A Zeova nin-buiidã a sẽn lebs n luglã pẽgd-a-la dũniyã gill zugu
“Mam na n toeema buud-gomd n kõ nin-buiidã buud-gomd sẽn yaa yɩlemde, sẽn na yɩl n tɩ b fãa pʋʋs ne a Zeova yʋʋrã.”—SOFONI 3:9, NW.
1. Bõe yĩng tɩ koees sẽn togsd yel-beed waoong pids Zida la tẽns a taab zutu?
AD SƖD yaa bʋ-kaoor koees sẽn tar pãng meng la a Zeova wilg a Sofoni t’a moona! Yel-beed koe-kãensã waa Zida la Zerizalɛm sẽn ya a na-tẽngã zutu, bala nin-buiida la taoor dãmb wʋsg ra pa maand a Zeova raabã ye. Tẽn-yags wala Filisti, Moaab la Amo me ra pa na n põs a Zeova sũ-yikrã ye. Bõe yĩnga? Yaa b sẽn zab ne a Zeova nin-buiidã ne wẽnem yʋʋm kob-gĩn pʋsẽ wã yĩnga. Woto yĩnga, Asiri sẽn da yaa dũni gill pãn-soaadã ra na n paama sãoongo, n pa tol n ye leb n yik ye.
2. Wõnda yaa ãnd dãmb la b sẽn gomd ne Sofoni 3:8 pʋgẽ wã?
2 La nin-tɩrs n da be pĩnd Zida wã pʋgẽ rẽ wẽnde. B ra gẽegda Wẽnnaam bʋ-kaoorã sẽn da na n pids nin-wẽnsã zutã. La wõnda yaa bãmb la b taas gom-kãensã: “Zusoaba yeelame: ‘Woto yĩnga, bɩ y gũ maam. Gũ-y daar ninga mam sẽn na n yik n mong buud wʋsg bʋʋmã. Tɩ bõe, mam yãka yam n na n tigim bãmb ne b soolma tɩ m sũ-dokra wʋm-ba. Bala mam sũ-yikra bugum na n dɩɩ dũniyã fãa.’ ”—Sofoni 3:8.
‘Buud-gomd sẽn yaa yɩlemd’ ãnd dãmb yĩnga?
3. Saagr koe-bʋg la vʋʋsem sõng vẽneg a Sofoni t’a kõ?
3 N-yẽe, a Sofoni taasa yel-beed koees sẽn yit a Zeova nengẽ. La no-rɛɛsã ra paama vẽnegr me sẽn na yɩl n paas saagr koe-kãsenga. Koe-kãng ra na n kõ neb nins sẽn da ket n tar kɩs-sɩd ne a Zeova wã belsg wʋsgo. Wala b sẽn wilg Sofoni 3:9 (NW ) pʋgẽ wã, Wẽnnaam a Zeova togsame: “Wakat kãnga mam na n toeema buud-gomd n kõ nin-buiidã buud-gomd sẽn yaa yɩlemde, sẽn na yɩl tɩ b fãa pʋʋs ne a Zeova yʋʋrã, sẽn na yɩl n sõng taab n sõgen-a.”
4, 5. a) Bõe n da na n paam neb nins sẽn pa tɩrsã? b) Ãnda n da na n dɩ rẽ nafre, la bõe yĩnga?
4 La neb n da be tɩ b ra pa na n kõ-b buud-gomd sẽn yaa yɩlemdã ye. Bãngr gomdã gomda b yell n yetẽ: “Mam na n yiisa tɩtaam dãmb yãmb sʋk[a].” (Sofoni 3:11) Woto, b ra na n laka tɩtaam dãmb nins sẽn paoog Wẽnnaam tõodã, la b tʋm sẽn pa tɩrgã. La ãnd dãmb n da na n dɩ a nafa? Sofoni 3:12, 13 yetame: “Mam [a Zeova] na n kɩtame tɩ sik-m-mens rãmba zĩnd be. Bãmb na n baoome tɩ m yʋʋra lill-ba. Israɛll neb nins sẽn keta ka na n maan wẽng bɩ b yag ziri walla gom belgr goam ye. La bãmb na n dɩɩme n gãand ne laafɩ tɩ ned ka yɩk b pɛleng ye.”
