Bɩ f gũus ne f yamã

1. Yʋʋmd 2013 rasem a yiib tigs-kãsengã gom-zug yaa bõe, la wãn to la a na n sõng tõndo?

¹ A Zezi ra yeela a karen-biisã tɩ b nong a Zeova ne b sũy fãa, ne b sɩɩsã fãa, la ne b yamã fãa. (Mat. 22:37, 38) Tigs-kãsems nins b sẽn sigl rõndã wã yaa sẽn na yɩl n sõng-d tɩ d maneg d sẽn yaa a soab d sũurã pʋgẽ wã tɩ yɩ sõma n paase. Tẽeg-y tɩ rasem a tãab tigs-kãsengã gom-zug yetame tɩ: “Bɩ f gũus ne f sũurã tagsgo,” tɩ daar a ye tigs-kãsengã sẽn na n pʋglã gom-zug yaa: “Bɩ f gũus ne f sũur-kasetã.” Rasem a yiib tigs-kãsengã sẽn na n pʋglã gom-zug yetame tɩ: “Bɩ f gũus ne f yamã.” A tika Matɩe 22:37. Tigs-kãngã na n sõnga tõnd ned kam fãa t’a modg t’a tagsa wã yɩ sõma wakat fãa tɩ noogd a Zeova sũuri.

2. Tigs-kãsengã sasa, sogs-bʋs leoor la d na n paame?

² D sẽn na n wʋm tigs-kãsengã sasa: D sã n wa kelgd sõssã, bɩ d bao sogsg nins sẽn be tẽngrã leoore:

• Wãn to la d tõe n maan n da tall ‘ninsaal tagsgo’?

• Wãn to la d tõe n sõng neb nins yam sẽn ludã tɩ b bãng Wẽnnaam?

• Tagsg bɩ yam-bʋg buud la d segd n talle?

• D sã n maagd d yĩng n bʋgsd sõma, wãn to la nafd tõndo?

• Wãn to la d tõe n bas t’a Zeova maneg d yamã?

• Wãn to la rapã, pagbã, roagdbã la kambã tõe n sõng tɩ sũ-noog zĩnd zakã pʋgẽ?

• Bõe la d tõe n maan tɩ wilg tɩ d segla d meng a Zeova daarã yĩnga?

• B sẽn yeel tɩ d ‘yõk d tagsgã’ rat n yeelame tɩ bõe?

• Neb nins sẽn tũud b sẽn zãmsd bũmb ningã paamda bark bʋse?

3. Bõe yĩng tɩ tar yõod tɩ d kẽng rasem a yiibã fãa, n kelg sõssã neere, la d tũ sagls nins d sẽn na n paamã?

³ A Sʋɩtãan maanda a sẽn tõe fãa sẽn na yɩl n golem d yamã. (2 Kor. 11:3) Yaa rẽ n so tɩ d segd n gũusi, n tõog n ta a Zeova yam. Yaa tɩlae tɩ d kell n tall Kirist tagsgo, sẽn na yɩl tɩ dũni-kãnga nebã yamã ra soog-d ye. (1 Kor. 2:16) Woto yĩnga, bɩ y modg n kẽng rasem a yiibã fãa la y kelg sõssã neere. D sã n tũ sagls nins d sẽn na n paamã, na n sõng-d lame tɩ d ‘yõkd d tagsa’ wã, n tõog n moon Rĩungã koɛɛg ne yẽesem.—1 Pɩɛ. 1:13.