Tõnd rogem-pʋɩɩr sẽn tar yõodã võor ne yãmb yaa bõe?
“Wa-yã, yãmb dãmba sẽn tar m Ba barka. Bɩ y reeg soolem ninga sẽn segl yãmb yĩng hal dũniyã naaneg wakatã [tɩ yɩ y rogem-pʋɩɩre, NW ].”—MATƖE 25:34.
1. Bõn-bʋs buud la nebã paamd tɩ yɩ rogem-pʋɩɩre?
NINSAALBA fãa tara yɛl b sẽn taas-ba. Ne neb sãnda, rogem-pʋɩɩrã tõe n tara laog sẽn kɩt tɩ b tar naar vɩɩmã pʋgẽ. Ne neb a taaba yaa naongo. Zĩis kẽer pʋsẽ, zãmaan dãmb nins sẽn loogã sẽn vɩɩmd yɛl nins bɩ b sẽn wʋm bũmb ninsã yĩnga, b taasa b kambã rogem-pʋɩɩr sẽn yaa kisgr sẽn tar pãng ne buud a to neba. La tõnd fãa lagem n tara bõn-yɛnga. Tõnd fãa paama pʋɩɩr ne yel-wẽna sẽn yit pipi ninsaal a Ãdem nengẽ d rogmẽ wã. Rogem-pʋɩɩr kãng baasd n waa ne kũum.—Koɛɛg Soaba 9:2, 10; Rom dãmba 5:12.
2, 3. Rogem-pʋɩɩr bʋg la a Zeova sɩng n dat n kõ a Ãdem ne a Hawa kamba, la bõe yĩng tɩ b pa paam-a?
2 A Zeova sẽn yaa yĩngr Ba sẽn tar nonglmã kõo ãdem-biisã rogem-pʋɩɩr sẽn yaa toor wʋsg sɩngrẽ wã: ra yaa vɩɩm sẽn pa sat zems zãng pʋgẽ Arzãn pʋgẽ. B kõo tõnd pipi roagdb a Ãdem ne a Hawa sɩngr sẽn zems-zãnga, n pa tar yel-wẽnd ye. Wẽnnaam a Zeova kõo ãdem-biisã Tẽngã. (Yɩɩl Sõamyã 115:16, NW ) A kõo Edɛn zẽedã tɩ yɩ makr ne tẽngã gill sẽn da segd n yɩ to-to wã. Sẽn paase, a kõo tõnd pipi roagdbã tʋʋmd sẽn be rasãnd wʋsgo, la tʋʋmd sẽn tar yamleoogo. B ra segd n doga kamba, n ges tẽngã yelle, la tɩɩs ne rũms buud toor-toorã sẽn be a zugã yelle, la b yalg arzãnã t’a wa pid dũniyã gilli. (Sɩngre 1:28; 2:8, 9, 15) B kamba ra na n kẽesa b toog tʋʋm-kãng pʋgẽ. Ad sɩd yaa rogem-pʋɩɩr sẽn yaa kãseng meng la b ra tõe n taas-ba!
3 La b sã n da rat n paam woto fãa, a Ãdem ne a Hawa ne b yagensã ra segd n talla zood ne Wẽnnaam. B ra segd n nonga a Zeova la b sak-a, baasgo, a Ãdem ne a Hawa pa tall naneb ne Wẽnnaam sẽn da kõ-b bũmb ningã ye. B kɩɩsa a noorã. B konga b yirã sẽn yaa Arzãnã la saagr sẽn be ziir ning Wẽnnaam sẽn da ning b taoorã. Woto yĩnga, b ra pa tõe n taas b yagensã bõn-kãensã ye.—Sɩngre 2:16, 17; 3:1-24.