5 Pĩnd Israɛllẽ wã, kɩs-sɩd dãmb kell n da na n paam nafa. Bõe yĩnga? B sẽn maan tɩ zems ne gom-kãensa wã yĩnga: “Tẽnga sik-m-mens rãmba fãa sẽn sakd Zusoaba tõodã, bao-y [a Zeova, NW ]. La y bao tɩrlem ne sik-m-menga tɩ daar ninga, b na n lilla yãmb [a Zeova, NW ] sũ-puugra raare.”—Sofoni 2:3.
6. Bõe n zĩnd a Sofoni bãngr-gomdã pipi pidsg pʋgẽ?
6 A Sofoni bãngr-gom-kãngã pipi pidsgẽ wã, Wẽnnaam sɩbga Zida sẽn pa tar tẽebã. A basame tɩ Babilon sẽn da yaa dũni gill pãn-soaadã lub-a, la a tall a nebã n kẽng yembd yʋʋmd 607 S.D.T.W. Kẽere, wala a Zeremi paama fãagre, la neb a taab kell n talla kɩs-sɩd ne a Zeova yembdã weoogo. Yʋʋmd 539 S.D.T.W., a Sirus lʋɩɩ Meed ne Pɛrs rãmbã taoor tɩ b wa lub Babilone. Yʋʋm a yiib poore, a Sirus yiisa noor sẽn kõt Israɛll neb nins sẽn kellã sor tɩ b leb b ba-yirã. Wakat wa n taame tɩ b lebs n me Zerizalɛm wẽn-doogã, tɩ maan-kʋʋdbã ra le tõe n zãms Tõogã a nin-buiidã. (Malaki 2:7) Woto, a Zeova ninga kellã b sẽn lebs n luglã barka, wakat ning fãa b sẽn yɩ kɩs-sɩd dãmbã pʋgẽ.
7, 8. Ãnda zug la Sofoni 3:14-17 bãngr-goamã tik-yã, la bõe yĩng tɩ y leokd woto?
7 A Sofoni reng n togsa neb nins sẽn da na n paam lebs-n-luglã woto: “Siõ neba, yɩɩl-y-yã! Israɛll neba, kaas-y-yã! Zerizalɛm neba, maan-y sũ-noog n kɩdem ne y sũyã fãa. Zusoaba basa yãmb bʋʋda taale. Bãmb yiisa y bɛɛbã. Yaa [a Zeova, NW ] la Israɛll rĩma, bãmb bee ne yãmba. Wẽng ka na n le kẽes yãmb dabeem ye. Baraare, b na n yeela Zerizalɛm neba yaa: ‘Siõ neba, ra zoe-y rabeem ye. Ra bas-y tɩ y nus pãng sɛ ye. Zusoab a Wẽnnaam bee ne yãmba. Bãmb yaa gãndaoog n fãagd yãmba. Bãmb na n maana sũ-noog wʋsgo yãmb yĩnga. Bãmb na n kõo yãmb vɩɩm paalg b nonglma pʋgẽ. Bãmb na n kɩdma yãmb yĩng n yɩɩl wa b sẽn da maan kibsa wakatã.’”—Sofoni 3:14-17.
8 Bãngr-gom-kãngã tɩ loee ne kell ning b sẽn tigim n yiis Babilon yembdã pʋgẽ, n lebs n wa ne b yaab rãmbã tẽngẽ wã. B wilga rẽ vẽeneg Sofoni 3:18-20 pʋgẽ, d sẽn karemdẽ tɩ: “[A Zeova, NW ] yeelame: ‘Mam na n yiisa yãmb sabaaba t’a ra le ning yãmb yãnd ye. Gese, wakat sã n ta, mam na n gesa y namsdba yelle. Mam na n fãaga põeyã; mam na n le tigsa neb nins b sẽn da rigã. La mam na n teka bãmb paoogra ne waoogre la yʋ-noog dũniyã zugu. Baraare, mam sã n tigim yãmba, mam na n taasa yãmb yiri. La y na n yãame tɩ mam sã n kõ yãmb sũ-noogo, mam na n kõo yãmb yʋ-noog ne pẽgr dũniyã neba fãa sʋka. Mam yaa Zusoaba, yaa maam n yeele.’”
