Kõ-y Sugr Ne Y Sũur Fãa
“Mam arzãn Ba na n maana yãmb woto, yãmb ned kam fãa sã n ka kõ a ba-biig sugr ne a sũur fãa.”—MATƖE 18:35.
1, 2. a) Wãn-wãn la yel-wẽn soab b sẽn da mi sõma tall naneb ne a Zezi? b) Bõe la a Zezi yeel n leoke?
A RA yaa pʋg-yoodre. A ra pa ned y sẽn gũud n na n yã wẽn-tũud roogẽ ye. Sã n linga neb kẽer b sẽn yã-a be wã, pʋg-kãng sẽn maan bũmb ningã ling-b lame n paase. A pẽnega rao wã sẽn tar vɩɩm manesem sẽn yaa sõma n yɩɩdã n wilg a naneb ne rao wã tʋʋmã, n pɛgs rao wã nao ne a nintãma, n yẽes-b ne a zoobdã.
2 Rao kãng sẽn yaa a Zezi wã sũur pa sãam ne pʋg-kãngã b sẽn da get wa ‘yel-wẽn soab tẽngã pʋgẽ’ wã ye. La sẽn da yaa Fariziẽ a Simo yirã yĩnga, a ra maanda yɩɩre, pagã sẽn da yaa yel-wẽn soaba yĩnga. A Zezi leokame n togs roap a yiib sẽn tar ned ligd kɩbare. A yembrã samd yaa wʋsgo, n zems tʋm-tʋmd yʋʋm a yiib yaoodo. A to wã yaa ligd kãng sẽn na n pʋɩ piiga, sẽn pa ta kiis a tãab yaood ye. B ned ba a ye sẽn da pa tõe n lebs ligdã yĩnga, nedã “basa bãmb b yiiba fãa taale.” Vẽenega, ned ning b sẽn kõ sugr n yɩɩdã n da tar bʋʋm sẽn yɩɩd n na n tall nonglem. A sẽn dɩk rẽ n tɩ loe ne pagã tʋʋm-sõngã, a Zezi paasa no-kãngã: “Ned sã n paam sugr bũmb bilf yĩnga, yẽ nonglem yaa bilfu.” Rẽ poore, a Zezi yeela pagã: “Fo paama f yel-wẽna sugri.”—Luk 7:36-48.
3. Bõe la d segd n vaeese, tõnd mengã wɛɛngẽ?
3 Sʋk-y y menga: ‘Mam sã n da yaa pʋg-kãngã, bɩ m sã n da zĩndẽ-la yell sẽn wõnd woto pʋgẽ tɩ b tall ninbãan-zoeer ne-ma, rẽ poor masã m da na n yɩɩ ned sẽn zãgsd ne toom n pa kõt neb a taabã sugr bɩ?’ Tõe tɩ y leok tɩ: ‘Abada!’ Baasg zãnga, y sɩd tagsdame tɩ y nong n kõta sugr bɩ? Yãmb sɩd yaa woto bɩ? Y nong n maanda woto tao-tao, la neb a taabã geta yãmb wa ned sẽn kõt sugr bɩ? Bɩ d ges bũmb ning sẽn kɩt tɩ tõnd ned kam fãa segd n vaees a meng ne pʋ-peelem yel-kãngã wɛɛngẽ wã.
D ratame tɩ b kõ-d sugri, la b sɩd kõ-d-la sugri
4. Bõe la d segd n sak n deeg tõnd mengã wɛɛngẽ?
4 Yãmb mengã mii vẽeneg tɩ y yaa pa-zems-zãng soaba. B sã n sʋk-yã, y na n sakame meng n deeg woto, la tõe tɩ y na n tẽega goam nins sẽn be 1 Zã 1:8 pʋgẽ wã: “Tõnd sã n yetẽ tɩ tõnd ka tar yel-wẽna, tõnd belgda tõnd mense la sɩd ka be tõnd pʋsẽ ye.” (Rom dãmba 3:23; 5:12) Ne neb kẽere, yel-wẽna tõe n puka ne yel-wẽn-kãsemse, yel-wẽn sẽn yaa beegr meng-menga. La baa y sã n pa mi tɩ y tara taal ne yel-wẽn-kãensã buudu, sɩd-sɩda, wakat wʋsg la ne manesem wʋsgo y konga Wẽnnaam noyã tũubu. Y beegame. Pa sɩda?