4. Wãn-wãn la d tõe n paam rogem-pʋɩɩr ning a Ãdem sẽn kongã?
4 Ne ninbãan-zoeere, a Zeova rɩka segls sẽn na yɩl t’a Ãdem ne a Hawa yagensã tõog n paam rogem-pʋɩɩr ning a Ãdem sẽn kongã. Wãn to? Wakat ning Wẽnnaam sẽn yãkã sẽn ta, yẽ mengã Biribl a Zezi Kirist kõo a ninsaal vɩɩm sẽn zems zãngã a Ãdem yagensã yĩnga. Ne rẽ maasem, Kirist raa bãmb fãa. La b pa paamd rogem-pʋɩɩrã nana-nana woto ye. B segd n taa Wẽnnaam yam, b sẽn na n tall tẽeb ne a Zezi maoongã yõod sẽn yẽesd yel-wẽnã, la b wilg tɩ b tara tẽeb n yɩ sakdba. (Zã 3:16, 36; 1 Tɩmote 2:5, 6; Hebre dãmba 2:9; 5:9) Yãmb vɩɩmã manesem wilgdame tɩ y nanda seglg kãngã bɩ?
Rogem-pʋɩɩr b sẽn tũnug ne a Abrahaam n taase
5. Wãn-wãn la a Abrahaam tall naneb ne a zoodã ne a Zeova?
5 A sẽn tʋm n na n pids a raabã tẽngã zugã, a Zeova talla manesem toor zall ne a Abrahaam. A kõo ra-kãngã sẽn tar kɩs-sɩdã noor t’a yi a tẽngẽ wã n kẽng tẽng Wẽnnaam mengã sẽn da na n wilg-a pʋgẽ. A Abrahaam saka ne yamleoogo. A Abrahaam sẽn ta be wã poore, a Zeova yeel-a lame t’a yagensã ra na n paama tẽngã tɩ yɩ b rogem-pʋɩɩre, la pa yẽ mengã ye. (Sɩngre 12:1, 2, 7) A Abrahaam manesem yɩɩ wãn-wãna? A ra rat n sõgena a Zeova, zĩig ning fãa la ne manesem ning fãa Wẽnnaam sẽn wilg-a sore, sẽn na yɩl t’a yagensã paam b rogem-pʋɩɩrã. A Abrahaam sõgena a Zeova tẽn-zẽng yʋʋm 100 pʋgẽ, hal a yõor tɛka. (Sɩngre 12:4; 25:8-10) Yãmb ra na n maana woto bɩ? A Zeova ra yeelame t’a Abrahaam ra ya a “zoa.”—Ezai 41:8.
6. a) Bõe la a Abrahaam wilg-yã, a sẽn sak n na n maan a biigã maoongã? b) Rogem-pʋɩɩr bʋg sẽn tar yõod wʋsg la a Abrahaam da tõe n taas a yagensã?
6 A Abrahaam gũu yʋʋm wʋsg n yaool n paam a biribl a Izaak a sẽn da nong wʋsgã. Biriblã sẽn da wa n bɩ n ta rao zĩigẽ vẽenegã, a Zeova kõo a Abrahaam noor t’a rɩk-a n tɩ maan maoong n kõ-a. A Abrahaam da pa mi t’a sẽn da na n maan bũmb ningã ra na n yɩɩ makr ne Wẽnnaam mengã sẽn da na n maan ne a Biriblã tɩ yɩ yao-n-dɛɛkã ye. Ne rẽ fãa a sakame, hali n da rat n dɩk a Izaak n maan maoong n kõ, t’a Zeova malɛkã yals-a. (Sɩngre 22:9-14) A Zeova ra zoe n yeelame t’a sẽn kãab a Abrahaam bũmb ninsã ra na n pidsa ne a Izaak tũnugri. Woto, a Abrahaam ra tara tẽeb vẽeneg tɩ sã n yaa tɩlae, Wẽnnaam da tõe n vʋʋga a Izaak kũ-rãmbã sʋka, baa ne b sẽn da zɩ n maan bũmb a woto pĩndã. (Sɩngre 17:15-18; Hebre dãmba 11:17-19) A Abrahaam sẽn pa zãgs a biriblã mengã yĩnga, a Zeova togsame: “Yaa fo [yagengã, NW ] yĩng la dũniyã buud fãa na n paam barka.” (Sɩngre 22:15-18) Woto wilgdame tɩ yageng ning yell b sẽn gom Sɩngre 3:15 pʋgẽ wã, sẽn yaa fãagdã sẽn yaa Mesi wã, ra na n tũu ne a Abrahaam yagensã n wa. Ad sɩd yaa rogem-pʋɩɩr sẽn tar yõod wʋsg la a ra na n taase!
