“Koe-noog” Sẽn Yit Apokalipsã Pʋgẽ

“Mam yãa malɛk a to sẽn yɩgd n pɩʋʋgd arzãna, la a tara Koe-noog sẽn ka sɛta n na n moon neb nins sẽn be dũniyã.”—WILGRI 14:6.

1. Baa ne a Zeova Kaset rãmbã sẽn tẽed tɩ yaa vʋʋsem sõngã n vẽneg tɩ b gʋls Apokalips sebrã, bõe yĩng tɩ b pa “tũudum will sẽn moond yel-be-kãsenga”?

SẼN yaa lebend ne rõdb nins b sẽn dõt-bã, a Zeova Kaset rãmbã pa “tũudum will sẽn moond yel-be-kãsenga,” bɩ “tũudum will sẽn moond bʋ-kaoor daar” ye. Baasg zãnga, b sakdame tɩ Apokalips bɩ Wilgr sebrã bee Wẽnnaam Gomdã vʋʋsem sõngã sẽn vẽneg tɩ b gʋlsã pʋgẽ. Yaa sɩda, Wilgrã tara bʋ-kaoor koees b sẽn togs nin-wẽnsã zutu. La b zãma sʋk kasetã pʋgẽ, Wẽnnaam sõgen dãmbã gomd n tadgda saagr kãseng ning sẽn be Biiblã pʋgẽ wã zug n yɩɩda, saagr ning sẽn be Apokalips bɩ Wilgrã pʋgẽ sẽn paase. Woto b pa paasd bũmbu, bɩ n yãk bũmb bãngr-goam nins sẽn be a pʋgẽ wã ye.—Wilgri 22:18, 19.

Koe-noog moondba

2. Verse kẽer bʋs la a Zeova Kaset rãmbã nong n tũnugd ne b moonegã tʋʋmdẽ?

² Tikr sẽn be Gʋlsg Sõamyã pʋgẽ b sẽn nong n wilgdẽ, tɩ kõt a Zeova Kaset rãmbã ministɛɛrã zãma sʋka bʋʋm yaa a Zezi togs-kãngã: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14, ges-y NW, tẽngr notã) “Soolem koe-noog kãngã” yaa bõe? Kaset rãmb wʋsg ra na n leokẽ lame n togs verse nins sẽn yit Wilgr sak 20 la 21 pʋsẽ sẽn gomd Kirist Yʋʋm Tusr Naamã rɩɩb la a goosneema sẽn yaa Rĩungã la ãdem-biis lagem-taabã, zĩig ning kũum, sũ-sãoong la toog sẽn pa na n ‘le zĩnd yɛsã’ yelle.—Wilgri 20:6; 21:1, 4.

3. A Zeova Kaset rãmbã zãma sʋk ministɛɛrã zemsa ne tʋʋm-bʋgo?

³ A Zeova Kaset rãmbã sẽn yaa koe-noog kãngã moondbã, b sɩd yaa saasẽ makr koe-taasdã gom-dɛɛsdba. B bilga koe-taasd kãng me tʋʋmdã Wilgr sebrẽ wã. “Mam yãa malɛk a to sẽn yɩgd n pɩʋʋgd arzãna, la a tara Koe-noog sẽn ka sɛta n na n moon neb nins sẽn be dũniyã soolem fãa la neba fãa.” (Wilgri 14:6) Mooneg n be “koe-noog sẽn ka sɛta” pʋgẽ. Mooneg kãng yaa wilg tɩ “dũniyã soolem [bɩ a naama] fãa lebga tõnd Zusoaba la bãmb Kirist dẽnda,” la t’a Zeova “wakat [ning a sẽn yãkã, NW]” taame t’a ‘na n sãam neb nins sẽn sãamd dũniyã.’ (Wilgri 11:15, 17, 18) Woto sɩd pa koe-noog sɩda?

