Y sũur tusd-y lame tɩ y maan wala a Zezi sẽn maanã bɩ?
“A Zezi yã[a] neb kʋʋngã, la b ninbãanegã yõka bãmba; tɩ bõe, bãmb wẽnda wa piis sẽn ka tar pe-kɩɩm ye, la bãmb sɩngame n zãms bãmb bũmb wʋsgo.”—MARK 6:34.
1. Bõe yĩng tɩ ka lingr tɩ neba tar zʋgd sẽn yaa sõma wʋsgo?
KƲDEMDÃ pʋgẽ neb wʋsg n zĩnd n tall zʋgd sẽn yaa sõma wʋsgo. Rẽ ka bũmb sẽn lingd tõnd ye. A Zeova Wẽnnaam tara zʋg-sõma sẽn yaa nonglem, sõmblem, n yaa kõata, la zʋg-sõma a taab tõnd sẽn nanda. B naana ninsaalbã tɩ b yaa wa Wẽnnaam wõnego. Dẽ d tõe n bãnga bũmb ning sẽn kɩt tɩ neb kẽer wilgd nonglem, sõmblem, la b tar ninbãan-zoeer n paas Wẽnnaam zʋg-sõma a taabã. Yaa wala neb wʋsg sẽn yɩɩd sẽn wilgd tɩ b tara sũur kasetã me. (Sɩngre 1:26; Rom dãmba 2:14, 15) La y na n yãame tɩ neb kẽer pukda zʋg-sõma kãensã tao-tao n yɩɩd neb a taaba.
2. Tʋʋm sõma kẽer bʋs la neb tõe n maandẽ, n tõe n tagsdẽ tɩ b rɩkda togs-n-taar ne Kiristã?
2 Tõeeme tɩ y mii roap la pagb sẽn nong n tʋgd n getẽ bɩ b sõngd bãad dãmba, n wilgd ninbãan-zoeer ne koms rãmbã, la b maand naong rãmbã kũun wʋsgo. Leb n tags-y b rãmb nins ninbãan-zoeer sẽn tusd tɩ b yõorã tɛk bɩ b tʋmd wãoob sõngr zagsẽ bɩ kɩɩbs wubr zagsẽ, b rãmb nins sẽn kõt b mens ne yamleoog n tʋmd logtor yiy bɩ yõor bãag bẽedb yel-gesg zagsẽ, bɩ neb nins sẽn modgd n sõngd sẽn ka tar-b yiy bɩ sẽn yi b tẽngẽ n zoe n solgã yelle. Vẽenega, bãmb kẽer tagsdame tɩ b rɩkda togs-n-taar ne a Zezi, sẽn kõ kiris-nebã makrã. D karemda evãnzill dãmbã pʋsẽ tɩ Kiristã sãooga bãad dãmb la a rɩlg kom sẽn tar-b rãmba. (Mark 1:34; 8:1-9; Luk 4:40) Nonglmã, sũ-bʋgsmã, la ninbãan-zoeerã a Zezi sẽn wilgã yaa ‘Kirist tagsgã’ pukri. La Kiristã me ra rɩkda togs-n-taar ne a Ba wã.—1 Korẽnt dãmba 2:16.
3. D sã n dat n tall tagsg sẽn kɩls tɩ zems ne a Zezi tʋʋm sõma wã, bõe la d segd n gese?
3 Baasgo yãmb ka yã tɩ rũndã-rũndã neb nins a Zezi nonglmã la a ninbãan-zoeerã sẽn yɩ noog ne wã wʋsg yĩmda Kirist tagsgã yel-kãseng a yembr sɩda? D tõe n paama võor-wʋmb yel-kãngã wɛɛngẽ, d sã n maag d yĩns n vaees Mark sak a 6. D karemda be tɩ nebã talla bãad dãmb n wa a Zezi nengẽ t’a sãoog-ba. Sag-kãng me leb n wilgdame t’a Zezi sẽn yã neb tusa wã sẽn da wa yẽ nengẽ tɩ kom yõk-bã, ne yel-solemde a rɩlg-b lame. (Mark 6:35-44, 54-56) Nebã bãas sãoogr la kom sẽn tar-b rãmbã rɩlgr ra yaa nonglem ninbãan-zoeer pukr sẽn yaa kãsenga. La rẽ yaa manesem sẽn yaa kãsems n yɩɩdã a Zezi sẽn tũnug ne n sõng neb a taabã bɩ? La wãn to la d tõe n dɩk togs-n-taar ne a makrã sẽn zems zãngã wa d sẽn tõe tɛka, wala yẽ me sẽn togs a Zeova n tall nonglmã, sõmblmã, la ninbãan-zoeerã?
