Yãmb vɩɩme tɩ zems ne y sẽn dɩk y meng n kõ wã bɩ?
“Yãmb sẽn maand bũmb ninga fãa, bɩ y maan ne y sũyã fãa Zusoaba yĩnga, la ka neba yĩng ye.”—KOLOS RÃMBA 3:23.
1. Sã n yaa ne dũniyã tagsgo, “rɩk f meng n kõ” rat n yeelame tɩ bõe?
WÃN TO la yĩn-wɩsgrã maandb tõogd n wa be b piig la yiib zugu? F sã n dat n lʋɩ taoor yĩn-wɩsgr wa tenisi, ball tãooga, baskɛtbolle, beezbolle, zoees buud toɛ-toɛya, la golfã reem pʋgẽ, yaa f sẽn na n dɩk f meng n kõ zãng bala. Yĩngã la yamã segl tɩ zemsã n wat pipi. Rẽ zemsa sõma ne gomd ning sẽn yaa “sẽn dɩk f meng n kõ wã,” sẽn yaa “kẽes f meng zãng tagsg bɩ tʋʋm manesem takɩ pʋgẽ wã.”
2. “Rɩk f meng n kõ” võor yaa bõe Biiblã pʋgẽ? Rɩk-y makre.
2 La sã n yaa ne Biiblã, “rɩk f meng n kõ” rat n yeelame tɩ bõe? “Rɩk n kõ” yaa Hebre gom-biig ning võor sẽn yaa “kell n welg toore, welge, yãke.”a Pĩnd Israɛllẽ wã, Maankʋʋd Kãsem a Aarõ ra tara peen-vindg tɩ b ning “rɩk-n-kõ wã bãnd sẽn yaa sõngã” zugẽ be. Bãnd kãng ra yaa bõn-paklg sẽn pɩnd sẽn maan ne sãnem halaale. B gʋlsa Hebre gom-bi-kãensã a zugu: “Sõng ya a Zeova n so.” Woto ra tẽegda maan-kʋʋd kãsmã t’a segd n gũusame n da maan bũmb sẽn tõe n dẽgem do-sõngã, “Tɩ bõe, kaam ninga sẽn pʋgdg maan-kʋʋd zug n welg yẽ a Wẽnnaam yĩnga [ra] bee yẽ zugu.”—Yikri 29:6; 39:30, NW; Maankʋʋre 21:12.
3. Tõnd sẽn dɩk d mens n kõ wã baoodame tɩ d maan bõe?
3 D sã n ges rẽ, d tõe n yãame tɩ rɩk f meng n kõ yel-kãngã pʋgẽ wã pa reem yell ye. A baoodame tɩ f wilg ne yamleoog tɩ f yaa Wẽnnaam sõgena. Rẽ baoodame tɩ d tall manesem yɩlemde. Woto yĩnga, d tõe n bãnga tʋm-tʋmd a Pɩɛɛr sẽn lebs n dɩk a Zeova goamã sẽn yet woto wã võore: “Y segd n yɩɩ sõmse, bala mam yaa sõngo.” (1 Pɩɛɛr 1:15, 16, NW ) D sẽn yaa kiris-neb sẽn dɩk d mens n kõ wã, d tara zɩɩb sẽn yaa kãsengã. D vɩɩmd tɩ zems ne d sẽn rɩk d mens n kõ wã, la d yɩ kɩs-sɩd dãmb hal tɩ saabã ta. La bõe la kiris-ned sẽn dɩk a meng n kõ segd n maane?—Maankʋʋre 19:2; Matɩe 24:13.