Wilgr sebrã sẽn tar bũmb ning n na n kõ tõndo

4. a) Sɩd-kãsems bʋs n be Wilgr sak a 1 wã pʋgẽ? b) Bõe la b baood tɩ neb nins sẽn tʋll n dɩ koe-noogã nafrã maane?

⁴ Wilgr sebrã pipi sakã wilgdame t’a Zeova yaa “sɩngre la sɛɛbo. Ned ninga sẽn be la sẽn dag n be la sẽn wata, Sẽn-tõeyã-fãa wã.” La a wilgdame t’a Biribl a Zezi Kirist yaa “kaset soab sɩd-sɩda” la “dũniyã nanams rĩma.” A leb n gomda a Zezi yell wala “sẽn nonga tõndo n pek tõnd ne bãmb zɩɩm n yiis tõnd yel-wẽna.” (Wilgri 1:5, 8) Woto, hal a sɩngrẽ wã, Wilgr sebrã togsda sɩd-kãsems sẽn fãagd vɩɩm. “Neb nins sẽn be dũniyã soolem fãa” wã pa na n dɩ koe-nood nins b sẽn taas-bã nafr tɩ sã n pa b sak n deega a Zeova naam sẽn-ka-to wã, n tall tẽeb ne a Zezi zɩɩmã sẽn daagã, la b tẽ t’a Zeova vʋʋg-a lame, la tɩ masã Kirist yaa tẽngã Naab ning Wẽnnaam sẽn yãkã ye.—Yɩɩl Sõamyã 2:6-8.

5. B bilga Kirista t’a tʋmd tʋʋm-bʋg Wilgr sak a 2 la a 3 pʋgẽ?

⁵ Sags a yiibã sẽn pʋgdã bilgda Kirist Zezi wala a karen-biisã sẽn be tẽng zugã tiging yel-gɛt sẽn be saasẽ sẽn tar nonglem. Seb-pindim ning b sẽn taas kiris-neb tigims a yopoe b sẽn tũus sẽn da be Azi Mineer yʋʋm kob-yendẽ T.W. ra tara sagls sẽn kengd pɛlg la sẽn da yaa kãn-kãe, sẽn ket n tar yõod rũndã-rũndã. Koees nins b sẽn tool tigimsã nong n sɩngda ne goam wala “Mam bãnga yãmb tʋʋma,” bɩ “Mam bãnga yãmb tooga.” (Wilgri 2:2, 9) N-yẽe, Kirist ra mii bũmb nins sẽn da maand a karen-biisã tigimsẽ takɩ. A pẽga kẽer b nonglmã, b tẽebã b tʋʋm toogã ministɛɛrã pʋgẽ wã, b tõog-toogã la b kɩs-sɩdã ne a yʋʋrã la a gomdã yĩnga. A lenga a taaba, b sẽn da bas tɩ b nonglmã ne a Zeova la ne a Biriblã maagã yĩnga, bɩ b sẽn da kẽes b mens yoobã, bõn-naands pʋʋsgã bɩ tũudum wil sẽn yaa sɩdã-kɩɩsgã pʋgẽ wã yĩnga.

6. Bõe la yãab ning b sẽn gʋls sak a 4 pʋgẽ wã sõngd nebã tɩ b bãnge?

⁶ Sak a 4 wilgda a Zeova Wẽnnaam yĩngr naam geerã mamsg sẽn yɛɛsd wʋsgã. A kõta makr bilf ne a Zeova zĩigẽ wã ziir la a saasẽ naamã rɩɩb siglg ning a sẽn na n tũnug ne wã. Na-rɩtb nins sẽn fõgen maanf rãmbã naam gɛy sẽn gũbg ãndũniyã geer sẽn be tẽn-sʋkã, waoogda a Zeova la b zẽkd b koees n yet woto: “Tõnd Zusoaba la tõnd Wẽnnaam, yãmb n zems tɩ reeg pẽgre la waoogre la pãnga, tɩ bõe, yãmb n naan bũmb fãa, la yaa yãmb daaba yĩng la yãmb naan bãmb tɩ b beẽ.”—Wilgri 4:11.

