Hal Sẽn Ta Zĩ-bʋg La Yãmb Nong Wẽnnaam Gomdã?
“Mam nonga yãmb tõoga wʋsgo. Mam tagsda a yell daar fãa.”—YƖƖL SÕAMYÃ 119:97.
1. Ne manesem a ye bʋg la Wẽn-zoɛtbã wilgd b nonglmã ne Wẽnnaam Gomdã?
ROAP la pagb milyõ rãmb n tar Biiblã. La tall Biiblã la nong Wẽnnaam Gomdã yaa toore. Ned tõe n sɩd yeel t’a nonga Wẽnnaam Gomdã, a sã n karemd-a wakat-wakat sɩda? Vẽenega ayo! Sẽn yaa lebende, kẽer sẽn da pa nand Biiblã wʋsg karemd-a-la daar fãa masã. B zãmsame n nong Wẽnnaam Gomdã, la wala yɩɩl-gʋlsdã, masã b tagsda Wẽnnaam Gomdã yell “daar[ã] fãa.”—Yɩɩl Sõamyã 119:97.
2. Wãn-wãn la a Zeova Kaset soab a yembr tẽeb paam teelg tood pʋsẽ?
2 Ned a yembr sẽn zãms Wẽnnaam Gomdã nonglem yaa a Nasho Dori. Ne a tẽed-n-taasã, a tõoga toog sẽn yɩɩd yʋʋm pi-gĩn wʋsg pʋgẽ n sõgend a Zeova Albani sẽn ya a ba-yirã. Wakat kãng pʋgẽ wʋsgo, b ra gɩdga a Zeova Kaset rãmbã tʋʋmã, la nin-kãensã sẽn tar kɩs-sɩdã pa paam Biiblã sɛb wʋsg ye. La saam-biig a Dori tẽebã kell n yɩɩ kãn-kãe. Wãn-wãna? A yeelame: “Mam bõn-datl yaa m karem Biiblã tɩ ta ba yaa lɛɛr a yembr daar fãa. La yaa woto la m maan yʋʋm 60 pʋgẽ tɩ m ninã wa ye pa ne sõma ye.” Hal sẽn pa kaoose, Biiblã tõr da pa be ne Albani buud-gomdã ye, la saam-biig a Dori ra zãmsa Gerɛk goamã a sẽn da wa n yaa biiga, rẽ n so t’a karem Biiblã buud-gom-kãng pʋgẽ. Biiblã kareng wakat fãa teela saam-biig a Dori makr toɛ-toɛ pʋsẽ, la a tõe n teela tõnd me.
“Bɩ y nong” Wẽnnaam Gomdã
3. Manesem bʋg la kiris-nebã segd n bao n tall ne Wẽnnaam Gomdã?
3 Tʋm-tʋmd a Pɩɛɛr gʋlsame tɩ “wa kom-peelse, bɩ y nong Wẽnnaam koɛɛga sẽn wẽnd wa bĩisim sẽn ka pulã.” (1 Pɩɛɛr 2:2) Wala bi-pɛɛlg sẽn tar tʋlsem wʋsg ne a ma bĩismã, kiris-neb nins sẽn mi tɩ b tara tẽeb ratmã baoodame n na n karem Wẽnnaam Gomdã ne yamleoogo. Yaa woto la yãmb tagsd bɩ? Sã n pa woto bɩ y ra koms raood ye. Yãmb me tõe n bɩɩsa nonglem wʋsg ne Wẽnnaam Gomdã.
4. Maan tɩ Biiblã kareng yɩ raar fãa minung baooda bõe maanego?
4 Sẽn na yɩl n maan woto, bɩ y reng n kibl y mengã n kɩt tɩ Biiblã kareng yɩ y wakat fãa minungu, bũmb y sẽn maand daar fãa tɩ sã n tõe. (Tʋʋma 17:11) Tõe tɩ y pa tõog n dɩk lɛɛr daar fãa n karem Biiblã wa a Nasho Dori sẽn maana ye, la y tõeeme n yãk sẽk daar fãa n vaees Wẽnnaam Gomdã. Kiris-neb wʋsg yikda minit a wãn pĩnd sẽn na yɩl n bʋgs Biiblã babg a yembr zugu. Manesem a to bee sẽn yaa sõma n yɩɩd woto d sẽn tõe n sɩng daarã sɩda? Neb a taab nongame n yɩɩd n baas daarã n karem Biiblã y yaool n kẽ gãaga. Neb a taab me karemda Biiblã wakat a taab sẽn zems pʋgẽ. Sẽn be sardã yaa d karem Biiblã wakat fãa. Rẽ poore, rɩk-y wakat a wãn n bʋgs y sẽn karma zugu. Bɩ d rɩk makr a wãn ne neb sẽn dɩ Wẽnnaam Gomdã kareng la a zug bʋgsg nafa.