4. Wãn to la d wat n dɩk d meng n kõ, la ne bõe la b tõe n mak rẽ?
4 D bãnga Wẽnnaam a Zeova la a raabã tɩ zems takɩ. Sẽn paase, d bãnga a Zezi Kirist la tʋʋmd ning a sẽn tar Wẽnnaam daabã pʋgẽ wã tɩ zems takɩ. Rẽ poore, d rɩka sard d toor n na n sõgen Wẽnnaam ne d sũur fãa, ne d yam fãa, ne d sɩɩg fãa la d pãng fãa. (Mark 8:34; 12:30; Zã 17:3) B tõe n gesa rẽ wa pʋleng f meng sẽn maane, sẽn yaa rɩk f meng n kõ Wẽnnaam zãnga. Tõnd sẽn dɩk d meng n kõ wã pa bũmb d sẽn zagem d zug bal n yik n maan ye. D maaga d yĩng n pʋʋs la d tags sõma n yaool n maan dẽ. Woto yĩnga, pa sard d sẽn dɩk wakat bilf yĩng ye. D pa segd n yɩ wa ned sẽn sɩng pʋʋg koob n wa pʋɩ sʋk n bas tɩ tʋʋmdã yaa toog wʋsgo, bɩ tɩ tigisgã wõnda a zãra wʋsgo, bɩ a sã n tẽed tɩ bas-m-yam kae baa bilf tɩ tigisgã na n sɩd yɩɩ sõma yĩng ye. Ges-y neb kẽer makre. B ‘zãada wãk’ tigingã pʋgẽ zɩɩbã wɛɛngẽ, baa ne tood wʋsg la zu-loe-kãsemsã.—Luk 9:62; Rom dãmba 12:1, 2.
B pa bas b rɩk-m-meng n-kõ wã ye
5. Wãn to la a Zeremi yɩ mak-kãseng wʋsgo, sã n yaa ne rɩk f meng n kõ Wẽnnaamã wɛɛngẽ?
5 A Zeremi sẽn togs bãngr-goam Zerizalɛm pʋgẽ wã rɩka sẽn yɩɩd yʋʋm 40 (647-607 S.D.T.W.), la ra pa tʋʋm nana ye. A ra miimi tɩ zĩis kẽere a ra pa tar tõog ye. (Zeremi 1:2-6) A ra baooda raood la tõog-toog sẽn na yɩl n seg Zida nebã sẽn da yaa neb sẽn pa wʋmd tʋbrã daar fãa. (Zeremi 18:18; 38:4-6) Baasg zãnga, a Zeremi teega Wẽnnaam a Zeova. A kõ-a-la pãng t’a yɩ Wẽnnaam sõgen sẽn sɩd rɩk a meng n kõ-a wã.—Zeremi 1:18, 19.
6. Mak-sõng bʋg la tʋm-tʋmd a Zã kõ tõndo?
6 B da talla kɩs-sɩd soab a Zã n kẽng Patmose, “Wẽnnaam goama la a Zezi kaseta yĩnga.” A da yaa nin-kẽema ko-sʋk tẽng kãngã vɩɩmã sẽn da yaẽ toogã pʋgẽ. Yɩɩ wãn to ne yẽ? (Wilgri 1:9) A tõoga toog la a vɩɩmd tɩ zems ne a sẽn dɩk a meng n kõ wã wa kiris-ned sẽn na maan yʋʋm 60. A vɩɩmdame tɩ zʋʋg wakat ning Rom tãb-biisã sẽn sãam Zerizalɛmã. A paama zu-noog n gʋls Evãnzilli, lɛta a tãab vʋʋsem sõng sẽn vẽnege, la Wilgr sebrã. Seb-kãng pʋgẽ la a sẽn deng n yã Armagedõ zabrã. A basa a tʋʋmdã, a sẽn bãng t’a na n kiime n pa yã Armagedõ wã bɩ? A kẽe yam-kaalg pʋgẽ bɩ? Ayo, a Zã kell n talla kɩs-sɩd n tɩ ta a kũum, n miẽ tɩ baa ‘wakatã sẽn kolgã,’ a yãabã pidsg ra ket n watame.—Wilgri 1:3; Daniɛll 12:4.