7. a) Bõe la malɛkã kos tẽngã neb tɩ b maane? b) Bõe n yaa tõnd zãmsgã tʋʋmd bab-kãsenga?

⁷ Rẽ tara võor ne nebã rũndã-rũndã bɩ? Vẽenega a tara võore. B sã n dat vɩɩm Rĩungã Yʋʋm tusr naam sasa, b segd n kelga bũmb ning ‘Malɛk ning sẽn yɩgd n pɩʋʋgd yĩngrã’ sẽn moondã: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame.” (Wilgri 14:6, 7) Tʋʋmd ning sẽn yaa zãms nebã Biiblã a Zeova Kaset rãmbã sẽn maandã bõn-datɩ kãsemsã a yembr yaa sõng “neb nins sẽn be dũniyã soolem fãa” wã tɩ b bãng a Zeova la b balm-a, tɩ b sak n deeg tɩ yaa yẽ la Naandã, la b sak a naam sẽn-ka-to wã sẽn yaa tɩrgã ne yamleoogo.

Pebilã zemsa ne waoogre

8. a) Wãn-wãn la b bilg Kirista sak a 5 la a 6 pʋgẽ? b) Neb nins fãa sẽn kelgd koe-noogã tõe n paama zãmsg bʋg ne yãab kãngã?

⁸ Sags a yiib nins sẽn pʋgdã, sak a 5 la a 6, wilgda a Zezi Kirist wala Pebil b sẽn ges t’a zemsa ne pak seb-pindmã ne sogds a yopoe wã, tɩ ne woto bɩ b pukd yɛl nins sẽn maand rũndã-rũndã wã makr goam pʋsẽ. (Mak-y ne Zã 1:29.) Koees sẽn yit yĩngr n yet makr Pebi-kãngã woto: “Yãmb n zems tɩ reeg sebrã la y sok a sogdsã. Tɩ bõe, b ra kʋʋ yãmba, la yãmb fãaga ninsaalb buud fãa bãmb goam sẽn yaa toor-toore, la b buud sẽn yaa toor-toore, la b soolem sẽn yaa toor-toora ne yãmb zɩɩm, tɩ bãmb lebg Wẽnnaam neba. La yãmb maana bãmb tɩ b yɩ rĩm dãmba la maan–kʋʋdb tõnd Wẽnnaam yĩnga, la bãmb na n dɩɩ naam dũniyã zugu.” (Wilgri 5:9, 10) Yãab kãngã wilgdame tɩ Kirist zɩɩmã sẽn daagã yẽbgr zugu, ninsaalb kẽer sẽn yit buud toɛ-toɛyẽ la b boolẽ tɩ b zĩnd ne yẽ saasẽ la “bãmb na n dɩɩ naam dũniyã zugu.” (Mak-y ne Wilgri 1:5, 6.) B sõorã sẽn yãk koakã b vẽneg n togs-a-la taoor Wilgr sebrã pʋgẽ.

9. Wãn-wãn la b wilg Kirist sak a 6 pʋgẽ?

⁹ Yãab kãng pʋgẽ, b bilga Kirist me wala wed-mo-pɛɛlg wed-rʋʋd sẽn fõgen maanfo, n yit n na n “tɩ tõoge la a baas a tõogrã.” Zu-noogo, a na n tõoga yel-beed nins Apokalips wed-rʋʋdb a tãabã a taabã sẽn makdã, tɩ b gãeem zoeesã wa ne zaba, kom la kũum ãdem-biisã zut yʋʋmd 1914 sẽn yɩ yʋʋmd sẽn welg toorã tɛkã. (Wilgri 6:1-8) Kirista sẽn yaa Wẽnnaam Pebilã tʋʋm-kãseng sẽn pa tar mak-n-taagã a sẽn maan ãdem-biisã fãagr yĩngã, la a Zeova raab kãsemsã pidsg yĩngã yaa a Zeova Kaset rãmbã Biibl zãmsg tʋʋmd gom-zu-ra-kãseng a yembre.

