‘Bɩ yãmb yel-manesem yɩ sõma neb nins sẽn ka pʋʋsd Wẽnnaamã sʋka’
1. Bõe yĩng tɩ d segd n zã d mens sõma tigis-kãsemsã sasa?
1 Yʋʋmd fãa, tõnd tigis-kãsemsã sasa, nebã bãngdame tɩ d tara tigsga. Woto yĩnga, segdame tɩ d zã d mens sõma tɩ wilg tɩ d yaa Wẽnnaam nin-buiidu. (Maan. 20:26) Tõnd yel-manesmã, d fu-yerdɩ wã la d sẽn maneg d mens to-to wã segd n wilga vẽeneg tɩ d yaa kiris-neb hakɩka. Rasem a tãab tigis-kãsengã wall tẽns toɛy-toɛy sẽn naag taab tigis-kãsemsã sasa, bõe la d tõe n maan n kell n tall manesem sẽn yaa sõma neb nins sẽn pa pʋʋsd Wẽnnaamã sʋka, tɩ waoog d saasẽ Ba wã?—1 Pɩɛ. 2:12.
2. Tigis-kãsengã sasa, segb bʋs la d tõe n paam n wilg tɩ d yaa kiris-neb hakɩka?
2 D wilg tɩ d yaa kiris-neb hakɩka: Tõnd sẽn wilgd to-to tɩ d nonga d tẽed-n-taasã la neb a taabã kɩtame tɩ d yaa toor fasɩ ne dũniyã neba. (Kol. 3:10; 4:5; 2 Tɩm. 3:1-5) Segdame tɩ d tall sũ-mar la d zã d mens sõma d gãag-soben-dãmbã zagsẽ la rɛstoorã-rãmbẽ wã, parkĩng-rãmbẽ wã la zĩis a taaba, baa d sã n seg zu-loɛɛga. Togame tɩ d waoogd nebã, tɩ b sã n maan bũmb n kõ-d bɩ d tẽeg n pʋʋs barka.
3. Bõe la roagdbã segd n maane, la bõe yĩnga?
3 Roagdbã segd n gũusa b kambã sõma b gãag-soben-dãmbã zagsẽ la zĩig fãa. (Yel. 29:15) Rɛstoorã a ye taoor soab yeela tõnd saam-biig ne a pag woto: “Tõnd nonga yãmb wʋsgo. Yãmb a Zeova Kaset rãmbã ne y kambã zãada y mens sõma la y waoogd neba. Tõnd fãa ra gomda yãmb yelle, n nongẽ tɩ y wat ka wɩkɛn fãa.”
4. Tigis-kãsengã sasa, wãn to la d segd n maneg d mense?
4 D ning fut sẽn zemse: D segd n gũusame tɩ fut nins d sẽn na n yelg tigis-kãsengã sasa wã zemse, tɩ d ra wõneg dũniyã neb ye. (1 Tɩm. 2:9) Baa d gãagã zĩigẽ, pemsem kokr sasa, wall nand tɩ tigsgã sɩng pa rẽ bɩ a poore, d futã segd n kell n yɩ sõma. Woto, d na n tõog n ninga d badz-rãmbã tɩ d sã n paam segb bɩ d kõ kasetã n pa zoe yãnd ye. Tigis-kãsemsã sẽn watã sasa, d sã n maneg d mens sõma la d tall manesem sẽn zemse, na n yɩɩ sabab tɩ sũ-tɩrs rãmbã tʋlg n kelg Biiblã koɛɛg sẽn fãagd yõyã. Sẽn paase, na n waooga a Zeova.—Sof. 3:17.
[Zĩ-gũbri, seb-neng 2-5]
Tẽegre, yʋʋmd 2014 rasem a tãab tigis-kãsengã yĩnga
◼ Sõssã sɩngr wakate: B na n pakda tigis-kãsengã zak noor yibeoog wakat a 8. Rasem a tãabã fãa, mizikã na n sɩngda yibeoog wakat a 9 sẽn loog minit 20. Sasa kãnga, d fãa segd n tɩ zĩnda d zĩisẽ tɩ sɩng tɩ tiisg ra zĩnd ye. Arzũmã ne sibrã, tigsgã yaoolem yɩɩllã ne pʋʋsgã na n yɩɩ zaabr wakat a 4 sẽn loog minit 55. La hatã na n yɩɩ zaabr wakat a 3 sẽn loog minit 50.
◼ Tẽns toɛy-toɛy tigis-kãsenga: Tẽns kẽer pʋsẽ, tẽns toɛy-toɛy n na n seg taab n maan tigis-kãsengã. Tẽeg-y tɩ filiyallã zoe n boola tigims nins sẽn na n kẽngã, ne sẽn na n yi-b tẽn-zẽms n wa wã. B maga zaoosã, parkĩng-rãmbã la ro-gãasã tɩ zems nebã sõore. Koe-moondb sã n kẽng tɩ b pa bool-ba, kɛlgdbã sõor na n looga noor tɩ zĩisã paooge. Rẽ yĩnga, y sã n pa na n tõog n kẽng tigsg ning yãmb tigingã sẽn segd n kẽngã, bɩ y ra kẽng tẽns toɛy-toɛy tigis-kãsengẽ ye.