5. Ne bõe la d segd n tall mi-beoog ne Wẽnnaam?
5 Woto yĩnga, yãmb sẽn be zĩig ningã tõe n zemsa ne tʋm-tʋmd a Poll bilg-kãngã: “La yãmb sẽn da yaa kũum y beegra ne y sẽn da ka kẽ bãonga yĩngã, bãmb kõo yãmb vɩɩm ne bãmb [a Zezi] n kõ tõnd sugri tõnd beegra fãa yĩnga.” (Kolos rãmba 2:13; Efɛɛz rãmba 2:1-3) Kelg-y gomd ning sẽn yet tɩ: ‘n kõ tõnd sugr tõnd beegra fãa yĩngã’ neere. Gom-kãngã võor tagmame. Tõnd fãa tara bʋʋm sẽn sek n na n bõos woto wa a Davɩɩde: ‘Zusoaba bɩ y kõ maam m yel-wẽna sugri, y yʋʋra yĩnga; tɩ bõe, mam yel-wẽna yaa wʋsgo.’—Yɩɩl Sõamyã 25:11.
6. D tõe n kɩsa sɩd ne bõe, sã n yaa ne a Zeova la sugrã wɛɛngẽ?
6 Wãn-wãn la yãmba, bɩ ned ning fãa sẽn be tõnd sʋka paamd sugri? Yaa a Zeova Wẽnnaam sẽn nong n kõt sugrã. Rẽ yaa bũmb sẽn be a nedemdã pʋgẽ. (Yikri 34:6, 7; Yɩɩl Sõamyã 86:5) Rẽnd Wẽnnaam gũudame tɩ tõnd tees a sẽnẽ pʋʋsg pʋgẽ n kos-a sugri, n kos-a t’a maan-d yaafa. (2 Kɩbaya 6:21; Yɩɩl Sõamyã 103:3, 10, 14) La a rɩka segls n maan yẽbgr sẽn zems ne noyã sẽn na yɩl n tõog n kõ sugr kãngã. Yẽbgr kãng yaa a Zezi yao-n-dɛɛk maoongã.—Rom dãmba 3:24; 1 Pɩɛɛr 1:18, 19; 1 Zã 4:9, 14.
7. Ne manesem bʋg la y segd n dɩk a Zeova togs-n-taare?
7 Y segd n gesa Wẽnnaam sẽn dat n kõ sugrã wa mak-sõng sẽn wilgd y sẽn segd n tall manesem ning ne neb a taabã. A Poll taka d yamã n sik rẽ zug n gʋlse: “Bɩ yãmb maan taab neere, la paam sũ-bʋgsem, la kõ taab sugri wa Wẽnnaam sẽn kõ yãmb sugr Kirist yĩngã.” (Efɛɛz rãmba 4:32) Sãmbg ka be t’a Poll sẽn togsd bũmb ningã tɩ loee ne tõnd sẽn paam zãmsg ne Wẽnnaam mak-sõngã, bala verse ning sẽn pʋgdã kẽngda taoor woto: “Woto yĩnga, bɩ yãmb yɩ Wẽnnaam togs-n-taas wa kom-nongdse.” (Efɛɛz rãmba 5:1) Y nee loeesã bɩ? A Zeova Wẽnnaam kõ-y-la sugri, woto, a Poll wata ne tagsg sẽn tar pãnga sẽn wilgd tɩ y segd n dɩka Wẽnnaam togs-n-taar n “paam sũ-bʋgsem, la [y] kõ taab sugri.” La sʋk-y y menga: ‘M maanda woto bɩ? Mam sã n pa nong n maand woto, m maoodame n na n maan woto bɩ, m sɩd modgda sõma n na n dɩk Wẽnnaam togs-n-taar n yɩ sugr kõt bɩ?’
