Yɩ-y Wilgr Sebrã Karemd Sẽn Tar Sũ-noogo
“Sũ-noog soab la ned ning sẽn zẽkd a koɛɛg n karemd bãngr-gom-kãngã goamã,la neb nins sẽn wʋmd-bã, la sẽn tũud bũmb nins sẽn gʋls a pʋgẽ wã.” —Wilgri 1:3, NW.
“MAAM a Zã . . . da bee Patmos sẽn yaa tẽng koom sẽn gũbga, Wẽnnaam goama la a Zezi kaseta yĩnga.” (Wilgri 1:9) Yaa yel-kãensã pʋsẽ la tʋm-tʋmd a Zã gʋls Apokalips bɩ Wilgr sebrã. B togsame tɩ b ra tall-a-la ne pãng n kẽng Patmos Rom soolmã Naab a Dominisiẽ (yʋʋmd 81-96 T.W.) sẽn kɩt tɩ soolmã Naabã baleng paam pãnga, la a lebg kiris-nebã namsdã naam wakate. A Zã sẽn da wa n be Patmosã, a paama yãab a taaba, n gʋls-ba. A togs-b lame, pa sẽn na yɩl n yɛɛs pipi kiris-nebã ye, la yaa sẽn na yɩl n kõ-b pãnga, n bels-b la a kõ-b raoodo, makr nins b sẽn da segdã, la b rãmb nins sẽn da gũud-bã yĩnga.—Tʋʋma 28:22, NW; Wilgri 1:4; 2:3, 9, 10, 13.
2. Bõe yĩng t’a Zã ne a kiris-nin-taasã sẽn da be yɛl nins pʋsẽ wã pak rũndã-rũndã kiris-nebã?
2 Yɛl nins pʋsẽ b sẽn gʋls Biiblã seb-kãngã wã võor tagma ne kiris-neb nins sẽn vɩ rũndã-rũndã wã. A Zã ra paamda namsgo, a sẽn da yaa a Zeova la A Biribl a Zezi Kirist kaset soabã yĩnga. Yẽ ne a kiris-nin-taasã ra vɩɩ neb sẽn kis-b sʋka, bala baa ne b sẽn da modgd n na n yɩ tẽng-n-bi-sõmsã, b ra pa rat n balem soolmã Naabã ye. (Luk 4:8, NW) Tẽns sãnda pʋsẽ, rũndã-rũndã kiris-neb hakɩkã bee yɛl a woto buud pʋsẽ. Tẽn-kãens pʋsẽ pãn-soaadbã yetame tɩ b tara sor n na n yãk sẽn “sakd maaneg tũudmã wɛɛngẽ.” Woto yĩnga, ad goam nins sẽn be Wilgr sebrã sɩngrẽ wã kõta belsg wʋsgo: “Sũ-noog soab la ned ning sẽn zẽkd a koɛɛg n karemd bãngr-gom-kãngã goamã, la neb nins sẽn wʋmd-bã, la sẽn tũud bũmb nins sẽn gʋls a pʋgẽ wã; bala wakatã b sẽn yãkã kolgame.” (Wilgri 1:3, NW) N-yẽe, neb nins sẽn maagd b yĩns n karem Wilgr sebrã la b sakd-a wã tõe n paama sũ-noog hakɩk la bark wʋsgo.
3. Ãnd nengẽ la Wilgrã b sẽn taas a Zã wã yi-yã?
3 Wilgr sebrã Yẽgr meng-meng yaa ãnda, la ne bõe la b tũnug n taas-a? Pipi verse wã yeta tõndo: “A Zezi Kirist wilgri, Wẽnnaam sẽn kõ-a, sẽn na yɩl n wilg a yembsã bũmb nins sẽn segd n wa ka la bilfã. La a tʋma a malɛkã la a wilg[-a] ne bãn n tũnug ne yẽ n taas a yamb a Zã.” (Wilgri 1:1, NW) D sã n na n togs nana-nana, Wilgr sebrã Yẽgr meng-meng yaa a Zeova Wẽnnaam, t’a kõ-a a Zezi, t’a Zezi tũnug ne malɛk n taas-a a Zã. Vaeesg bilf sẽn paas wilgdame t’a Zezi rɩka vʋʋsem sõngã n tʋm me sẽn na yɩl n taas tigimsã koees la a kõ a Zã yãabo.—Wilgri 2:7, 11, 17, 29; 3:6, 13, 22; 4:2; 17:3; 21:10; mak-y ne Tʋʋma 2:33.
