Ket-y n gũud-y-yã a Zeova
1. Rasem a tãab tigis-kãsengã gom-zug yaa bʋgo, la bõe yĩng t’a zemse?
1 A Ezai gʋlsa woto: ‘A Zeova yaa Wẽnnaam sẽn yaa tɩrga. Ned ninga fãa sẽn tẽed yẽ, a tara sũ-noogo.’ (Ezai 30:18b) Biiblã tara kibay wʋsg sẽn wilgd Wẽnnaam sẽn kao a bɛɛb bʋʋd n sɩbg-ba, la a sẽn fãag a sõgen dãmbã. Bõe la kiba-kãens zãmsd a Zeova balemdbã rũndã-rũndã? Bõe la tõnd tõe n maan masã tɛk n segl d mens n gũ a Zeova “ra-kãsengã sẽn tar dabeemã” sẽn watã? (Zoɛll 3:4, 5) Tõnd rasem a tãab tigis-kãseng ning sẽn watã na n kɩtame tɩ d tags sogs-kãensã zut la d vaees d mens neere. A gom-zugã la woto: “Tõnd fãagrã ta n saame!” Tigis-kãsen-kãngã na n sõng-d lame tɩ d ket n gũud a Zeova.
2. Wãn-wãn la d tõe n wilg tɩ d nanda d rasem a tãab tigis-kãsengã?
2 Yãmb zoe n segla y mens sẽn na yɩl n tõog n zĩnd tigis-kãsengẽ wã a rasem a tãabã fãa n dɩ a nafa bɩ? Wala makre, y zoe n yẽsa ne y tʋʋmdã taoor soab n gãneg t’a na n kõ-y vʋʋsem dẽ yĩng bɩ? Ra tags-y tɩ y na n paama sor y tʋʋmã zĩigẽ nana-nana ye. Reng-y n pʋʋs-y rẽ wɛɛngẽ n yaool n tɩ kose. (Neh. 2:4, 5) D segdame me n bao d sẽn na n maaneg n ta tigis-kãsengã zĩigẽ, d gãag zĩiga, la bũmb nins fãa sẽn yaa tɩlae ne-dã. D sã n deng n segl d mens sõma, d wilgdame tɩ d nanda tẽeb rɩɩb ning a Zeova sẽn segl n na n kõ-dã wʋsgo. Kãsem dãmbã segd n gesame tɩ b sõng neb nins fãa sẽn segd ne sõngrã, sẽn yɩɩd fãa tigingã neb nins sẽn kʋʋlã.—Gal. 6:10.
3. A Zeova Kaset rãmbã sẽn maand b tigis-kãseng tẽng ning pʋgẽ wã, b zʋg bʋs n segd n yɩ vẽeneg nebã nifẽ?
3 Yel-manesem sẽn yaa sõma tallg pẽgda Wẽnnaam: Tõnd sã n wa tigim taab wʋsg d tigis-kãsemsẽ wã, d yel-manesmã sẽn yaa sõma wã kõta kaset neb nins sẽn get tõndã. Woto baoodame tɩ d maan bõe? Segdame tɩ d sã n wa tɩ be lotɛll dãmbẽ wã, rɩɩb zĩisẽ wall zĩis a taaba, bɩ d mao n tall sũ-bʋgsem la yõk-m-menga, la d yɩ maan-tɩ-zems rãmba, tɩ neb nins d sẽn segd zĩ-kãensã sũy yɩ noog ne-do. (Gal. 5:22, 23; Fil. 4:5) Tõnd ned kam fãa segd n puka nonglem ning sẽn ‘ka maand sẽn ka zemsã, sẽn ka baood a meng sõngr bal la a ka maand sũ-yikrã.’ Baa zu-loees sã n wa kẽ sʋka, d segd ‘n maana bũmba fãa Wẽnnaam waoogr yĩnga.’—1 Kor. 10:31; 13:5.
4. Wãn-wãn la roagdbã tõe n sõng b kambã tɩ b tall yel-manesem sẽn pẽgd a Zeova?
4 Tigis-kãseng a yembr loogr poore, lotɛll taoor soab a ye sũur yɩɩ noog wʋsg ne tõnd kom-bɩɩsã, b yel-manesmã la b sẽn maneg b mens to-to wã yĩnga. Rẽ kɩtame t’a yeel tɩ yẽ ratame t’a Zeova kaset rãmbã sigd a lotɛllẽ wã. Ad woto sɩd noogda d sũyã! La wilgdame me tɩ roagdbã sɩd modgd n kibinda b kambã, la tɩ b gũusd n geta b sẽn maandã. Lotɛll dãmbẽ wã, pa sõmb tɩ roagdbã basd b kambã nebã sʋk n pa gũusd-b ye. B segd n gũusa kambã neere. (Yel. 29:15) Bɩ d ges tɩ d kambã pẽg a Zeova la b noog a sũur ne b yel-manesem sõngã!—Yel. 27:11.