7. Wãn-wãn la a Abrahaam, a Izaak la a Zakoob tall naneb ne b rogem-pʋɩɩrã?
7 A Abrahaam da pa mi a Zeova sẽn da maand bũmb ning rẽ wẽndã võor ye. A biribl a Izaak la a yageng a Zakoob me sẽn lebg neb “sẽn tar pʋɩɩr ne kãabg a yembrã” me ra pa wʋmd a võor ye. La b fãa ra tara bas-yard ne a Zeova. B pa loe b mens ne rĩmd sẽn yaa galʋ-tẽns nins sẽn be tẽngẽ wã a yembr ye, bala b ra gẽegda bũmb sẽn yaa sõma n yɩɩda: “tẽng sẽn tar yẽbgr sõama, a tãn-meta ne a naanda sẽn yaa Wẽnnaam.” (Hebre dãmba 11:8-10, 13-16) La pa a Abrahaam yagensã fãa n tall naneb ne rogem-pʋɩɩrã sẽn tar yõod wʋsgã b sẽn tũnug ne a Abrahaam n kõ wã ye.
Kẽer sẽn pa tall naneb ne rogem-pʋɩɩrã
8. Wãn-wãn la a Ezayu wilg t’a ra pa nand a rogem-pʋɩɩrã yõod sẽn yaa wʋsgã?
8 A Izaak pipi biribl a Ezayu pa ges tɩ zu-noog ning a sẽn tar n yaa bi-kãsengã tara yõod wʋsg ye. A pa tall naneb ne balengã yɛl ye. Woto, kom sẽn da tar a Ezayu daar a yembre, a rɩka a kasengã zu-nood n koos ne a ba-biig a Zakoobe. Yaa ne bõe la a koos-a? Bãng-y tɩ yaa ne bur la bɛng buud b sẽn dʋge! (Sɩngre 25:29-34; Hebre dãmba 12:14-17) Wẽnnaam sẽn da na n tũnug ne buud ning n pids kãabs nins a sẽn kãab a Abrahaamã ra na n tũu ne a Zakoobe, a soab ning yʋʋr Wẽnnaam sẽn toeem tɩ lebg Israɛllã. Rogem-pʋɩɩr kãngã sẽn yaa toor zallã paka so-bʋs n kõ-ba?
9. B tẽeb rogem-pʋɩɩrã yĩnga, fãagr bʋg la a Zakoob yagensã bɩ Israɛll paam-yã?
9 Kom wakate, a Zakoob ne a zaka neb kẽnga Ezipti. Beenẽ b fɩɩgame n lebg kʋʋng wʋsgo, la b yɩɩ yembs me. Baasg zãnga, a Zeova pa yĩm a kaoolã a sẽn maan ne a Abrahaamã ye. Wakat ning Wẽnnaam sẽn yãkã sẽn ta, a yiisa Israɛll kambã yembdẽ wã, la a yeel-b t’a ra na n tall-b lame n kẽes ‘tẽng sẽn tar bĩisim ne sɩɩd wʋsg’ pʋgẽ. Yaa tẽng ning a sẽn da kãab a Abrahaamã.—Yikri 3:7, 8; Sɩngre 15:18-21.
10. Sinai Tãngã zugu, yel-kãsems a taab bʋs n zĩnd sẽn tɩ loe ne Israɛll kambã rogem-pʋɩɩre?
10 Israɛll kambã sẽn da be Kãabg Tẽngã sor zugu, a Zeova tigem-b-la Sinai Tãnga sɛɛga. Beenẽ a yeel-b-la woto: “Sẽn sɩng masã, yãmb sã n sak mam koɛɛga la y sak mam kãabgã, yãmb na n lebga mam neb buuda fãa sʋka. Tɩ bõe, dũniyã fãa yaa maam n so. La yãmb buuda na n yɩɩ maan-kʋʋdba [rĩung, NW ] la neb sẽn welg mam yĩnga.” (Yikri 19:5, 6) Neba fãa sẽn lagem taab n sak rẽ ne yamleoogã poore, a Zeova kõ-b-la a Tõogã, bũmb a sẽn da pa maan n kõ buud a to ye.—Yɩɩl Sõamyã 147:19, 20.