D segd n modgame n yɩ sugr kõtba
8. Bõe la d segd n sak n deeg sã n yaa ne neb nins sẽn be tõnd tigingã pʋgẽ wã?
8 Yɩtẽ-la sõma, sã n da mikame tɩ kiris-neb tigingã pʋgẽ, yaa naoor a wãn bal la yaa tɩlae tɩ d tall sugr kũunã sẽn yaa wẽn-zoeer manesmã. La yɛlã sɩd pa woto ye. Yaa sɩda, tõnd saam-biisã la d saam-bi-pogsã sẽn yaa kiris-nebã modgdame n na n tũ a Zezi nonglmã makre. (Zã 13:35; 15:12, 13; Galat dãmba 6:2) B modga hal sẽn kaoose, la b ket n modgdame, n na n bas dũni wẽng kãngã sẽn tagsd to-to wã, a nebã sẽn gomd la b tʋmd to-to wã. B sɩd rat n puka nedemd paalgã. (Kolos rãmba 3:9, 10, NW) La, d pa tõe n yĩm tɩ yaa ninsaalb sẽn pa zems zãng n be dũniyã gill tigims fãa la tiging fãa pʋgẽ ye. Naoor wʋsgo, b sɩd yaa sõma n yɩɩd b sẽn da reng n yaa to-to wã, baasgo b ket n pa zems zãng ye.
9, 10. Bõe yĩng tɩ pa segd n ling tõndo, zu-loees sã n puk saam-biisã sʋka?
9 Biiblã pʋgẽ, Wẽnnaam yeta tõnd vẽeneg tɩ d segd n gũume tɩ pa-zems-zãngã puk tigingã pʋgẽ, d saam-biisã la d saam-bi-pogsã sʋka. Wala makre, bɩ y ges a Poll goam nins sẽn be Kolos rãmba 3:13 (NW) pʋgẽ wã: “Ket-y n maand sũmar ne taaba la y kõ taab sugr ne yamleoogo, ned sã n tar yẽgeng ne a to. Wala a Zeova sẽn kõ yãmb sugr ne yamleoogã, bɩ yãmb me maan woto.”
10 Pa zaalem yĩng la Biiblã tẽegd tõnd ka tɩ sẽn na yɩl tɩ Wẽnnaam kõ tõnd sugri, rẽnda tõnd me kõ neb a taabã sugr ye. Bõe yĩng tɩ woto yaa toogo? Bala a Poll sak n deegame tɩ ned tõe n tara “yẽgeng ne a to.” A bãngame tɩ yɛl a woto ra na n zĩndame. Yel-kãens ra segd n bee yʋʋm kob-yendẽ kiris-neb sẽn yaa “nin-sõmsã” sẽn da tar ‘saagr sẽn bĩng-b saasẽ’ wã sʋka. (Kolos rãmba 1:2, 5, NW) Woto, tõnd tõe n tagsame tɩ na n yɩɩ toor rũndã-rũndã, kiris-neb hakɩkã wʋsg sẽn yɩɩd sẽn pa tar vʋʋsmã kaset tɩ b yaa ‘Wẽnnaam nin-tũusdsã’ sɩda? (Kolos rãmba 3:12) Woto, d pa segd n baas n yeel tɩ bũmb n pa zems lae-lae, sã n mik tɩ tõnd tigingã pʋgẽ, yɛl sẽn wat ne yẽgeng n be ye, wala makre, ned sã n sãam a to sũur wẽng b sẽn sɩd maan ned bɩ ned sẽn tẽed tɩ b maan-a-la wẽng yĩnga.
11. Ne bõe la karen-biig a Zak keoogd tõndo?
11 A Zezi ma-biig a Zak goamã me wilgdame tɩ d segd n gũume tɩ baa yaa wakat-wakat bɩ d seg yɛl sẽn na n wa kɩt tɩ d segd n kõ d saam-biisã sugri. “Ãnda n be yãmb sʋk n tar yam la bãngre? Bɩ a wilg a tʋʋma ne a yel-manesem sõama ne sũ-bʋgsem yam sẽn wat ne. La sũ-kiiri ne no-koɛɛma sã n be yãmb sũyã pʋsẽ, da wuk-y yãmb mens n yag zĩri n kɩɩs sɩda ye.” (Zak 3:13, 14) “Sũ-kiir ne no-koɛɛma” kiris-neb hakɩk sũyẽ? N-yẽe, a Zak goamã wilgda vẽeneg tɩ yɩɩ woto yʋʋm kob-yendẽ wã la a na n yɩɩ woto rũndã-rũndã me.
