Tigims gĩnd tigis-kãseng paalga

‘Yaoolem wakat tood’ kãensã pʋsẽ, d segd n paama yam ning sẽn yit Wẽnnaam nengẽ wã n tõog n ta a yam. (2 Tɩm. 3:1) Yʋʋmd 2005 tʋʋmd yʋʋmdã tigims gĩnd tigis-kãsengã sõss na n kõo tõnd sagls sẽn zems la a keng tõnd raoodo, ne gom-zu-raoog kãngã b sẽn na n wɛgsã: “Sak-y tɩ ‘yam ning sẽn yit yĩngrã’ wilg-y sore.”—Zak 3:17.

Pipi gom-n-dees-taabã gom-zug sẽn yaa “D tall ‘yam ninga sẽn yit yĩngra’ d vɩɩmã pʋgẽ” wã na n sõng-d lame tɩ d bãng d sẽn segd n maan bũmb ning n tall vɩɩm manesem sẽn yaa yɩlemde, n yɩ ned sẽn baood laafɩ, la d yɩ maan-tɩ-zems soaba, la ned sẽn sakd nana. Tigims gĩnd yel-gɛtã me na n goma yam ning sẽn yit Wẽnnaam nengẽ wã nens a tãab yelle. Tigims gĩn sull yel-gɛtã na n baasa raarã sõss n wilg tɩ baa nebã sẽn get kiris-nebã wa ‘nin-tals sẽn ka paam zãmsgã,’ b paama seglg sõma n na n moon Wẽnnaam yamã.—Tʋʋ. 4:13.

Rasem a yiib soabã raare, gom-n-dees taab ning gom-zug sẽn yaa “Bao-y bũmb nins sẽn kɩtd tɩ ned bɩ tẽebã pʋgẽ wã” na n sõnga tõnd tɩ d bãng bũmb nins sẽn tõe n koms tõnd tẽebã, la d gil-ba. A na n leb n wilg-d-la d sẽn tõe n kɩt tɩ neb a taabã bɩ tẽeb pʋgẽ to-to tigingã tigissẽ, koe-moonegã wakate, la zakã pʋgẽ. Zãmã sõasg ning gom-zug sẽn yaa “Yam ning sẽn yit Wẽnnaam nengẽ wã sẽn nafd tõnd to-to” wã na n paasa tõnd naneb ne nafa nins d sẽn paamde, d sẽn tũud Wẽnnaam noyã d vɩɩmã pʋgẽ wã yĩnga. Baasg sõasgã gom-zug sẽn yaa “Yam ning sẽn yit Wẽnnaam nengẽ wã sakr kogenda tõndã” na n kɩtame tɩ d rɩk sard sẽn ka vigsd n bao yam a Zeova nengẽ yaoolem day kãensã sasa.

Tigis-kãseng fãa wakat kãseng yaa karen-bi-paalsã lisg reegr sasa. Tigis-kãsengẽ wã, b na n maana Wẽnnaam tʋʋmdã lekoll la b kʋms Gũusg Gasgã zãmsg b sẽn da segd n maan tigis-kãsengã semenã. A Zeova ratame tɩ yam ning a sẽn kõtã naf d fãa. Sagls nins sẽn gũud tõnd d tigims gĩnd tigis-kãsengẽ wã na n nafa tõnd wʋsg tẽebã wɛɛngẽ.—Yel. 3:13-18.