11. Yɛl nins sẽn tar yõod wʋsg sẽn be Israɛll kambã rogem-pʋɩɩr pʋgẽ wã kẽer la bʋse?
11 Ad bu-paalg kãngã ra paam tẽeb rogem-pʋɩɩr tɛkẽ! B balma sɩd Wẽnnaam a yembrã. A fãag-b-la Ezipti, la b maana kaset ne yel-kãsemse, b sẽn da wa n kõt Tõogã Sinai Tãngã zugã. B rogem-pʋɩɩrã paama bark n paase, b sẽn paam “Wẽnnaam . . . goama” n paase, ne no-rɛɛsdbã tũnugrã. (Rom dãmba 3:1, 2) A Zeova ra yãk-b lame tɩ b yɩ a kaset rãmba. (Ezai 43:10-12, NW ) Yagengã sẽn yaa Mesi wã ra na n puka b buudã pʋgẽ. Tõogã goma a yelle, n wilg a sẽn da ya a soaba. Tõogã ra segdame me n sõng-b tɩ b bãng tɩ Yagengã ra yaa tɩlae ne-ba. (Galat dãmba 3:19, 24) Sẽn paase, b ra na n paama sor n lagem ne Yageng kãng sẽn yaa Mesi wã n sõgene, n yɩ maan-kʋʋdb rĩung la bu-sõngo.—Rom dãmba 9:4, 5.
12. Baa ne b sẽn kẽ Kãabg Tẽngẽ wã, bõe la Israɛll nebã pa paame, la bõe yĩnga?
12 A Zeova talla Israɛll nebã n kẽng Kãabg Tẽngẽ wã wa a sẽn da kãabã. La wala tʋm-tʋmd a Poll sẽn wilg kaoosg poorã, b tẽeb kaalmã yĩnga, tẽngã sɩd pa yɩ [“vʋʋsg zĩig,” NW ] ye. B buudã pa kẽ “Wẽnnaam vʋʋsgã” pʋgẽ ye, b sẽn pa bãng la b tʋm tɩ zems ne Wẽnnaam mengã vʋʋsg daar sẽn sɩng a Ãdem ne a Hawa naanegã poorã yĩnga.—Hebre dãmba 4:3-10.
13. B sẽn pa tall naneb ne b tẽebã rogem-pʋɩɩrã yĩnga, bõe la Israɛll buudã kong-yã?
13 Neb nins fãa sẽn da na n lagem ne Mesi wã a yĩngr Rĩungã pʋgẽ n yɩ maan-kʋʋdb rĩung la neb sẽn welgã zãng ra tõe n yii nems Israɛllã pʋgẽ. La b pa tall naneb ne b rogem-pʋɩɩrã sẽn tar yõod wʋsgã ye. Yaa nems Israɛllã neb kell bal n sak Mesi wã, a sẽn wa n wa wã. Rẽ kɩtame tɩ yɩ neb sõor bilf bal la b yãk tɩ b zĩnd maan-kʋʋdbã rĩung b sẽn deng n goma yellã pʋgẽ. B ra reega Rĩungã nems Israɛllã nengẽ n kõ “buud ninga sẽn na n maan tʋʋm sẽn zemse.” (Matɩe 21:43) Bu-kãng yaa bʋgo?
Rogem-pʋɩɩr saasẽ
14, 15. a) A Zezi kũumã poore, wãn-wãn la tẽn-tẽnsã sɩng n barkd b mense, a Abrahaam “yagenga” maasem yĩnga? b) Bõe la “Israɛll sẽn yaa Wẽnnaam dẽnda” neb paamd tɩ yɩ b rogem-pʋɩɩre?