12. Yel-bʋg n puk pĩnd Filipã tiging pʋgẽ?
12 Makr sɩd-sɩd ne rẽ n zĩnd kiris-neb a yiib sẽn zae sʋka. B yiibã yʋy ra yii sõma wa neb sẽn modgd sõma a Poll sɛɛgẽ. Tõe tɩ y tẽege, y sã n karem a Evodi ne a Sẽntis sẽn da yaa Filip tigingã neba wɛɛngẽ. Baa ne a sẽn pa togsd yellã n fasem zãngã, Filip rãmba 4:2, 3 wilgdame tɩ yell n da be b sʋkã. Rẽ sɩnga ne gomd sẽn zabd sũur b sẽn togs n pa tags tɩ bɩ, roagd paoogr manesem bɩ sũ-kiir buud sẽn pukd wags-taab vẽeneg bɩ? Ba a sẽn yɩ to-to, wa n lebga yell hali n kɩt t’a Poll zĩnd hal Rom n wʋm a kɩbare. Tõe tɩ kiris-nin-pogs a yiibã sẽn tar tẽebã ra ye pa gomd ne taaba, tɩ rẽ wa kɩt tɩ ned fãa gind a to tigissẽ wã, bɩ ned fãa sãbgd a to a zo-rãmb taoore.
13. Bõe n zĩnd a Evodi la a Sẽntis sʋka, tɩ rẽ kõt zãms-bʋgo?
13 Yel-kãensã wõnda y sẽn mi n yã bɩ, wala bũmb sẽn zĩnd yãmb tigingã pʋgẽ neb sʋka, bɩ yell yãmb sẽn da be a pʋgẽ bɩ? Yel-kãngã buud tõeeme meng n be bilf masã. Bõe la d tõe n maane? Sã n yaa ne yell ning sẽn zĩnd pĩnd wẽndẽ wã wɛɛngẽ, a Poll sagla saam-bi-pogs kãensã b yiibã sẽn tar yẽesma tɩ b “paam yam a yembr Zusoaba tʋʋmd pʋgẽ.” Tõe tɩ b sakame n yẽs yellã zug vẽeneg sẽn na yɩl tɩ b mo-yõsrã sa, tɩ b yiibã fãa wilg tɩ b rat n kõo sugri, tɩ ne woto bɩ b sɩd rɩk a Zeova sẽn nong n kõt sugrã togs-n-taare. D pa tõe n tags bũmb a to tɩ sã n pa a Evodi la a Sẽntis tõog n zemsa taab ye, la tõnd me tõe n zemsa taaba. D tõe n talla sugr kũun manesem a woto rũndã-rũndã n tõoge.
Bao-y laafɩ n kõ sugri
14. Bõe yĩng tɩ naoor wʋsgo yaa bũmb sẽn tõe la são tɩ d bas d mo-yõsrã ne d taabã tɩ sa bala?
14 Sɩd yaa bõe la y segd n maan n kõ sugri, y sã n tar zu-loɛɛg ne kiris-ned a to? Sɩd-sɩda, manesem sẽn yaa nana ka be ye, la Biiblã kõta makr sẽn tõe n sõnge, la sagls sẽn sɩd zemse. Yellã tɩɩm a yembr b sẽn sagend tɩ d tũ, baa ne a sakrã la a tũubã sẽn pa nana wã, yaa d sẽn na n yĩm yellã bal n bas taale. Naoor wʋsgo, yell sã n beẽ, wala sẽn yɩ to-to ne a Evodi la a Sẽntisã, ned fãa tagsdame tɩ ned a to wã n ka bʋʋm bɩ tɩ yẽ soabã kongr n yɩɩde. Yel-kãngã buud pʋgẽ, y sɩd tõeeme n tags tɩ yaa kiris-ned a to wã la b segd n deng n ning taale, bɩ tɩ yaa yẽ n maan wẽng n yɩɩda. Baasg zãnga, y tõeeme bal n bas yellã n kõ sugr bɩ? Bãng-y tɩ sã n yaa kiris-ned a to wã n deng n tar taal n yɩɩda, la yaa toog tɩ yɩ woto, yãmb sẽn be zĩig ningã kõta yãmb sor n yɩɩd tɩ y bas yellã tɩ loog n kõ sugr tɩ sa.