Rũndã-rũndã neb sẽn dɩk b mens n kõ makre
7. Wãn to la saam-biig a yembr kõ mak-sõngo, sã n yaa ne kiris-ned rɩk-m-meng n kõ wã wɛɛngẽ?
7 Rũndã-rũndã, kiris-neb tusa sẽn tar kɩs-sɩd gãda b rɩk-m-meng-n-kõ wã ne yẽesem baa b sẽn pa vɩɩmd n maan kaset ne Armagedõ wã. Makr a yembr ne rẽ ya a Ernest Beavor sẽn yit Ãngeletɛɛrã. A lebga Kaset soab yʋʋmd 1939, Dũni gill Zabr a Yiib-n-soabã sɩngrẽ. La a basa Sosiete sẽn maand fot rãmb sẽn da marsd sõma, sẽn na yɩl n kẽ wakat fãa ministɛɛrã pʋgẽ. A sẽn tall a kiris-ned pa-kẽesd-m-toogã yĩnga, a kẽe bãens roog yʋʋm a yiibu. A zaka rãmb teel-a-la ne kɩs-sɩda. La yʋʋmd 1950, a kamb a tãab n kẽng Gilead Watstawa Biiblã Lekollẽ sẽn kõt misioneer dãmbã zãmsgã, Niu York. Saam-biig a Beavor da tara yẽesem wʋsg a moonegã tʋʋmdẽ hal t’a zo-rãmbã pʋd-a t’a Armagedõ Ernest. A vɩɩmdame tɩ zems ne a sẽn dɩk a meng n kõ wã ne burkĩndi. La hal tɩ ta a kũumã yʋʋmd 1986, a mooname n togs tɩ Wẽnnaam zabrã sẽn yaa Armagedõ wã pẽnega wʋsgo. A pa ges t’a sẽn dɩk a meng n kõ Wẽnnaamã yaa wakat bilf yĩng ye!b—1 Korẽnt dãmba 15:58.
8, 9. a) Ɛspayn, mak-bʋg la kom-bɩɩs wʋsg kõ a Frãnko naamã wakate? b) Sʋgs-bʋs n zemse?
8 Makr a to sẽn wilgd yẽesem sẽn kell n tall pãng yita Ɛspayn. A Franco naamã (yʋʋmd 1939-75) wakate, Kaset rãmb kobs sẽn yaa kom-bɩɩs sẽn dɩk b mens n kõ rɩka sard n kell n yɩ kiris-neb sẽn pa kẽesd b toogo. Bãmb wʋsg maana yʋʋm piig bɩ sẽn yɩɩd woto sodaas bãens rot pʋsẽ. Kaset soab a yembre, a Jesus Martin bãens roogẽ kõomã kaoosg sẽn naag taab meng yik n taa yʋʋm 22. B pãb-a-la ne toom, b sẽn da wa n ning-a sodaas bãens roogẽ Afirik Rɩtg babgã. Mak-kãensã fãa pa yɩ nana ye, la a zãgsame t’a kõn kɩɩs ye.
9 Naoor wʋsgo kom-bɩ-kãensã ra pa mi wakat ning b sẽn da na n paam yolsgo, bɩ b sã n da na n paama yolsg meng ye, bala bʋ-kao toɛ-toɛ sẽn pʋg taab sẽn ningd-b taal la b paam-yã. La b talla b burkĩndã la b yẽesmã ne ministɛɛrã b sẽn da wa n yõg-bã sasa. Yɛlã baas n sɩnga yolsg yʋʋmd 1973. Kaset kãens wʋsgo, sẽn da wẽ yʋʋm 30 rẽ wẽndã, yii bãens-roogẽ wã, n kell n kẽ wakat fãa ministɛɛrã pʋgẽ. Bãmb kẽer lebg zall so-pakdb la so-toak yel-gɛtba. B vɩɩmdame tɩ zems ne b sẽn dɩk b mens n kõ wã bãensã roogẽ, la bãmb wʋsg sẽn yɩɩd kell n maana woto b bãens roogẽ yiibã poore.c Yaa wãn to yẽ ne tõnd rũndã-rũndã? Tõnd yaa kɩs-sɩd dãmb ne d sẽn dɩk d mens n kõ wã wala burkĩmb kãensã bɩ?—Hebre dãmba 10:32-34; 13:3.