14 Buud ning b sẽn da kõ Rĩungã yaa “Israɛll sẽn yaa Wẽnnaam dẽnda,” sẽn yaa tẽeb Israɛllã, sẽn da ya a Zezi Kirist karen-biis 144 000 sẽn paam vʋʋsem sõng rogmã. (Galat dãmba 6:16; Wilgri 5:9, 10; 14:1-3) Neb 144 000 kẽer da yaa Zʋɩf rãmb sɩd-sɩda, la wʋsg sẽn yɩɩd yii Buzẽmsã neb sʋka. Ne manesem a woto, a Zeova sẽn kãab a Abrahaam tɩ ne a ‘yagengã’ maasem buudã fãa ra na n barka b mensã sɩnga pidsgu. (Tʋʋma 3:25, 26; Galat dãmba 3:8, 9) Pipi pids-kãng pʋgẽ, bu-zẽmsã neb paama zaeeb ne vʋʋsem sõngo, tɩ Wẽnnaam a Zeova yãk-b tɩ b yɩ a tẽeb komdibli, sẽn ya a Zezi Kirist ba-biisã. Woto, bãmb me lebga ‘yageng’ kãng babg a yiib-n-soabã.—Galat dãmba 3:28, 29.
15 Sẽn deng a kũumã, a Zezi lugla kaool paalgã, a sẽn da na n kõ pãng ne a mengã zɩɩmã, n wilg Zʋɩf rãmb sẽn da na n yɩ bu-paalg kãng neba. B tika tẽeb ning b sẽn tall ne maoong kãng sẽn kõt kaoolã pãngã zugu, n kɩt tɩ neb nins b sẽn kẽes kaool kãng pʋgẽ wã “zems zãng wakat sẽn ka sɛta.” (Hebre dãmba 10:14-18) B ra tõe n ‘lebga tɩrs’ tɩ b yel-wẽnã paam sugri. (1 Korẽnt dãmba 6:11) Woto, ne rẽ wɛɛngẽ, b yaa wa a Ãdem sẽn da yaa to-to t’a nan pa maan yel-wẽndã. La bãmba rãmbã pa segd n vɩɩmd tẽng zug arzãnẽ ye. A Zezi yeelame t’a ra na n tɩ segla zĩig b yĩng saasẽ. (Zã 14:2, 3) B basda b tẽng zug vɩɩmã saagr sẽn na yɩl n paam ‘dogem-pʋɩɩr b sẽn bĩng b yĩng saasẽ.’ ( Pɩɛɛr 1:4) Yaa bõe la b maand be? A Zezi wilgame: “Mam maanda kaool ne yãmba, . . . rĩung yĩngã.”—Luk 22:29, NW.
16. Sõgeneg tʋʋmd sẽn yaa kãseng bʋg n be kiris-neb nins sẽn zaeyã yĩnga?
16 Sẽn paas ne tʋʋm a taaba, neb nins sẽn na n dɩ naam ne Kirista na n zĩnda saasẽ n sõng me n yiis kɩɩsgã b sẽn maand n tõdgd a Zeova naam sẽn-ka-to wã vũgs fãa. (Wilgri 2:26, 27) B sẽn ya a Abrahaam tẽeb yagengã babg a yiib-n-soabã, b na n lagem n waa ne bark n kõ buudã fãa neb tɩ b paam vɩɩm sẽn zems zãnga. (Rom dãmba 8:17-21) Ad b sɩd tar dogem-pʋɩɩr sẽn tar yõod wʋsgo!—Efɛɛz rãmba 1:16-18.
17. Kiris-neb nins sẽn zaeyã paamda b rogem-pʋɩɩrã nen-bʋs tɩ b ket n be tẽng zugu?
17 La a Zezi karen-biis nins sẽn zaeyã rogem-pʋɩɩr pa sẽn wat bal ye. A Zezi sõng-b lame tɩ b bãng a Zeova sẽn yaa sɩd Wẽnnaam a yembrã n yɩɩd ned a to buud fãa sẽn da tõe n maane. (Matɩe 11:27; Zã 17:3, 26) Ne goam la mak-sõng kũuni, a zãms-b lame tɩ b bãng ‘a Zeova teegr’ sẽn dat n yɛɛlga, la a Zeova sakr sẽn baood tɩ b maan bũmb ninga. (Hebre dãmba 2:13, NW; 5:7-9) A Zezi bobl-b-la sɩdã bãngr Wẽnnaam daabã wɛɛngẽ, la a kõ-b bas-m-yam tɩ vʋʋsem sõngã ra na n wilg-b-la sor tɩ b wʋm a võorã zãng n paase. (Zã 14:24-26) A kɩtame tɩ b bãng Wẽnnaam Rĩungã yõod b yamẽ wã la b sũyẽ wã. (Matɩe 6:10, 33) A Zezi leb n bobl-b-la tʋʋmd sẽn yaa kõ kaset la b maan karen-biis Zerizalɛm, Zide, Samari la tẽngã babs nins sẽn zãr n yɩɩdẽ wã fãa.—Matɩe 24:14; 28:19, 20; Tʋʋma 1:8.
