D Nong Wẽnnaam Gomdã N Dɩ A Nafa
“Bɩ f nong [yam] t’a na n kogl-f lame. . . . A na n kõ-f-la ziiri, fo sẽn gãd-a wã yĩnga.”—YELBŨNA 4:6, 8, NW.
BIIBLÃ kareng tara yõod wʋsg ne kiris-neda. Baasg zãnga, a kareng bal pa wilgd tɩ ned nonga Wẽnnaam Gomdã ye. Yaa wãn to masã, ned sã n karemd Biiblã n yaool n maand bũmb nins Biiblã sẽn gɩdgdã? Vẽenega, a pa nong Wẽnnaam Gomdã wa Yɩɩl Sõamyã 119 soabã gʋlsd sẽn nong-a to-to wã ye. Nonglem tallg ne Wẽnnaam Gomdã tus-a lame t’a vɩɩmd tɩ zems ne a noyã.—Yɩɩl Sõamyã 119:97, 101, 105.
2. Yam sẽn yẽbg Wẽnnaam Gomdã zug tara nafa bʋse?
2 Vɩɩmd tɩ zems ne Wẽnnaam Gomdã baoodame tɩ f rems f tagsgã la f vɩɩmã manesem wakat fãa. Manesem a woto wilgdame tɩ f tara yam sẽn yit Wẽnnaam nengẽ, sẽn dat n yeel tɩ bãngrã la võor-wʋmb f sẽn paamd ne Biiblã zãmsgã tũub vẽeneg-vẽenegã. “Bɩ f nong-a, t’a na n kogl-f lame. Tall naneb ne-a hal wʋsgo, t’a na n zẽk-f lame. A na n kõ-f-la ziiri, fo sẽn gãd-a wã yĩnga. A na n kɩtame tɩ f zug paam bõn-fõgendg sẽn tar rasãndlem; a na n kõ-f-la maanf sẽn tar neerem.” (Yelbũna 4:6, 8, 9, NW) Ad sɩd yaa sagl-sõng la b kõ-d tɩ d bɩɩs nonglem ne Wẽnnaam Gomdã la d bas t’a wilg-d sore! Ãnd n pa rat n paam koglgo, zẽkr la ziiri?
Koglg ne sãoong sẽn kaoosde
3. Bõe yĩng tɩ kiris-nebã rat koglg n yɩɩd pĩndã, la yaa ne ãnd la b rat koglgo?
3 Wãn-wãn la yam ning ned sẽn paam ne Wẽnnaam Gomdã zãmsg la a tũubã kogend-a? Bũmb a yembr sẽn be yaa t’a paamda koglg ne a Sʋɩtãan Munaafɩɩka. A Zezi zãmsa a karen-biisã tɩ b pʋʋs n paam fãagr wẽng soab a Sʋɩtãan nugẽ. (Matɩe 6:13) Rũndã-rũndã, d sɩd segd n yɩɩ tao-tao n paas rẽ d pʋʋsgã pʋgẽ. B riga a Sʋɩtãan ne a zĩn dãmbã n yiis saasẽ yʋʋmd 1914, la woto yĩnga, a Sʋɩtãan “sũ-puugra yaa kãsenga a sẽn bãng t’a wakat yaa bilfa yĩnga.” (Wilgri 12:9, 10, 12) Wakat kãngã sẽn kẽ n bõogã sasa, a sũ-yikrã segd n wɩngame n paase, a sẽn zabd ne neb nins “sẽn sakd Wẽnnaam noore la sẽn tar a Zezi kasetã” n makd n kongdẽ wã yĩnga.—Wilgri 12:17.