Yɩɩl-gʋlsd sẽn da nong Wẽnnaam Tõogã
5, 6. Baa ne d sẽn tõe n pa mi a yʋʋrã, bõe la d tõe n zãms n bãng Yɩɩl Sõamyã 119 soabã gʋlsd wɛɛngẽ, d sã n karem la d bʋgs a sẽn gʋlsã zugu?
5 Yɩɩl Sõamyã 119 soabã gʋlsd sɩd talla naneb wʋsg ne Wẽnnaam Gomdã. Ãnd n gʋls yɩɩn-kãngã? B pa wilg gʋlsdã sẽn ya a soab Biiblã pʋgẽ ye. La d sã n ges yɩɩllã sẽn be zĩig ningã, d bãngda yɛl b sẽn togs n welg a soabã wɛɛngẽ, la d miimi t’a sega zu-loees a vɩɩmã pʋgẽ. A mitins kẽer sẽn da yet tɩ b yaa a Zeova balemdb pa tall nonglem ne Biiblã noy wa yẽ ye. Baasg zãnga, yɩɩl-gʋlsdã pa bas tɩ b manesmã kɩt t’a pa maan sẽn yaa tɩrg ye. (Yɩɩl Sõamyã 119:23) Yãmb sã n vɩ bɩ y tʋmd ne ned sẽn pa tar waoogr ne Biiblã noyã, y tõe n yãa yɛl sẽn wõnd b rãmb nins yɩɩl-gʋlsdã sẽn yã wã.
6 Baa ne yɩɩl-gʋlsdã sẽn da yaa wẽn-zoɛtã, a ra pa ned sẽn get a meng wa nin-tɩrg tɩ loog ye. A sak n deega vẽeneg t’a tara pãn-komslem. (Yɩɩl Sõamyã 119:5, 6, 67) Baasg zãnga, a pa bas tɩ yel-wẽnã soog-a ye. “Bi-bɩɩg na n maana a wãn t’a sor zemse [n yɩlg a sore, NW]?” woto la a sʋk-yã. Ad a sẽn leoke: “Ya a sẽn na n kẽn wa sẽn zems yãmb goama.” (Yɩɩl Sõamyã 119:9) Rẽ, a sẽn gomd n tadgd Wẽnnaam Gomdã sẽn tar pãng to-to wã zug neer maaneg yĩngã, yɩɩl gʋlsdã paasame: “Mam bĩnga yãmb koɛɛga m sũur pʋgẽ sẽn na n yɩlga tɩ m da wa kong ne yãmb ye.” (Yɩɩl Sõamyã 119:11) Pãng sẽn tõe n sõng tõnd tɩ d ra beeg Wẽnnaam sɩd yaa pãng menga!
7. Sẽn yɩɩd fãa, bõe yĩng tɩ kom-bɩɩsã segd n bãng tɩ b segd n karma Biiblã daar fãa?
7 Kom-bɩɩs nins sẽn yaa kiris-nebã na maan neer n vaees yɩɩl-gʋlsdã goamã. Kiris-neb nins sẽn yaa kom-bɩɩsã segda weoogr rũndã-rũndã. Munaafɩɩkã rata ne a sũur fãa n kʋɩɩb a Zeova balemdbã zãmaan-paalga. A Sʋɩtãan sẽn dat yaa tus kiris-neb nins sẽn yaa kom-bɩɩsã tɩ b bas b mens n lʋɩ yĩngã ratem yɛlẽ tɩ b kɩɩs Wẽnnaam noyã. Filim dãmbã la televiziõ wã nong n pukda a Sʋɩtãan tagsgã. Filim kãensã aktɛɛr dãmbã wõnda b bee yamleoogo. B bilgda yoobã sẽn maand nin-kãens sʋkã wa bũmb sẽn zemse. Yaa bõe koɛɛg la rẽ taasda? ‘Yaa bũmb sẽn sakd tɩ neb sẽn pa kẽ kãadem maan yoob ne taaba, b sã n sɩd nong taaba.’ Zu-bʋko, yʋʋmd fãa, kiris-neb kẽer sẽn yaa kom-bɩɩs n paamd kʋɩɩbg tags-kãngã buud yĩnga. Kẽer tẽeb sãamdame. Woto, weoogrã beeme! La weoogrã yaa wʋsg hal n kɩt tɩ kom-bɩɩsã pa tõe n mao n tõog-a bɩ? Ayo! A Zeova tuka sor tɩ kiris-neb nins sẽn yaa kom-bɩɩsã tõe n tõog tʋlsem wẽnsã. B tõe n yalsa kãn-kãe zab-teoog fãa Munaafɩɩkã sẽn tõe n mams n wa ne taoore, ‘b sẽn na n kẽn wa sẽn zems yãmb goama, n bĩng a koɛɛga b sũur pʋgẽ.’ Wakat a wãn la yãmb mengã rɩkd n zãmsd Biiblã, n karmda la y bʋgsd a zugu?