5. Wãn-wãn la d tõe n pẽg a Zeova ne d sẽn manegd d mensã to-to wã?
5 D maneg d mens sõma: Tõnd ned kam fãa sã n maneg a meng sõma, a tõe n sõngame tɩ tigis-kãsengã yɩ neere. Dẽ yĩng bɩ d ra ning fu-yood wala fu-koeese, sẽn sẽbd bɩ sẽn pa segd n ning n kẽ neb sʋk ye. D segd n manega d mens sõma me d sẽn wat n debd tigis-kãsengã bɩ d sã n wa lebgdẽ, d sã n wa tɩ sõngd n manegd tigis-kãsengã zĩiga, la sõssã sasa. Tõnd sẽn yaa Wẽnnaam a Zeova sõgen dãmbã yĩnga, yaa a Zeova yʋʋrã pẽgr n segd n pak-d n tɩ yɩɩda, pa sẽn noom tõndã ye. Zak soab fãa n segd n ges t’a zakã neb maneg b mens sõma tɩ zemse.—1 Tɩm. 2:9.
6. Bõe yĩng tɩ d segd n kell n maneg d mens sõma tigissã poor d sẽn wat n kokd pemsmã?
6 Segdame me tɩ d sã n wa tɩ kokd pemsem lotɛll dãmbẽ wã wall d rebd koosem zĩisẽ, bɩ mik tɩ d sẽn maneg d meng to-to wã yaa sõma. Yɩta sõma tɩ tigis-kãsengã poore, d sã n na n tɩ rɩ bɩ d ra toeem fut ye. D sã n ning d badz rãmbã, tõe n kɩtame tɩ d paam sor n kõ kasetã.—2 Kor. 6:3, 4.
7. Wãn-wãn la d tõe n sõng n kɩt tɩ bũmbã fãa maan tɩ zemse, la tɩ tigis-kãsengã yɩ noogo? (Ges-y sagls nins sẽn be “Tẽegr dasem a tãab tigis-kãsengã yĩngã” pʋgẽ.)
7 A Ezai ra pĩnd n wilga woto: “Zusoaba gũuda wakat n na n ning yãmb barka. Yaa rẽ n kɩt tɩ b yikd n na n zoe yãmb nimbãanega.” (Ezai 30:18a) A Zeova nimbãan-zoeerã la a lohorem d sẽn pa segd ne wã tog n kɩtame tɩ d sẽn wat n tigim taabã sasa bɩ d pẽg-a ne d yel-manesmã la d sẽn manegd d mensã to-to wã. Bɩ d rasem a tãab tigis-kãsengã gom-zug sẽn yaa “Tõnd fãagrã ta n saame!” wã pẽg Wẽnnaam la a sõng-d tɩ d ket n gũud-a!
[Zĩ-gũbri, seb-neng a 4]
Tẽegr dasem a tãab tigis-kãsengã yĩnga:
◼ Tigim-taabã sɩngr wakate: Tigim-taabã na n sɩngda daar fãa yibeoog wakat a 9 wã sẽn loog minit 30. Wakat bilf sẽn deng sɩngrã, b sẽn wat n ning Rĩungã yɩɩllã, perzidã wã na n tɩ zĩnda ɛstaraadã zugu. Wakat kãnga, d fãa segd n tɩ zĩnda d zĩisẽ, sẽn na yɩl t’a sɩngrã tall waoogre. Arzũmã raar tigim-taabã na n saa zaabr wakat a 5 wã sẽn loog minit 15. Sibrã rẽnd sata zaabr wakat a 5 sẽn loog minit a 5, tɩ hatã tigim-taabã na n tek zaabr wakat a 4 sẽn loog minit 10.
◼ Parkĩngã: Ning-y y badz rãmbã sẽn na yɩl tɩ parkĩngã rãmb bãng-y n welge. Tũ-y parkĩngã tʋm-tʋmdb noy sõma sẽn na yɩl tɩ sãmpoag ra wa zĩnd ye.