9. Wãn-wãn la a Zeova zẽk a yʋʋrã Zida wɛɛngẽ?
9 Mams-y n ges yãoã sẽn ling tẽn-yags nins sẽn da yaa Wẽnnaam nin-buiidã bɛɛbã wʋsg to-to! Babilon sẽn da tar pãngã ra rɩka Zida nebã n kẽng yembdo, tɩ wõnd saagr da kae tɩ b ra na n lebg n waame ye. Sẽn paase, b tẽngã lebga raboogo. La ne a Zeova pãnga, b ra lebs n lugl-b-la b ba-yirã yʋʋm 70 poore. La wakat kãnga b tẽn-bɛɛbã ra rebda b sãoong zĩigẽ. Ad a Zeova sɩd zẽk a yʋʋrã, a sẽn tall kell sẽn yaa kɩs-sɩd dãmb n lebg n wa wã! A sɩd maan-b lame tɩ b yɩ “yʋ-noog ne pẽgr dũniyã neba fãa sʋka.” Ad lebs-n-lugl kãngã sɩd waa ne pẽgr n kõ a Zeova ne neb nins sẽn da zãad a yʋʋrã!
A Zeova balengã paama zẽkre
10, 11. Wakat bʋg la a Sofoni bãngr-gomdã sẽn gomd lebs-n-lugl yellã pids-kãseng ra segd n zĩndi, la wãn to la d mi rẽ?
10 Lebs-n-lugl a to n wa yʋʋm kob-yendẽ Tõnd Wakatã, a Zezi Kirist sẽn wa n tigim Israɛll kell sɩd balengẽ wã. Woto ra yaa reng-n-lɛmbg ne sẽn da watã, bala lebs-n-luglã bab-kãseng ra ket n wata beoog-daare. A Miise bãngr-gomdã ra reng n togsa woto: “Rayã baasg sasa, na n zĩndame t’a Zeova roogã tãng lugl kãn-kãe tãensã zug-tẽn-sʋgs zutu, la a na n sɩd zẽkame n yɩɩg tãn-puusã; la nin-buiid wʋsg na n kaoog n kẽnga be.”—Miise 4:1, NW.
11 Wakat bʋg la rẽ ra na n zĩndi? Wala bãngr-gomdã sẽn yeelã, yaa “rayã baasg sasa,” n-yẽe, ‘yaoolem wakat’ kãngã. (2 Tɩmote 3:1) Woto ra na n zĩndame tɩ yɛl siglg wẽng kãngã nan pa sa, tẽn-tẽnsã sẽn da na n ket n balemd ziri wẽnnaam dãmbã sasa. Miise 4:5 (NW ) yetame: “Buud a taabã fãa na n kẽna ne b wẽnnaam yʋʋre.” La yaa wãn to ne balemdb hakɩkã? A Mise bãngr-gomdã leokdame: “La tõndo, tõnd na n kẽna ne tõnd Wẽnnaam a Zeova yʋʋrã wakat sẽn pa yãk tɛka, n-yẽe wakat fãa.”
12. Wãn-to la b zẽk sɩd balengã yaoolem day kãensã?
12 Woto yĩnga, yaoolem day kãensã, “a Zeova roogã tãng lugl[a] kãn-kãe tãensã zug-tẽn-sʋgs zugu.” A Zeova baleng hakɩkã sẽn zẽk wʋsgã paama luglg kãn-kãe n yɩɩd tũudum a taaba buud fãa. La wala a Miise bãngr-gomdã sẽn deng n togsã me, “nin-buiid wʋsg na n kaoog n kẽnga be.” La neb nins sẽn tũud sɩd balengã na n “kẽna ne [bãmb] Wẽnnaam a Zeova yʋʋrã wakat sẽn pa yãk tɛka, n-yẽe wakat fãa.”
13, 14. Wakat bʋg la dũni kãngã kẽ “rayã baasg sasa” pʋgẽ, la bõe n maand rẽ tɛka, sẽn tɩ loe ne sɩd balengã?
13 Yɛl nins sẽn pidsd Biiblã bãngr-goamã wilgdame tɩ dũni kãngã kẽe a “rayã baasg sasa,” a yaoolem dayã pʋsẽ yʋʋmd 1914. (Mark 13:4-10) Yɛlã wilgdame t’a Zeova sɩngame n tigimd sẽn zae-bã kell sẽn yaa kɩs-sɩd dãmbã sẽn tar yĩngr saagrã sɩd balengã pʋgẽ. Rẽ pʋgla ne ‘kʋʋn-kãseng’ tigisgu, “sẽn yi soolem fãa, la buud fãa, la neb sẽn gomd goam toɛ-toɛya fãa,” sẽn tar saagr n na n vɩɩmd wakat sẽn pa sat tẽng zugã.—Wilgri 7:9, NW.