4. Wãn-wãn la kiris-nebã paamd koglg ne a Sʋɩtãan weoogrã la a bẽdsã?
4 A Sʋɩtãan sũ-yikrã pʋgẽ, a ket n wata ne gudgr kiris-neb ministr kãensã zutu, la a gãanded tẽng n wat ne nams-toos bɩ n wat ne gɩdgr a taab b tʋʋmdã zugu. A ratame me n belg Rĩungã koe-moondb tɩ b modg wʋsg n bao yɛl wala dũniyã naam, nonglem ne reemã, laogo, la yõ-noogrã pʋgb n yɩɩd Rĩungã mooneg tʋʋmde. Yaa bõe n kogend Wẽnnaam sõgen dãmb nins sẽn yaa kɩs-sɩd dãmbã tɩ b pa lʋɩt a Sʋɩtãan weoogrã bɩ a bẽdsã pʋsẽ? Yaa sɩda, pʋʋsgã, zood sõma-sõma ne a Zeova la tẽ t’a kãabsã yaa waazibã tara yõod wʋsgo. La rẽ fãa tɩ loee ne d sẽn na n bãng Wẽnnaam Gomdã tẽegre, la sard kãn-kãe f sẽn dɩk n na n kelg tẽesg kãensa wã. D paamda tẽesg kãense, d sã n karemd Biiblã la d zãmsd sɛb nins sẽn tik Biiblã zugã, n kẽngd kiris-neb tigissẽ wã, n kelgd Gʋlsg Sõamyã sagls d tẽed-n-taag sẽn kõtã, bɩ d sẽn na n bʋgsd Biiblã noy Wẽnnaam vʋʋsmã sẽn tẽegd tõndã pʋʋsg pʋgẽ bala.—Ezai 30:21; Zã 14:26; 1 Zã 2:15-17.
5. Wãn-wãn la yam ning sẽn yẽbg Wẽnnaam Gomdã zug kogend tõndo?
5 Neb nins sẽn nong Wẽnnaam Gomdã paamda koglg ne manesem a taaba. Wala makre, b põsda sũ-sãams la bãas sẽn tũud ne dorgã, tabã la yoobã n watẽ wã. (1 Korẽnt dãmba 5:11; 2 Korẽnt dãmba 7:1) B pa maand gom-toog bɩ n tar toom goam sẽn sãamd zems-n-taarã ye. (Efɛɛz rãmba 4:31) B leb n pa basd tɩ sãmb-sãmbã tõog-ba, n kẽes b mens dũniyã yam filozofi sẽn yaa belgrã pʋgẽ ye. (1 Korẽnt dãmba 3:19) B sẽn nong Wẽnnaam Gomdã yĩnga, b paamda koglg ne yɛl sẽn da tõe n sãam b zems-n-taarã ne Wẽnnaam la b vɩɩm sẽn-kõn-sa wã saagre. B ket n sõngda b taabã tɩ b tall tẽeb ne kãab-kãsems nins sẽn be Biiblã pʋgẽ wã, n miẽ tɩ yaa woto la b ’na n fãag b mense la neb nins sẽn kelgd bãmbã.’—1 Tɩmote 4:16.
6. Wãn-wãn la yam sẽn tik Wẽnnaam Gomdã zug tõe n kogl tõnd baa zu-loees pʋsẽ?
6 Yaa sɩda, ned fãa, baa neb nins sẽn nong Wẽnnaam Gomdã segda “wakat la yel-lingdem.” (Koɛɛg Soaba 9:11, NW) D pa tõe tɩ tõnd neb kẽer da seg sabab-wẽnse, bã-kɛgemse, sãmpogr bɩ kũ-lingdem ye. Baasg zãnga d tara koglgo. Yel-beed ba a yembr pa tõe n maan ned sẽn sɩd nong Wẽnnaam Gomdã wẽng sẽn kaoosd wakat fãa ye. Woto yĩnga, d pa segd n maan yɩɩr tɩ loog ne bũmb ning sẽn tõe n wa beoog-daarã ye. D sã n wa maan d sẽn tõe fãa wa sẽn zems n na n beool yɛlã, sẽn são yaa d sẽn na n bas yɛlã a Zeova nugẽ, la d ra bas tɩ rũndã-rũndã vɩɩmã sẽn ka bas-m-yamã kɩt d yam pa gãe bãan ye. (Matɩe 6:33, 34; Filip rãmba 4:6, 7) Ning-y vʋʋgrã saagr sẽn yaa waazibã la vɩɩm sẽn yaa sõma n yɩɩdã, Wẽnnaam ‘sã n wa maan bũmb fãa paalsã’ y yamẽ.—Wilgri 21:5; Zã 11:25.
