‘D lagem taab n zẽk a yʋʋrã’
1. Segb bʋg la d na n paam n lagem taab n zẽk Wẽnnaam yʋʋrã, la bõe la d tõe n maan masã n segl rẽ?
1 Yɩɩl-gʋlsdã yɩɩla woto: ‘D lagem taab n pẽg a Zeova la d zẽk a yʋʋre.’ (Yɩɩl 34:4) “Tũ-y Wẽnnaam” tigims gĩn sull tigis-kãsengã sẽn watã na n kõ-d-la segb tɩ d lagem ne d saam-biis la d saam-bi-pogs sẽn yit tigims wʋsg pʋsẽ n zẽk a Zeova yʋʋrã. Yãmb zoe n baoo gãag zĩig bɩ, y zoe n segla y tãrspoorã la y bõos sor y tʋʋma zĩigẽ bɩ? Yaa yam tʋʋmd tɩ d reng pĩnd n segl bõn-kãensã.—Yel. 21:5, Sebr Sõngo.
2. Bõe yĩng tɩ tar yõod tɩ d segl n ta tigis-kãsengã zĩigẽ pĩnda?
2 D sã n ta tigis-kãsengã zĩigẽ: Tõnd sã n kẽnd tigis-kãsengẽ, d segd n manesa yɛl wʋsgo. D sã n yik yir pĩnda, rẽ tõe n kõ-d-la weer tɩ d maneg yel-lingdem sẽn tõe n wa rɩk d sẽk kẽngrã wakate, la sõng-d tɩ d paam zombds pĩnda, n tõog n naag nebã n yɩɩl pipi yɩɩllã la d lagem ne-b pipi pʋʋsgẽ wã ne d sũur fãa. (Yɩɩl 69:31) Minit a wãn sẽn deng tigim-taabã sɩngre, tigim-taabã perzidã na n tɩ zĩnda ɛstaraadã zug pipi Rĩungã mizik wakate. Yaa wakat kãng la tõnd fãa me segd n tɩ zĩnd d zĩisẽ, sẽn na yɩl tɩ sõssã sɩng ne burkĩndi.—1 Kor. 14:33, 40.
3. D sã n wa baood zombdse, wãn to la d tõe n waoog neb a taabã?
3 Wẽnnaam Gomdã sagenda tõnd tɩ ‘bũmb ninga fãa tõnd sẽn maanda, bɩ d maan ne nonglem.’ (1 Kor. 16:14) B sã n pak tigims gĩn sul tigis-kãsengã noy yibeoog 8.00, d sẽn waoogd neb a taabã d ka na n zoet n tusd-b n wẽdgd n na n deng-b n paam zombds nins tõnd sẽn nongã ye. Y tõe n bĩnga zombds neb nins sẽn tog sor ne yãmbã, bɩ sẽn be-b ne yãmb zag-yɛng pʋgẽ wã yĩng bala.—1 Kor. 13:5; Fil. 2:4.
4. Segl-bʋs la d segd n maan midi wã vʋʋsg wakat yĩnga, la bõe yĩng tɩ rẽ be nafre?
4 Tall-y y midi wã rɩɩb yir n wa, la ra yi-y tigis-kãsengã zĩigẽ n na n tɩ bao rɩɩb zĩig a to midi wã vʋʋsg wakat ye. Rẽ na n kɩtame tɩ y tõog n maan tũud-n-taar sẽn kengd tẽeb ne neb a taabã, la sõng tɩ wĩnd-kaoorã tigim-taab sɩngrẽ bɩ y zoe n be tigis-kãsengã zĩigẽ. Rẽ leb n tõe n sõng-y lame tɩ y ra rɩ rɩɩb sẽn ka segl sõma tɩ tõe n wa kõ-y bãase. Sã n yaa tɩlae, y tõe n talla galasɩɛɛr bil sẽn tõe n kẽ y goeelã tẽngr n wa. B ka segd n wa ne galasɩɛɛr bɛd-bɛda, teed sẽn maan ne vɛɛre, bɩ rãam tigis-kãsengã zĩigẽ ye.
5. Bõe la b maan sẽn ka wʋmd-b sõma wã yĩnga?
5 B maanda seglse, la b bĩngd zĩis takɩ sẽn ka wʋmd-b sõma wã yĩnga.
6. Wãn-wãn la d tõe n segl d sũyã zãmsg ning d sẽn na n paamã yĩnga?
6 Tẽeb rɩɩb wʋsg n gũud tõndo: Rĩm a Zozafat ra yaa ned sẽn “segl [a] sũur n na n bao sɩd Wẽnnaamã.” (2 Kɩb. 19:3, NW ) Wãn to la d tõe n segl d sũurã, nand tɩ tigis-kãsengã sɩnge? Sõss nins sẽn be sig-noy kiuug rasem 22 ne sigr kiuug rasem a 8 Réveillez-vous ! wã poɛyã kõta reng-n-lɛmbg ne tẽeb rɩɩb ning sẽn gũud tõndã. D rɩk sẽk n bʋgs sõs-kãens zutu, tɩ woto kɩt tɩ d tʋll wʋsg n dɩ tẽeb rɩɩb ning a Zeova sẽn segl d yĩng tɩ watẽ wã. D sã n dat n segl d sũyã, baoodame tɩ d leb n kos a Zeova t’a sõng-d tɩ d wʋm zãmsgã d sẽn na n paamã võor la d tũ-a.—Yɩɩl 25:4, 5.
7. Tõnd tʋlla bõe, la bõe yĩng tɩ d tʋll rẽ?
7 Tõnd fãa tʋllame n zãms Wẽnnaam Gomdã, n miẽ tɩ yaa ne rẽ maasem la d na n bɩ n paam fãagre. (1 Pɩɛ. 2:2) Woto yĩnga, bɩ d zĩnd “Tũ-y Wẽnnaam” tigims gĩn sull tigis-kãsengẽ wã n ‘lagem taab n zẽk a Zeova yʋʋrã.’—Yɩɩl 34:4.
[Zĩ-gũbri, seb-neng a 3]
Y sẽn na n maan to-to n zẽk Wẽnnaam yʋʋrã
◼ Reng-y n segl pĩnda
◼ Tall-y nonglem ne neb a taabã
◼ Segl-y y sũurã