Tẽegre, yʋʋmd 2015 tigis-kãsengã yĩnga
Sõssã sɩngr wakate: B na n pakda tigis-kãsengã zak noor yibeoog wakat a 8. Rasem a tãabã fãa, mizikã na n sɩngda yibeoog wakat a 9 sẽn loog minit 20. Sasa kãnga, d fãa segd n tɩ zĩnda d zĩisẽ tɩ tigsgã sɩng tɩ tiisg ra zĩnd ye. Arzũmã ne sibrã, tigsgã yaoolem yɩɩllã ne pʋʋsgã na n yɩɩ zaabr wakat a 5. La hatã na n yɩɩ zaabr wakat a 4.
‘D pẽg a Zeova ne yɩɩlla’: Pĩnd wẽndẽ, Wẽnnaam a Zeova nin-buiidã ra yɩɩndame n pẽgd-a. Rũndã-rũndã me, yɩɩlã ket n tara yõod tũudum hakɩkã pʋgẽ. (Yɩɩl 28:7) Nand tɩ tigis-kãseng sɛsiõ fãa sɩnge, b rengd n ninga miziki. La pa mizik zaalg ye. Yaa mizik sẽn tõe n sõng-d tɩ d bãng a Zeova la d pẽg-a. Woto wã, tigis-kãsengã perzidã sã n wa yeel tɩ mizikã na n sɩngame, segdame tɩ d bao zĩig n zĩndi, n kelg neere, la d ra ket n sõsd ne taab ye. D sã n maand woto, d wilgdame tɩ d nanda modgr ning siglgã orkɛstrã neb sẽn maandã. Naoor a yiib yʋʋmd fãa, d saam-biis la d saam-bi-pogs n yãkd b ligd n kẽng Patɛrsõn sẽn be Niuyorkã, n tɩ segl yɩɩn-nood tõnd yĩnga. D sã n kelg mizikã n sa, d segd n zẽka d koees n naag n yɩɩl Rĩungã yɩɩl n pẽg a Zeova.
Parkĩngã: Sã n yaa tõnd n na n gũ montɛ wã, wiidi wã la mobila wã, parkĩngã na n yɩɩ zaalem. La naoor wʋsgo, parkĩngã zĩig paoodame. Woto wã, yɩta sõma tɩ y rɩk biis bɩ tagsɩ wall y rɩkd taab n watẽ.
Zĩisã bĩngri: D bõos tɩ b sã n pak tigis-kãsengã zak noor bɩ d ra wẽdg taab n kẽ, la d ra zae zĩisã ye. D wilg tɩ d nonga d taabã, n tõe n sak n mong d meng b yĩnga. Woto, na n yɩɩ vẽeneg tɩ d yaa kiris-neb hakɩka. Sẽn paase, na n kɩtame tɩ gɛtbã waoog Wẽnnaam yʋʋrã. (Zã 13:34, 35; 1 Kor. 13:5; 1 Pɩɛ. 2:12) Y pa segd n bĩng ned zĩiga, sã n pa mikame t’a soab tũu yãmb n wa, bɩ a bee zak a ye ne yãmb wall yaa y Biibl karen-biig ye. Ra yãmb-y zĩig zaalem ne y teedo, tɩ sã n pa zĩig y sẽn bĩng ned yĩng ye. Woto, neb a taabã paamda zĩig n zĩndi. B yãka zĩis n bĩng sẽn kʋʋl-bã la koms-rãmbã. Zĩ-kãens sõorã sẽn pa waoogã, yaa neb nins sẽn get nin-kãensã yellã bal n tõe n zĩnd ne-ba.
D ning fut sẽn zemse: D segd n gũusame tɩ fut nins d sẽn na n yelg tigis-kãsengã sasa wã zemse, tɩ d ra wõneg dũniyã neb ye. (1 Tɩm. 2:9) Baa d gãagã zĩigẽ, pemsem kokr sasa, wall nand tɩ tigsgã sɩng pa rẽ bɩ a poore, d futã segd n kell n yɩɩ sõma. Woto, d na n tõog n ninga d badz-rãmbã tɩ d sã n paam segb bɩ d kõ kasetã n pa zoe yãnd ye. Tigis-kãsemsã sẽn watã sasa, d sã n maneg d mens sõma la d tall manesem sẽn zemse, na n yɩɩ sabab tɩ sũ-tɩrs rãmbã tʋlg n kelg Biiblã koɛɛg sẽn fãagd yõyã. Sẽn paase, na n waooga a Zeova.—Sof. 3:17.
