Daar a ye tigis-kãseng paalga

¹ Baa ne kɩba-kɩtbã la dũniyã karen-saam dãmb sẽn pẽgd tẽng zug arzɛkã, Wẽnnaam Gomdã sagenda tõnd woto: ‘Yɩ-y neb sẽn maand tʋʋm sõama wʋsgo.’ (1 Tɩm. 6:18, Kãab-paalgã Koe-noogo) Yaa woto la daar a ye tigis-kãsengã sẽn sɩngd yʋʋmd 2002 bõn-bɩʋʋng kiuugã gom-zu-raoogo. Tigis-kãseng kãngã na n kenga tõnd raood wãn-wãn to?

² Tigims gĩnd yel-gɛtã na n wilga ‘yɩ arzɛk rãmb Wẽnnaam nifẽ’ wã sẽn dat n yɛɛlga, sẽn paase a na n boola neb kẽer sẽn modgd n na n paam tẽeb arzɛgs n maan sʋgsgo. Sõasd sẽn yaa kaagdã na n wilga a pipi sõasgã pʋgẽ Wẽnnaam nin-buiidã sẽn segd n maan “Tʋʋm sõama wakat kãngã sẽn yaa tigisg sasa wã” to-to. B na n sagla tõnd ned kam fãa t’a ges a sẽn tõe n maan to-to n kẽes a meng n paas tigisg tʋʋmdã Wẽnnaam sẽn kõ noor tɩ b maane, tɩ maand rũndã-rũndã wã pʋgẽ.

³ Ad yaa sũ-noog meng n kõ-do, tɩ d neẽ tɩ kiris-neb kom-bɩɩsã baooda tẽeb arzɛgse! Woto waoogda a Zeova la sõngd kom-bɩɩsã tɩ b segl b mens sõma masã n wa paam zu-nood tʋʋma. Sõasg ning gom-zug sẽn yaa “D pẽg kom-bɩɩsã b sẽn maand tʋʋm sõma n waoogd a Zeova wã yĩngã” na n wilga tigims gĩndã kom-bɩɩs sẽn segd n maan tʋʋm sõma ninsi.

⁴ Tʋʋm sõma wã maaneg biis la bʋse? Sõasd sẽn yaa kaagdã na n goma rẽ yell a yaoolem sõasg gom-zug sẽn yaa “Ket-y n maand-y tʋʋm sõma n paam a Zeova barkã” pʋgẽ. A na n goma zĩis a naas wɛɛngẽ d sẽn paamd bark wʋsgo: 1) tõnd mensã yembr-yembrã, 2) zakã pʋgẽ, 3) tigingã pʋgẽ, la 4) d dũni gill siglgã pʋgẽ.

⁵ B rãmb nins sẽn dɩk b mens n kõ a Zeova wã na n tõog n deega lisgu. Yãmb sã n seglame n na n maan dẽ bɩ y togs yel-gɛt taoor soabã zĩig pʋgẽ.

⁶ B sã n togs tigis-kãsengã sẽn na n maan raar ning yãmb babgẽ wã fãa, bɩ y maan segls tao-tao n tõog n wa zĩnd be. Modg-y n ta tigis-kãsengã zĩigẽ tao-tao n tõog n naag nebã sɩngr yɩɩllã la pʋʋsgã sasa. D sã n zĩnd daar a yembr tigis-kãsengẽ wã raarã tõr n kelg sõssã fãa, na n kenga tõnd raood tɩ d sɩd yɩ arzɛgs rãmb tõnd Wẽnnaam a Zeova nifẽ.