Tagsg sẽn zems ne tõnd sẽn dɩk d mens n kõ wã zugu
10. a) Wãn to la d segd n ges d sẽn rɩk d mens n kõ wã? b) Wãn to la a Zeova get sõgeneg ning tõnd sẽn maand a yĩngã?
10 Wãn to la tõnd get d sẽn dɩk d mens n kõ Wẽnnaam n na n maan a raabã? Yaa rẽ n be pipi tõnd vɩɩmã pʋgẽ bɩ? Baa tõnd vɩɩmã sẽn yaa to-to, d yaa bi-bɩɩg tɩ d yaa nin-kẽema, d kẽe kãadem tɩ d yaa ra-kõore, d tara laafɩ tɩ d pa tar laafɩ, d segd n modgame n vɩɩmd tɩ zems ne d rɩk-m-meng-n-kõ wã, tɩ zems ne d vɩɩmã yɛl sẽn yaa to-to wã. Ned sẽn be zĩig ningã tõe n kõ-a-la sor t’a sõgen wakat fãa ministɛɛrã pʋgẽ wa so-pakda, wala yamleoog tʋm-tʋmd Sosiete Watstawa biru zĩigẽ, wala misioneere, bɩ wala so-toak yel-gɛta. La tõeeme tɩ roagdb kẽer tar tʋʋm wʋsgo, n pidsd b zakã rãmb ratem yĩngã la tẽebã wɛɛngẽ. B lɛɛr a wãna b sẽn dɩkd n kẽesd ministɛɛrã pʋgẽ kiuug fãa wã yõod paooda a Zeova nifẽ, b sã n mak rẽ ne lɛɛr dãmb wʋsgã wakat fãa sõgen dãmbã sẽn dɩkd n kẽesd tʋʋm-kãng pʋgẽ wã bɩ? Ayo. Wẽnnaam zɩ n bao tɩ tõnd kõ d sẽn pa tar ye. Tʋm-tʋmd a Poll togsa no-kãngã: “Ned sã n kõ ne sũ-noogo sẽn zems a sẽn tara, la ka bũmb ning a sẽn ka tara, yẽ tata Wẽnnaam yam.”—2 Korẽnt dãmba 8:12.
11. Tõnd fãagrã bee ne bõe?
11 Sẽn yaa to-to fãa, tõnd fãagrã pa be ne bũmb ba a yembr tõnd sẽn tõe n maan ye. La a bee ne a Zeova sõmblem d sẽn pa segd ne wã, la ne Kirist Zezi sẽn yaa tõnd Soaalã maasem. A Poll wilga woto vẽenega: “Tɩ bõe, fãa maana yel-wẽna n kong Wẽnnaam waoogre. La Wẽnnaam barka kɩtdame tɩ b zems fãagre Kirist Zezi maasem yĩnga, la bãmb paam-a-la zaalem.” Baasg zãnga, tõnd tʋʋmã yaa kaset tɩ tõnd tẽebã ne Wẽnnaam kãabsã tʋmdame.—Rom dãmba 3:23, 24; Zak 2:17, 18, 24.
12. Bõe yĩng tɩ d pa segd n mak d mens ne neb a taabã?
12 Pa tar yõod tɩ d mak wakat ning d sẽn dɩkd n kẽesd Wẽnnaam sõgenegã pʋgẽ wã, sɛb sẽn tik Biiblã zug d sẽn basd sõore, bɩ Biibl zãmsg ne neb d sẽn maandã sõor ne neb a taabã rẽnd ye. (Galat dãmba 6:3, 4) Bũmb ning tõnd sẽn tõog n pids kiris-ned ministɛɛrã pʋgẽ sẽn yaa to-to ning fãa, tõnd fãa segd n tẽega a Zezi sik-m-meng gom-kãensã: “Yaa woto ne yãmb me yãmb sã n maan bũmb nins fãa b sẽn yeel yãmb tɩ y maan n sɛ, bɩ y yeele: Tõnd yaa tʋm-tʋmdb sẽn ka yõodo. Tõnd maana tʋʋmd ninga d sẽn tog n maana bala.” (Luk 17:10) Hal naoor a wãn la tõnd sɩd tõe n yeel tɩ d maana ‘bũmb nins fãa b sẽn yeel tõnd tɩ d maanã’? Woto yĩnga, sʋkrã yaa woto: Tõnd sẽn sõgend Wẽnnaamã segd n yɩɩ sõma wãn to?—2 Korẽnt dãmba 10:17, 18.
