Daar a ye tigis-kãseng sẽn yaa zall paalga

Tʋʋmd yʋʋmd paalgã daar a ye tigis-kãseng sẽn yaa zallã gom-zug kell n yita Gʋlsg Sõamyã pʋgẽ: “Bɩ y sak Wẽnnaam, la y kɩɩs Sʋɩtãanã.” (Zak 4:7) Woto yaa sor-wilgr sẽn yaa sõma wakat kãensã sẽn yaa toodã pʋsẽ! Tõnd sẽn sakd Wẽnnaam noyã kɩtdame tɩ d ya a Sʋɩtãan bɛɛba. Tigis-kãsengã na n zãmsa tõnd d sẽn na n maan to-to n yals kãn-kãe a Sʋɩtãan sɩlem wẽnsã sẽn sãamd tẽebã taoore. Tẽeb arzɛgsã d sẽn na n paam tigis-kãseng kãngã wakatã kẽer la bʋse?

Tigims gĩnd yel-gɛtã na n wilga “Zak neb sẽn sakd Wẽnnaam” sẽn tõe n paam pãng to-to n tõog n yals kãn-kãe dũniyã weoogr taoore. Sõasd sẽn yaa kaagdã pipi sõasg daarã pʋgẽ gom-zug yaa: “Kɩɩs Sʋɩtãana sẽn dat n yɛɛlga.” Sõs-kãng na n wilga bũmb ning sẽn kɩt tɩ d segd n mao sõma n kɩɩs a Sʋɩtãan sẽn dat n sãam tõnd tẽebã, la d sẽn segd n maan dẽ to-to me. Sõss a yiib la b yãk kom-bɩɩsã yĩnga, bala bãmb me tog n gũusa ne a Sʋɩtãanã sɩlem wẽnse. Kiris-neb wʋsg sẽn lebg kãsemb masã zãgsame tɩ b kõn pʋg dũniyã ratem b sẽn da wa n yaa kom-bɩɩs ye. Yaa ne sũ-noog la d na n kelg yɛl nins bãmb sẽn vɩɩmd n yã wã.

Ãdem-biisã fãa segd n saka zu-sobendo. Dẽ, sõasd sẽn yaa kaagdã yaoolem sõasg na n wilga zĩis a naas wɛɛngẽ d sẽn tog n wilg vẽeneg tɩ d sakda Wẽnnaam: 1) ne goosneem dãmbã, 2) tigingã pʋgẽ, 3) nug-tʋʋma wɛɛngẽ, la 4) zakã pʋgẽ. Ad wã yaa zãms-sõng tɛkẽ!

Neb nins sẽn dat n deeg lisg daar a ye tigis-kãseng sẽn yaa zall kãngã wakatã segd n togsa yel-gɛt taoor soabã tao-tao. B sã n togs-d a raarã fãa, bɩ d fãa gʋls-a sõma d kalãndirie wã zugu, la d segl sõma sẽn na yɩl n zĩnd tigis-kãsengẽ wã raarã tõre. D sã n sakd a Zeova wakat fãa, bark nins d sẽn na n paamã na n kaoosa wakat sẽn kõn sa.