8. Wãn-wãn la makr nins sẽn be sul-kãngã pʋgẽ wã tõe n sõng yãmb tɩ y tall naneb n paas ne a Moiiz Tõogã?
8 Yɩɩl Sõamyã 119 soabã gʋlsd zẽka a koɛɛg n yeel woto: “Mam nonga yãmb tõoga wʋsgo.” (Yɩɩl Sõamyã 119:97) A ra gomda tõog bʋg yelle? Ra yaa a Zeova Gomdã a sẽn vẽneg tɩ b gʋlsã, a Moiiz Tõogã sẽn paase. Neb kẽer tõe n deng n basa Tõogã kɛɛng n yetẽ tɩ b ye pa tar yõod tõnd wakatã, la b sʋkd n dat n bãng ned sã n tõe n nong-a lame. La d sã n tags a Moiiz Tõogã nens toɛ-toɛ zut wa yɩɩl-gʋlsdã, d tõe n bãnga yam ning sẽn be Tõog kãng pʋgẽ wã. Tõogã nens wʋsg sẽn yaa bãngr-goamã toor sẽn ka be, noy sẽn tɩ loe ne laafɩ wã la rɩ-rɩtɩ wã n da be be. No-kãens paasa yɩlemdã la yĩns laafɩ wã. (Maankʋʋre 7:23, 24, 26; 11:2-8) Tõogã ra sagenda nebã tɩ b tall pʋ-peelem leebgã pʋgẽ la a ra sagend Israɛll nebã tɩ b tall ninbãan-zoeer ne b balemdb taas nins sẽn da be ratem pʋgẽ wã. (Yikri 22:25, 26; 23:6; Maankʋʋre 19:35, 36; Tõodo 24:17-21) B ra segd n kaoo bʋʋdã tɩ bak-n-sõng kaẽ ye. (Tõodo 16:19; 19:15) Yɩɩll Sõamyã 119 soabã gʋlsd sẽn paam minim vɩɩmã pʋgẽ wã, sãmbg sẽn ka be, a yãa yɛlã sẽn baas n yɩ neer to-to ne neb nins sẽn tũ Wẽnnaam Tõogã, la a nonglmã ne Tõogã pãng paasame. Woto me, rũndã-rũndã, kiris-nebã sẽn tõogde, b sẽn tũud Biiblã noyã yĩnga, b nonglmã la b nanebã ne Wẽnnaam Gomdã pãng paasdame.
Na-biig sẽn tall raood n yɩ toore
9. Manesem bʋg la Rĩm a Ezekɩas bao n tall ne Wẽnnaam Gomdã?
9 Tagsa nins sẽn be Yɩɩll Sõamyã 119 soabã pʋgẽ wã zemsda sõma ne bũmb ning d sẽn mi a Ezekɩas zugã, a sẽn da wa n ket n yaa na-bi-pollã. Biiblã mitb kẽer yetame tɩ yaa a Ezekɩas n da yaa yɩɩn-kãnga gʋlsdã. Baa ne d sẽn pa mi vẽeneg tɩ sɩd yaa woto wã, d sɩd miimi t’a Ezekɩas ra tara waoogr sẽn yaa kãseng ne Wẽnnaam Gomdã. A wilga ne a vɩɩm manesmã t’a saka goam nins sẽn be Yɩɩl Sõamyã 119:97 pʋgẽ wã ne a sũur fãa. Biiblã yeta a Ezekɩas wɛɛngẽ: “Yẽ tũu Zusoabã n ka tol n bʋdg n bas bãmb ye. La yẽ saka tõod nins fãa Zusoaba sẽn da kõ a Moiizã.”—2 Rĩm dãmba 18:6.