A sũurã tus-a lame t’a pids nebã tẽeb ratem
4. Yel-bʋs pʋsẽ la b togs goam nins sẽn be Mark 6:30-34 pʋgẽ wã?
4 Sẽn yɩɩd fãa yaa nebã sẽn da gũbg-a wã tẽeb ratem n kɩt tɩ b ninbãaneg ra tar-a. Yaa ratem kãens yõod n da yaa kãseng n yɩɩd b yĩngã wɛɛngẽ ratmã. Ges-y kɩbar ning sẽn be Mark 6:30-34 pʋgẽ wã. Yell ning b sẽn gʋls be wã zĩnda Galile Mogrã noore, sẽn kolg yʋʋmd 32 T.W. Pak sasa. Tʋm-tʋmdbã ra tara sũ-noog wʋsgo, la yaa ne bʋʋm me. B ra nan baasa gilgrã b sẽn maan zĩis wʋsgã, n waa a Zezi nengẽ. La sik kae tɩ b ra tʋlla ne yãgb n togs a Zezi yɛl nins b sẽn vɩɩmdã. Baasg zãnga, kʋʋng n tigmi. Kʋʋngã labsem kɩtame t’a Zezi ne a tʋm-tʋmdbã ka tõog n dɩ bɩ n pems meng ye. A Zezi yeela a tʋm-tʋmdbã: “Bɩ y wa yi n kẽng we-kɛɛnga neb sẽn ka beẽ n tɩ vʋʋs bilfu.” (Mark 6:31) B rɩka koom koglgo, tõe tɩ ra pẽe Kapɛrnaum, n pasg Galile Mogrã n kẽng zĩig sẽn tar bãane. La kʋʋngã zoeeme n yɛg Mogrã n deng koom koglgã n ta zĩigẽ wã. A Zezi ra na n maana wãn masã? A Zezi sũurã sãama b sẽn da baood zĩig n na n tɩ zĩnd b yembr tɩ neba wa sãam dẽ wã bɩ? Lɛ-lɛ!
5. A Zezi tagsg ra yaa wãn-wãn ne kʋʋngã sẽn waa a nengẽ wã, la bõe la a maan-yã?
5 A Zezi sẽn yã kʋʋng kãngã sẽn tar neb tusa wã sẽn da gũud-a ne yãgb tɩ bãad dãmb be b sʋkã, b ninbãaneg yõk-a lame. (Matɩe 14:14; Mark 6:44) A Mark gom n tadga bũmb ning sẽn kɩt tɩ b ninbãaneg yõk a Zezi la a sẽn maan bũmbã zugu. A gʋlsame: “[A] yã[a] neb kʋʋngã, la b ninbãanegã yõka bãmba; tɩ bõe, bãmb wẽnda wa piis sẽn ka tar pe-kɩɩm ye, la bãmb sɩngame n zãms bãmb bũmb wʋsgo.” (Mark 6:34) A Zezi sẽn yã wã ka neb wʋsg sẽn lagem taab bal ye. A yãa neb yembr-yembr sẽn tar tẽeb ratem. B ra yaa wala piis sẽn yeebd sẽn ka tar pe-kɩɩm sẽn na n peeg-b n kẽng yam-maas zĩigẽ bɩ n kogl-b ye. A Zezi ra miimi tɩ tũudmã taoor dãmb ka tar ninbãan-zoeer ye. Bãmb n da segd n yɩ pe-kɩɩm nongdsã, la sɩd-sɩdã, b ra kisa nin-buiidã n pa get-b b tẽebã ratem yell ye. (Ezekɩɛll 34:2-4; Zã 7:47-49) A Zezi ra na n talla manesem sẽn yaa toor ne bãmba, n maan-b yel-sõmd sẽn yaa sõma n yɩɩda. A sɩngame n zãmsd-b Wẽnnaam Rĩungã wɛɛngẽ.