◼ Parkĩngã: Sã n yaa tõnd n so zĩig ning d sẽn na n dɩgl d montɛyã la d mobila wã, parkĩngã na n yɩɩ zaalem. La naoor wʋsgo, parkĩngã zĩig paoodame. Woto wã, yɩta sõma tɩ y rɩk biis bɩ tagsɩ wall y rɩkd taab n watẽ.
◼ Zĩisã bĩngri: D bõos tɩ b sã n pak tigis-kãsengã zak noor bɩ d ra wẽdg taab n kẽ, la d ra zae zĩisã ye. Tẽeg-y tɩ tõnd ned kam fãa sã n sakd n mongd a meng a taabã yĩnga, a wilgdame t’a yaa kiris-ned hakɩka. Sẽn paase, kɩtdame tɩ gɛtbã waoogd Wẽnnaam yʋʋrã. (Zã 13:34, 35; 1 Kor. 13:4, 5; 1 Pɩɛ. 2:12) D pa segd n bĩng ned zĩiga, sã n pa mikame t’a soab tũu tõnd n wa, bɩ a bee zak a ye ne tõnd wall yaa d Biibl karen-biig ye. B yãka zĩis n bĩng sẽn kʋʋl-bã la koms-rãmbã. Zĩ-kãens sõorã sẽn pa waoogã, yaa neb nins sẽn get nin-kãensã yellã bal n tõe n zĩnd ne-ba.
◼ Midi wã rɩɩbã: Zã-y rɩɩb n wa, tɩ vʋʋsgã sasa bɩ y ra yi n tɩ bao rɩɩb ye. D tõe n ninga d rɩɩbã galasɩɛɛr kɩds pʋgẽ n bĩng d zaoosã tẽngre. D pa segd n zã galasɩɛɛr bɛda, la teoog buud fãa sẽn maan ne vɛɛr n wa tigis-kãsengã ye.
◼ Kũunã: D tõe n wilga d mi-beoogo, n kõ yamleoog kũun d Rĩungã Roogẽ walla tigis-kãsengã zĩigẽ, sẽn na yɩl n teel tʋʋmdã d sẽn tʋmd dũniyã gill zugã. Burkĩna Faaso ka, d sã n na n tũnug ne sɛk n kõ ligdi, d segd n gʋlsa sɛkã zug tɩ Association Les Témoins de Jéhovah du Burkina Faso. Y tõe n kɩtame me tɩ y bãnkã yãk ligd yãmb kõntẽ wã n tool tɩ b ning Association Les Témoins de Jéhovah du Burkina Faso kõntã pʋgẽ.
◼ Tɩbsgã: Y sã n bẽedame n tar tɩɩm y sẽn vond bɩ y zã n wa. Bala ned sã n ka laafɩ, a pa tõe n paam tɩɩm be ye. Ned sã n bẽeda dɩabɛt n pikdẽ, bɩ a gũus n da wa lob a serɩng-rãmbã tigis-kãsengã zĩigẽ bɩ a gãag-soabã zakẽ yaar ye.
◼ D koglg d mense: Gũus-y n da wa lak wall n salg n lʋɩ n pogl ye. Yʋʋmd fãa, neb wʋsg n pogend b sẽn wid neood-wogd yĩnga. Rẽnd sẽn são yaa y wid neooda sẽn zemse, sẽn na sõng-y tɩ sẽn yaa zĩig ning fãa bɩ y tõog n kẽn sõma.
◼ Wʋmsã: Sõssã na n zĩnda radio-rãmbẽ wʋmsã yĩnga. Sẽn dat-a n kelg bɩ a zã radio-bil ne ekutɛɛr-dãmba, n tõog n kelge.
◼ Zaoos b sẽn tõe n bilim bɩ n põde: Ra n zã-y zaoos a woto buud n wa tigis-kãsengẽ wã ye. Y sã n tara bi-pɛɛlg n dat n zã a zaoogã n wa, segd n yɩɩ zaoog a sẽn tõe n zomb n pa lʋɩ la sẽn pa yãmbd zĩiga.
◼ Parfẽ-rãmbã la ka-zaeedmã: Zĩis kẽere, b maanda tigis-kãsemsã zĩis sẽn gũbg pʋsẽ tɩ yaa vãntɩlatɛɛr-dãmb bal n kõt pemsmã. Woto yĩnga, yɩta sõma tɩ d gũus ne parfẽ-rãmba, ka-zaeedem la mãntolato nins yũug sẽn tõe n wa nams neb nins sẽn bẽed vʋʋsmã bãasã.—1 Kor. 10:24.
