Tõnd koe-moonegã yaa nimbãan-zoeer tʋʋmde
1 A Zezi ra gũus n gesame tɩ zãma wã sẽn da kelgd a koɛɛgã “pãnga fãa sɛɛme,” tɩ b “yaa wa piis sẽn ka tar kɩɩm ye.” (Mat. 9:36) Woto yĩnga, ne nonglem la nimbãan-zoeere, a zãms-b-la a Zeova noyã, n bels-b la a tɩgs b tẽebã ratem. D sã n bʋgs a Zezi sẽn da tar manesem ning ne nebã zugu, d na n dɩka a togs-n-taare, tɩ kɩt tɩ d yɩ nimbãan-zoɛtb koe-moonegã pʋgẽ.
2 D ges a Zezi sẽn da maand to-to, neb nins sũy sẽn sãam b zu-loeesã yĩngã sã n da wa kos-a sõngre. (Luk 5:12, 13; 8:43-48) A ra pa maand tɩ yãnd yõkd neb nins sẽn da tar zu-loees takɩ wã ye. (Mark 7:31-35) A Zezi ra mii a sẽn na n maan to-to ne-b tɩ b sũy ra sãam ye. A ra mii sẽn da be nebã sũyẽ. (Luk 7:36-40) Sɩd-sɩda, a talla Wẽnnaam nimbãan-zoeerã buud kɛpɩ.
3 A Zezi ra zoeta nebã nimbãanega: A Zezi ra pa moond koɛɛgã a ye n moon la a paam a meng ye. A ra zoeta nebã nimbãanega. (Mark 6:34) Rũndã-rũndã me, tõnd pa taasd nebã koɛɛgã d ye n taas-a bal ye, d maooda sẽn na yɩl n fãag b vɩɩmã sẽn tar yõod wʋsgã. D bao n wʋm nebã manesem sẽn yaa to-to ne koɛɛgã võore. Yaa vɩɩmã zu-loees n namsd-b bɩ? Yaa ziri tũudmã karen-saam dãmb sẽn pa zãms-b sõma la b tudg-bã yĩng bɩ? D sã n kɩt tɩ nebã bãng tɩ d rat n sɩd sõng-b lame, tõe tɩ b sak n kelg koe-noogã.—2 Kor. 6:4, 6.
4 F sã n wilgd ned tɩ f kʋmda a nimbãanega, noogda a sũuri. Ad makr a ye sẽn wilgd rẽnda: Pag a yembr kiuug a tãab bi-pɛɛlg n da ki t’a zĩ ne sũ-sãanga. Saam-bi-pogs a yiib n wa n na n moon-a koɛɛgã, t’a kɩt tɩ b kẽ. A ra rat n sok-b lame n bãng bũmb ning sẽn kɩt tɩ Wẽnnaam bas tɩ ãdem-biisã namsdẽ wã, la a ra sɩfame n na n kɩɩs saam-bi-pogsã sẽn na n leok-a to-to fãa. La kaoosg poore, pʋg-kãngã yeela woto: “B kʋma mam nimbãaneg wʋsg n kelg-m neere. B sẽn wa n loogdẽ wã, m sũ-sãangã ra boogame hal tɩ kɩt tɩ m sak tɩ b na n ye wa nindaare.” Rẽ yĩnga yãmb modgd n wilgda neb nins fãa y sẽn segd koe-moonegã pʋgẽ wã tɩ y kʋmd-b lame bɩ?
5 D sã n yaa nimbãan-zoɛtba, d na n tõog n belsa nebã ne belsg hakɩka, la rẽ na n pẽga a Zeova sẽn yaa “nimbãan-zoeer Ba” wã me.—2 Kor. 1:3.