10. a) Kɩba-bʋg sẽn tar yõod la sak a 7 wã kõta? b) Wãn-wãn la Kirist gom neb nins sẽn paamd Rĩungã yelle?

¹⁰ Sak a 7 wã sɩd tara koe-noodo. Yaa wilgr sebrẽ wã bal la d yãt neb nins a Zezi sẽn bool tɩ “bãg-bila” sõore, tɩ Pebilã Ba kõt-b Rĩungã. (Luk 12:32, NW; 22:28-30) Yaa a Zeova Wẽnnaam n tũnug ne a vʋʋsem sõngã n ning nin-kãensã bãnde. (2 Korẽnt dãmba 1:21, 22) Tʋm-tʋmd a Zã sẽn deeg Wilgrã yeta woto: “Mam wʋma bãmb sõor b sẽn ning bãnde, a yaa tus-koabga la tus-pis-naase la a naase.” (Wilgri 7:4) B wilgame tɩ sõor kãngã sẽn yaa takɩ wã sɩd yaa woto sak sẽn be taoore, sẽn wilgd tɩ yaa neb nins “b sẽn da ãdem-biisã sʋk” sõor zãnga, tɩ b rɩ naam ne Pebilã yĩngr Siõ Tãngã zugu. (Wilgri 14:1-4, NW) Sasa ning dũni kiris-nedemdã sẽn wilgd sõor kãngã võor tɩ pa vẽenega, t’a sakr yaa toogã, ges-y Biibl mit a Ethelber Bullinger sẽn yet sõor kãng wɛɛngẽ tɩ be yamleoogo: “Yaa bũmb sẽn na n zĩnd togsg bala: yaa sõor sẽn yaa takɩ, sẽn yaa lebend ne sõor sẽn pa yãk takɩ wã sẽn be sak kãngã meng pʋgẽ wã.”

11. a) Koe-no-bʋg la d yãt sak a 7 wã pʋgẽ? b) Saag-bʋs la ‘kʋʋng kãsengã’ neb tõe n paame?

¹¹ A Bullinger ra gomda sõor sẽn pa yãk takɩ bʋg yelle? Verse a 9 wã pʋgẽ, tʋm-tʋmd a Zã gʋlsame: “Dẽ poore, mam gesame, la haya, kʋʋng [kãsengã, NW] n be be tɩ ned ka tõe n sõd n sɛ ye, sẽn yi soolem fãa, la buud fãa, la neb sẽn gomd goam toɛ-toɛya fãa.” (Wilgri 7:9) Ãnd dãmb n be kʋʋng kãsengã pʋgẽ, la b yasr Wẽnnaam taoor yaa bʋg rũndã-rũndã, la bõe n gũud-b beoog-daare? Apokalips leokrã yaa koe-noog n kõ tẽngã nebã. D karemdame: “Bãmb yaa neb sẽn yi to-kãsenga pʋgẽ, la bãmb peka b fut tɩ lebg peelse ne Pebila zɩɩm.” Tẽeb ning b sẽn tar ne Kirist zɩɩmã sẽn daagã maasem, b na n paama koglg “to-kãsenga” sasa. Kirist “na n talla bãmb n ta vɩɩm ko-bunds zĩisẽ. La Wẽnnaam na n yẽesa bãmb nintãma fãa.” (Wilgri 7:14-17) N-yẽe, neb milyõ rãmb sẽn vɩ rũndã-rũndã tõe n zĩnda kʋʋng b sẽn pa tõe n sõd n sa wã sẽn na n põs masã yɛl siglgã saabẽ wã sʋka. B sẽn na n yɩ Rĩm a Zezi Kirist zẽemba, a Yʋʋm Tusr Naamã rɩɩb sasa wã, a na n kõ-b-la sor-wilgr tɩ b wa paam vɩɩm sẽn-kõn-sa tẽng zugu. Woto pa koe-noog sɩda?

