D rɩk no-rɛɛsdbã togs-n-taare: A Sofoni
1. Yɛlã ra yaa wãn no-rɛɛs a Sofoni wakatã, la mak-sõng-bʋg la a kõ-do?
1 Yʋʋm 600 la zak sẽn deng Kiristã rogmã t’a Baal tũudmã ra paama pãng Zida soolmẽ wã. Rẽ tɩ b sẽn kʋ rĩm-wẽng a Amo nan pa kaoose, t’a biig a Zozɩas sẽn da paoodã rɩt naam. (2 Kib. 33:21–34:1) Yaa wakat kãng la a Zeova yãk a Sofoni t’a taas nin-buiidã bʋ-kaoor koeese. Wõnda no-rɛɛs a Sofoni ra yaa Zida na-yirã neda, la baasgo, a pa golem koees nins a Zeova sẽn yeel t’a togs Zida taoor dãmbã ye. (Sof. 1:1; 3:1-4) Tõnd me rɩka a Sofoni togs-n-taar n tar a raoodã buudu, n pa basdẽ tɩ rogem yĩn-sidg kɩt tɩ d pa tũ a Zeova wa a sẽn datã ye. (Mat. 10:34-37) Koe-bʋg la a Sofoni taas nin-buiidã, la baasa wãna?
2. Bõe la d segd n maan n wa paam n põs a Zeova sũ-puugrã daare?
2 D bao a Zeova: Yaa a Zeova bal n tõe n fãag ãdem-biisã a sũ-puugrã daare. Rẽ n so t’a Sofoni sagl Zida nin-buiidã tɩ b bao a Zeova la b bao tɩrlem ne sik-m-meng tɩ nan ket n tõe. (Sof. 2:2, 3) Yaa woto me rũndã-rũndã. Wa a Sofoni, tõnd sagenda nebã tɩ b bao a Zeova, la tõnd ned kam fãa me segd n maoome n da wa bas a Zeova tũub ye. (Sof. 1:6) D sã n zãmsd Biiblã la d pʋʋsd n kot a Zeova sor-wilgri, wilgdame tɩ d baood-a lame. D sã n maood n yaa yɩlem d vɩɩmã nens fãa pʋgẽ, d baooda tɩrlem. Sẽn na n baase, d sã n sulgd d mens n sakd siglgã sor-wilgr tao-tao, d wilgdame tɩ d baooda sik-m-menga.
3. Bõe yĩng tɩ d segd n ket n moond koɛɛgã ne yam-sõngo?
3 Bi-sõma: Koees nins a Sofoni sẽn taas Zida nin-buiidã sõnga neb wʋsg tɩ b toeeme. Sẽn yɩɩd fãa, kɩtame t’a Zozɩas sɩng a Zeova baoob t’a nan paoodẽ. Kaoosg zugẽ, a zaba ne bõn-naands pʋʋsdbã n kɩt tɩ b menem a soolmẽ wã. (2 Kib. 34:2-5) Rũndã-rũndã, Rĩungã bõn-buudã tõnd sẽn bʋtã kẽer lʋɩta sor kɩrenga, kug zĩigẽ, wall gõosẽ. La baasgo, sãnda lʋɩta zĩ-sõngẽ n womd biisi. (Mat. 13:18-23) Tõnd kɩsa sɩd t’a Zeova na n ket n ningda tõnd koe-moonegã barka.—Yɩɩl 126:6.
4. Bõe yĩng tɩ d segd n ket n gũud a Zeova daarã?
4 Zida nebã kẽer tagsame t’a Zeova pa na n tol maan bũmb ye. La a Zeova wilg-b lame t’a sũ-puugrã daar ta n saame. (Sof. 1:12, 14) Yaa neb nins sẽn bao a Zeova wã bal n da na n paam fãagre. (Sof. 3:12, 17) Bɩ d fãa sẽn ket n gũud d Wẽnnaam a Zeova sẽn ka to wã daarã kɩdem sũ-noogo, n naag d tẽed-n-taasã n maand a raabã!—Sof. 3:8, 9.