Tigis-kãseng sẽn na n sõng-d tɩ d kogl d zoodã ne a Zeova
1. Segl-bʋs la a Zeova rɩk sẽn na yɩl n sõng-d tɩ d moon koɛɛgã?
1 A Zeova kõt-d-la saglse, n zãmsd-d la a kengd-d raoodo, sẽn na yɩl tɩ d tõog n moon koe-noogã a sẽn bobl-dã. (Mat. 24:14; 2 Tɩm. 4:17) Rasem a yiib tigis-kãsemsã d sẽn maand yʋʋmd fãa wã yaa bũmb a ye a sẽn tũnugd ne n maand woto. Yʋʋmd 2010 rasem a yiib tigis-kãsengã gom-zug na n yɩɩ: “D kogl zood ning d sẽn tar ne a Zeova wã.” A tika Rom dãmb 8:5 ne Ziid 17-19 zugu. Yaa yʋʋmd 2009 sak-sik kiuug rasem 31 semennã la b na n sɩng-a.
2. a) Wãn to la rasem a yiib tigis-kãsengã na n naf-do? b) Wãn to la rasem a yiib tigis-kãsems sẽn loog sõng yãmb koɛɛgã mooneg wɛɛngẽ?
2 Rasem a yiib tigis-kãsengã sẽn na n naf-d to-to: Sõssã na n sõng-d lame tɩ d gũus d mens ne yɛl kẽere. Wala makre, tɩ d gũus d mens ne bũmb nins fãa sẽn tõe n dɩk d sẽkã la kɩt tɩ d bas sẽn tar yõod n yɩɩdã yell gesgo. Tigis-kãsengã na n sõng-d lame tɩ d bãng d sẽn tõe n maan to-to n da soog d mens n maand d sẽn date, la d bãng bũmb nins sẽn wilgd tɩ ned yaa wẽn-tũud hakɩka. Hatã daar gom-n-dees-taabã na n wilga bũmb nins tõnd ned kam fãa la zagsã rãmb sẽn tõe n maan sẽn na yɩl tɩ zood ning d sẽn tar ne a Zeova wã pãng paase, baa ne zu-loeesã la yɛl a taab sẽn tõe n koms d tẽebã. Sõssã na n sõng-d lame tɩ d kogl d sũyã, n kell n tall zood ne a Zeova, la d ning d yamẽ neb nins sẽn na n kogl b zoodã ne a Zeova wã sẽn na n paam bark ninsã.
3. Rasem a yiib tigis-kãsengã yaa ra-bʋre, la bõe la y segd n maane?
3 Y sã n wa bãng rasem a yiib tigis-kãsengã raare, la b sẽn na n maan-a zĩig ninga, bɩ y segl y mens sẽn na yɩl n tõog n zĩnd rasem a yiibã fãa la y maag y yĩng n kelg sõma. Bãng-y t’a Zeova ningda neb nins sẽn maand modgr wʋsgã barka.—Yel. 21:5.
4. Wãn to la rasem a yiib tigis-kãsengã na n sõng tõndo?
4 Sɩd-sɩda, yaa a Zeova n dɩk segls tɩ d na n paam tigis-kãsengã. Sõssã tʋm-tʋmd sẽn tũud sɩdã sẽn seglã na n sõng-d-la koe-moonegã wɛɛngẽ. D tara mi-beoog ne a Zeova, a sẽn kõt-d bũmb nins fãa sẽn na yɩl n sõng-d tɩ d “tall tẽeb kãn-kãe n da yuusã” yĩnga.—Heb. 10:23-25; Zak 1:17.