‘A bʋʋda kaoob yaa sɩda la tɩrga’

12, 13. a) Bõe n be sak a 8 n tɩ ta sak 19 wã pʋgẽ? b) Bõe yĩng tɩ bãngr-gom-kãensã pa segd n kẽes pʋ-peelem dãmbã rabeem?

¹² Sak a 8 n tɩ ta 19 wã kɩta wʋsg tɩ Apokalips bɩ Wilgr sebrã yʋʋr yi wala sebr sẽn dengd n togsd yel-be-yɛɛsdse. B tara bʋ-kao koees sẽn tar pãng wʋsgo (b sẽn mak ne bard peebgo, toodo la Wẽnnaam sũ-yikrã laase) b sẽn taasd a Sʋɩtãan yɛl siglgã babs toɛ-toɛya. B na n pidsa bʋ-kao kãensã. Pipi, na n yɩɩ ziri tũudmã (“Babilon kãsenga”) zugu, rẽ poore yaa politik siglsã we-rũmsã sẽn makdã zutu.—Wilgri 13:1, NW, 2; 17:5-7, 15, 16.a

¹³ Sag-kãensã bilgda saasẽ yɩlgrã, tɩ b rig a Sʋɩtãan ne a zĩn dãmbã n sik tẽngã sẽnẽ. Yaa rẽ bal n wilgd dũniyã toog to buud sẽn zɩ n zĩndã yʋʋmd 1914 tɛkã võor tɩ zemse. (Wilgri 12:7-12) Ne makr goam me, b leb n bilgda a Sʋɩtãan yɛl siglg wẽngã sẽn be tẽng zugã sãango. (Wilgri 19:19-21) Pʋ-peelem dãmbã sũy segd n sãama ne yel-to-kãsems kãensã bɩ? Ayo, bala Wẽnnaam bʋ-kao wã pidsg wakate kʋʋng sẽn be saasẽ zẽkda b koees n yetẽ: “Alleluia! Fãagre la waoogre ne pãng bee ne tõnd Wẽnnaam. Tɩ bõe, bãmb bʋʋda kaoob yaa sɩda la tɩrga.”—Wilgri 19:1, 2.

14, 15. a) Wãn-wãn la b na n saas masã yɛl siglg wẽngã tɩrlem pʋgẽ? b) Bõe yĩng tɩ Apokalipsã bab-kãngã segd n kõ pʋ-peelem dãmbã sũ-noogo?

¹⁴ A Zeova pa na n wa ne yɛl siglg tɩrgã n pa reng n sãam neb nins sẽn sãamd tẽngã ye. (Wilgri 11:17, 18; 19:11-16; 20:1, 2) Baasg zãnga, ninsaal bɩ Politik tẽng ba a ye pa tar sor bɩ pãng n tõe n maan woto ye. Yaa a Zeova ne a Zezi Kiristi, sẽn yaa Rĩm la Bʋkaood a sẽn yãkã bal n tõe n maan woto ne tɩrlem.—2 Tesalonik rãmba 1:6-9.

¹⁵ Wa Apokalipsã sẽn wilgd vẽenegã, a Zeova raab yaa a sãam masã dũni wẽngã. Rẽ segd n waa ne sũ-noog n kõ roap la pagb nins sẽn “wõosd n yãbd bõn-wẽns nins sẽn maand[ã] . . . yĩnga.” (Ezekɩɛll 9:4) Rẽ segdame n kɩt tɩ b bãng tɩ yaa yãgb bũmb ne-b tɩ b kelg booll ning malɛk ning sẽn tar koe-noogã sẽn maanã, n togs woto wã: “Bɩ y zoe Wẽnnaam . . . tɩ bõe, bãmb bʋʋd kaoob wakat taame. Bɩ y waoog sẽn naan-a yĩngri la tẽnga.” (Wilgri 14:7) Bɩ nin-kãens balem la b sõgen a Zeova ne a Kaset rãmbã, “sẽn sakd Wẽnnaam noore la sẽn tar a Zezi kasetã.”—Wilgri 12:17.