6, 7. a) A Zezi sẽn maan bũmb ning n pids nebã ratem pʋgẽ wã, bõe la Evãnzill dãmbã wilg tɩ tara yõod n yɩɩda? b) Ne yam-tusdg bʋg la a Zezi moon la a zãms nebã?
6 Kɩbar a to sẽn wõnd woto pʋgẽ, ges-y b sẽn togs yɛlã pʋgdg-pʋgdgã sẽn sõngd tõnd tɩ d bãng bũmb nins sẽn tar yõod n yɩɩdã to-to. Yaa a Luk sẽn da yaa logtorã n gʋls kɩba-kãngã. Neb a taabã yĩns laafɩ ra yaa yell sẽn pak-a wʋsgo. “Kʋʋnga . . . pʋgl[a a Zezi]. A Zezi reega bãmba n gom Wẽnnaam soolem yell ne bãmba n maag neb nins sẽn dat maagrã.” (Luk 9:11, [Yaa tõnd n ning italikã]; Kolos rãmba 4:14) Baa ne sẽn ka woto ne kɩbar fãa b sẽn togs yel-solemd wɛɛngẽ wã, ka wã, bõe la a Luk kɩbarã vʋʋsem sõngã sẽn vẽnegã wilg pipi? Ra yaa a Zezi sẽn kõ nebã zãmsgã.
7 Woto sɩd zemsa ne Mark 6:34 sẽn gom n tadg bũmb ning zugã. Verse kãng wilgda sẽn yɩ to-to meng t’a Zezi sũurã tus-a t’a wilg tɩ neba ninbãaneg ra tar-a lame wã. A zãmsa neba n pids b tẽebã ratem. A Zezi ministɛɛrã sɩngrẽ a ra yeelame: “Yaa tɩlae tɩ mam moon Wẽnnaam soolem koe-noog tẽns a taab me; tɩ bõe, b tʋma maam bõn-kãng yĩnga.” (Luk 4:43) Baasgo, d ra na n tudgẽ lame, d sã n tags t’a Zezi moona Rĩungã koɛɛg tɩ yaa wala zɩɩb bala, tɩ yaa wala a ra maandã moonegã tʋʋmd a sẽn da segd n maanã ne yam-kaalgo. Ayo, ra yaa nonglem la ninbãan-zoeerã a sẽn tar nebã yĩngã n da yaa yam-tusdg kãseng ning sẽn tus-a t’a taas-b koe-noogã. Neer ning sẽn yaa kãseng n yɩɩd a Zezi sẽn da tõe n maane, baa ne bãad dãmbã, zĩn dãmb sẽn namsd b rãmbã, naong rãmbã, bɩ kom sẽn tar-b rãmba, ra yaa sõng-b tɩ b bãnge, n sake, la b tall nonglem ne Wẽnnaam Rĩungã sɩda. Sɩd kãngã yõodã n da yaa kãseng n yɩɩd fãa menga, bala Rĩungã na n wilgame t’a Zeova naam sẽn-ka-to wã zemsame, la a wa ne bark wakat fãa yĩng n kõ ninsaalbã.
8. Wãn-wãn la a Zezi ra tagsd ne a moonegã la zãmsgã tʋʋmde?
8 A Zezi sẽn moon Rĩungã ne yẽesmã n yaa bʋʋm ning sẽn kɩt t’a wa tẽng zugã nifu. A tẽng zug ministɛɛrã sẽn wa n kolgd saabã, a Zezi yeela a Pɩlat woto: “Yaa bõn-kãng yĩng la mam dog-yã, la yaa bõn-kãng yĩng la mam wa dũniyã n na n kɩs sɩd kaseto. Ned ninga fãa sẽn yaa sɩd dẽnda a kelgda mam koɛɛgã.” (Zã 18:37) D yãa sõss a yiibã sẽn loogã pʋsẽ t’a Zezi ra yaa sũ-bʋgsem soaba, ned b sẽn tõe n kolg nana-nana, ned sẽn waoogd neba, b sẽn tõe n teege, la sẽn yɩɩd fãa ned sẽn tar nonglem. Tõnd sã n sɩd rat n wʋm Kiristã tagsg võore, d segdame n bãng a nedemdã nen-kãensã. Woto me, tara yõod wʋsg tɩ d bãng t’a sẽn ning moonegã la zãmsgã tʋʋmd pipi zĩigẽ wã bee Kiristã tagsg pʋgẽ.
