Bao-y n pẽneg-y Wẽnnaam

Wẽnnaam kõo ãdem-biig fãa tõog t’a tõe n yãk a toorẽ yam

2 RĨM DÃMBA 18:1-7

YAA kambã ba-rãmb n segd n kõ b kambã mak-sõngo. Roagdbã sã n kõt mak-sõngo, kambã tõe n dɩka rẽ tɩ sõng-b tɩ b tall zʋg-sõma, la b bãng n yãk yam-sõmã b vɩɩmã tõre. Zu-bʋko, roagdb wʋsg pa kõ b kambã mak-sõng ye. La rẽ yĩnga rat n yeelame tɩ kamb a woto buudã pa tol n tõe n yɩ nin-tɩrs bɩ? Bũmb a ye Wẽnnaam a Zeova sẽn kõ ãdem-biisã, n kɩt tɩ d tõe n bãng n leok sok-kãngã. Yaa a sẽn kõ ãdem-biig fãa tõog t’a tõe n yãk a toorẽ yamã. D ges a Ezekɩas makrã sẽn be 2 Rĩm dãmb 18:1-7 wã.

A Ezekɩas yɩɩ “Zida naab a Akaaz biiga.” (Vɛrse a 1 wã.) A Akaaz kɩtame t’a nin-buiidã bas a Zeova. Rĩm-kãngã sẽn yɩ nin-wẽngã tũu ziri wẽnnaam a Baal, n da rɩkd ninsaalb n maand maoong n kõt-a. A rɩka a Ezekɩas ma-biiga, wall a ma-biis meng n kʋ maando. A paga wẽnd-doogã, la “a maan a meng tẽn-kug Zerizalɛm zĩiga fãa.” A kɩtame t’a Zeova “sũur puugi.” (2 Kibaya 28:3, 24, 25) Dẽnd yaa vẽneg t’a Ezekɩas ba wã yɩɩ nin-yoog tɛkẽ. La rẽ yɩnga a Ezekɩas ra tõeeme n pa yɩ wa a ba wã bɩ?

A Ezekɩas sẽn wa n ledg a Ba a Akaaz naamẽ wã, tao-tao bala, a wilgame t’a pa na n sak t’a Ba wã sẽn yɩ nin-wẽngã yĩng kɩt t’a me yɩ nin-wẽng ye. A Ezekɩas “maana sẽn ta [a Zeova] yam.” (Vɛrse a 3 wã.) A teega a Zeova, hal tɩ b yeel tɩ “Zida ka tol n paam dĩm sẽn deng yẽnda bɩ sẽn pʋgl yẽnda, n wẽnd yẽ ye.” (Vɛrse a 5 wã) Yʋʋmd ning na-kãngã sẽn da yaa bi-bɩɩgã sẽn deeg naamã, a tʋma tʋʋm toor-toore, sẽn na yɩl tɩ nin-buiidã lebs n sɩng a Zeova tũubu. A kɩtame tɩ b yiis tẽn-kugã sẽn da be kunkubã zutã, zĩig ning nebã sẽn da pʋʋsd ziri wẽnnaam dãmbã. A kɩtame tɩ b lebs n pak wẽnd-doogã, la b sɩng tʋʋm nins a Zeova sẽn da kɩt tɩ b sigl be wã. (Vɛrse a 4; 2 Kibaya 29:1-3, 27-31) A Ezekɩas “tũu Zusoabã n ka tol n bʋdg n bas bãmb ye.” La “Zusoabã zĩnda ne-a.”—Vɛrse 6, ne a 7 wã.

Bõe n sõng a Ezekɩas t’a tõog n pa yɩ nin-wẽng wa a ba wã? Tõe tɩ yaa a ma a Abiya, Biiblã sẽn pa gomd a yell wʋsgã mak-sõng n sõng-a. Tõe me tɩ yaa no-rɛɛs a Ezai mak-sõngã n sõng na-biiga a Ezekɩase. Bala a Ezai sɩnga a tʋmdã meng t’a Ezekɩas nan pa rog ye. Biiblã pa wilgd bũmb ning sẽn sõng-a wã ye. Sẽn yaa a soab fãa, bũmb a ye n yaa vẽenega: A Ezekɩas yãka yam n yɩ toor fasɩ ne a ba wã.

A Ezekɩas mak-sõngã kengda neb nins sẽn nams b yãadmẽ, b roagdb sẽn pa kõ mak-sõngã yĩngã. Yaa sɩd tɩ sẽn loog loogame. Baa sã n ket n namsd-d lame, d pa tõe n toeem bũmb sẽn zoe n loog ye. La baa d roagdbã sã n pa yɩ nin-tɩrse, pa rat n yeel tɩ yaa tɩlae tɩ tõnd me yɩ wa bãmb ye. D tõe n yãka d toorẽ yam n maan sẽn yaa sõma, tɩ kɩt tɩ d beoog daarã yɩ neere. Wa a Ezekɩase, d tõe n yãka yam n tũ a Zeova sẽn yaa Wẽnnaam sɩd-sɩdã, n nong-a ne d sũur fãa. D sã n maan woto, d vɩɩmã na n talla bark masã tɛka, la kɩt me tɩ d wa paam n vɩɩmd wakat sẽn kõn-sa, Wẽnnaam dũni paalgã pʋgẽ. (2 Pɩɛɛr 3:13; Wilgri 21:3, 4) Ad d segd n wilga Wẽnnaam d mi-beoogo, a sẽn kõ ãdem-biig fãa tõog t’a tõe n yãk a toorẽ yamã. Yãoã sɩd yaa kũun sẽn ka to sẽn wilgd t’a nonga tõndo!

[Tẽngr note]