10. A Ezekɩas makrã kõta kiris-neb nins roagdb sẽn pa wẽn-zoɛtb sẽn wubã bõe raoodo?
10 Sã n yaa ne kɩbayã fãa sẽn wilgã, a Ezekɩas pa bɩ wẽn-zoɛtb zakẽ ye. Rĩm a Akaaz sẽn ya a ba wã ra yaa ned sẽn ka tẽeb sẽn da yaa wẽn-naands pʋʋsda. A rɩka a biribl a yembr sẽn yaa a Ezekɩas meng saam-biiga, n yõog vɩɩg tɩ yɩ maoong n kõ ziri wẽnnaam! (2 Rĩm dãmba 16:3) Baa ne mak-wẽng kãngã fãa, a Ezekɩas ra tõe n “yɩlga a sorã” n yiis payẽ rãmbã manesem, a sẽn bãng Wẽnnaam Gomdã.—2 Kɩbaya 29:2.
11. A Ezekɩas sẽn da gũusd n getẽ wã sasa, a ba wã sẽn da pa kɩs-sɩd soabã yɛl baasa wãn-wãn to?
11 A Ezekɩas sẽn wa n bɩtẽ wã, yẽ mengã yãa a ba wã sẽn yaa wẽn-naands pʋʋsdã sẽn zã tẽngã yɛl to-to vẽenega. Bɛɛb n da gũbg Zida. Siiri rĩm a Retsin tɩ naaga Israɛll Rĩm a Peka n wẽ gũbr n gilg Zerizalɛm. (2 Rĩm dãmba 16:5, 6) Edom la Filisti nebã tɩ piga Zida n deeg galʋ-tẽns kẽer menga. (2 Kɩbaya 28:16-19) A Akaaz maana wãn-wãn gudgr kãensã taoore? Wall t’a bool a Zeova n kos a sõngr n zab ne Siiri wã, a Akaaz tɩ baoo Asiri sõngre, n da-a ne sãnem la wanzũri, wẽn-doogã laog sẽn paase. La rẽ pa wa ne laafɩ sẽn kaoosd n kõ Zida ye.—2 Rĩm dãmba 16:6, 8.
12. Yaa bõe la a Ezekɩas da maan n tõog n pa maan a ba wã kongr buudu?
12 A Akaaz baas n kiime t’a Ezekɩas lebg rĩm a yʋʋm 25 zugu. (2 Kɩbaya 29:1) A ra yaa bɩ-bɩɩg n zemse, la rẽ pa gɩdg-a t’a pa lebg rĩm sẽn tõog a tʋʋmdã ye. Wala a na rɩk a ba wã sẽn yaa kɩɩsdã togs-n-taare, a gãda a Zeova Tõogã sõma. Noor zall b sẽn da yãk rĩm dãmbã yĩng ra bee rẽ sʋka: “Yẽ [rĩmã] sã n deeg naamã, bɩ y kɩt tɩ Levi ned sẽn yaa maan-kʋʋd gʋls tõodã n kõ-a. Bɩ a bĩng sebra a nengẽ n karemd-a daar fãa a yõor tɛka n zãms Zusoab a Wẽnnaam zoeese la a sak tõoda goama fãa.” (Tõodo 17:18, 19) A sẽn da karemd Wẽnnaam Gomdã daar fãa wã, a Ezekɩas ra na n zãmsa a Zeova zoeese, la a gũus a meng n da maan a ba wã sẽn da yaa wẽn-kɩɩsã kongrã buud ye.
13. Wãn-wãn la kiris-ned tõe n kɩs sɩd tɩ tẽebã wɛɛngẽ, bũmb ning fãa a sẽn maandã na n tõogame?
13 Ra pa Israɛll rĩm dãmbã bal la b ra sagend tɩ b tags Wẽnnaam Gomdã zug wakat fãa ye, la yaa Israɛll neb nins fãa sẽn da yaa wẽn-zoɛtbã me n da segd n maan woto. Pipi yɩɩllã bilgda ned sẽn sɩd tar sũ-noog wala ned sẽn ‘maand sũ-noog ne a Zeova Tõogã, n sikd a koɛɛg n karemd a tõogã wĩndg la yʋngo.’ (Yɩɩl Sõamyã 1:1, 2, NW) Yɩɩl gʋlsdã yeta nin-kãng buudã wɛɛngẽ: “bũmb ning fãa a sẽn maand na n tõogame.” (Yɩɩl Sõamyã 1:3, NW) Sẽn yaa lebende, Biiblã yeta ned ning sẽn pa tar tẽeb ne a Zeova Wẽnnaamã wɛɛngẽ tɩ: “Yẽ yaa yam a yiib soaba sẽn yuusd ne a yɛla fãa.” (Zak 1:8) Tõnd fãa rat n talla sũ-noog la d tõoge. Biiblã kareng sõma wakat fãa tõe n sõng n paasa tõnd sũ-noogã.