14 Hal Dũni gill Pipi Zabrã tɛk n tõk rũnd kãngã, a Zeova balengã kẽnga taoor ne pãng a sor-wilgr pʋgẽ. A balemdbã sẽn da zãad a yʋʋrã sẽn da yaa tus a wãn bal Dũni gill Pipi Zabrã poorã, sõor taa sẽn zems neb milyõ a yoob masã. B bee sẽn zems tigims 91 000 pʋsẽ, tẽns 235 pʋsẽ. Yʋʋmd fãa, nin-kãensã rɩkda sẽn yɩɩd lɛɛr dãmb milyaar n pẽgd a Zeova zãma wã taoore. Yaa vẽeneg tɩ ya a Zeova Kaset rãmb kãensã la sẽn pidsd a Zezi bãngr-gom-kãensã wã: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.”—Matɩe 24:14.
15. Wãn to la Sofoni 2:3 pidsd masã?
15 Sofoni 3:17 yetame: “Zusoab a Wẽnnaam bee ne yãmba. Bãmb yaa gãndaoog n fãagd yãmba.” Tẽeb bark nins a Zeova sõgen dãmbã sẽn paamd yaoolem day kãensa wã yaa yẽ sẽn ‘be b sʋka,’ n yaa Wẽnnaam sẽn tar pãng wʋsgã yĩnga. Sɩd yaa woto rũndã-rũndã, wa sẽn yɩ to-to ne Zida lebs-n-lugl yʋʋmd 537 S.D.T.W. Woto, d tõe n yãa Sofoni 2:3 sẽn yeel tɩ: “Tẽnga sik-m-mens rãmba fãa sẽn sakd Zusoaba tõodã, bao-y Zusoabã” sẽn paamd pidsg kãseng ning tõnd wakatã. Yʋʋmd 537 S.D.T.W., Zʋɩf rãmb nins sẽn yi yembdã n wa wã ra bee “fãa” wã sʋka. La masã, rẽ sɩd makda tẽnsã fãa sẽn be dũniyã gill zugã sik-m-mens rãmba. A leb n makda neb nins sẽn sakd Rĩungã mooneg tʋʋmd sẽn maand dũniyã gill zug n kaoogd n wat “a Zeova roogã tãng” zugã.
Sɩd balengã pãng paasdame
16. Tõe tɩ manesem bʋg la d bɛɛbã tar bark ning a Zeova sẽn ningd a nin-buiidã rũndã-rũndã wã taoore?
16 Yʋʋmd 537 S.D.T.W., Wẽnnaam sõgen dãmbã b sẽn lebs n lugl sɩd balengã pʋgẽ b ba-yirã linga neb wʋsg sẽn be tẽn-yagsẽ wã. La lebs-n-lugl kãng pa yɩ kãseng wʋsg ye. Y tõe n mamsa neb kẽere, Wẽnnaam sõgen dãmbã bɛɛb menga, sẽn yet bũmb ning masã, b sẽn ne t’a Zeova rũndã-rũndã sõgen dãmbã fɩɩgr yaa kãsenga, tɩ b paamd bark la b kẽngd taoorã bɩ? Sãmbg sẽn ka be, bɛɛb kãens kẽer tagsda wala Fariziẽ rãmbã. B sẽn da wa n ne nebã sẽn kaoogd n kẽngd a Zezi nengẽ to-to wã b yeela woto: “Gese, neba fãa tũuda bãmba.”—Zã 12:19.
17. Bõe la gʋlsd a yembr yeel a Zeova Kaset rãmbã wɛɛngẽ, la fɩɩgr bʋg la b paam-yã?
17 A sebrã (These Also Believe) pʋgẽ, Porfesɛɛr a Charles Braden yetame: “A Zeova Kaset rãmbã sɩd pidsa tẽngã ne b kasetã. B sɩd tõe n yeelame tɩ tũudum sull ba a yembr dũniyã zug pa wilg yẽesem la nang pãng n yɩɩg woto, n mak n yelg Rĩungã koe-noog wala a Zeova Kaset rãmbã ye. Wõnda sul-kãngã pãng na n tara paasg bala.” Ad a sɩd ra be bʋʋm! A sẽn da gʋls gom-kãensã yʋʋm 50 sẽn loogã, tɩ ra yaa Kaset rãmb 300 000 bal n da moond dũniyã gill zugu! Bõe la a ra na n yeel rũndã-rũndã, sẽn mik tɩ yaa sẽn ta sõor kãng naoor 20, sẽn dat n yeel tɩ neb milyõ a yoob n moond koe-noogã?