15, 16. a) Wãn-wãn la a Miise bilg a Zeova? b) Wẽnnaam sẽn ‘basd taalã’ rat n yeelame tɩ bõe?
15 Bɩ d ra yĩm tɩ Wẽnnaam kõo tõnd mak-sõng sugrã kũun wɛɛngẽ ye. (Efɛɛz rãmba 4:32–5:1) Sã n yaa ne mak-sõng ning A sẽn basd beegrã taalã wɛɛngẽ, no-rɛɛs a Miise gʋlsame: “Wẽnnaam a to ka be n zem yãmb ye. Yãmb kõta sugri, la y basda neb nins sẽn keta taale. Yãmb sũur ka puugd wakat fãa ye, bala yãmb nonga sẽn yaa neere.”—Miise 7:18.
16 Biiblã sẽn bilgd a Zeova wa ned sẽn ‘basd taalã,’ a pa yet tɩ Wẽnnaam pa tõe n tẽeg beegrã, t’a yãkda yɛl n yĩmd n ye pa tõe n tẽeg ye. Ges-y a Sãmsõ la a Davɩɩd kɩbarã. B yiibã fãa maana kong-kãsemse. Wẽnnaam da tõe n ket n tẽegda b yel-wẽnã hal kaoosg wʋsg poore. D pʋd n mii b yel-wẽn kẽere, a Zeova sẽn kɩt tɩ b gʋls-b Biiblẽ wã yĩnga. Baa ne rẽ, tõnd Wẽnnaamã sẽn yaa sugr-kõtã talla ninbãan-zoeer ne nin-kãensa b yiibã, n wilg-b tõnd wa tẽeb mak-sõms d sẽn tõe n dɩk b togs-n-taare.—Hebre dãmba 11:32; 12:1.
17. a) Bõe n na n sõng tõnd tɩ d bas neb a taabã kongrã bɩ b beegrã taale? b) D sã n modg n maan woto, wãn-wãn la d na n dɩk a Zeova togs-n-taare? (Ges-y seb-vã-neng tẽngr notã.)
17 N-yẽe, a Zeova ra tõeeme n ‘bas taal’a ne beegrã, wala a Davɩɩd sẽn kos-a n yɩlem t’a maanã. (2 Sãmwɛll 12:13; 24:10) D tõe n dɩka Wẽnnaam togs-n-taar dẽ wɛɛngẽ bɩ, n dat n bas taal ne beeg-kɩds la kong-kɩds nins tõnd sõgen-taasã sẽn maand tõndo, b sẽn yaa ninsaalb sẽn pa zems zãngã yĩngã bɩ? Mams-y n ges y sẽn na n be sɩlg sẽn yɩkd pʋgẽ. Y sẽn lɩk n ges yɩngã y nee y mit sẽn be sɩlgã yɩkr sor noor n laeed a nus ne paoogr manesem wa biiga. Yãmb miimi t’a sũurã ra sãama ne yãmba. Bɩ tõeeme t’a pa tagsd yãmb yell baa bilf ye. Sẽn ya a soab fãa, sɩlgã sẽn tar zẽkr n loogdẽ wã, yãmb zãaga wʋsg ne pagã sẽn lebg lɩʋʋ masã wã. Lɛɛr a yembr kẽnd pʋgẽ y zãaga sẽn na maan kɩlometr kobs wʋsgo, la a paoogr manesmã zãra wʋsg ne yãmb masã. Woto me, naoor wʋsgo, na n sõnga tõnd tɩ d kõ sugri, d sã n modg n na n yɩ wa a Zeova n tall yam n bas beegrã talle. (Yelbũna 19:11) Paoogrã pa na n wõneg zaalem yʋʋm piig poore, bɩ yʋʋm kobs-yi Yʋʋm tusrã pʋgẽ sɩda? Bõe yĩng tɩ y pa na n bas taal tɩ sa bala?