4. Bõe la a Zeova ket n tũnugd ne rũndã-rũndã n wilgd a nin-buiidã sor tẽng zugu?
4 A Zeova ket n tũnugda ne a Biriblã, sẽn yaa “bãmb neba zu-soabã,” sẽn na yɩl n zãms a sõgen dãmbã sẽn be tẽng zugã. (Efɛɛz rãmba 5:23; Ezai 54:13, NW; Zã 6:45) A Zeova leb n tũnugda ne a vʋʋsmã n zãmsd a nin-buiidã. (Zã 15:26; 1 Korẽnt dãmba 2:10) La wala a Zezi sẽn tũnug ne “a yamb a Zã” n taas yʋʋm kob-yendẽ tigimsã tẽeb rɩɩb tɩ zã-bã, woto me, rũndã-rũndã, a tũnugda ne “kɩs-sɩd la gũusd yambã,” sẽn yaa a ‘ba-biis’ nins sẽn zae sẽn be tẽng zugã, n kõt a zakã neb la b tẽeb tũud-n-taasã “rɩɩbã wakat sẽn zems pʋgẽ wã.” (Matɩe 24:45-47, NW; 25:40) Neb nins sẽn sakd “kũun sõama” nins tõnd sẽn paamd tɩ yaa tẽeb rɩɩbã Yẽgrã, la neb nins A sẽn tũnugd ne wã tara sũ-noogo.—Zak 1:17.
Tigims Kirist sẽn wilgd sore
5. a) Ne bõe la b mak kiris-neb tigimsã la b yel-gɛtbã? b) Baa ne d sẽn yaa ninsaalb sẽn pa zems zãngã, bõe n na n paas tõnd sũ-noogã?
5 Wilgr sebrã pipi sags pʋsẽ, b rɩka kiris-neb tigimsã n mak ne fɩtl dogendse. B rɩka b yel-gɛtbã n mak ne malɛk rãmba (koe-taasdba) la ãdse. (Wilgri 1:20)a A sẽn gomd a meng yelle, Kirist yeela a Zã t’a gʋlse: “Sẽn zãad-a ãds a yopoe ne a rɩtgo la a kẽnd sãnem fɩtl dogends a yopoe sʋka yetame tɩ yaa.” (Wilgri 2:1) Koees a yopoe nins b sẽn tool Azi tigims a yopoe wã wilgdame tɩ yʋʋm kob-yendẽ T.W., tigimsã ne b kẽem dãmbã ra tara b zʋg-sõma la b zʋg-wẽnse. Yaa woto me rũndã-rũndã. Woto yĩnga, d na n paama sũ-noog n paase, d sã n pa tol n yĩm tɩ Kirist sẽn yaa tõnd Zusoabã bee tigimsã sʋka. A mii bũmb nins sẽn maandã hal sõma. Makr wɛɛngẽ, yel-gɛtbã bee ‘a nug rɩtgo,’ sẽn dat n yeel t’a so-b lame la a wilgd-b sore, tɩ b segd n kolg n togs-a b sẽn wãbend tigimsã to-to wã.—Tʋʋma 20:28; Hebre dãmba 13:17.
6. Bõe n wilgd tɩ pa yel-gɛtbã bal n segd n kolg n togs Kirist taoore?
6 Baasg zãnga, d na n belga d mense, d sã n tagsdẽ tɩ yaa yel-gɛtbã bal n segd n kolg n togs Kirist taoor b tʋʋmã yĩnga. Kirist koɛɛg a yembr pʋgẽ, a yeelame: “Mam tẽedbã sẽn be zĩiga fãa wã bãng tɩ mam mii neba ratem ne b sũyã, la mam na n kõo yãmb ned kam fãa sẽn zems a tʋʋma.” (Wilgri 2:23) Woto kell n yaa keoogr la yaa goam sẽn kõt raoodo. Yaa keoogr tɩ Kirist mii bũmb nins sẽn solg sẽn tusd tõndã, la yaa bũmb sẽn kõt raoodo, bala rẽ kõta tõnd bas-m-yam tɩ Kirist nee tõnd modgrã, la a na n ning-d-la barka, d sã n maan d sẽn tõe.—Mark 14:6-9; Luk 21:3, 4.