Yɩ-y ‘zĩ-sõngo’
7. Bilg-bʋg la a Zezi togs kʋʋngã sẽn wa n na n kelg-a wã?
7 A Zezi yel-bũnd a yembr pʋgẽ, b wilga vẽeneg tɩ tara yõod wʋsg tɩ d tall tagsg sẽn zems ne Wẽnnaam Gomdã. A Zezi sẽn da wa n moond koe-noogã Palɛstinã, kʋʋng n tigim n na n kelg-a. (Luk 8:1, 4) La yaool n pa b fãa n sɩd ra nong Wẽnnaam Gomdã ye. Sãmbg sẽn ka be, neb wʋsg wa n na n kelg-a lame, bala b ra rat n yãa yel-soalem bɩ b ra rat n kelga a zãmsgã a sẽn kõt ne manesem sẽn be yamleoog wʋsgã. Woto yĩnga, a Zezi togsa kʋʋngã bilgri: “Ka-fẽrgd a ye kẽngame n na n tɩ fẽrg a ki. Yẽ sẽn fẽrgda, ka-buud kẽer lʋɩɩ sor kɩrenga tɩ neb tab-ba, tɩ liuuli wa n dɩ-ba. La kẽer lʋɩɩ kugr zugu. La b sẽn yi, b zelgame maasr sẽn ka waooga yĩnga. La kẽer lʋɩɩ gõos sʋka; la b sẽn yi, gõos me yi n dɩɩ bãmba. La kẽer lʋɩɩ zĩ-sõngẽ n yi n wom biisi tɩ ta koabga.”—Luk 8:5-8.
8. Bõn-buudã yaa bõe a Zezi bilgrã pʋgẽ?
8 A Zezi bilgrã wilgame tɩ nebã ra na n talla manesem toor-toor ne koe-noogã, tɩ rẽ be ne kɛlgdã sũur halhaale. Bõn-buud ning b sẽn bʋtã yaa “Wẽnnaam goama.” (Luk 8:11) Bɩ wala bilgrã kɩbar a to sẽn yetã, bõn-buudã yaa “Wẽnnaam soolem koɛɛga.” (Matɩe 13:19) A Zezi ra tõe n tũnuga ne gomd ning a sẽn dat a soab bãmbã b yiibã sʋka, bala Wẽnnaam Gomdã gom-zu-raoog yaa saasẽ Rĩungã a Zezi Kirist sẽn yaa a Rĩmã, a Zeova sẽn na n tũnug ne n wilg t’a naam sẽn-ka-to wã zemsame la a sõms a yʋʋrã. (Matɩe 6:9, 10) Sɩda, rẽ, bõn-buudã yaa koe-noogã koɛɛg sẽn be Wẽnnaam Gomdã sẽn yaa Biiblã pʋgẽ. A Zeova Kaset rãmbã gomd n tadgda Rĩungã koe-kãngã zugu, b sẽn bʋt bõn-bʋʋdã n dɩkd pipi Bʋt a Zezi Kirist togs-n-taarã. B mikdame tɩ nebã manesem yaa wãn-wãna?