Wẽnnaam Gomdã teela a Zezi
14. Wãn-wãn la a Zezi wilg t’a nonga Wẽnnaam Gomdã?
14 Vugri, a Zezi roagdbã mik-a lame t’a zĩ karen-saam dãmbã sʋk wẽn-doogẽ wã Zerizalɛm. Ad “a Zezi bãngra ne a leokra yɛɛsa” Wẽnnaam Tõogã mitb kãensã hal sõma! (Luk 2:46, 47) Rẽ zĩnda a Zezi sẽn da wa n tar yʋʋm 12. N-yẽe, baa ne a sẽn da yaa biigã, vẽenega a ra nonga Wẽnnaam Gomdã. Kaoosg zugẽ, a Zezi tũnuga ne Gʋlsg Sõamyã n leng Munaafɩɩkã n yeele: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Matɩe 4:3-10) Rẽ poor bilfu, a Zezi moona Nazarɛt sẽn ya a mengã ba-yirã, n tũnug ne Gʋlsg Sõamyã.—Luk 4:16-21.
15. Wãn-wãn la a Zezi kõ mak-sõng a sẽn da wa n moond neb a taabã?
15 Naoor wʋsgo a Zezi togsa goam sẽn yit Wẽnnaam Gomdẽ wã sẽn na yɩl n kõ a zãmsgã pãnga. A kɛlgdbã ‘yɛɛsa a karengã yĩnga.’ (Matɩe 7:28) La a Zezi zãmsgã sẽn yit a Zeova Wẽnnaam mengã nengẽ wã pa segd n ling tõnd ye! A Zezi yeelame: “Mam karenga ka mam dẽnd ye, yaa sẽn tʋma maama rẽnda. Ned ninga sẽn gomd a meng yell baooda a meng waoogre. La ned ninga sẽn baood sẽn tʋma yẽ wã waoogre, yõ wã soab yaa sɩd soaba, la bũmb sẽn ka tɩrg ka be yẽ pʋgẽ ye.”—Zã 7:16, 18.
16. Hal sẽn ta zĩ-bʋg la a Zezi wilg a nonglem ne Wẽnnaam Gomdã?
16 Sẽn yaa lebend ne Yɩɩll 119 soab gʋlsdã, “bũmb sẽn yaa kɛgr pa be” a Zezi nengẽ ye. A ra pa tar yel-wẽnd ye. A ra yaa Wẽnnaam Biribla sẽn ‘sik a meng n yɩ sakd hal n tɩ ta kũum.’ (Filip rãmba 2:8, NW; Hebre dãmba 7:26, NW) Ne a Zezi sẽn da zems zãngã, a zãms n bãnga Wẽnnaam Tõogã la a sak-a. Rẽ yɩɩ bõn-kãseng sẽn sõng-a t’a tõog n tall a burkĩndlmã. A Pɩɛɛr sẽn tũnug ne sʋʋg n mak n na n gɩdg nebã tɩ b ra yõk a Zusoabã, a Zezi lenga tʋm-tʋmdã n sʋke: “Fo ka mi tɩ mam tõe n pʋʋsa m Ba tɩ b kõ maam malɛk rãmb tus pis-yopoe la a yiib la? La a sã n yɩ woto Gʋlsg Sõamyã nins sẽn wilg tɩ yaa tɩlae tɩ yɩ woto wã na n yɩɩ wãn n paam pidsgu?” (Matɩe 26:53, 54) N-yẽe, a Zezi nifẽ, Gʋlsg Sõamyã pidsg yõod ra yɩɩda yẽ mengã sẽn da na n põs kũ-toaag yãnd pʋgẽ. Ad a sɩd tall nonglem tɛkẽ ne Wẽnnaam Gomdã!