Rogem-pʋɩɩr sẽn tar yõod wʋsg n kõ kʋʋng kãsenga
18. Wãn-wãn la a Zeova sẽn kãab tɩ tẽn-tẽnsã na n barka b mense, a Abrahaam “yagenga” maasem yĩngã paamd pidsg rũndã-rũndã?
18 Wõnda b tũusa tẽeb Israɛllã sẽn yaa Rĩungã rogem-pʋɩɩr dɩtb ‘bãg-bil’ kãngã neb sõor zãnga. (Luk 12:32, NW ) Sẽn na maan yʋʋm pi-gĩn masã, a Zeova gesa kʋʋng kãsengã tigisg tẽn-tẽnsã fãa sʋk yelle. Woto, a Zeova sẽn kãab a Abrahaam tɩ buudã fãa neb ra na n barka b mens ne a ‘yagenga’ maasem yĩngã paamda pidsg wʋsgo. Ne sũ-noogo, nin-kãensã me kõta a Zeova baleng sẽn yaa sõngo, la b sakd n deegame tɩ b fãagrã bee ne tẽeb ne Wẽnnaam Pebil a Zezi Kirista. (Wilgri 7:9, 10) Yãmb saka a Zeova boolgã a sẽn maand ne sõmblem n dat tɩ y zĩnd sul-kãngã pʋgẽ wã bɩ?
19. Rogem-pʋɩɩr bʋg la tẽn-tẽnsã neb sẽn barkd b mensã masã wã gẽegda?
19 Rogem-pʋɩɩr sẽn tar yõod wʋsg bʋg la a Zeova kõt neb nins sẽn pa be bãg-bilã pʋgẽ wã? Pa rogem-pʋɩɩr saasẽ ye, ayo. Yaa rogem-pʋɩɩr ning a Ãdem sẽn da tõe n taas a yagensã: vɩɩm sẽn pa sat saagr zems zãng pʋgẽ Arzãn sẽn na n wa zĩnd dũniyã gill zug bilf-bilf pʋgẽ. Dũni kãng pʋgẽ, ‘kũum, sũ-sãoong bɩ yãbr wala toog kõn zĩnd yɛs ye.’ (Wilgri 21:4) Rẽ, yaa yãmb la Wẽnnaam Gomdã vʋʋsem sõng sẽn vẽneg tɩ b gʋlsã sẽn yetã: “Dell Zusoaba [a Zeova, NW ] n maan neere. Zĩnd tẽng pʋgẽ n vɩɩnd ne laafɩ. Maan sũ-noog Zusoaba yĩnga, la bãmb na kõ foom f sẽn kot bũmb ninsã. A keta bilf bala tɩ nin-wẽng kõn tol n zĩnd ye . . . La sũ-maasem dãmba na n sooga dũniyã n maan sũ-noog laafɩ wʋsg yĩnga. Nin-tɩrs na n sooga dũniyã la bãmb na n zĩnda a zug wakat sẽn ka sɛta.”—Yɩɩl Sõamyã 37:3, 4, 10, 11, 29.