9. Bõn-buud ning sẽn lʋɩt a) sorã kɩrengã, b) kugrã zugã, d) gõosã zĩigẽ wã, makda bõe?
9 A Zezi yeelame tɩ bõn-buud kẽer n dʋʋg sorã kɩreng tɩ b tab-ba. Rẽ tɩ loee ne neb nins sẽn pa tar sẽka, tɩ Rĩungã bõn-buud pa tõe n kɩ yẽg b sũyẽ wã. B ne b yet b na n tõog n bɩɩs nonglem ne Wẽnnaam Gomdã tɩ “Sʋɩtãana wa n yiisa Wẽnnaam koɛɛga bãmb sũyã pʋsẽ tɩ bãmb kõn tẽ n paam fãagr ye.” (Luk 8:12) Bõn-buud kẽer lʋɩta kugr zugu. Rẽ tɩ loee ne neb nins Biiblã koɛɛg sẽn tar yamleoog ne, tɩ b yaool n pa basd-a t’a kẽ b sũyã. Kɩɩsg sã n wa fãa, bɩ b sã n mik tɩ yaa toog tɩ b tũ Biiblã sagls fãa, “bãmb lʋɩtame,” bala b pa tar yẽgr ye. (Luk 8:13) Rẽ poore, neb sẽn wʋmd gomdã n basd tɩ “yɩɩr ne arzɛgse la dũniyã vɩɩm sũ-noog” lim-ba. Wala bõn-bɩts gõos sẽn dɩ, b wat n baasame n “ka wom[d] bi-moaam ye.”—Luk 8:14.
10, 11. a) Ãnd dãmb la zĩ-sõngã makda? b) Bõe la d segd n maan sẽn na yɩl n ‘tall’ Wẽnnaam Gomdã d sũyã pʋsẽ?
10 Sẽn na n baase, yaa bõn-buud ning sẽn lʋɩ zĩ-sõngẽ wã. Rẽ tɩ loee ne neb nins sẽn deeg koɛɛgã ne “sũur sẽn yaa tɩrga la sõama” wã. Wa sẽn zemse, tõnd ned kam fãa rat n tagsame t’a bee nin-kãensã sʋka. La baasg zãnga, yaa Wẽnnaam sẽn tagsd to-to wã n tar yõod n yɩɩda. (Yelbũna 17:3; 1 Korẽnt dãmba 4:4, 5) A Gomdã yetame tɩ tõnd sẽn tar “sũur sẽn yaa tɩrga la sõama” wã yaa bũmb d sẽn wilgd ne d tʋʋmã masã tɛka, n tɩ ta d kũum bɩ n tɩ ta Wẽnnaam sẽn na n saas yɛl siglg wẽng kãngã wã. Tõnd sã n deng n saka Rĩungã koɛɛga, yaa sõma. Baasg zãnga, neb nins sẽn tar sũur sẽn yaa tɩrg la sõma wã sakda Wẽnnaam Gomdã ‘n talld-a n womd biis ne sũ-mare.’—Luk 8:15.
11 Manesem a ye zãntãa ning d sẽn tõe n tũnug ne n tall Wẽnnaam Gomdã d sũyã pʋsẽ yaa d sẽn na n karm-a la d zãms-a d toore, la d lagem ne d tẽed-n-taasã n maan woto me. Rẽ baoodame tɩ d rɩ tẽebã rɩɩb b sẽn tũnugd ne bõn-tũnugdg ning b sẽn yãk t’a ges a Zezi karen-biisã tẽeb yɩ-neerã yell tɩ pidã. (Matɩe 24:45-47, NW) Ne bõn-tũnugds a woto, nonglem tusda neb nins sẽn talld Wẽnnaam Gomdã b sũyẽ wã tɩ b ‘wom biis ne sũ-mare.’
12. Yaa bõe biis la tõnd segd n wom ne tõog-toogo?
12 Bõe biis la zĩ-sõngã womda? Zĩig sɩd-sɩdã pʋgẽ, bõn-buudã bɩtame n lebg bõn-bɩts sẽn womd biis sẽn yaa yembr ne bõn-buudã, tɩ b tõe n ye yelg bãmb me tɩ wom biisi. Woto me, ne neb nins sẽn tar sũur sẽn yaa tɩrg la sõma wã, gomdã bõn-buud bɩta b pʋsẽ wã, n kɩtdẽ tɩ b bɩt tẽebã wɛɛngẽ hali tɩ bãmb me wa tõe n bʋd bõn-buudã neb a taab sũyẽ. (Matɩe 28:19, 20) La b bʋdbã bʋta ne tõog-toogo. A Zezi wilga tõog-toogã yõod bʋdbã pʋgẽ a sẽn wa n yeel tɩ: “Ned ninga sẽn na n tall a tẽeb hal tɩ wakat ta, a na n paama fãagre. Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:13, 14.