7. Wãn-wãn la kiris-neb nins sẽn da be Filadɛlfi wã ‘tall koɛɛg ning sẽn tɩ loe ne a Zezi tõog-toogã’?
7 Kirist koɛɛgã a sẽn taas tigimsã Filadɛlfi tigingã sẽn be Lidi soolmẽ wã ra pa tar lengr ye, la b sɩd kãab-a-la bũmb sẽn segd n tall yõod wʋsg ne tõndo. “Yãmb sẽn talld mam koɛɛga namsg pʋgẽ wã yĩnga, mam me na n fãaga yãmb makr wakate sẽn na n wa dũniyã tɛk fãa n mak dũniyã rãmbã.” (Wilgri 3:10) Gerɛk gom-biig ning b sẽn lebg ne “talld mam koɛɛga namsg pʋgẽ [namsgã wɛɛngẽ, NW] wã” tõe n dat n yeelame me tɩ “tall mam sẽn yeel bũmb ning tõog-toogã wɛɛngẽ wã.” Verse a 8 wã wilgdame tɩ kiris-nebã sẽn be Filadɛlfi wã ra pa sak Kirist noyã bal ye, la b ra tũu saglg ning a sẽn kõ n yeel tɩ bãmb mensã tõog toog kɩs-sɩd pʋgẽ wã.—Matɩe 10:22; Luk 21:19.
8. a) Kãab-bʋg la a Zezi maan Filadɛlfi kiris-nebã? b) Rũndã-rũndã, ãnd dãmb la ‘makr wakatã’ tukda?
8 A Zezi kãabame t’a ra na n kogl-b-la ‘makrã wakate.’ Rẽ võor sẽn yɩ a soab ne kiris-nebã rẽ wẽnde d pa mi ye. Baa ne yolsg bilf sẽn zĩnd namsgã tẽebã yĩng a Dominisiẽ kũumã poor yʋʋmd 96 T.W., namsg wʋsg tẽebã yĩng n ye sɩng a Tarzã naama wakate (98-117 T.W.), tɩ sãmbg kaẽ tɩ rẽ waa ne makr a taaba. La ‘makr wakat’ kãsengã bee “Soaalã daarẽ,” “sɛɛba wakate,” tõnd sẽn be a pʋgẽ masã wã. (Wilgri 1:10, NW; Daniɛll 12:4) Kiris-neb nins sẽn zae ne vʋʋsmã pasga makr wakat zall Dũni gill Pipi Zabrã wakat la a poor bilfu. Baasg zãnga, ‘makrã wakat’ ket n kẽngda taoore. A tukda “dũniyã tɛk fãa,” tɩ neb milyõ rãmbã sẽn be kʋʋn-kãsengã pʋgẽ wã sẽn saagd n na n põs to-kãsenga be sʋka. (Wilgri 3:10; 7:9, 14) D na n paama sũ-noogo, d sã n ‘ket n tũud a Zezi sẽn yet tõog-toogã wɛɛngẽ wã,’ sẽn dat n yeel tɩ: “Ned ninga sẽn na n tall a tẽeb [sẽn na n tõog toog, NW] hal tɩ wakat ta, a na n paama fãagre.”—Matɩe 24:13.
A Zeova naam sẽn-ka-to wã sakr ne sũ-noogo
9, 10. a) Wãn-wãn la yãab ning sẽn tɩ loe ne a Zeova geerã segd n tuk tõndo? b) Wãn-wãn la Wilgr sebrã kareng tõe n paas tõnd sũ-noogã?
9 A Zeova naam geerã la a yĩngr zakã yãab sẽn be Wilgr sebrã sak a 4 la a 5 pʋgẽ wã segd n kɩtame tɩ d tall wẽn-yɛɛsgo. Yĩngr bõn-naandsã sẽn tar pãng wʋsgo, n sakd a Zeova naam sẽn-ka-to wã sẽn yaa tɩrgã ne sũ-noogã la b pẽgd-a ne b sũy fãa wã segd n kẽe tõnd sũyã sõma. (Wilgri 4:8-11) B segd n wʋma tõnd me koees neb nins sẽn yet woto wã sʋka: “Pẽgre la naam la waoogre la pãng bee ne sẽn zaoa geera zugã la ne Pebila wakat sẽn-ka-sɛta.”—Wilgri 5:13.
