Rasem a yiib tigis-kãsengã na-kẽndre

Bõe n tõe n sõng tõnd tɩ tũudum hakɩkã bɛɛb ra tõog-do? A Sʋɩtãan modgda wakat fãa n dat tɩ d lebg n leb dũni wẽngã pʋgẽ. Bõe la d tõe n maan t’a ra tõog-do? Yʋʋmd 2009 rasem a yiib tigis-kãsengã na n leoka sogs-kãensã sẽn tar yõod wʋsgã. A gom-zugã yaa: “D ‘maan sõma n tõog wẽnga.’ ” (Rom 12:21) D ges sõss kẽer d sẽn na n kelg sasa kãngã gom-zutu.

Distrik yel-gɛtã na n wɛgsa sõss nins gom-zut sẽn yaa: “D paama pãng n na n maan sõma n tõog wẽnga,” “D ra tags tɩ d pa tõe n lʋɩ ye,” “Wẽng buud fãa na n saa ka la bilfu!,” la “D keng d tẽebã sẽn na yɩl n tõog dũniyã.” Tigims sull yel-gɛtã na n wɛgsa sõss nins sẽn pʋgdã: “Yaa masã la d segd n gũus n yɩɩda!,” sẽn tik Rom dãmba 13:11-13 zugu. La “D ra koms raood toog wakat ye,” sẽn tik Yelbũn 24:10 zugu. Yaa tigims sull yel-gɛtã me n na n wɛgs sõsg ning gom-zug sẽn yet tɩ “Yɛl sẽn pak tigims sullã.” Sõsg a to sẽn tõe n keng d pels yaa: “Y tõe n yɩɩ so-pakda, n tõog n moon koɛɛgã wʋsg bɩ?” Pipi gom-n-dees-taabã gom-zug na n yɩɩ woto: “D yals kãn-kãe n da lʋɩ a Sʋɩtãan bẽdsã pʋgẽ ye.” A na n sõnga tõnd tɩ d bãng a Sʋɩtãan sẽn tũnugd ne teed nins bãngdbã sẽn yiisdã, reemã, filim dãmbã la karengã n bẽt nebã to-to. Gom-n-dees-taab ning gom-zug sẽn yaa “D bao pãng n tõog n yals kãn-kãe wakat kãngã sẽn yaa wẽngã pʋgẽ” wã na n wilg-d-la d sẽn tõe n tũ sagls nins sẽn be Efɛɛz rãmb 6:10-18 pʋgẽ wã to-to n paase.

Wẽngã tõogr ne koɛɛgã mooneg tũuda taaba. (Wil. 12:17) D mii vẽeneg t’a Sʋɩtãan modgda wʋsg n dat n nams a Zeova Kaset rãmbã. (Ezai 43:10, 12) A Sʋɩtãan modgrã fãa na n yɩɩ zaalem, bala tõnd yãka yam n na n kell n “maan sõma n tõog wẽnga.” Modg-y n maan-y y sẽn tõe fãa n wa kelg tigis-kãsengã sõss fãa gilli.