D gũus n da tiis d taabã ne tɛknolozi wã teed ye: Y sã n tara portaable, taablɛt bɩ bũmb sẽn wõnd woto, bɩ y ra bas t’a tiis nebã tigsgã sasa ye. Y sã n dat n pa y zĩigẽ wã n filim bũmb bɩ n yõk foto, segdame tɩ y waoog y taabã n da lill-ba, wall y tiisd-b ye. Y pa segd me n zĩ n toond mesaaz-rãmb sẽn pa tɩlae tigsgã sasa ye.
Midi wã rɩɩbã: Zã-y rɩɩb n wa, tɩ vʋʋsgã sasa bɩ y ra yi n tɩ bao rɩɩb ye. Y tõe n ninga y rɩɩbã galasɩɛɛr kɩds pʋgẽ n bĩng y zaoosã tẽngre. Y pa segd n zã galasɩɛɛr bɛd n wa yãmb zĩigã, wall teoog buud fãa sẽn maan ne vɛɛr ye.
Kũunã: D tõe n wilga d sũ-noog n kõ kũun tigis-kãsengã zĩigẽ, n teel tʋʋmdã d sẽn tʋmd dũniyã gill zugã. Burkĩna Faso ka, d sã n na n tũnug ne sɛk n kõ ligdi, d segd n gʋlsa sɛkã zug tɩ Association Les Témoins de Jéhovah du Burkina Faso. Y tõe n kɩtame me tɩ y bãnkã maan trãnsfɛɛre, rat n yeel tɩ n yãk ligd yãmb kõntẽ wã, n ning Association Les Témoins de Jéhovah du Burkina Faso kõntã pʋgẽ.
Tɩbsgã: Y sã n bẽedame n tar tɩɩm y sẽn vond bɩ y zã n wa. Bala ned sã n ka laafɩ, a pa tõe n paam tɩɩm tigis-kãsengã zĩigẽ ye. Ned sã n bẽeda dɩabɛt n pikdẽ, bɩ a gũus n da wa lob a serẽng-rãmbã tigis-kãsengã zĩigẽ bɩ a gãag-soabã zakẽ yaar ye.
D koglg d mense: Gũus-y n da wa lak wall n salg n lʋɩ n pogl ye. Yʋʋmd fãa, neb wʋsg n pogend b sẽn wid neood-wogd yĩnga. Rẽnd sẽn são yaa y wid neooda sẽn zemse, sẽn na sõng-y tɩ sẽn yaa zĩig ning fãa bɩ y tõog n kẽn sõma.
Sẽn pa wʋmd-b sõma wã yĩnga: Sõssã na n zĩnda radio-rãmbẽ. Sẽn dat-a n kelg bɩ a zã radio-bil ne ekutɛɛr-dãmba, n tõog n kelge.
Gãag-sobendã: Sẽn yaa zĩig ning fãa la y sig sãand bɩ y tall sũ-mare, la y wilg tɩ y yaa wʋmdba. Sã n yaa y roagd wall y miting zakẽ la y sig-yã, bɩ y sõng-b ne depãens-rãmbã la zakã tʋʋm kẽere. Nand tɩ y loog bɩ y maneg y gãagã zĩig sõma, tɩ bũmba fãa yɩ yɩlemde.
Parfẽ-rãmbã la ka-zaeedmã: B maanda tigis-kãsemsã kẽer zĩis sẽn gũbg pʋsẽ, tɩ yaa vãntɩlatɛɛr-dãmb bal n kõt pemsmã. Woto yĩnga, yɩta sõma tɩ d gũus ne parfẽ-rãmba, ka-zaeedem la mãntolato nins yũug sẽn tõe n wa nams neb nins sẽn bẽed vʋʋsmã bãasã.—1 Kor. 10:24.