‘Wom-y biis ne tʋʋm sõama buud fãa’
13. Pʋʋs-bʋg la a Poll maan-yã, sẽn loe biis womb ne Wẽnnaam Gomdã bãngre?
13 Tʋm-tʋmd a Poll me gom n wilgame tɩ d segd n woma biisi, la a rɩka biisã womb n tɩ loe ne Wẽnnaam Gomdã. A pʋʋsame t’a tẽed-n-taasã “sũyã pid ne [Wẽnnaam] daaba bãngre [“sẽn yaa takɩ,” NW] la yam fãa ne vẽnegr ninga Sɩɩg Sõng sẽn kõtã, tɩ yãmb kẽnda zems Zusoaba [“a Zeova,” NW] waoogre la a ta bãmb yam ne bũmb fãa, la tɩ yãmb wom biis ne tʋʋm sõama buud fãa.”—Kolos rãmba 1:9, 10; Filip rãmba 1:9-11.
14-16. Wala sẽn zems ne a Poll pʋʋsgã, bõe biis la neb nins sẽn nong Wẽnnaam Gomdã womda?
14 Woto, a Poll wilgame tɩ Biiblã bãngr paoong a yen-yen wã pa sek ye. Walla tɩ yɩ woto, nonglem ne Wẽnnaam Gomdã tusda tõnd tɩ d ‘kẽnda zems a Zeova waoogre,’ d sẽn na n ket n ‘womd biis ne tʋʋm sõama buud fãa.’ Tʋʋm sõama bʋse? Rĩungã koe-noog mooneg yaa tʋʋm-kãseng b sẽn bobl kiris-nebã yaoolem day kãensã. (Mark 13:10) Sẽn paase, neb nins sẽn nong Wẽnnaam Gomdã maanda b sẽn tõe fãa sẽn na yɩl n teel tʋʋm-kãngã ne ligd wakat fãa. B maanda sũ-noog ne zu-noog kãngã, n miẽ tɩ “Wẽnnaam nonga ned ninga sẽn kõt ne sũ-noogo.” (2 Korẽnt dãmba 9:7) B yamleoog kũunã kɩtdame tɩ b yiisd ligd n kɩtdẽ tɩ sẽn yɩɩd Betɛll dot koabg tʋmdẽ. Yaa Betɛll kãens pʋsẽ la b get Rĩungã mooneg tʋʋmd yelle, la yaa bãmb kẽer pʋsẽ la b yiisd Biibl dãmb la sɛb sẽn tik Biiblã zugu. B yamleoog kũunã sõngd n kɩtdame me tɩ b maand depãens rãmb nins sẽn tɩ loe ne kiris-neb tigis-kãsemsã, n paas so-toak yel-gɛtba la misioneer dãmbã la wakat fãa koe-moondb a taabã b sẽn tʋma yĩnga.
15 Tʋʋm sõma a taab tɩ loee ne sɩd balengã zĩis meeb la b zãabo. Wẽnnaam Gomdã nonglem tusda a balemdbã tɩ b maan b sẽn na maaneg tɩ Tigis-kãsemsã Rot la Rĩung Rotã paamd zãab sẽn zemse. (Mak-y ne Nehemi 10:40.) Wẽnnaam yʋʋrã sẽn be ro-kãens zutã yĩnga, tara yõod wʋsg tɩ b pʋsẽ wã la b yɩnga yɩ yɩlem la b tall yamleoogo, la tɩ neb nins sẽn balemd ro-kãens pʋsẽ wã ra tall taal ye. (2 Korẽnt dãmba 6:3) Kiris-neb kẽer tõe n maaname tɩ yɩɩg woto. Nonglem ne Wẽnnaam Gomdã tusd-b lame tɩ b togd sor zĩ-zãrsẽ sẽn na yɩl n kẽes b mens balengã zĩ-paals meeb pʋsẽ dũniyã babs nins pʋsẽ ratem sẽn be wã, naongã bɩ minim kaalem yĩngã.—2 Korẽnt dãmba 8:14.