Kirist togsen-taas a taaba
17. Wẽnnaam Gomdã yõod ne tʋm-tʋmd a Poll ra taa zĩ-bʋgo?
17 Tʋm-tʋmd a Poll gʋlsa a kiris-nin-taas woto: “Bɩ yãmb yɩ mam togsen-taas wa mam me sẽn yaa Kirist togsen-taagã.” (1 Korẽnt dãmba 11:1) Wala a Zusoabã, a Poll talla nonglem ne Gʋlsg Sõamyã. A sak n deega woto: “Mam sũurẽ wã m nonga Wẽnnaam Tõogã hal sõma.” (Rom dãmba 7:22, Bible de Jérusalem) A Poll togsa goam sẽn yit Wẽnnaam Gomdẽ wã naoor wʋsgo. (Tʋʋma 13:32-41; 17:2, 3; 28:23) A sẽn wa n kõ a yaoolem noyã a ministr taag a Tɩmote wã, a Poll wilga vẽeneg tɩ Wẽnnaam Gomdã segd n talla tʋʋmd sẽn yaa kãseng “Wẽnnaam ned” daar fãa vɩɩm pʋgẽ.—2 Tɩmote 3:15-17.
18. Rɩk-y makr ne ned sẽn tall waoogr ne Wẽnnaam Gomdã tõnd wakatã.
18 A Zeova sõgen dãmb wʋsg sẽn yaa kɩs-sɩd rãmb rũndã-rũndã me rɩka a Zezi nonglmã ne Wẽnnaam Gomdã togs-n-taare. Yʋʋm kob-gĩnd kãngã sɩngrẽ, bi-bɩɩg n paam Biibl a zoa nengẽ. A bilga kũun kãng sẽn tar yõod wʋsgã pãn-tusdg yẽ zug woto: “Mam dɩka sard tɩ m vɩɩmã pʋgẽ m segd n karma Biiblã babg a yembr daar ne a to fãa.” Bi-bɩɩg kãngã ra yaa a Frederick Franz, la a nonglmã ne Biiblã kɩtame t’a paam tõogr la yõ-wok a Zeova sõgenegã pʋgẽ. B tẽra a yell ne nonglem, a sẽn da tõe n togs Biiblã sags tõy goam ne zugã yĩnga.
19. Wãn-wãn la neb kẽer sigind semen fãa Biiblã kareng Teoakaratik Ministɛɛr Lekollã yĩnga?
19 A Zeova Kaset rãmbã gomd n tadgda Biiblã kareng wakat fãa zugu. Semen fãa, b sã n segend b kiris-neb tigisg a yembr b sẽn boond tɩ Teokaratik Ministɛɛr Lekollã, b karemda Biiblã sags yaka. Biiblã zĩis nins b sẽn yãk tɩ b karma tags-kãsems la b wɛgsd tigisgã sasa. Kaset rãmb kẽer neeme tɩ zemsame tɩ b pʋɩ Biiblã semen fãa karengã bab-kɩds a yopoe, n karem babg a yembr daar fãa. B sã n karemdẽ, b tagsda bab-kãng zugu. Sã n tõeyã, b maanda vaeesg n paase, n tũnug ne sɛb sẽn tik Biiblã zugu.
20. Bõe n yaa tɩlae sẽn na yɩl n paam sẽk n karem Biiblã wakat fãa?
20 Tõe tɩ y segdame n “bao sẽk” tʋʋm a taab pʋsẽ sẽn na yɩl n karem Biiblã wakat fãa. (Efɛɛz rãmba 5:16, NW) Baasg zãnga, nafa wã na n lima modg-kãsemsã fãa. Y sã n bɩɩs Biiblã kareng minungu, y nonglmã ne Wẽnnaam Gomdã na n paasame. Pa na n kaoos la y wa yeel wa yɩɩl-gʋlsdã woto ye: “Mam nonga yãmb tõoga wʋsgo. Mam tagsda a yell daar[ã] fãa.” (Yɩɩl Sõamyã 119:97) Manesem a woto na n talla nafa kãsems masã la beoog-daare, wala sõsg ning sẽn pʋgdã sẽn na n wilgã.
Y tẽrame bɩ?
◻ Wãn-wãn la Yɩɩll Sõamyã 119 soabã gʋlsd wilg nonglem kãseng ne Wẽnnaam Gomdã?
◻ Zãms-bʋs la d tõe n paam ne a Zezi la a Poll makrã?
◻ Wãn-wãn la tõnd mengã tõe n paas d nonglmã ne Wẽnnaam Gomdã?
[Picture on page 22]
Rĩm dãmb sẽn tar kɩs-sɩdã ra segd n karma Wẽnd gomdã wakat fãa. Y maanda woto bɩ?
[Picture on page 24]
Ba a sẽn da yaa biig menga, a Zezi ra nonga Wẽnnaam Gomdã