10 Vẽenega, woto rat n yeelame tɩ d sak a Zeova raabã bũmb fãa wɛɛngẽ ne sũ-noogo. Tʋm-tʋmd a Poll gʋlsame: “Yãmb sẽn maand bũmb ninga fãa, sã n yaa goama wala tʋʋmde, bɩ y maan fãa ne Zusoab a Zezi yʋʋre, la y pʋʋs Wẽnnaam sẽn yaa tõnd Ba wã bark Kirist maasem yĩnga.” (Kolos rãmba 3:17) D sã n karemd Wilgr sebrã d sɩd tõe n paama sũ-noogo, sã n mik tɩ tõnd yamã la d sũyã pʋsẽ, d sak n deega a Zeova naam sẽn-ka-to wã la d tũud a raabã d vɩɩmã nens fãa pʋsẽ.
11, 12. a) Wãn-wãn la b na n digimd a Sʋɩtãan tẽng zug siglgã n sãam-a? b) Sã n yaa ne Wilgr sak a 7, ãnd dãmb n na n ‘tõog n yals’ rẽ wẽnde?
11 Yaa a Zeova naam sẽn-ka-to wã sakr n yaa tõnd yembr-yembrã la ãndũniyã fãa sũ-noogã yẽgre. Ka la bilfu, tẽn-digimdg sẽn yaa makr tẽn-digimdg n na n digimd a Sʋɩtãan dũniyã siglg n luk a yẽbgrã n sãam-a. Ninsaalb nins sẽn zãgsd tɩ b kõn sak Kirist yĩngr goosneema pa na n paam solgr zĩig ye. Yĩngr goosneem kãng tʋmda Wẽnnaam naamã sẽn zemsã yʋʋr yĩnga. Bãngr-gomdã yetame: “Dũniyã rĩm dãmba ne nin-kãsemsa la sodaas nanamsa ne arzɛgs rãmba la pãens rãmba ne yembsa la burkĩmba fãa solga b mens bogd pʋsẽ la tãens kug sʋka. La bãmb yeela tãensa ne kuga yaa: ‘Bɩ y lʋɩ tõnd zutu la y solg tõnd ne sẽn zaoa geera zugã la ne Pebila sũ-puugri.’ Tɩ bõe, bãmb sũ-puugra daar kãsenga taame. La ãnda n tõe n põse?”—Wilgri 6:12, 15-17.
12 Yel-kãngã wɛɛngẽ, sak ning sẽn pʋgdã pʋgẽ, tʋm-tʋmd a Zã bilgda neb nins sẽn yaa kʋʋn-kãsengã sẽn “yi to-kãsenga pʋgẽ wã,” tɩ b ‘yas geera ne pe-bila taoore.’ (Wilgri 7:9, 14, 15) B sẽn yas Wẽnnaam geera taoorã wilgdame tɩ b sak n deega geer kãngã la b sakda a Zeova naam sẽn-ka-to wã zãng-zãnga. Woto yĩnga b tata Wẽnnaam yam.
13. a) Bõe la dũniyã neb wʋsg sẽn yɩɩd balemda, la bãndã sẽn be b rĩyẽ wã la b nusẽ wã makda bõe? b) Woto, bõe yĩng tɩ tõog-toogã na n yɩ tɩlae?
13 La sak 13 bilgda dũniyã neb a taabã wala neb sẽn balemd a Sʋɩtãan politik siglgã b sẽn mak ne we-rũnga. B paamda bãnd b “dĩyã” bɩ b “nug[ẽ],” tɩ rẽ wilgdẽ tɩ b tagsgẽ wã la b tʋʋmẽ wã b teenda siglg kãnga. (Wilgri 13:1-8, 16, 17) Rẽ poore sak 14 paasdame: “Ned sã n waoog [we-]rũngã wala yẽ bõn-naandgã, la a sã n deeg a gʋlsem a dĩirẽ wala a nugẽ, yẽ soab me na n yũu Wẽnnaam sũ-puugra rãam sẽn ka pulã, . . . Yaa woto n kɩt tɩ Wẽnnaam neba sẽn sakd Wẽnnaam noora ne a Zezi tẽeba tog n maan sũmare.” (Wilgri 14:9, 10, 12) Wakatã sẽn tar loogrã, sʋkr ning sẽn na n wa beẽ t’a pãngã paasdẽ wã la woto: Ãnd la yãmb teenda? Yaa a Zeova la a naam sẽn-ka-to wã bɩ, bɩ yaa politik siglgã sẽn yaa wẽn-kɩɩsã we-rũngã sẽn makdã? Neb nins sẽn na n lak b mens n pa reeg rũngã bãndã, la sẽn tõogd toog ne kɩs-sɩda, n sakd a Zeova naam sẽn-ka-to wã na n paama sũ-noogo.