D maan tɩ daar fãa tall yõodo
13. Manesem bʋg la d segd n talle, d sẽn vɩ tɩ zems ne d sẽn dɩk d mens n kõ wã sasa?
13 A sẽn kõ pagbã, sɩdbã, kambã, roagdbã la yembsã sagls poore, a Poll gʋlsame: “Yãmb sẽn maand bũmb ninga fãa, bɩ y maan ne y sũyã fãa Zusoaba yĩnga, la ka neba yĩng ye, tɩ yãmb miimi tɩ yãmb na n deega pʋɩɩr Zusoaba nengẽ tɩ yɩ yãmb keoore. Bɩ y sak Kirist sẽn yaa Zusoabã.” (Kolos rãmba 3:23, 24) Tõnd pa sõgend n na n dɩ yʋʋr neb a taabã taoore, ne d sẽn pidsd bũmb ning a Zeova sõgenegã pʋgẽ wã ye. Tõnd maoodame n na n sõgen Wẽnnaam n tũ a Zezi Kirist makre. A pidsa a ministɛɛrã sẽn kaoos wakat bilf pʋgẽ wã ne yãgdem yam.—1 Pɩɛɛr 2:21.
14. A Pɩɛɛr yeelame tɩ d gũus ne bõe yaoolem dayã wɛɛngẽ?
14 Tʋm-tʋmd a Pɩɛɛr me wilga yãgdem yam. A lɛtr a yiib-n-soabã pʋgẽ, a yeelame tɩ b gũus tɩ yaoolem dayã, yaandba, sɩdã kɩɩsdb la sãmb-sãmb rãmba, n da na n yik n maan sẽn zems b tʋlsem n kɩɩs Kirist belmã. Baasg zãnga a Pɩɛɛr yeelame: “Zusoaba ka kaoosda tɩ pids bãmb kãabg wa neb kẽer sẽn tagsda ye. La bãmb sẽn ka rat tɩ ned ba a ye sãama yĩnga, bãmb maanda sũ-mar ne yãmba n dat tɩ yãmb fãa yam tek tɩ y kos sugri. Zusoaba daar na n waa wa wagdre.” N-ye, a Zeova daarã na n sɩd waame. Woto yĩnga, tõnd tẽebã ne Wẽnnaam kãabsã sẽn yaa waazib la a sẽn sɩd tar pãng to-to ningã segd n paka tõnd daar fãa.—2 Pɩɛɛr 3:3, 4, 9, 10.
15. Wãn-wãn la d segd n vaees d vɩɩmã daar fãa?
15 Sẽn na yɩl n vɩɩmd tɩ zems ne d sẽn dɩk d mens n kõ wã ne d sũy fãa, d segd n dɩka daar fãa n pẽg a Zeova. Daar fãa saabẽ, d pa tõe n lebg n ges d sẽn maan to-to n sõng n sõms Wẽnnaam yʋʋrã la d moon Rĩungã koe-noog ne manesem toor-toor sɩda? Tõe tɩ yɩɩ ne d manesem yɩlemdã, d yẽsg sẽn kengd tẽebã, bɩ d sẽn ges d zakã neb la d zo-rãmb yell ne nonglmã yĩnga. Tõnd tũnuga ne soay n taas d kiris-neb saagrã neb a taab bɩ? Tõnd sõnga ned t’a tags Wẽnnaam kãabsã zut sõma bɩ? Bɩ d maan sẽn yaa sõma n paas tẽebã wɛɛngẽ daar fãa, tɩ ne woto bɩ d paas d tẽebã paoong sõma.—Matɩe 6:20; 1 Pɩɛɛr 2:12; 3:15; Zak 3:13.
