D vɩɩmd tɩ zems ne d sẽn dɩk d mens n kõ Wẽndã
1 Yãmb deega lisg wakat sẽn nan pa kaoos pʋgẽ tɩ yaa yʋʋm pi-gĩn me, tõe tɩ y ket n tẽra bõn-kãngã sẽn yaa kãsengã. Tõnd rɩka d meng n kõ a Zeova n na n maan a raabã d vɩɩma tõre, tɩ rẽ tõe n kaoos wakat sẽn ka sɛta. Lisgã yãmb sẽn deegã yaa rɩk-f-meng-n-kõ vɩɩm sɩngre, la ka a baasg ye. (1 Zã 2:17) Vɩɩmd tɩ zems ne d sẽn dɩk d mens n kõ Wẽndã baoodame tɩ d maan bõe?
2 Tũ-y Kirist makrã: A Zezi sẽn deeg lisgã, a ‘sɩnga a tʋʋmdã,’ n togsd ‘Wẽnnaam Rĩungã koe-noogo.’ (Luk 3:23; 4:43) Woto, tõnd me sẽn deeg lisg n wilg tɩ d rɩka d mens n kõ a Zeova wã, d lebga neb b sẽn kõ sor tɩ d yɩ koe-noogã moondba. Baa sẽn tõe n yaa tɩlae tɩ d rɩk sẽk la d modg wʋsg n bao d noorã rɩɩbã, tõnd tʋʋmd ning sẽn yaa kãseng n yɩɩdã yaa koe-moonegã. (Mat. 6:33) Neb nins sẽn dɩk b mens n kõ Wẽnnaamã ka modgd n na n paam arzɛgs bɩ ziir ye, b baoodame n na n ‘waoog b tʋʋmdã’ wala tʋm-tʋmd a Polle. (Rom 11:13) Rẽ yĩnga yãmb sũur nooma ne tʋʋm-kãseng ning y sẽn tar a Zeova balengã pʋgẽ wã tɩ y maand y sẽn tõe fãa n waoogd tʋʋm kãng bɩ?
3 D tog n ‘kɩɩsa Sʋɩtãanã’ wa a Zezi me sẽn kɩɩs-a wã. (Zak 4:7) A Sʋɩtãan makame n na n kʋɩɩb a Zezi a lisgã poore, la yaa woto me la a maand ne a Zeova sõgen dãmb nins sẽn dɩk b mens n kõ-a wã rũndã-rũndã. (Luk 4:1-13) D sẽn be a Sʋɩtãan dũniyã pʋgẽ wã, d tog n kibla d mense, n da bas tɩ bũmb ba a yembr dẽgem d yamã la d sũurã ye. (Yel. 4:23; Mat. 5:29, 30) B wilga kiris-nebã tɩ b ‘ka tõe n dɩt a Zeova rɩɩb la zĩn dãmbã rɩɩb ye.’ (1 Kor. 10:21) Rẽ rat n yeelame tɩ d lak d mens ne reem dẽgdo, tũud-n-ta-wẽnse, la ẽntɛrnetã pʋgẽ bõn-wẽnsã. Leb n dat n yeelame tɩ d lak d mens ne sɩdã kɩɩsdb zãmsgo. D sã n gũusd d mens ne bõn-kãensã la ne a Sʋɩtãan sɩlem tʋʋm a taabã fãa, na n sõng-d lame tɩ d vɩɩmd tɩ zems ne d sẽn dɩk d mens n kõ a Zeova wã.
4 Rɩ-y segls nins Wẽnnaam sẽn maanã nafa: A Zeova kõo a Gomdã la kiris-neb tigingã sẽn na yɩl n sõng tõnd tɩ d vɩɩmd tɩ zems ne d sẽn dɩk d mens n kõ wã. Karemd-y Biiblã la y pʋʋsd a Zeova daar fãa. (Zoz. 1:8; 1 Tes. 5:17) Maan-y sũ-noog ne tigingã tigissi. (Yɩɩl 122:1) Maand-y tũud-n-taar ne neb nins sẽn zoet a Zeova la b sakd a noyã.—Yɩɩl 119:63.
5 Ne a Zeova sõngre, y tõe n vɩɩmdame tɩ zems ne y sẽn dɩk y meng n kõ-a wã, la y balm-a ne sũ-noog wakat sẽn ka sɛta.—Yɩɩl 22:27, 28; Fil. 4:13, Sebr Sõngo.