14, 15. Koe-bʋg n yals Wilgr sebrã bilgr sẽn tɩ loe ne Armagedõ wã, la rẽ võor ne tõnd yaa bõe?
14 “Dũniyã tɛk fãa” nanambs manesem sẽn yaa to-to wã yaa no-baoodem, tɩ yɛlã tar n debd zabr zĩigẽ ne a Zeova, naam sẽn-ka-to wã wɛɛngẽ. Yellã welgr na n yɩɩ Armagedõ, sẽn yaa “Wẽnnaam Sẽn-tõe-fãa daar kãsenga zabre.” (Wilgri 16:14, 16) B sẽn da bilgd dũniyã nanambs sẽn da tigim n na n zab ne a Zeova wã wakate, yell sẽn nekd ratem wʋsg n kẽ sʋka. Yãabã pʋgẽ, a Zezi mengã yalsa bilgrã n yetẽ: “Gese, mam wata wa wagdre. Bark bee ned ninga sẽn gũusda zugu, la sẽn talld a fut n ka rat n kẽn zaal tɩ neba yã a yãndã.” (Wilgri 16:15) Rẽ tõeeme n tɩ loe ne Levi wẽn-doogã gũudbã. B ra piita gũudb kãens futã n ning-b yãnd neba fãa taoore, b sã n da mik-b tɩ b gõe b gũubã wakate.
15 Koɛɛgã yaa vẽenega: D sã n dat n põs Armagedõ, d segd n paa gũusg pʋgẽ tẽebã wɛɛngẽ, la d tall d tẽebã fut sẽn kɩtd tɩ b bãng tɩ tõnd yaa a Zeova Wẽnnaam Kaset rãmb sẽn tar kɩs-sɩdã. D na n paama sũ-noogo, d sã n pa gũs tẽebã wɛɛngẽ, la d sã n moond Wẽnnaam Rĩungã sẽn luglã “koe-noog sẽn ka sɛta” ne yẽesem n pa basdẽ ye.—Wilgri 14:6.
‘Sũ-noog bee ne ned ninga sẽn sakd seb-kãnga bãngr-goama’
16. Bõe yĩng tɩ Wilgr sebrã baasg sagsã wat ne sũ-noog zalle?
16 Wilgr sebrã karemdb sẽn tar sũ-noogã pa tõe n pa tall yĩn-sidg sẽn lagem ne sũ-noogo, b sã n karemd yaoolem sagsã sẽn bilgd tõnd saagrã sẽn tar ziirã ye. Saagr kãng yaa sa-paals la tẽn-paalga, sẽn yaa yĩngr goosneema tɩrg sẽn yaa Rĩungu, n dɩt naam ninsaalb lagem taab paalg zugu, tɩ rẽ fãa yaa “Wẽnnaam-sẽn-tõeyã-fãa” wã waoogr yĩnga. (Wilgri 21:22) Yãab kãsemsã sẽn pʋgd taabã sẽn baasdã wakate, koe-taasdã sẽn yaa malɛkã yeela a Zã: “ ’Gom-kãens yaa sɩda la b zemsa reegre, Zusoaba Wẽnnaam sẽn so bãmb no-rɛɛsdba sɩɩsa tʋma bãmb malɛka t’a wilg bãmb nonglem yembsa bũmb nins sẽn yaa tɩlae tɩ zĩnd bilf sã n paase.’ . . . ‘Gese, mam wata tao-tao. Bark bee ned ninga sẽn sakd seb-kãnga bãngr-goama zugu.’ ”—Wilgri 22:6, 7.
17. a) Bas-m-yam bʋg la b kõ Wilgr 22:6 pʋgẽ? b) Bõe la d segd n gũus n lak d mens ne?