Kell-y n tall tagsg sẽn zemse
16. Wãn to la a Sʋɩtãan makd n na n boog tõnd sẽn dɩk d mens n kõ Wẽnnaamã pãnga?
16 Tõnd vɩɩ wakat sẽn lebgd toog n paasd ne kiris-nebã. A Sʋɩtãan ne a tʋm-tʋmdbã makdame n na n kɩt tɩ nebã ra bãng sẽn yaa sõma la wẽnga, sẽn yaa yɩlemd la rẽgdo, manesem sõma la wẽnga, sẽn be burkĩnd la sẽn pa be burkĩndã vẽeneg n bak ye. (Rom dãmba 1:24-28; 16:17-19) A maaname tɩ yaa nana wʋsg tɩ d rẽgem d sũyã la d yamã ne televiziõ bala, bɩ ne ẽntɛrnetã, d sã n pa gũusi. Tõnd tẽebã nin tõe n libsame, n ye pa ne sõma, bɩ n pa bãng a sɩlem tʋʋmã n welg ye. Sard kãn-kãe ning tõnd sẽn dɩk n na n vɩɩmd tɩ zems ne d sẽn dɩk d mens n kõ wã pãng tõe n boogame, la tõnd sẽn gãd ‘wãkã’ kãn-kãeyã tõe n yomsame, d sã n pa tũ d tẽebã noyã.—Luk 9:62; Filip rãmba 4:8.
17. Wãn to la a Poll saglgã tõe n sõng tõnd tɩ d kell n tall d zems-n-taarã ne Wẽnnaam?
17 Woto yĩnga, goam nins a Poll sẽn taas Tesalonik tigingã zemsa b wakate: “Wẽnnaam sẽn data yaa tɩ yãmb dɩk yãmb mens n kõ bãmba; la y ra maan yoob ye. Bɩ yãmb ned kam fãa bãng tɩ tall a yĩng ne pʋ-peelem la waoogre, la ra sak-y tɩ wẽng ratem soog yãmb sũyã wa neb nins sẽn ka mi Wẽnnaama sẽn maanda ye.” (1 Tesalonik rãmba 4:3-5) Yoobã kɩtame tɩ b wa yiis kẽer kiris-neb tigingã pʋgẽ. Yɩɩ neb nins sẽn pa vɩɩmd tɩ zems ne b dɩk b mens n kõ Wẽnnaamã. B basame tɩ b zems-n-taarã ne Wẽnnaam pãng booge, tɩ Wẽnnaam ra pa leb n tar yõod b vɩɩmã pʋgẽ ye. La a Poll yeelame: “Wẽnnaam ka bool tõnd tɩ d sũyã zĩnd dẽgd ye, la yaa tɩ tõnd na rɩk d mens n kõ bãmba. Dẽ yĩnga, ned ninga sẽn zãgsd bõn-kãense, ka ned la a zãgsd ye, a zãgsda Wẽnnaam ninga sẽn kõ yãmb b Sɩɩg Sõngã.”—1 Tesalonik rãmba 4:7, 8.
Yãmb dɩka sard bʋg kãn-kãe?
18. D sard rɩkr kãn-kãe wã segd n yɩɩ bõe?
18 Tõnd sã n miẽ tɩ d sẽn dɩk d mens k kõ Wẽnnaam a Zeova wã pa reem yelle, d segd n dɩka sard kãn-kãe n maan bõe? Tõnd segd n dɩka sard kãn-kãe n tall sũur-kaset sẽn yaa sõma d manesmã la d ministɛɛrã pʋsẽ. A Pɩɛɛr sagla woto: “La bɩ y tall sũur-kaset sõama, tɩ neb nins sẽn kãnegd yãmb wa nin-wẽnse n gomd yãmb yel-manesem sõama Kirist tũudum pʋgẽ wẽnga paam yãnde.” (1 Pɩɛɛr 3:16) Tõe tɩ d wa nams la d paam toogo, d sẽn tar kiris-ned manesmã yĩnga, la Kirist maana woto a tẽebã la a burkĩndã Wẽnnaam taoorã yĩnga. A Pɩɛɛr yeelame: “Woto yĩnga, Kirist sẽn nams bãmb yĩnga pʋgẽ wã, bɩ yãmb me paam yam kãnga. Tɩ bõe, ned ninga sẽn nams a yĩng pʋgẽ, a basa yel-wẽna.”—1 Pɩɛɛr 4:1.