18. Buud-gomd sẽn yaa yɩlemdã yaa bõe, la ãnd dãmb la Wẽnnaam kõ-a?
18 Wẽnnaam tũnuga ne a no-rɛɛsã n yeele: “Mam na n toeema buud-gomd n kõ nin-buiidã buud-gomd sẽn yaa yɩlemde, sẽn na yɩl tɩ b fãa pʋʋs ne a Zeova yʋʋrã, sẽn na yɩl n sõgna ne yam a yembre.” (Sofoni 3:9, NW) Yaoolem da-kãensa pʋgẽ, ya a Zeova Kaset rãmbã, sẽn pʋʋsd ne a Zeova yʋʋrã, n sõgend-a ne zems-n-taare, nonglem sẽn pa tõe n vigs pʋgẽ, n-yẽe, ‘n sõgen-a ne yam a yembre.’ Yaa bãmb la a Zeova kõ buud-gomd sẽn yaa yɩlemdã. Sɩdã sẽn tɩ loe ne Wẽnnaam la a raabã võor wʋmb sõma bee buud-gomd yɩlemd kãng pʋgẽ. Ya a Zeova bal n tõe n kõ võor-wʋmb kãng ne a vʋʋsem sõngã maasem. (1 Korẽnt dãmba 2:10) Yaa ãnda la a kõt a vʋʋsem sõngã? Yaa “neb nins sẽn sakd-a wa naabã” bala. (Tʋʋma 5:32, NW ) Ya a Zeova Kaset rãmbã bal n sakd Wẽnnaam wa Naab bũmb fãa pʋgẽ. Yaa woto yĩng la b sẽn paamd Wẽnnaam vʋʋsem sõngã la buud-gomd sẽn yaa yɩlemdã. Buud-gom-kãng yaa sɩdã a Zeova la a raab kãsemsã wɛɛngẽ. B rɩkda buud-gom-kãng sẽn yaa yɩlemdã n pẽgd a Zeova dũniyã gill zug ne manesem kãseng la zĩis wʋsg n paasdẽ.
19. Buud-gomd sẽn yaa yɩlemdã goam baooda bõe maanego?
19 Woto, buud-gomd sẽn yaa yɩlemdã goam baoodame tɩ d tẽ sɩdã la d zãms-a neb a taabã yembo, la a baoodame me tɩ d manesmã zems ne Wẽnnaam tõodã la a noyã. Kiris-neb sẽn zaeyã n lʋɩ taoor a Zeova baoobã la buud-gomd sẽn yaa yɩlemdã goam pʋgẽ. La tags-y n ges b sẽn pids bũmb ninsã! Baa ne sẽn zae-bã sõor sẽn boog n ye pa ta 8 700 wã, yaa sẽn zems neb milyõ a yoob a taab n dɩkd b togs-n-taar n baood a Zeova la b gomd buud-gomd sẽn yaa yɩlemdã. Yaa bãmb la neb kʋʋn-kãsengã, t’a neba sõor tara fɩɩgrã n yit tẽn-tẽns fãa wã. B wilgda tẽeb ne maoong ning a Zezi sẽn kõ, sẽn na yɩl n yao n fãag nebã. Sẽn paase, b balemda Wẽnnaam tẽeb wẽn-doogã tẽng zug samandẽ wã. B na n põsa “to-kãsenga” sẽn na n wa ka la bilf dũni kãngã sẽn pa tɩrg zugã.—Wilgri 7:9, 14, 15.