◼ Zĩisã bĩngri: D pa segd n bĩng ned zĩiga, sã n pa mikame t’a soab tũu tõnd n wa tigis-kãsengã, bɩ a bee zak a ye ne-d ye.
◼ Midi wã rɩɩbã: Zã-y rɩɩb n wa tɩ vʋʋsgã sasa bɩ y ra yi tigis-kãsengã zĩigẽ n tɩ bao rɩɩb ye. D tõe n zãa galasɩɛɛr kɩds d sẽn tõe n bĩng d zaoogã tẽngre. D pa segd n wa ne galasɩɛɛr bɛd la teed buud fãa sẽn maan ne vɛɛre, la rãam n wa tigis-kãsengẽ wã ye.
◼ Kũunã: Tigis-kãseng seglg baooda ligd wʋsgo. D tõe n wilgame tɩ d nanda segl-kãens n kõ yamleoog kũun n teel tʋʋmdã b sẽn tʋmd dũniyã gill zugã d Rĩungã Roogẽ wall tigis-kãsengã zĩigẽ. Burkĩna Faso ka, d sã n na n tũnug ne sɛk n kõ ligdã, d sɛkã zug d segd n gʋlsame tɩ “Association les Témoins de Jéhovah.” D bõos tɩ y tɩ yã tigis-kãsengã yel-gɛtb sull n dɩ moor dẽ wɛɛngẽ n paase.
◼ Sãmpoagã la tɩbsg nins sẽn baood yãgbã: Ned sã n dat tɩbsg ne yãgb tigis-kãsengã zĩigẽ bɩ y tɩ yã yamleoog tʋm-tʋmd t’a wilg-y sẽn get-b tɩbsgã yellã tɩ b sõng-yã. Neb nins sẽn yaa bãad rãmbã segd n zãa b tɩɩm n wa.
◼ Sõssã rɩkre: D pa segd n tall post buud fãa d sẽn wa ne n na n dɩk sõssã n tɩ sel kʋʋrã wã bɩ wʋmbã teed zĩigẽ ye. D leb n segd n gũusame tɩ d sã n na n tʋm ne-b bɩ b ra tiis nebã ye.
◼ Fot yõkre: Y sã n yõgd foto rãmb tigim-taabã sasa, y pa segd n ning flas ye.
◼ Telefõn selilɛɛr dãmbã: B segd n kiisa telefõn selilɛɛr dãmbã tɩ b ra wa tiis nebã ye.
◼ Parfẽ rãmbã la ka-zaeedmã: Zĩis kẽere, d maanda tigis-kãsemsã zĩis sẽn gũbg pʋsẽ tɩ yaa vãntɩlatɛɛr dãmb bal n kõt pemsmã. Woto yĩnga, yɩta sõma tɩ d gũus ne parfẽ rãmb la ka-zaeedem nins yũug sẽn tõe n wa nams neb nins sẽn bẽed vʋʋsmã bãasã.—1 Kor. 10:24.
◼ D tʋm ne Veillez suivre l’intérêt seb-vãoogã: Tigis-kãsengã wakate, d sã n paam segb n kõ ned kasetã t’a wilg t’a tʋll n bãnga koɛɛgã n paase, d segd n pidsa Veillez suivre l’intérêt (S-43) seb-vãoogã. Koe-moondbã segd n zãa seb-vã-kãngã a ye wall a yiib n wa. Sẽn get-b tigis-kãsengã sɛb yellã segd n gesame t’a zĩnd sɛbã sʋka. Y sã n pids seb-vãoogã, y tõe n kɩs-a-la sẽn get-b sɛbã yellã, wall y bas tɩ tigis-kãsengã loogr poor bɩ y kɩs-a y tigingã sekertɛɛre.—Ges-y yʋʋmd 2005 wao-fugdg kiuug Rĩungã Tʋʋmde, seb-neng a 8.
◼ Ro-gãasã: Zĩig ning y sẽn na n gãandẽ fãa bɩ y puk vʋʋsem sõngã biis y manesmã ne nebã pʋgẽ. Yɩ-y nin-sõma, wilg-y nonglem la y waoog nebã. Sã n yaa zak pʋgẽ la b reeg-y bɩ y teel zakã rãmb ne b tʋʋmã la ne depãens rãmbã wa y sẽn tõe tɛka. Yaoolem daarã, nand tɩ y loog bɩ y maneg rotã n bas-b yɩlma.