19. Bõe la d rat tɩ b yeel d zugu?
19 Sɩda, tõnd sẽn dɩk sard kãn-kãe n na n vɩɩmd tɩ zems ne d sẽn dɩk d mens n kõ wã na n kogla tõnd ne a Sʋɩtãan dũniyã sẽn bẽed tẽebã wɛɛngẽ, vɩɩm manesmã la yĩngã wɛɛngẽ wã bẽdse. La pa tek woto bal ye. D na n paama bas-m-yam tɩ d tata Wẽnnaam yam. Rẽ tara yõod n yɩɩd bũmb ning fãa a Sʋɩtãan la a tʋm-tʋmdbã sẽn tõe n kõ wã. Woto yĩnga, bɩ b ra tol n yeel tɩ tõnd basa nonglem ning d sẽn da tare, d sẽn da wa n bãng sɩdã paalmã ye. Sẽn yaa lebende, bɩ b yeel tõnd wɛɛngẽ wa b sẽn yeel yʋʋm kob-yendẽ Tiyatiir tigingã neb wɛɛngẽ woto wã: “Mam bãnga yãmb tʋʋma, la yãmb nonglem, la yãmb tẽebo, la yãmb tʋʋm sõama yãmb sẽn maand mam yĩngã, la yãmb sẽn maand sũ-mare n ka basdẽ wã, la yãmb yaoolem tʋʋma yaa wʋsgo n yɩɩd pipi tʋʋma.” (Wilgri 2:4, 18, 19) N-yẽe, d ra yɩ zal-zal ne d sẽn dɩk d mens n kõ wã wɛɛngẽ ye. Bɩ d ‘kae ne vʋʋsem sõngã,’ n tall yẽesem hal tɩ saabã ta, la saabã me la sẽn kolgã.—Rom dãmba 12:11; Wilgri 3:15, 16.
[Tẽngr not rãmbã]
a Ges-y yʋʋmd 1987 Gũusg Gasgã (farende) tʋʋl-nif kiuug rasem 15, seb-neng 31.
b Ges-y yʋʋmd 1980 Gũusg Gasgã (farende), sigr kiuug rasem 15, seb-neng a 8-11, n yã yɛl b sẽn togs n welg a Ernest Beavor vɩɩmã zugu.
c Ges-y Annuaire des Témoins de Jéhovah 1978, seb-neng 156-8, 201-18, Watchtower Bible and Tract Society of New York, Inc. sẽn yiisi.
Yãmb tẽrame bɩ?
• Rɩk f meng n ko wã baooda bõe maanego?
• Pĩnd makr la rũndã-rũndã mak-bʋs sẽn tɩ loe ne Wẽnnaam sõgen dãmb sẽn dɩk b mens n kõ n zems tɩ tõnd rɩk b togs-n-taare?
• Wãn to la d segd n ges d Wẽnnaam sõgenegã?
• Tõnd sard dɩkr kãn-kãe wã segd n yɩɩ bʋgo, tõnd sẽn dɩk d mens n kõ Wẽnnaamã wɛɛngẽ?
[Foto, seb-neng 24]
A Zeremi kell n talla kɩs-sɩd baa ne b sẽn nams-a ne toom wʋsgã
[Foto, seb-neng 25]
A Ernest Beavor kõo a kambã mak-sõng n yɩ kiris-ned sẽn tall yẽesem
[Foto, seb-neng 26]
Kaset rãmb sẽn yaa kom-bɩɩs kobs sẽn zĩnd Ɛspayn bãens rotẽ wã kell n talla b burkĩndã
[Foto rãmba, seb-neng 27]
Daar fãa, bɩ d maan bũmb sẽn yaa sõma n paas tẽebã wɛɛngẽ