A raoola neb a taab tɩ b kõ kasetã
9. Ãnd dãmb n da segd n ning moonegã la zãmsg kũuna pipi zĩigẽ?
9 Ra ka a Zezi bal n da segd n ning moonegã la zãmsgã pipi zĩigẽ, tɩ rẽ yaa nonglem la ninbãan-zoeer wilgr ye. A raoola a karen-biisã tɩ b rɩk togs-n-taar ne a yam-tusdi wã, a sẽn ning yɛl nins pipi zĩigẽ wã, la a tʋʋmã. Wala makre, a Zezi sẽn yãk tʋm-tʋmdb 12 wã poore, bõe la b ra segd n maane? Mark 3:14, 15 yeta tõndo: “Bãmb yãka roap piig la a yiibu [a sẽn bool tɩ ‘tʋm-tʋmdba,’ NW ] tɩ b pa ne bãmba tɩ b tõe n tʋm bãmb tɩ b tɩ moon koe-noog ne pãnga la b rig zĩn dãmba.” (Yaa tõnd n ning italikã) Yãmb nee bũmb b sẽn ning pipi zĩigẽ tʋm-tʋmdbã yĩng bɩ?
10, 11. a) A sẽn da wa n tʋmd a tʋm-tʋmdbã, bõe la a Zezi yeel-b tɩ b tɩ maane? b) A sẽn da wa n tʋmd a tʋm-tʋmdbã, bõe zug la a gom n tadge?
10 Pa kaoos la a Zezi sɩd kõ a karen-biis 12 wã tõog tɩ b sãoog neb a taabã la b rig zĩn dãmb ye. (Matɩe 10:1; Luk 9:1) A tʋm-b-la “Israɛll neba sẽn wẽnd wa piis sẽn menema” nengẽ. Tɩ b tɩ maan bõe? A Zezi sagl-b lame tɩ b maan woto: “Bɩ y kẽng n moone n yeel tɩ arzãn soolem kolgame. Bɩ y maag bãad dãmba, la y vʋʋg kũum, la y maag wãooba, la y rig zĩn-dãmba.” (Matɩe 10:5-8; Luk 9:2) La sɩd-sɩda bõe la b maan-yã? “Bãmb loogame, la [1] b togsa neba tɩ b tek yam n kos sugri. [2] Bãmb diga zĩn dãmb wʋsgo, la b tika bãad dãmb wʋsg ne kaam n maag-ba.”—Mark 6:12, 13.
11 Ka wakat fãa la b ningd zãmsgã kũun pipi zĩigẽ ye. Sã n yaa woto, yɛlã tongr pʋgdg-pʋgdg a woto zugẽ wã rat n yeelame tɩ b rɩkda pipi bõn-yõodã bɩ yam-tusdi nins sẽn tɩ loe ne rẽ wã n maan tɩ yaa yell gĩi tɩ yaa n loog bɩ? (Luk 10:1-8) Be neere, d ka segd n tags tɩ b sẽn deng n gom zãmsg kũunã yell n yaool n gom sãoogrã yell naoor wʋsgã yaa zaalem yĩng ye. Ges-y yɛlã sẽn yɩ to-to yel-kãngã pʋgẽ wã. Bilf sẽn deng t’a tʋm tʋm-tʋmdb 12 wã, kʋʋngã sẽn da yaa to-to wã ninbãaneg ra yõka a Zezi. D karemda woto: “A Zezi saaga tẽn-kãsemse ne tẽn-bõoneg fãa n zãms neba karen-dotẽ la b moon Wẽnnaam soolem koe-noogo, n maag bãase la yĩns tood buud fãa. La a Zezi sẽn yã kʋʋngã, b ninbãanega yõka bãmba, tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye. Dẽ, bãmb yeela b karen-biisa yaa: ‘Tigisg yaa wʋsgo la tigisdba yaa bilfu. Dẽ yĩnga, bɩ y kos tigisga soaba tɩ b tʋm tigisdba tɩ b kẽng bãmb tigisgã.’ ”—Matɩe 9:35-38.
