Segl-y Yʋʋm Tusr Ning Sẽn Tar Yõodã Yi̇̃nga!

KIRIST Yʋʋm Tusr Naamã Rɩɩb na n waa ne bark b sẽn pa tõe n bãng n bilg n kõ ãdem-biisã. A Zezi sor-wilgr sẽn tar nonglmã pʋgẽ, b na n zẽka ãdem-biisã tɩ b yi b masã sũ-sãoongã zĩigẽ n paam zems zãng sẽn tar ziiri. Tags-y n ges rẽ sẽn tõe n wa ne bũmb ning n kõ yãmba. Yaa yĩns laafɩ sẽn yaa sõma wʋsgo! Tags-y n ges y sẽn na n nek yibeoog fãa tɩ y laafɩ wã yɩɩd zaamẽ. Neb milyõ rãmba, roap la pagb ne kamb gẽegdame n na n vɩɩmd wakat kãng sẽn be sũ-noogã sasa. B gũud-a lame, n pʋʋsdẽ t’a wa. B sẽn zãms Biiblã kɩtame tɩ b kɩs sɩd tɩ b tõe n paama bark kãensã.

Baasg zãnga, nand t’a sɩng a Yʋʋm Tusr Naamã Rɩɩbo, a Zezi Kirist segd n yiisa a naamã bɛɛb fãa tɩ b menem tẽngã zugu. A na n maana woto n tũnug ne zabr ning b sẽn boond tɩ Armagedõ Biiblã pʋgẽ wã. (Wilgri 16:16) Kiris-neb hakɩkã sẽn be tẽng zugã pa na n zab zab-kãng pʋgẽ ye. Yaa Wẽnnaam zabre. La zabrã pa na n zab zĩ-yend ye. Biiblã yetame t’a na n taa tẽngã zĩ-zãrs sẽn yɩɩdẽ wã fãa. B na n kʋʋ Kirist naamã bɛɛba. Bãmb ned ba a yembr pa na n põs ye!—Zeremi 25:33.

Rẽ poore, a Zezi na n balga a Sʋɩtãan Munaafɩɩk la a zĩn dãmbã. Mams-y n ges yellã wa Wilgr sebrã gʋlsd sẽn yã-a wã: “Mam yãa malɛk [a Zezi Kirista] sẽn yi arzãn n sigi. La a tara bog-zulung kʋɩlen-biiga la bãng kãseng a nugẽ. Yẽ yõka dragõ sẽn yaa wag-kʋdre sẽn yaa diaabl la Sʋɩtãana n balg-a yʋʋm tusri.” (Wilgri 20:1, 2) Kaoosg poore, b na n sãama a Sʋɩtãan la a zĩn dãmbã wakat fãa yĩnga.—Matɩe 25:41.

“Kʋʋng [kãsengã, NW] . . . ned [sẽn] ka tõe n sõd n sɛ” wã na n põsa Armagedõ. (Wilgri 7:9) Kirist na n sõnga nin-kãensã tɩ b rɩ ‘vɩɩm ko-bundsã zĩis’ nafa tɩ pidi, wala pe-kɩɩm sẽn kokd a piis n kẽngd koom sẽn fãagd vɩɩm zĩigẽ wã. (Wilgri 7:17) A Sʋɩtãan ne a zĩn dãmbã sẽn pa na n leb n gɩdg nin-kãensã taoor kẽngr tẽebã wɛɛngẽ wã yĩnga, Armagedõ põsdb kãensã na n paama sõngr bilf-bilf n tõog b yel-wẽnã tʋlsem n wa baas n ta zems zãng zĩigẽ!

Kirist naamã rɩɩb sẽn tar nonglmã pʋgẽ, vɩɩmã na n lebgda sõma n paasd wakat fãa. A Zeova Wẽnnaam na n tũnuga ne a Zezi Kirist n yiis yɛl nins fãa sẽn wat ne toog la sũ-sãoongã. A “na n yẽesa nintãma fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre wala toog kõn le zĩnd yɛs ye.” (Wilgri 21:4) No-rɛɛs a Ezai kʋmsda yɛlã sẽn na n yɩ to-to wã woto: “Dẽ, zõens nin na n pukame la wʋms tʋb na n yoosame. Dẽ, wobs na n yikame n tĩims wa yãgse la mugs zɛlma na n laka ne sũ-noog yɩɩla.” (Ezai 35:5, 6) La kũumã, “nin-tals ne nin-kãsems” na n lebg n waa vɩɩm pʋgẽ ne saagr sẽn yaa vɩɩmd n da tol n ki yɛs ye!—Wilgri 20:12.

Baa masã, b tigimda ‘kʋʋng kãseng’ ning sẽn na n põs Armagedõ wã. B segenda b mens Kirist Yʋʋm Tusr Naamã Rɩɩb yĩnga. Baa ne b sẽn pa mi wakat ning naam dɩɩb kãng sẽn na n sɩngã, b kɩsa sɩd tɩ wakat ning Wẽnnaam sẽn yãkã pʋgẽ, b na n sɩng-a lame. Y tõe n zĩnda b sʋkã, la yãmb me segd n seglame, pa y koos y tarma bɩ y tog sor n kẽng zĩig ning ye, la yaa y sẽn na n tũnug ne Biiblã zãmsg n bao n paam a Zeova Wẽnnaam la a raabã bãngr sẽn yaa takɩ wã. A Zeova Kaset rãmbã sũy na n yɩɩ noog tɩ b wilg Biiblã zãmsg sẽn tõe n naf yãmb la y zakã rãmb to-to tɩ pa tũ ne yaoob bɩ modgr ye. Seb-kãngã yiisdb sũy na n yɩɩ noog tɩ b kõ-y kɩbay n paase.

[Box on page 7]

Yʋʋm tusrã yaa yʋʋm tusr sɩd-sɩd bɩ yaa makr bũmbu?

Sẽn mik tɩ b gʋlsa Wilgr sebrã sẽn be Biiblã pʋgẽ wã ne makr goamã yĩnga, rẽ wata ne sʋkre. Yaa wãn to ne Kirist Yʋʋm Tusr Naamã Rɩɩb yell b sẽn gom Wilgr sebrã pʋgẽ wã? A yaa yʋʋm tusr sɩd-sɩd bɩ yaa makr bũmbu?

Kasetã fãa wilgdame tɩ yaa yʋʋm tusr sɩd-sɩda. Ges-y-yã: Tʋm-tʋmd a Poll gomda Kirist Yʋʋm Tusr Naamã Rɩɩb yell n yetẽ tɩ yaa daar a ye, tɩ wakat kãng bɩ ãdem-biisã bʋʋd na n bʋ. (Tʋʋma 17:31; Wilgri 20:4) Tʋm-tʋmd a Pɩɛɛr gʋlsame tɩ daar a yembr (lɛɛr 24) ne a Zeova yaa wa yʋʋm tusri. (2 Pɩɛɛr 3:8) Woto kõta kaset tɩ bʋ-kaoor kãng “raar[ã]” sɩd kaoosda yʋʋm tusr meng-menga. Sẽn paase, Wilgri 20:3, 5-7 (NW) pʋgẽ naoor a naas zĩis toɛ-toɛyẽ, d pa karemd be tɩ “yʋʋm tusr a yembr” ye, la yaa “yʋʋm tusrã.” Wõnda woto wilgda wakat kaoosg sẽn yãk takɩ.