩɩb n wa tɩ vʋʋsgã sasa bɩ y ra yi n tɩ bao rɩɩb ye. D tõe n ninga d rɩɩbã galasɩɛɛr kɩds pʋgẽ n bĩng d zaoogã tẽngre. D pa segd n zã galasɩɛɛr bɛda, la teed buud fãa sẽn maan ne vɛɛr n wa tigis-kãsengã ye.
◼ Kũunã: D tõe n wilga d mi-beoogo, n kõ yamleoog kũun d Rĩungã Roogẽ walla tigis-kãsengã zĩigẽ, sẽn na yɩl n teel tʋʋmdã d sẽn tʋmd dũniyã gill zugã. Burkĩna Faso ka, d sã n na n tũnug ne sɛk n kõ ligdi, d segd n gʋlsa sɛkã zug tɩ Association Les Témoins de Jéhovah du Burkina Faso.
◼ Sãmpoagã la tɩbsgã: Ned sã n dat tɩbsg tao-tao tigis-kãsengã zĩigẽ, bɩ y tɩ yã sãamb rɛɛgda, t’a wilg-y neb nins sẽn get tɩbsgã yellã tɩ b sõng-yã.
◼ Sõssã rɩkre: D pa segd n dɩk aparɛy buud baa a ye n tɩ sel kʋʋrã wã bɩ sono wã zĩigẽ ye. D leb n segd n gũusame n da tiis nebã ye.
◼ Fot yõkre: Y sã n dat n yõk foto sõssã sasa, y pa segd n ning flas ye.
◼ Selilɛɛr dãmbã: B segd n kiisa selilɛɛr dãmbã tɩ ra wa tiis nebã ye.
◼ Parfẽ rãmbã la ka-zaeedmã: Zĩis kẽere, b maanda tigis-kãsemsã zĩis sẽn gũbg pʋsẽ tɩ yaa vãntɩlatɛɛr dãmb bal n kõt pemsmã. Woto yĩnga, yɩta sõma tɩ d gũus ne parfẽ rãmb la ka-zaeedem la mantolato nins yũug sẽn tõe n wa nams neb nins sẽn bẽed vʋʋsmã bãasã.—1 Kor. 10:24.
◼ D tʋm ne Veillez suivre l’intérêt seb-vãoogã: Tigis-kãsengã wakate, d sã n tõog n kõ ned kasetã t’a wilg t’a rat n bãnga koɛɛgã n paase, d segd n gʋlsa rẽ Veillez suivre l’intérêt (S-43) seb-vãoogã zugu. Koe-moondbã segd n zãa seb-vã-kãngã a ye bɩ a yiib n wa tigis-kãsengã. Y sã n gʋls ned yʋʋr seb-vãoogã zugu, y tõe n tɩ kɩsa sẽn get-b sɛbã yell tigis-kãsengã zĩigẽ wã, walla y zã n tɩ kɩs y tigingã sekertɛɛre.—Ges-y yʋʋmd 2005 wao-fugdg kiuug Rĩungã Tʋʋmd seb-neng a 6.
◼ Ro-gãasã: Zĩig ning y sẽn na n gãandẽ fãa bɩ y waoog nebã la y wilg tɩ y nong-b lame. Sã n yaa zak pʋgẽ la b reeg yãmba, bɩ y sõng zakã rãmb ne b tʋʋmã la ne depãens rãmbã wa y sẽn tõe tɛka. Yaoolem daarã, nand tɩ y loog bɩ y maneg rotã n bas-b yɩlma.