Yʋʋm Tusr Naamã Rɩɩb sẽn tar ziirã

16. a) Bõe yĩng tɩ dũni kiris-nedemdã egiliiz rãmb zãgs Yʋʋm tusrã saagre? b) Bõe yĩng t’a Zeova Kaset rãmbã tẽed tɩ makr pʋʋsgã na n paama reegre?

¹⁶ Sak 20 n tɩ ta 22 sẽn be Wilgr sebrẽ wã tara Gʋlsg Sõamyã tikr sẽn na yɩl tɩ d tall saagr ne Yʋʋm Tusrã. Biiblã pʋgẽ, sɩd yaa zĩ-kãngã pʋgẽ bal n gomd yʋʋm tusrã wakatã sẽn na n yɩ sũ-noog sẽn-kõn-sa sɩngr saasẽ la tẽng zugã yelle. Dũni kiris-nedemdã egiliiz rãmb zãgsa Yʋʋm tusrã saagre. Sẽn mik tɩ Egiliizã tara pa-vigsd zãmsg ning sẽn yet tɩ nin-tɩrsã kẽngda saasẽ tɩ nin-wẽnsã kẽngd bugmẽ wã, a pa tar zĩig tẽng zug arzãn yĩng ye. Makr pʋʋsgã sẽn kot tɩ Wẽnnaam “daabã maan tẽng zug wala a sẽn maand saasẽ” wã ye pa tar võor baa bilf ne dũni kiris-nedemdã egiliiz rãmb neb wʋsg sẽn yɩɩd ye. (Matɩe 6:10, New International Version) La pa woto ne a Zeova Kaset rãmbã ye. B tẽeda ne pa-vigsd t’a Zeova Wẽnnaam pa maan tẽngã “zaalem ye,” la yaa sẽn na yɩl tɩ “neb zĩnd a zugu.” (Ezai 45:12, 18) Woto, pĩnd wẽndẽ bãngr-goama, makr pʋʋsgã la apokalips saagrã sẽn tɩ loe ne yʋʋm tusrã fãa zemsda taaba. A Yʋʋm Tusr Naamã rɩɩb sasa, Kirist na n kɩtame t’a Zeova raabã maan tẽng zugu, wa a sẽn maand saasẽ wã.

17. Bõe n wilgd tɩ d segd n gesa “yʋʋm tusrã” t’a yaa yʋʋm tusr sɩd-sɩda?

¹⁷ Gomd ning sẽn yaa “yʋʋm tusr[ã]” wata naoor a yoob Wilgr sak 20 wã pipi verse rãmb a yopoe pʋsẽ. Bũmb sẽn nekd ratem yaa tɩ b rɩkd-a lame n tʋmd naoor a naas ne tẽngẽng sẽn yaa “ã” wã, tɩ wilgdẽ t’a tɩ loee ne yʋʋm tusr sɩd-sɩda, la pa wakat sẽn kaoosd wʋsg tɩ b pa mi a tɛkã, wala neb wʋsg dũni kiris-nedemdã võor-wilgdb sʋk sẽn dat tɩ tõnd tags to-to wã ye. Bõe n na n zĩnd yʋʋm tusrã wakate? Pipi, b na n n yõka a Sʋɩtãan t’a pa tõe n maan bũmb wakat kãng fãa pʋgẽ ye. (Wilgri 20:1-3, NW; mak-y ne Hebre dãmba 2:14.) Ad woto sɩd yaa koe-noogo!