12. Raab bʋg yɛs la yel-soalma a Zezi la a tʋm-tʋmdbã sẽn da maandã ra tõe n pidsi?
12 Tʋm-tʋmdbã sẽn da be ne a Zezi wã yĩngã, b ra tõe n paama Kiristã tagsg bilfu. B ra tõe n bãngame tɩ b nonglmã la b ninbãan-zoeerã wilgr ne neb a taabã ra baoodame tɩ b moon la b kõ zãmsg Rĩungã wɛɛngẽ. Dẽ ra segd n yɩɩ b tʋʋm sõma wã neng sẽn yaa kãseng n yɩɩda. Sẽn zems ne rẽ, tʋʋm sõma nins a sẽn maan yĩngã wɛɛngẽ wala bãasã sãoogrã, pidsa raab sẽn yɩɩd sẽn be-b ratem pʋgẽ wã sõngre. Wala y sẽn mi wã, sãoogr b sẽn maand bɩ rɩɩb b sẽn kõt n tũnugd ne yel-soalem tõe n boola neb kẽere. (Matɩe 4:24, 25; 8:16; 9:32, 33; 14:35, 36; Zã 6:26) La sõngrã b sẽn kõt yĩngã wɛɛngẽ sẽn yãk a toogo, sɩd-sɩda tʋʋm-kãensã tusa kɛlgdbã tɩ b sak n deeg t’a Zezi ra yaa Wẽnnaam Biribla, la “no-rɛɛsa” a Moiiz sẽn da reng n togs t’a na n waame wã.—Zã 6:14; Tõodo 18:15.
13. Bãngr-gomd ning sẽn be Tõodo 18:18 pʋgẽ wã gom n tadga ‘no-rɛɛs’ ning sẽn da segd n wa wã tʋʋm-bʋg zugu?
13 Bõe yĩng t’a Zezi sẽn da yaa ‘no-rɛɛsã’ tar yõodo? Be neere, tʋʋm-kãseng bʋg la b ra reng n togs t’a ra na n maaname? ‘No-rɛɛsã’ yʋʋr da segd n yii a sẽn sãoogd bãas bɩ a sẽn na n dɩlgd kom sẽn tar-b rãmbã ne ninbãan-zoeerã yĩng bɩ? Tõodo 18:18 reng n togsa woto: “Mam na n zẽka bãmb saam-biig a ye n maan m no-rɛɛs wa foom [a Moiizi] n kõ bãmba. Mam na n ninga m goama a noorẽ t’a togs bãmb bũmb nins fãa mam sẽn na n yeelã.” Baa tʋm-tʋmdbã sẽn zãms la b wilg sũ-bʋgsmã, b ra tõe n baas n yeelame tɩ bũmb ning sẽn da kõt kaset tɩ b tara Kiristã tagsg me yaa b mooneg la b zãmsg kũun tʋʋmdã. Bũmb sẽn yaa sõma n yɩɩd b sẽn da tõe n maan n kõ nebã la woto. Ne rẽ tũnugri, bãad dãmbã la naong rãmba ra tõe n paama nafa sẽn kaoosd wakat fãa, lakae pa sẽn kaoosd ninsaal yõorã sẽn yaa koɛɛgã tɛk bɩ rɩbd a wãn nafa ye.—Zã 6:26-30.
Tall-y Kiristã tagsg rũndã-rũndã
14. Wãn-wãn la Kiristã tagsg tallg kẽed sʋk tõnd moonegã pʋgẽ?
14 Tõnd ned ba a ye ka na n ges tɩ Kiristã tagsg yaa yʋʋm kob-yendẽ yell bala, tɩ yaa bũmb sẽn tɩ loe ne a Zezi la a pipi karen-biisã bal ye. Karen-bi-kãens wɛɛngẽ, tʋm-tʋmd a Poll gʋlsame: “Tõnd tara Kirist tagsgo.” (1 Korẽnt dãmba 2:16) La tao-tao bala d na n sak n deegame tɩ yaa tɩlae tɩ d moon koe-noogã la d maan karen-biisi. (Matɩe 24:14; 28:19, 20) Baasg zãnga, yɩta sõma tɩ d tags n bãng yam-tusdi nins sẽn tusd tõnd tɩ d maand tʋʋm kãngã. D ka segd n maand-a tɩ yaa d zɩɩb bal ye. Pipi yaa d sẽn nong Wẽnnaamã n kɩt tɩ d kẽesd d mens koe-moonegã pʋgẽ, la sɩd-sɩda d sã n dat n yɩ wa Kiristã, baoodame tɩ ninbãan-zoeerã tus-d tɩ d moon la d kõ zãmsgo.—Matɩe 22:37-39.