20. Wãn-wãn la “piis a taab[ã]” paamd kiris-neb nins sẽn zaeyã tẽeb rogem-pʋɩɩr wʋsgo?
20 A Zezi “piis a taab[ã]” tara rogem-pʋɩɩr saasẽ Rĩungã tẽng zug babgẽ. (Zã 10:16a) Baa ne b sẽn pa na n zĩnd saasẽ wã, b paamda neb nins sẽn zaeyã tẽeb rogem-pʋɩɩr wʋsgo. Yaa ne sẽn zae-bã sull sẽn yaa “kɩs-sɩd la gũusd yambã” tũnugr la piis a taabã paam n wʋm kãabs nins sẽn tar yõod wʋsgã sẽn be Wẽnnaam Gomdã pʋgẽ wã võore. (Matɩe 24:45-47, NW; 25:34) Sẽn zae-bã ne piis a taabã fãa sẽn naag taab mii sɩd Wẽnnaam a yembr bal a Zeova la b balemd-a. (Zã 17:20, 21) B lagemda taab n pʋʋsd Wẽnnaam bark a Zezi maoongã sẽn yẽesd yel-wẽnã yĩnga. B sõgenda ne taab n yaa bãgr a yembre, Pekɩɩm yɛng a Zezi Kirist sor-wilgr pʋgẽ. (Zã 10:16b, NW ) B fãa bee dũni gill saam-biis sẽn nong taab sʋka. B lagemda taab n tar zu-noog ning sẽn yaa yɩ a Zeova la a Rĩungã Kaset rãmbã. N-yẽe, yãmb sã n ya a Zeova sõgen sẽn dɩk a meng n kõ n deeg lisgu, rẽ fãa bee yãmb tẽebã rogem-pʋɩɩr pʋgẽ.
21, 22. Wãn-wãn la tõnd fãa tõe n wilg tɩ d nonga d tẽeb rogem-pʋɩɩrã wʋsgo?
21 Tẽeb rogem-pʋɩɩr kãngã yõod ne yãmb taa zĩ-bʋgo? Yãmb neeme t’a tara yõod tɩ sek y na rɩk Wẽnnaam daabã maaneg tɩ lebg bũmb ning sẽn tar yõod n yɩɩd yãmb vɩɩmã pʋgẽ wã bɩ? Sẽn na yɩl n wilg rẽ, yãmb tũuda a Gomdã la a siglgã sagls sẽn wilgd tɩ d wa kiris-neb tigingã tigiss fãa n da vaalã bɩ? (Hebre dãmba 10:24, 25) Rogem-pʋɩɩr kãngã tara yõod wʋsg woto ne yãmb hal tɩ y ket n sõgend Wẽnnaam baa ne namsgã bɩ? Yãmb nanebã ne-a wã tara pãng wʋsg n sek a na kõ yãmb pãnga, tɩ y yals kãn-kãe makr buud fãa sẽn na n kɩt tɩ y maan n wa kong-a wã taoor bɩ?
22 Bɩ tõnd fãa tall naneb ne tẽeb rogem-pʋɩɩrã Wẽnnaam sẽn kõ tõndã. Tõnd sẽn ket n get Arzãnã sẽn watã sõma-sõma sasa, bɩ d kẽes d meng n tʋm sõma ne tẽebã zu-nood a Zeova sẽn kõt tõnd masã wã. Tõnd sã n sɩd rɩk d vɩɩmã fãa n tik d zems-n-taarã ne a Zeova wã zugu, d kõta kaset sẽn sakd reegr tɩ d geta d rogem-pʋɩɩrã Wẽnnaam sẽn kõ-dã wa bũmb sẽn sɩd tar yõod wʋsgo. Bɩ d zĩnd neb nins sẽn yet woto wã sʋka: “Mam Wẽnnaam sẽn yaa mam dĩma, mam pẽgda yãmba. Mam waoogda yãmb yʋʋr wakat fãa.”—Yɩɩl Sõamyã 145:1.
Y na n wilgẽ-la a võorã wãn to?
• A Ãdem sã n da yɩẽ-la kɩs sɩd soab ne Wẽnnaam, rogem-pʋɩɩr bʋg la a ra na n taasẽ tõndo?
• Wãn-wãn la a Abrahaam yagensã maan ne rogem-pʋɩɩr ning b sẽn da tarã?
• Bõe n be Kirist karen-biis sẽn zaeyã rogem-pʋɩɩr pʋgẽ?
• Kʋʋng kãsengã rogem-pʋɩɩr yaa bõe, la wãn-wãn la b tõe n wilg tɩ b sɩd nand-a lame?
[Foto, seb-neng 29]
A Abrahaam yagensã paama rogem-pʋɩɩr sẽn tar yõod wʋsg kãabgo
[Foto rãmba, seb-neng 31]
Yãmb nanda y tẽebã rogem-pʋɩɩr bɩ?