18. Sã n wõnd d pa tõe n bas beegr taale, sagl-bʋg la d tõe n tũ?
18 Tõe tɩ wakat-wakat bala y pʋʋsa yellã wɛɛngẽ n mak n na n kõ sugri, la y mikame tɩ y pa tõe ye. Bõe la y segd n maan masã? A Zezi saglame tɩ d tɩ yã ned a to wã n mak n welg mo-yõsrã tõnd d yiib sʋk bal tɩ laafɩ zĩndi. “Dẽ yĩnga, fo sã n wa ne f kũun tẽn-kugr taoore, n zĩnd be n tẽeg tɩ f tara yell ne f ba-biiga, bɩ f bas f kũuna tẽn-kugrã taoore n kẽng n deng n maneg f yella ne f ba-biigã n yaool n wa n kõ f kũunã.”—Matɩe 5:23, 24.
19. Manesem bʋg la d segd n talle, la manesem bʋg la d pa segd n talle, d sã n baood laafɩ ne d saam-biiga?
19 Y yãame, a Zezi pa yeel tɩ y tɩ yã y saam-biigã n kɩt t’a sak tɩ y ra bee bʋʋm la tɩ yẽ da ka bʋʋm ye. Tõe t’a ra ka bʋʋm ye. Tõe tɩ neb a yiibã fãa ra kongame. Sẽn ya a soab fãa, d sẽn datã pa d kɩt tɩ ned a to wã sulg n sake, tɩ yaa wa a wẽeda kãntɩɩg n kot sugr tõnd taoor ye. Sã n yaa woto la y na n sõs yellã zug fãa, yaa y sɩd bãng tɩ y na n konga bõn-datlã la bala. D sẽn datã me pa lebs n tẽeg beegrã sẽn sɩd zĩndã bɩ d sẽn mamsd bal tɩ zĩndame wã yel-bil fãa ye. Sõsg sẽn maan bãan pʋgẽ la kiris-nedemd la nonglem pʋgẽ sã n kɩt tɩ y bãng tɩ wʋm-taab kaalem la yellã võor meng-mengã, yãmb y yiibã fãa tõe n maoome n welg yellã. La baa yẽsgã sã n pa kɩt tɩ y zems taab zãng-zãnga, woto yaa tɩlae wakat fãa bɩ? Pa são tɩ baa yaa yãmb y yembr sak n deeg tɩ yãmb y yiibã fãa rata ne pʋ-peelem n sõgen tõnd Wẽnnaamã sẽn yaa sugr kõtã sɩda? Y sã n ges yellã ne sɩd woto, tõe n yɩɩ nana n yɩɩd ne ned fãa t’a yeel woto ne a sũur fãa: “Kaeto! Tõnd pa-zems-zãngã n kɩt tɩ d moorã yõsg taab woto wã. Wa tɩ d bas tɩ sa.”
20. Bõe la tʋm-tʋmdbã makr tõe n zãms tõndo?
20 Tẽeg-y tɩ tʋm-tʋmdbã talla mo-yõsa, bãmb kẽer sẽn wa n dat waoogr n yɩɩdã. (Mark 10:35-39; Luk 9:46; 22:24-26) Rẽ waa ne tak-tɩ-m-take, tõe tɩ b sãama taab sũyã, bɩ b beega taab wʋsg menga. La b ra tõe n basa taal ne mo-yõsr a woto la b ket n tʋmd ne taaba. Bãmb ned a yembr gʋlsa woto kaoosg zugẽ: “Ned sã n dat t’a vɩɩm yɩ noogo la [a] paam sũ-noog daar fãa, bɩ a ra sak t’a zɩlemd gom wẽnga, la [a] ra sak t’a noor gom ziri goam ye. Bɩ a zãag ne wẽnga la a maan neere. Bɩ a bao laafɩ la tũ-a.”—1 Pɩɛɛr 3:10, 11.