15. Bõe yĩng tɩ zems tɩ ninbãan-zoeerã yaa bũmb sẽn kẽed sʋk tõnd koe-moonegã pʋgẽ?
15 Sɩda, ka wakat fãa la yaa nana tɩ d tall ninbãan-zoeer ne b rãmb nins tẽeb sẽn yaa toor ne tõndã ye, sẽn yɩɩd fãa d sã n wa segd yam-kaalgo, zãgsg la kɩɩsgo. La d sã n menes d nonglmã la d ninbãan-zoeerã ne nebã, d tõeeme n wa menes yam-tusdg sẽn tar yõod n yɩɩd ning sẽn tusd-d tɩ d kẽesd d mens kiris-neb koe-moonegã pʋgẽ. Wãn to masã la d tõe n tall ninbãan-zoeere? Tõnd tõe n makame n ges nebã wala a Zezi sẽn ges-b to-to wã, wala “piis sẽn ka tar pe-kɩɩma.” (Matɩe 9:36) Woto ka bilgd neb wʋsg sẽn yaa to-to rũndã-rũndã wã sɩda? Ziri tũudum pe-kɩɩmbã talla yam-kaalg ne-b la b ning-b tẽeb zõnd pʋgẽ. Rẽ n so, tɩ b ka mi sor-wilg-sõng ning sẽn be Biiblã pʋgẽ wã. B leb n ka mi arzãna Wẽnnaam Rĩungã sẽn na n wa ne ka la bilf tõnd tẽngã zugã kɩbar ye. B segda vɩɩmã daar fãa zu-loeese, wala naongã, zak pʋgẽ mo-yõsã, bãasã, la kũumã, n ka tar Rĩungã saagr ye. Tõnd tara bũmb ning b sẽn datã, sẽn yaa Wẽnnaam Rĩungã sẽn lugl saasẽ masã wã koe-noog sẽn fãagd yõyã!
16. Bõe yĩng tɩ d segd n dat n taas neb a taabã koe-noogã?
16 Yãmb sã n tags neb nins sẽn gũbg yãmbã tẽeb ratem yell woto, yãmb sũurã pa tusd-y tɩ y rat n maan y sẽn tõe fãa n togs-b Wẽnnaam raabã sẽn be nonglmã sɩda? N-ye, tõnd tʋʋmdã yaa ninbãan-zoeer tʋʋmde. Tõnd sã n wʋmd d taabã yĩn-sids võor wala sẽn yɩ to-to ne a Zezi wã, rẽ na n yɩɩ vẽeneg d koe-zomẽ wã, d nen-wamdẽ wã, la d sẽn kõt zãmsgã to-to wã pʋgẽ. Woto fãa na n kɩtame tɩ tõnd koɛɛgã tall yamleoog n yɩɩd ne b rãmb nins sẽn be “yam-sõng pʋgẽ vɩɩm sẽn-kõn-sa wã yĩngã.”—Tʋʋma 13:48, NW.
17. a) Ne manesem kẽer bʋs la d tõe n wilg d nonglmã la d ninbãan-zoeerã neb a taabã yĩnga? b) Bõe yĩng tɩ ka f sẽn na n yãk tʋʋmd a yembr tʋʋm-sõma maanegã bɩ kẽes-f-mengã koe-noogã pʋgẽ wã sʋk n maanã la sardo?
