D zã d mens sõma tɩ waoog Wẽnnaam
1. Bõe yĩng t’a Zeova Kaset rãmbã sã n tar tigs-kãseng bɩ yaa nana ne nebã tɩ b bãnge?
1 D rasem a tãab tigs-kãsemsã sasa, mi n yaa nana ne nebã tɩ b bãng tɩ d tara tigs-kãsenga. Tẽns wʋsg pʋsẽ, kiba-kɩtbã sɛb wilgdame tɩ d tara tigs-kãsenga. Sẽn paase, nebã nee sãambã sẽn ning tigs-kãsengã badz-rãmbã. Rẽ n so tɩ d na n tẽeg sagls kẽer sẽn na n sõng-d tɩ d waoog Wẽnnaam tẽng ning d tigs-kãsengã sẽn na n zĩndã.—1 Pɩɛ. 2:12.
2. D sã n kẽng tigs-kãsengẽ, d futã sã n zemse, wãn to la tõe n waoog Wẽnnaam?
2 D ning fut sẽn zemse: Naoor wʋsgo, d tigs-kãsemsã sasa, neb kẽer pẽgda tõnd d sẽn ning fut sẽn zemsã. La d sã n wa na n kẽng rɛstoorã pʋgẽ n tɩ rɩ wall butikẽ n na n da teedo, fut nins d sẽn na n ningã me tog n zemsame, bala tõe n kɩtame tɩ sẽn get-b tõndã pẽg-do, wall sãam b sũuri. Baa sẽn pa tɩlae tɩ d ning fut nins d sẽn ningd n kẽnd tigissã, d sẽn na n ning-b rãmbã me segd n yɩɩ sõma, n sek pẽgre. Segd n yɩɩ vẽeneg nebã nifẽ tɩ d yaa toor ne dũniyã rãmba. (Rom 12:2) Sẽn paase, d tog n ningda d badz-rãmbã, bala na n sõngame tɩ nebã bãng tɩ d tara tigs-kãsenga, la kõ-d segb tɩ d moon koɛɛgã. Leb n na n kɩtame tɩ d tẽed-n-taasã bãng-d n welge.
3. Wãn to la d tõe n wilg tɩ d tara sũ-mare, la tɩ d waoogda neba?
3 D tall sũ-mare, la d waoog nebã: Rũndã-rũndã nebã sẽn yaa beed-rãmb la zɩ-beoog rãmbã, d sã n tar sũ-mar la d waoogd nebã, d get-bã sũy na n yɩɩ noogo. Wala makre, rɛstoorã-rãmbã tʋm-tʋmdbã. (2 Tɩm. 3:1-5) Tigs-kãsengã zĩigẽ d sã n na n yãk zaoose, wall d sã n wa na n tong n tɩ reeg seb-paalã, segdame tɩ d bao d taabã nafre, n da bao d meng sõngr bal ye. (1 Kor. 10:23, 24) Rao a ye sẽn kẽng tõnd tigs-kãsengẽ pipi yeela woto: “Mam pa tẽr sõss nins m sẽn kelgã baa a yembr ye. La saam-biisã sẽn zã b mens to-to wã yɩ-m-la noog wʋsgo.”
4. Bõe yĩng tɩ sã n tõe bɩ d tog n sõng n tʋm tigs-kãsengã tʋʋma?
4 D sõng n tʋm ne yamleoogo: Kiris-neb hakɩkã nong n sõngda b taabã ne yamleoogo. (Yɩɩl 110:3) Tigs-kãsengã sasa, yãmb tõe n sõng n tʋma tʋʋmã ne yamleoog bɩ? Sẽn deng tigs-kãseng a yembre, saam-biis la saam-bi-pogs na maan 600 n sõng n pɩɩs zĩigã. Ad sull ning sẽn ges zĩigã yellã taoor dãmb sẽn yeele: “Tõnd da nan zɩ yã woto ye! Kʋʋn-kãngã fãa wa n tʋma ne yamleoogo!” D gũuda yʋʋmd 2013 rasem a tãab tigs-kãsengã ne yãgbo, n na n kelg sõssã toor-toorã n paam zãmsgo, la d waoog Wẽnnaam.