18. a) Bõe yĩng tɩ b tõe n bool Yʋʋm tusrã tɩ bʋ-kaoor “daare”? b) Bõe n na n zĩnd yʋʋm tusrã saabẽ?

¹⁸ Sẽn mik tɩ b kõo ‘bʋʋd kaoob tõog’ neb nins sẽn ‘dɩt naam wala rĩm dãmb ne Kirista yʋʋm tusrã sasa wã,’ rẽnd, wakat kãng yaa yʋʋm tusr bʋ-kaoor ‘daare.’ (Wilgri 20:4, 6, NW; mak-y ne Tʋʋma 17:31; 2 Pɩɛɛr 3:8.) Sẽn ki-bã na n vʋʋgame, la ne “to-kãsenga” põsdba, b na n kaoa b bʋʋd ne tɩrlem tɩ zems ne b rẽ wẽnd tʋʋmã bɩ b manesmã. (Wilgri 20:12, 13) Yʋʋm tusrã saabẽ, b na n basa a Sʋɩtãan wakat bilf pʋgẽ sẽn na yɩl t’a wa ne yaoolem makr ãdem-biisã zutu, rẽ poore b na n sãama yẽ ne a zĩn dãmbã la tõtbã fãa sẽn be tẽng zug n na n pʋg-a wã wakat fãa yĩnga. (Wilgri 20:7-10) Ninsaalb nins sẽn na n tõog makrã na n paamame tɩ b yʋy gʋls “vɩɩm sebra” pʋgẽ tɩ b ye pa yẽes-b ye. La b na n kẽes-b-la vɩɩm sẽn tar sũ-noog sẽn-kõn-sa pʋgẽ, tɩ b sõgend a Zeova la b balemd-a tẽng zug arzãnã pʋgẽ.—Wilgri 20:14, 15; Yɩɩl Sõamyã 37:9, 29; Ezai 66:22, 23.

19. a) Bõe yĩng tɩ d tõe n kɩs sɩd tɩ kãab-kãsems nins sẽn be Wilgr sebrẽ wã na n pidsame tɩ sãmbg ka be? b) Bõe la d na n vaees sõsg ning sẽn pʋgdã pʋgẽ?

¹⁹ Koe-nood nins sẽn be Apokalipsã pʋgẽ la woto. Pa pʋlem-vɩɩd ninsaal sẽn maan ye. Tʋm-tʋmd a Zã gʋlsa woto: “La sẽn zaoa geera yeelame yaa: ‘Gese, mam maanda bũmb fãa paalse.’ La b yeela maam yaa: ‘Gʋlse! Tɩ bõe, gom-kãens yaa sɩda la b zemsa reegre.’ ” (Wilgri 21:5) Bõe la d segd n maan n naag koe-no-kãensã pidsg pʋgẽ? Wilgr sebrã tara sagls wʋsg neb nins sẽn dat n ta Wẽnnaam yama yĩnga. Sagl-kãensã tũub na n kõo tõnd sũ-noog sẽn ka koak masã la wakat sẽn-kõn-sa, wala sõsg ning sẽn pʋgdã sẽn na n wilgã.

[Footnotes]

Lebg-n-gese

◻ Sɩd-kãsems bʋs sẽn be Wilgr sak a 4 n tɩ ta a 6 pʋgẽ n yaa koe-noodã bab-kãsenga?

◻ Koe-no-bʋg n be Wilgr sak a 7 wã pʋgẽ?

◻ Bõe yĩng tɩ bʋ-kao koees nins sẽn be Wilgr sebrẽ wã pa segd n kẽes pʋ-peelem dãmbã rabeem?

◻ Wãn-wãn la Yʋʋm tusrã na n yɩ bʋ-kaoor “daare”?

[Picture on page 22]

Rĩm a Zezi Kirist na n yiisa zabã, komã la kũumã zãng fasɩ tẽngã zugu