17 Yaa sɩd tɩ tõnd vɩɩmã tõr meng segd n puka nonglem la ninbãan-zoeere. Rẽ baoodame tɩ d maan sẽn be-b raab pʋgẽ wã, bãad dãmbã la naong rãmbã yel-sõmde, n maand d sẽn tõe sẽn na yɩl n kɩt tɩ b namsgã booge. Modgr nins d sẽn maand d goamẽ la d tʋʋmẽ sẽn na yɩl n yiis neb nins nin-nongds sẽn ki wã sũ-sãangã bee rẽ sʋka. (Luk 7:11-15; Zã 11:33-35) Baasg zãnga, nonglem, sõmblem, la ninbãan-zoeer a woto wilgr ka tog n yɩ tõnd tʋʋm-sõma wã nif ye, wala sẽn yaa to-to ne b rãmb nins sẽn nong n tʋmd n sõngd ninsaalb Wẽnd yĩngã. La sẽn tar yõod wʋsg n yɩɩd yaa Wẽnnaam zʋg-sõma kãensã sẽn tusd tõnd tɩ d maand modgre, la d sẽn wilgd-b n kẽesd d mens kiris-neb mooneg la zãmsg kũun tʋʋmdã pʋgẽ wã. Tẽeg-y bũmb ning a Zezi sẽn yeel Zʋɩf rãmbã tũudum taoor dãmbã wɛɛngẽ wã: “Yãmb yãkda piig pʋɩɩr ne ment la ne anet la ne cumin, la yãmb basda bũmb nins sẽn yaa neer n yɩɩd tõog pʋgẽ sẽn yaa tɩrlem la ninbãan-zoeere la sɩda. Yaa bãmb la yãmb tog n maane la y ra bas bũmb a taaba me ye.” (Matɩe 23:23) A Zezi ra ka yeta, tɩ sõng nebã ne b yĩnsã ratem la kõ-b zãmsg ne tẽeb yɛl sẽn kõt vɩɩmã sʋk bɩ d yãk a ye n maan ye. A Zezi maana b yiiba fãa. Baasgo, yaa vẽeneg t’a zãmsgã tʋʋmd n zĩnd pipi zĩigẽ, bala neer ning a sẽn tõog n pids woto wã ra tõe n waa ne sõngr sẽn kaoosd wakat sẽn-kõn-sa.—Zã 20:16.
18. D sẽn vaees Kirist tagsgã segd n tusa tõnd tɩ d maan bõe?
18 Ad d sɩd tõe n talla mi-beoog a Zeova sẽn vẽneg tõnd Kiristã tagsgã! Ne evãnzill dãmbã tũnugri, d tõe n wa paam n bãnga ninsaan-kãseng sẽn yɩɩd to sẽn zɩ n zĩndã tagsa, yĩn-sidsi, zʋg-sõma, tʋʋmã la yɛl nins a sẽn ning pipi zĩigẽ wã sõma n paase. Bee ne tõnd masã tɩ d karem, n bʋgse, la d tũ bũmb ning Biiblã sẽn vẽnegd a Zezi wɛɛngẽ wã. D tẽeg tɩ d sã n dat n sɩd n maan wala a Zezi, d toga pipi n zãms n tagse, la d mag yɛlã wala a sẽn mag-b to-to, wala ninsaalb sẽn ka zems zãng sẽn tõe n maan tɛka. Dẽ masã bɩ d rɩk sard kãn-kãe n tall la d wilg Kirist tagsgo. Manesem a to ka be sẽn yaa sõma n yɩɩd d sẽn tõe n vɩɩmde, n tall manesem ne neb a taabã, la d pẽneg d sũ-bʋgsem Wẽnnaam a Zeova, a soab ning nedemd a Zezi sẽn puk ne manesem sẽn zems zãngã ye.—2 Korẽnt dãmba 1:3; Hebre dãmba 1:3.
Wãn-wãn la y ra na n leokẽ?
• Võor-wʋmb bʋg la Biiblã kõt sã n yaa ne manesem ning a Zezi sẽn da minim n tar ne neb nins sẽn be raab pʋgẽ wã?
• A sẽn da wa n kõt a karen-biisã sor-wilgrã bõe zug la a Zezi gom n tadge?
• Wãn to la d tõe n wilg tɩ d tara ‘Kiristã tagsg’ d tʋʋmã pʋsẽ?
[Fot bala, seb-neng 16]
[Foto, seb-neng 17]
Yel-sõmd sẽn yaa kãseng n yɩɩd bʋg la kiris-nebã tõe n maan neb a taabã?