Segl-paalg tigis-kãsemsã sõss lebg-n-ges yĩnga
A Sʋɩtãan dũniyã sẽn sãamd n debdã yĩnga, a Zeova kengda tõnd tẽeb sẽn na yɩl “tɩ d bas Wẽnnaam kɩɩsgo la dũniyã ratem sẽn yaa wẽnsã, la d gũus d mens dũniyã ka masã n maan tɩrga la d sak Wẽnnaam.” (Tɩt 2:12) Tigims gĩn la daar a ye tigis-kãsemsã d sẽn maand yʋʋmd-yʋʋmdã bee bũmb nins a sẽn tũnugd ne tʋm-tʋmd sẽn tũud sɩd la sẽn tar yamã n kõt-dã sʋka. (Mat. 24:45) Ad tigis-kãensã sɩd kengda tõnd tẽebã sõma!
Sẽn na yɩl n sõng-d tɩ d tẽeg la d tũ zãmsg ning d sẽn paamdã, segl-paalg la b maan tigis-kãsems kãensã sõss lebg-n-ges yĩnga, tɩ d na n sɩng a tũub yʋʋmd 2005 wã tʋʋmd yʋʋmd pʋgẽ. Seb-paasdem kãngã seb-neng a 5-6 tara sõss sẽn yaa sõss nins d sẽn na n wʋm tigis-kãsems kãensã wakatã reng-n-lɛmbga, la tigis-kãseng fãa sõss lebg-n-ges sogsgo. Tigimsã segd n vaeesa sõs-kãensã Tʋʋmdã tigisgẽ bilf sẽn deng tigis-kãsems kãensã la b poore. Wãn to la b na n maan dẽ?
Semen a ye bɩ a yiib sẽn deng tigims gĩnd tigis-kãseng ning tigingã sẽn na n kẽngã, b segd n dɩka minit piiga Tʋʋmdã tigisgẽ n kõ diskuur sẽn tik sõasg ning gom-zug sẽn yaa “Tigims gĩnd tigis-kãseng paalgã” zugu, n kɩt tɩ nebã gẽeg tigis-kãsengã ne sũ-noogo. Sõasdã na n wilga nebã lebg-n-gesã sogsgo, n sagl-b tɩ b gʋls tigis-kãsengã sõss tagsa n segl b mens lebg-n-gesã b sẽn na n wa maan semen a wãn pʋgẽ tigis-kãsengã loogr poorã yĩnga.
Semen a wãn pʋgẽ, tigis-kãsengã poore, b segd n dɩka minit 15 tʋʋmdã tigisgẽ n lebg n ges tigis-kãsengã pipi raar sõsse. Semen ning sẽn pʋgdã, b na n leb n dɩka minit 15 n lebg n ges tigis-kãsengã rasem a yiib-n-soab sõsse. Lebg-n-ges kãens segd n tika sogsgã sẽn be seb-paasdem kãngã pʋgẽ wã zugu. Lebg-n-gesã segd n wilga sõssã tagsa yõodo. Sẽn na yɩl n tõog n maan lebg-n-ges kãensã, kãsem dãmbã tõeeme n kʋmse, n bas n da maane, bɩ n viig Tʋʋmdã tigisg sõss a taaba.
B segd n maana woto me ne daar a ye tigis-kãsengã, la yaa vugr bal la b segd n dɩk minit 15 Tʋʋmdã tigisgẽ n lebg n ges tigis-kãsengã tõr sõsse. Tõnd fãa segd n bĩnga seb-paasdem kãngã n tall n tʋm, sẽn na yɩl n dɩ zãmsg ning a Zeova sẽn kõtã yõod zãnga.—Ezai 48:17, 18.