16 Tʋk zɩɩb nins d sẽn tar zakã pʋgẽ wã, la ges kiris-nin-taasã yellã me bee “wom biis tʋʋm sõama buud fãa” wã sʋka. Nonglem Wẽnnaam Gomdã yĩng tusda tõnd tɩ d ges neb nins sẽn “yaa tõnd ba-biis a Zezi tẽeba yĩngã” yelle, la d “maan wẽn-zoeer tʋʋm d mengã zak pʋgẽ.” (Galat dãmba 6:10; 1 Tɩmote 5:4, 8, NW) Rẽ wɛɛngẽ, yaa tʋʋm-sõng tɩ d tɩ ges bãad dãmbã la d bels sũ-sãang rãmbã. La ad sɩd yaa tʋʋm-sõng meng la tigingã kẽem dãmb la Logtor Yirẽ Wʋm-taab Sull nebã sẽn sõngd neb nins sẽn tar tɩbsg zu-loeesã maanda! (Tʋʋma 15:29, NW) Sẽn paase, sabab rãmbã sõor tara paasgo. Bãmb kẽer yaa tẽng-sabab rãmba t’a taab yaa ninsaal yalemdã n wa ne. Ne Wẽnnaam vʋʋsmã sõngre, a Zeova Kaset rãmbã tara yʋ-noog tẽngã zĩis wʋsg pʋsẽ, b sẽn yaa neb sẽn yɩt tao-tao n wat ne sõngr n kõ b tẽed-n-taasã la neb a taab sababã bɩ sãmpogrã sẽn paamã. Woto fãa yaa biis sẽn yaa sõma neb nins sẽn nong Wẽnnaam Gomdã sẽn wom.
Beoog-daar nafa sẽn be ziiri
17, 18. a) Rĩungã bõn-buud bʋdb pidsda bõe? b) Yel-bʋs sẽn na n dĩms dũniyã gill la sẽn nong-b Wẽnnaam Gomdã na n maan kaset ne ka la bilfu?
17 Rĩungã bõn-buud bʋdb ket n kõta ãdem-biisã nafa kãsemse. Yʋʋm sẽn nan pa kaoosã pʋsẽ, yʋʋmd fãa, sẽn yɩɩd neb 300 000 n bas tɩ Biiblã koɛɛg kɩ yẽg b sũyẽ wã hal tɩ b rɩk b vɩɩmã n kõ a Zeova n wilg rẽ ne koom lisgu. Ad sɩd yaa beoog-daar sẽn be ziir meng n gũud-ba!
18 Ka la bilfu, sẽn nong-b Wẽnnaam Gomdã miimi t’a Zeova Wẽnnaam na n tik n yikame n kɩt tɩ b waoog a yʋʋrã wʋsgo. B na n sãama “Babilon kãsenga” sẽn yaa dũni gill ziri tũudum soolmã fãa gilli. (Wilgri 18:2, 8) Rẽ poore, Rĩm a Zezi Kirist na n kʋʋ neb nins sẽn zãgsd tɩ b kõn vɩɩmd tɩ zems ne Wẽnnaam Gomdã. (Yɩɩl Sõamyã 2:9-11; Daniɛll 2:44) Rẽ poore, Wẽnnaam Rĩungã na n waa ne wakat fãa yolsg tɩ d paam d mens ne bi-beerã, zabã la yel-beed a taabã. Pa na n leb n yɩ tɩlae tɩ b bels nebã toodã, bãasã la kũumã yĩng ye.—Wilgri 21:3, 4.