Yamleoog tʋm-tʋmdba: Y sã n dat n sõng n tʋm tʋʋmã, bɩ y togs tigis-kãsengã sull ning sẽn get rẽ yellã. Baa biig yʋʋm pa ta 16, a tõe n naaga a roagdb n sõng n tʋm yamleoog tʋʋmã.
Rɛstoorã-rãmbẽ wã: Mao-y tɩ y manesem yɩ sõma rɛstoorã-rãmbẽ wã tɩ waoog a Zeova. Gũus-y tɩ y sẽn manegd y mens to-to wã wilg tɩ y yaa kiris-neb hakɩka. Rɛstoorã pʋgẽ, b sã n maan bũmb n kõ-y bɩ y tẽeg n pʋʋs barka.
Lotɛll-dãmbã:
Ra n kos-y tɩ b bĩng rot wʋsg tɩ yɩɩg y sẽn datã, la y gũus n da reeg neb wʋsg y ro-gãagã pʋgẽ tɩ yɩɩg sõor ning b sẽn kõ wã ye.
Sã n pa mikame tɩ gɩdgr n zĩndi, bɩ y modg n dɩk roogã y sẽn kosã. Y sã n wa pa na n tõog bɩ y wilg lotɛllã rãmb tao-tao, tɩ b paam n dɩk roogã n kõ sẽn dat-ba. (Mat. 5:37) Sã n wa yaa tɩlae tɩ y bas roog bɩ y mao n paam kaset sẽn wilgd tɩ y basa roogã. Y sã n dat n bas roog y sẽn da kose, bɩ y modg n wilg tɩ ket rasem a yi. Sã n pa rẽ, lotɛllã rãmb pa na n lebs yãmb y ligdã ye.
Bãng-y tɩ y sã n tũnug ne kart de kredi n kos tɩ b bĩng-y roog lotɛll pʋgẽ, naoor wʋsgo, yaa yãmb loogrã daar la b lebsd-y kartã. Bala, lotɛllã rãmb kelld n tall-a lame tɩ y sã n wa tar b samde, pa rẽ bɩ y sã n wa sãam bũmb roogã pʋg bɩ b kell n yãk ligdã yãmb kõntã zugu.
Y sã n na n deeg puus-puus n wʋk y teedo, segd n mikame tɩ raab n sɩd be. La rẽ poor bɩ y tɩ lebs tao-tao tɩ neb a taab me paame.
Tẽngã neb sã n minim n kõta lotɛll tʋm-tʋmdb ligd b modgr toor-toorã yĩng bɩ yãmb me maan woto.
Y sã n dat n segla rɩɩb y ro-gãagã pʋgẽ bɩ y reng n bao n bãng b sã n kõo sore.
Lotɛllã rãmb sã n bĩnga rɩɩb wala no-soak bɩ kafe ro-gãasã pʋsẽ, bɩ y rɩ n zems la y ra maan yão-beed ye.
Zã-y y mens sõma ne lotɛllã tʋm-tʋmdba, tɩ yɩ vẽeneg tɩ y tara zʋg-sõma nins vʋʋsem sõngã sẽn kõtã. Tẽeg-y tɩ lotɛllã tʋm-tʋmdb geta neb wʋsg yelle. Y sã n tall sũ-mar la y wilg tɩ y yaa wʋmdba, na n yɩ-b-la noogo.
Lotɛll-dãmbẽ wã, roagdbã segd n gũusa b kambã neere. Wala makre, pemsmã kokr zĩisẽ la zĩis a taaba.
Rotã kosg sebr zugu, ligdã sõor b sẽn ningã yaa daar a ye fãa yaoodo, rɩɩbã la teed a taab ligd sẽn pa naage. B sã n kos-y tɩ y yao tɩ zʋʋg rẽ bɩ y tõdge, la y togs sẽn get-b rotã yellã.
Y sã n mik tɩ y roogã bũmb ning n dat manegre, bɩ y togs tigis-kãsengã sull ning sẽn get ro-gãasã yellã tɩ b sõng-yã.
Yamleoog tʋm-tʋmdba: Y sã n dat n sõng n tʋm tʋʋmã, bɩ y togs tigis-kãsengã sull ning sẽn get rẽ yellã. Baa biig yʋʋm pa ta 16, a tõe n naaga a roagdb n sõng n tʋm yamleoog tʋʋmã.