17 Wilgrã sebrã karemdb sẽn tar sũ-noogã na n tẽegame tɩ goam sẽn wõnd woto n zĩnd “seb-pindmã” sɩngrẽ. (Wilgri 1:1, 3, NW) Gom-kãensã kõta tõnd bas-m-yam tɩ “bũmb nins” fãa b sẽn togs bãngr-goam pʋgẽ Biiblã yaoolem seb-kãngã pʋgẽ wã na n ‘waa ka la bilfu.’ Tõnd kẽe saabã wakat pʋgẽ wʋsg hal tɩ yel-kãsems nins waoong b sẽn deng n togs Wilgr sebrẽ wã segd n sɩd pʋg taab tʋʋll-tʋʋll n wa ka la bilfu. Sã n wõnd a Sʋɩtãan yɛl siglgã lugla kãn-kãe me, woto pa segd n kẽes tõnd tẽeb gõeem pʋgẽ ye. Sẽn karemda ne gũusg na n tẽega keoogr nins b sẽn kõ koees nins b sẽn taas Azi tigims a yopoe wã pʋsẽ wã, la a na n laka a meng ne bẽds wala laogã nonglem, bõn-naands pʋʋsgo, yoobo, yẽesem kaalem la tũudum wil maaneg sẽn yaa sɩdã kɩɩsgã.
18, 19. a) Bõe yĩng t’a Zezi wat ka la bilfu, la saagr bʋg a Zã sẽn togs la tõnd me tara? b) Bõn-datl bʋg yĩng la a Zeova na n ‘wa’ ka la bilfu?
18 Wilgr sebrã pʋgẽ a Zezi togsa naoor a yopoe tɩ: “Gese, mam wata tao-tao.” (Wilgri 2:16; 3:11; 22:7, 20a) Ka la bilfu a segd n waame n pids bʋ-kaoorã Babilon Kãsengã, a Sʋɩtãan politik siglgã, la ninsaalb nins fãa sẽn pa rat n sak a Zeova naam sẽn-ka-to wã Mesi Rĩungã sẽn ledgd masã wã zutu. Tõnd zẽkda d koees n naag tʋm-tʋmd a Zã sẽn zẽk a koɛɛg n yeel woto wã: “Ãmina! Bɩ y wa, Zusoab a Zezi.”—Wilgri 22:20b.
19 A Zeova mengã yetame: “Gese, mam wata tao-tao, la keoor bee ne maam tɩ kõ ned kam fãa sẽn zems a tʋʋmd sẽn yaa bũmb ninga.” (Wilgri 22:12) D sẽn gũud vɩɩm sẽn ka saabã keoor sẽn tar ziirã sasa, d bee “sa-paalsẽ wã” tɩ yaa “tẽn-paalgẽ wã” me, bɩ d lagem n togs pʋ-peelem dãmbã fãa bool-kãngã ne yẽesem: “ ‘Wayã’ la ned ninga sẽn wʋmda, bɩ yẽ yeele: ‘Wayã.’ La ko-yũud sẽn tar a soaba, bɩ a wa. La ned ninga sẽn data, bɩ a reeg vɩɩm koom zaalem.” (Wilgri 22:17) Bɩ bãmb me tõog n yɩ Wilgr sebrã sẽn yaa seb-kãseng vʋʋsmã sẽn vẽnegã karemdb sẽn tar sũ-noogo!
[Footnotes]
a Ges-y La Révélation: le grand dénouement est proche!, seb-vã-nens 28-9, 136 (tẽngr note).
Lebg-n-gese
◻ Bõe la a Zeova tũnug ne sẽn n taas Wilgrã, la bõe la d tõe n zãms rẽ pʋgẽ?
◻ Bõe yĩng tɩ d segd n tall sũ-noog ne koees nins b sẽn tool Azi tigims a yopoe wã karengo?
◻ Wãn-wãn la d tõe n paam koglg ‘makrã wakate’?
◻ Sũ-noog bʋg la dna n paame, d sã n tũud seb-pindim ning sẽn tar Wilgrã goama?
1. Yel-bʋs pʋsẽ la tʋm-tʋmd a Zã zĩnd a sẽn da wa n gʋlsd Wilgr sebrã, la yaa ne bõn-datl bʋg la b gʋls yãab kãensã?
[Picture on page 27]
Sũ-noog rãmb la neb nins sẽn sakd n deeg koe-noodã Yẽgr sẽn ya a soabã
[Picture on page 30]
Sũ-noog soab la ned ning sẽn paad nekr pʋgẽ wã