20. Bõe n gũud kɩs-sɩd dãmb nins sẽn zae-b ne vʋʋasem sõngã la kʋʋng kãsenga neba?
20 B na n kẽesa kʋʋng kãsengã Wẽnnaam dũni paalgã sẽn yaa tɩrgã pʋgẽ. (2 Pɩɛɛr 3:13) A Zezi Kirist la neb 144000 sẽn zae ne vʋʋsem sõngã na n vʋʋg n paama saasẽ vɩɩmã. B na n sõgena wa rĩm dãmb la maan-kʋʋdb ne yẽ. La b na n yɩɩ na-rɩtb sul-paallã sẽn na n dɩ naam tẽngã neb zutu. (Rom dãmba 8:16, 17; Wilgri 7:4; 20:6) Rẽ poore, to-kãsengã põsdb na n tʋmame n kɩt tɩ tẽngã lebg arzãna. La b na n ket n gomda buud-gomd sẽn yaa yɩlemdã Wẽnnaam sẽn kõ wã. Sɩda, gom-kãensã pidsda bãmb me zutu: “Fo kamba fãa na n yɩɩ Zusoaba karen-biisi. La bãmb laafɩ wã na n yɩɩ wʋsgo. B na n yẽbga foom ne tɩrlem.”—Ezai 54:13, 14.
Zãmsg tʋʋmd ning sẽn yaa kãseng n yɩɩd a taabã fãa wã
21, 22. a) Wa b sẽn wilg Tʋʋma 24:15 (NW ) pʋgẽ wã, ãnda la b segd n wa zãms buud-gomd sẽn yaa yɩlemdã? b) Zãmsg tʋʋm-bʋg buud sẽn ka to la b na n maan tẽngã zug Rĩungã naam sasa?
21 Sull sẽn yaa kãseng wʋsg la b na n kõ sor tɩ b zãms buud-gomd sẽn yaa yɩlemdã dũni paalgã pʋgẽ. B goma nin-kãens yell Tʋʋma 24:15 (NW ) sẽn yet woto wã pʋgẽ: “Nin-tɩrsã la sẽn pa-b nin-tɩrsã me vʋʋgr na n zĩndame.” Neb milyaar dãmb n ki pĩndã n pa paam a Zeova bãngr sẽn yaa hakɩka ye. B na n vʋʋg-b-la ball-balle. La nin-kãensã b sẽn vʋʋgã na n datame tɩ b zãms-b buud-gomd sẽn yaa yɩlemdã.
22 Ad sɩd na n yɩɩ zu-no-kãseng tɩ d kẽes d toog zãmsg-tʋʋm kãseng kãngã pʋgẽ! Sɩda, na n yɩɩ zãmsg tʋʋmd ning sẽn yaa kãseng n yɩɩd ãdem-biis sẽn be tẽng zug tɛkã. Tʋʋm-kãng fãa na n tʋma Kirist Zezi Rĩungã naamã sẽn yaa sõma wã sasa. Rẽ na n kɩtame tɩ ãdem-biisã wa baas n yã Ezai 11:9 sẽn yet woto wã pidsgu: “Dũniyã na n pida ne [a Zeova, NW ] bãngr wa koom sẽn pid mogre.”
23. Bõe yĩng tɩ y tõe n yeel tɩ y sẽn ya a Zeova nin-buiidã, y tara zu-noog kãsenga?
23 Ad d sɩd tar zu-noog yaoolem day kãensã, d sẽn segend d mens ra-kãseng kãng sẽn watã, sasa ning a Zeova bãngrã sẽn na n sɩd pid tẽngã! La ad d sɩd tar zu-noog masã, d sẽn yaa Wẽnnaam nin-buiidã, neb nins sẽn ne bãngr-goam nins sẽn be Sofoni 3:20 pidsgã! Beenẽ a Zeova kõt-d-la bas-m-yam woto: “Mam na n kõo yãmb yʋ-noog ne pẽgr dũniyã neba fãa sʋka.”
Wãn to la y na n leokẽ?
• A Sofoni bãngr-gomdã sẽn gomd lebs-n-lugl yellã paama pids-bʋgo?
• Wãn to la sɩd balengã paamd bark yaoolem day kãensã?
• Zãmsg tʋʋm-kãseng bʋg n na n zĩnd dũni paalgã pʋgẽ?
[Foto, seb-neng 16]
A Zeova nin-buiidã leba b ba-yirã n tɩ lebs n lugl baleng yɩlemdã
Yãmb mii wã võor rũndã-rũndã bɩ?
[Foto rãmba, seb-neng 18]
B sẽn gomd “buud-gomd sẽn yaa yɩlemdã,” a Zeova Kaset rãmbã kãabda nebã Biiblã koɛɛg sẽn kõt belsgã