19, 20. Beoog-daar bʋg sẽn be ziir n gũud neb nins sẽn sɩd nong Wẽnnaam Gomdã?
19 Ad yaa tʋʋm sõma sẽn be ziir meng la neb nins sẽn nong Wẽnnaam Gomdã na n pids wakat kãngã! Armagedõ põsdbã na n sɩnga ne tʋʋmd sẽn kõt sũ-noog ning sẽn yaa toeem tẽngã t’a lebg arzãna. B na n paama zu-noog sẽn sidgd yĩng sẽn yaa segl n pids ninsaalb nins sẽn gõe yaadẽ wã, n be Wẽnnaam pʋ-tẽerẽ masã wã, n tar saagr n na n vʋʋg kũumã sʋkã ratem. (Zã 5:28, 29, NW) Wakat kãnga, Soaal sẽn yaa Naab sẽn-ka-to a Zeova na n kõo tẽngã neb sor-wilgr sẽn zems zãng sõma-sõma, n tũnug ne a Biribl a Zezi Kirist sẽn paam zẽkrã. ‘Seb-pinds la b na n lagse,’ n wilg a Zeova noy dũni paalgã pʋgẽ vɩɩmdg yĩnga.—Wilgri 20:12.
20 Wakat ning a Zeova sẽn yãkã pʋgẽ, kiris-neb nins sẽn yaa kɩs-sɩd rãmb nins sẽn zaeyã sull fãa na n vʋʋgame n paam b saasẽ keoorã n yɩ “rogem pʋɩt-n-taas ne Kirist.” (Rom dãmba 8:17, NW) Kirist Yʋʋm Tusr Naamã Rɩɩb sasa, b na n zẽka ãdem-biis nins fãa sẽn be tẽng zug n nong Wẽnnaam Gomdã tɩ b paam zems zãng b tagsgã la b yĩngã pʋgẽ. B sã n wa wilg tɩ b yaa kɩs-sɩd dãmb yaoolem makr pʋgẽ, b na n paama keoor sẽn yaa vɩɩm sẽn-kõn-sa wã, n wa paam “Wẽnnaam kambã paam-m-meng sẽn be ziirã.” (Rom dãmba 8:21, NW; Wilgri 20:1-3, 7-10) Ad sɩd na n yɩɩ wakat sẽn be yamleoog menga! Sɩd-sɩda, a Zeova kõo tõnd saagr tɩ d na n vɩɩmd saasẽ tɩ yaa tẽng zug me, d sã n tõog toog nonglem pʋgẽ ne a Gomdã la d rɩk sard kãn-kãe n vɩɩmd tɩ zems ne Wẽnnaam yamã, d na n paama koglgo. La beoog-daare, ‘a na n kõ-d-la ziiri, d sẽn gãd-a wã yĩnga.’—Yelbũna 4:6, 8, NW.
Y tõe n wilga a võor bɩ?
◻ Wãn-wãn la nonglem ne Wẽnnaam Gomdã na n kogl tõndo?
◻ A Zezi bilgrã bõn-buud yaa bõe, la wãn-wãn la b bʋt-a?
◻ Wãn-wãn la d tõe n yɩ ‘zĩ-sõngo’?
◻ Nafa bʋs la sẽn nong-b Wẽnnaam Gomdã gũuda?
1. Sɩd nong Wẽnnaam Gomdã baoodame tɩ d maan bõe?
[Picture on page 28]
Garo Nalbandian
[Picture on page 28]
A Zezi bilgrã bõn-buud makda koe-noogã sẽn be Wẽnnaam Gomdẽ wã
[Picture on page 29]
A Zeova Kaset rãmbã rɩkda Bʋt Kãsengã togs-n-taare
[Picture on page 30]
Armagedõ põsdbã na n dɩɩ tẽngã biis nafa