‘Bɩ f tigim nebã fãa’
1. Bõe yĩng tɩ d tõe n yeel tɩ rasem a tãab tigis-kãsemsã la tẽns toɛy-toɛy sẽn naag taab tigis-kãsemsã wõnda tigisg Israyɛll nebã sẽn talle?
1 A Zeova sẽn yiis Israyɛll nebã Eziptã poor bilfu, a yeela a Moiiz t’a “tigim nebã” Sinayi tãngẽ wã, t’a wilg-b a raabã tɩ b zoe yẽ, la b tõog me n zãms b kambã. (Tõo. 4:10-13) Ad tigs-kãngã sɩd kenga nin-buiidã tẽeb wʋsgo! Ka la kiis a wãna, a Zeova nin-buiidã na n talla rasem a tãab tigs-kãsemse, la tẽns toɛy-toɛy sẽn naag taab tigs-kãsemse. Bõe la d segd n maan n tõog n dɩ b yõod sõma?
2. Bõe la d segd n maan n segl d meng rasem a tãab tigis-kãsengã yĩnga?
2 ‘Bɩ y maneg y mense’: Nand tɩ Israyɛll nebã kẽng tigs-kãseng ning sẽn zĩnd Sinayi tãngẽ wã, a Zeova sagl-b lame tɩ b segl b mense. (Yik. 19:10, 11) Woto me, neb nins fãa sẽn na n kẽng rasem a tãab tigs-kãsengã tog n segla b mense. Pa sõsdbã ne neb nins sẽn na n sõng-bã bal n tog n segl ye. Wala makre, tõe tɩ wʋsg na n kosa sor b tʋʋmã zĩigẽ. Yɩɩ woto me ne a Nehemi. A ra yaa rĩm a Artazɛgzɛs sõgne, n da rat sor n tɩ sõng n me Zerizalɛm lalsã sẽn lʋɩ wã. La Nehemi ra miime tɩ tõeeme n pa yɩ rĩmã noog ye. Rẽ n so t’a reng n pʋʋs Wẽnnaam n paam daoodo, n kos rĩmã a sẽn dat bũmb ningã ne yam. Rĩmã saka a Nehemi kosgã, n sõng-a meng ne tʋʋmdã. (Neh. 2:1-9) Yãmb me sã n paama sor y tʋʋmã zĩigẽ, bɩ y segl y so-toakã, la y bao y gãag zĩiga. Kãsem-dãmbã na n sõnga ned ning fãa sẽn dat sõngre. Modg-y n ta-y tigsgã zĩigẽ pĩnda, n paam n kelg sõssã neere.—Heb. 2:1.
3. Bõe n na n sõng-d tɩ d segl d mens d sũurã pʋgẽ tigis-kãsengã yĩnga?
3 Bũmb me sẽn tõe n sõng-d tɩ kelg sõma, yaa d sẽn na n deng n segl d mens d sũyã pʋsẽ. Y tõe n karma tigis-kãsengã na-kẽndr tõnd sit wɛɛbã (jw.org) pʋgẽ n bãng sõssã gom-zutã ne vɛrse nins b sẽn tikã. Semen a wãn nand tɩ tigis-kãsengã ta, y zak pʋgẽ zaabr Biibl zãmsgã sasa, y tõe n sõsa tigsgã na-kẽndr sẽn be tõnd sitã pʋgẽ wã zugu. Koe-moondb kẽer ẽnprimda na-kẽndrã, sẽn na yɩl tɩ tigis-kãsengã sasa, bɩ b gʋls bũmb nins b sẽn dat n wa tẽegdẽ wã.
4. Wãn to la tigis-kãsengã tõe n sõng roagdbã tɩ b zãms b kambã?
4 ‘Zãms-y y kambã’: Bʋʋm a to sẽn kɩt tɩ Israyɛll nebã tigim taab Sinayi tãngẽ wã, yɩɩ sẽn na yɩl tɩ roagdbã paam n “zãms b kambã.” (Tõo. 4:10) Rasem a tãab tigis-kãsengã sasa me, roagdbã paamda segb n zãmsd b kambã. Rẽnd yɩta sõma tɩ zakã neb fãa zĩnd ne taaba, tɩ roagdbã tõog n gũus b kambã tɩ b kelg neere. Tigis-kãsengã daar fãa baasgẽ, la zak pʋgẽ Biibl zãmsgã sasa, zakã rãmb tõe n sõsa bũmb ning b sẽn kelgã zugu.
5. D sã n kẽng rasem a tãab tigis-kãsengã sẽn watã, nafa bʋs la d na n paame?
5 Tigis-kãseng ning sẽn zĩnd Sinayi tãngẽ wã sõnga Israyɛll nebã tɩ b maneg n pẽg Wẽnnaam, b sẽn paam n yaa a nin-buiidã. (Tõo. 4:7, 8) Tigsgã sẽn watã na n sõnga tõnd me woto. Hal rasem a tãab tõre, d na n paama d mens ne dũni-kãngã nebã, n zĩnd ne d saam-biisã n kelg sõss sẽn kengd tẽebo. (Ezai 35:7-9) A Zeova daarã sẽn kolgdã, bɩ tõnd ned kam fãa modg n kẽng tigis-kãsengã sẽn watã, tɩ d paam n keng taab raoodo.—Heb. 10:24, 25.