21. Sagl-bʋg sẽn tar pãng la a Zezi kõ sugrã kũun wɛɛngẽ?
21 Tõnd reng n togsa bũmb sẽn wat n yɩlemdẽ neng a yembre: Wẽnnaam kõo tõnd sugr yel-wẽn wʋsg d sẽn maan pĩndã yĩnga. Woto yĩnga, d segd n dɩka a togs-n-taar n kõ d saam-biisã sugri. (Yɩɩl Sõamyã 103:12; Ezai 43:25) La bõn-kãngã sẽn wat n yɩlemdẽ wã tara neng a to. A Zezi sẽn kõ makr pʋʋsgã poore a yeelame: “Yãmb sã n kõ neba sugr b beegra yĩnga, yãmb Ba sẽn be arzãna me na n kõo yãmb sugri y beegra yĩnga.” Yʋʋmd poore, a ye togsa a võorã meng-meng n zãms a karen-biisã tɩ b pʋʋs woto: “Bɩ y kõ tõnd sugri d yel-wẽna yĩnga, tɩ tõnd me kõta neb nins sẽn beegd tõnda sugri.” (Matɩe 6:12, 14; Luk 11:4) Rasem a wãn bal sẽn deng a Zezi kũumã a paasame: “La yãmb sã n yas yĩngri n pʋʋsdẽ, yãmb sã n tar yell ne neda, bɩ y kõ-a sugri, tɩ yãmb Ba sẽn be arzãn me kõ yãmb sugri y beegra yĩnga.”—Mark 11:25.
22, 23. Wãn-wãn la tõnd sẽn dat n kõ sugrã tõe n mad tõnd beoog-daarã?
22 N-yẽe, tõnd sã n dat n ket n paamd Wẽnnaam sugri, bee wʋsg ne d sẽn na n dat n kõ d saam-biisã sugri. Zu-loees sã n wa puk kiris-nebã ne taab sʋka, bɩ y sʋk y mengã: ‘Wẽnnaam sugrã paoong pa tar yõod wʋsg n yɩɩd mam sẽn na n wilg tɩ m saam-biigã bɩ m saam-bi-poakã ra konga bʋʋm, a sẽn maan paoogr bilfu, beegr sẽn pa zem baa fʋɩ, bɩ ninsaal pa-zems zãngã pukr bilf yĩng sɩda?’ Yãmb mii a leokre.
23 Yaa wãn to masã, yellã sã n yaa dem-dem n yɩɩd beeg-kɩdg bɩ zu-loe-kɩdg neb ne taab sʋka? La yaa wakat bʋg la d segd n tũ a Zezi saglg ning sẽn be Matɩe 18:15-18 pʋgẽ wã? Bɩ d vaees sʋgs-kãensã nindaare.
[Footnotes]
a Mit a yembr yeelame tɩ Hebre gom-makdem ning b sẽn tũnug ne Miise 7:18 pʋgẽ wã b “rɩk-a-la so-toagd manesmẽ sẽn loogd n pa bãngd teoog a sẽn pa rat n gũus n yã ye. Tagsg ning a sẽn wat ne wã pa tɩ Wẽnnaam pa ne yel-wẽnde, bɩ a geta yel-wẽnd wa yel-yaalg bɩ bũmb sẽn ka yõod ye, la t’a pa gʋlsd-a sẽn na yɩl n wa wa ne sɩbgr ye. A rat n yeelame t’a pa sɩbgde, la a kõta sugri.”—Bʋkaoodba 3:26; 1 Sãmwɛll 16:8.
Y tẽrame bɩ?
◻ Wãn-wãn la a Zeova kõ-d makr tɩ d tũ, sugrã kũun wɛɛngẽ?
◻ Bõe la d segd n tẽege, neb nins sẽn be tigingã pʋgẽ wã wɛɛngẽ?
◻ Naoor wʋsgo, bõe la d segd n tõog n maan paoog-biy bɩ beeg-biya wɛɛngẽ?
◻ Sã n yaa tɩlae, bõe la d tõe n maan n tall laafɩ ne d saam-biiga?
[Caption on page 13]
Y sã n paam mo-yõsr ne kiris-ned a to, bɩ y modg n bas taale, tɩ sã n tar-n-tarẽ, yellã na n wa lebga wa zaalem