◼ D tʋm ne Veillez suivre l’intérêt (S-43) seb-vãoogã: Tigis-kãsengã wakate, d sã n tõog n kõ ned kasetã t’a wilg t’a rat n bãnga koɛɛgã n paase, bɩ d gʋls rẽ Veillez suivre l’intérêt (S-43) seb-vãoogã zugu. Gʋls-y-yã a soabã yʋʋr seb-vãoogã zug n tɩ kɩs sẽn get-b sɛbã yell tigis-kãsengã zĩigẽ wã, wall y tigingã sekertɛɛre.
◼ Rɛstoorã-rãmbẽ wã: D mao tɩ d yel-manesem yɩ sõma rɛstoorã-rãmbẽ wã tɩ waoog a Zeova. D gũus tɩ d sẽn manegd d mens to-to wã wilg tɩ d yaa kiris-neb hakɩka. Rɛstoorã pʋgẽ, b sã n maan bũmb n kõ-d bɩ d tẽeg n pʋʋs barka.
◼ Lotɛll-dãmbã:
1) Ra n kos-y tɩ b bĩng rot wʋsg tɩ yɩɩg y sẽn datã, la y gũus n da reeg neb wʋsg y ro-gãagã pʋgẽ tɩ yɩɩg sõor ning b sẽn kõ wã ye.
2) Sã n pa mikame tɩ yaa tɩlae bɩ y ra kos tɩ b rɩk rot nins y sẽn kosã n kõ neb a taab ye. Y sã n wa pa na n tõog n kẽng bɩ y wilg lotɛllã rãmb tao-tao tɩ b paam n dɩk roogã n kõ sẽn dat-ba. (Mat. 5:37) Sã n wa yaa tɩlae tɩ y bas roog bɩ y mao n paam kaset sẽn wilgd tɩ y basa roogã. Y sã n dat n bas roog y sẽn da kose, bɩ y modg n wilg tɩ ket rasem a yi. Sã n pa rẽ, lotɛllã rãmb pa na n lebs yãmb y ligdã ye.
3) Bãng-y tɩ y sã n tũnug ne kart de kredi n kos tɩ b bĩng-y roog lotɛll pʋgẽ, naoor wʋsgo, yaa yãmb loogrã daar la b lebsd-y kartã. Bala, lotɛllã rãmb kelld n tall-a lame tɩ y sã n wa tar b samde, pa rẽ bɩ y sã n wa sãam bũmb roogã pʋg bɩ b kell n yãk ligdã yãmb kõntã zugu.
4) Y sã n na n deeg puus-puus n wʋk y teedo, segd n mikame tɩ raab n sɩd be. La rẽ poor bɩ y tɩ lebs tao-tao tɩ neb a taab me paame.
5) Tẽngã neb sã n minim n kõta lotɛll tʋm-tʋmdb ligd b modgr toor-toorã yĩng bɩ yãmb me maan woto.
6) Y sã n dat n segla rɩɩb y ro-gãagã pʋgẽ bɩ y reng n bao n bãng b sã n kõo sore.
7) Lotɛllã rãmb sã n bĩnga rɩɩb wala no-soak bɩ kafe ro-gãasã pʋsẽ, bɩ y ra vaag n kẽng tigis-kãsengã zĩigẽ ye.
8) Zã y mens sõma ne lotɛllã tʋm-tʋmdba, tɩ yɩ vẽeneg tɩ y tara zʋg-sõma nins vʋʋsem sõngã sẽn kõtã. Tẽeg-y tɩ lotɛllã tʋm-tʋmdb geta neb wʋsg yelle. Y sã n tall sũ-mar la y wilg tɩ y yaa wʋmdba, na n yɩ-b-la noogo.
9) Lotɛll-dãmbẽ wã, roagdbã segd n gũusa b kambã neere. Wala makre, pemsmã kokr zĩisẽ la zĩis a taaba.
10) Rotã kosg sebr zugu, ligdã sõor b sẽn ningã yaa yʋng a ye fãa yaoodo, rɩɩbã la teed a taab ligd sẽn pa naage. B sã n kos-y tɩ y yao tɩ zʋʋg rẽ bɩ y tõdge, la y togs sẽn get-b rotã yellã.
11) Y sã n mik tɩ y roogã bũmb ning n dat manegre, bɩ y togs tigis-kãsengã sull ning sẽn get ro-gãasã yellã tɩ b sõng-yã.
◼ Yamleoog tʋm-tʋmdba: Y sã n dat n sõng n tʋm tʋʋmã, bɩ y togs tigis-kãsengã sull ning sẽn get rẽ yellã. Baa biig yʋʋm pa ta 16, a tõe n naaga a roagdb n sõng n tʋm yamleoog tʋʋmã.