Bũmb b sẽn maan koe-moondbã sõngr yĩnga
1 Yʋʋmd 1938 wã, a Zeova siglgã sɩnga tigsg buud sẽn yaa paalga. B sigla tigis-kãsems tɩ tigims sẽn be babg a ye segd n tigimd taaba. Yaa rẽ la b sẽn boond masã tɩ rasem a yiib tigis-kãsengã. Yaa bõe yĩnga? Yʋʋmd 1939 yʋʋm-vẽkr kiuugã Informateur sẽn lebg Rĩungã Tʋʋmdã leokda woto: “Tigis-kãsemsã me yaa bũmb a Zeova sẽn tũnugd ne n wilgd koe-moondbã b sẽn segd n tʋm Rĩungã tʋʋmdã to-to. Sagls nins b sẽn kõt be wã tara yõod wʋsgo, bala sõngda koe-moondbã fãa tɩ b tõogd n tʋmd tʋʋmd ning Wẽnnaam sẽn bobl-bã sõma.” D sã n ges Rĩungã koe-moondbã sẽn da yaa bãmb 58 000 bal yʋʋmd 1938 wã, sẽn fɩɩg n ta 7 000 000 yʋʋmd 2009 wã, yaa vẽeneg tɩ rasem a yiib tigis-kãsemsã sɩd sõngda koe-moondbã tɩ b “tʋmd tʋʋmd ning Wẽnnaam sẽn bobl-bã sõma”!
2 Vẽer tigis-kãsengã gom-zugu: D gũuda rasem a yiib tigis-kãsengã sẽn watã, la raood kengr ning d sẽn na n paamã. A gom-zugã la woto: “Yãmb ka dũniyã rẽnd ye.” A tika Zã 15:19 zugu. Sõss nins b sẽn na n wɛgsã na n nafa koe-moondbã. Sõssã kẽer gom-zut la woto: Sibrã, d na n kelga sõsg sẽn yet tɩ “Wãn to la so-pakrã tʋʋmd kogend tõndo?” D na n kelga gom-n-dees-taab sẽn tar babs a tãabo: “Ra bas-y tɩ rũngã rẽgm-y ye,” “Ra bas-y tɩ pʋg-yood-kãsengã rẽgm-y ye,” la “Ra bas-y tɩ toandbã rẽgm-y ye.” Hatã, d na n kelga gom-n-dees-taab gom-zug sẽn yet tɩ “D nong a Zeova, la d ra nong dũniyã ye.” Sõss a taab me gom-zut la woto: “D kell n yɩ ‘wa sãamb dũni kãngã pʋgẽ,’ ” la “Tall-y raoodo, tɩ y tõe n tõoga dũniyã!”
3 Saam-bi-poak a ye sẽn da maag koɛɛgã mooneg pʋgẽ sẽn kẽng rasem a yiib tigis-kãsengã poore, a yeelame tɩ sõssã kɩtame tɩ yẽ tags n ges a yɛlã sẽn yaa to-to, n yãk yam n na n yit koɛɛgã moonego, n da le bao padems n kõ a meng ye. Sãmbg sẽn ka be, rasem a yiib tigis-kãsengã sẽn watã na n sõnga tõnd fãa tɩ d nong a Zeova, la d ra nong dũniyã ye. (1 Zã 2:15-17) Modg-y n zĩnd-y be, la y kelg sõma sẽn na yɩl n dɩ bũmb ning a Zeova sẽn segl koe-moondbã yĩngã nafa!
[Zãmsgã sogsgã]
1. Bõe la b sɩng yʋʋmd 1938 wã, la yaa bõe yĩnga?
2. Gom-zu-bʋs la b na n wɛgs rasem a yiib tigis-kãsengã sẽn watã sasa?
3. D sã n kẽng rasem a yiib tigis-kãsengẽ wã, nafa bʋs la d na n paame?