666​—Pa yel-solgdg bal ye

“Ned ba a ye ka tõe n da walla koose t’a ka tar dũnga gʋlsem sẽn ya a yʋʋre walla a yʋʋr nimero wã ye. Yam be ka. Sẽn tar-a yam bɩ a geelg rũnga nimero võore; tɩ bõe, a yaa ned nimero, la a nimero wã yaa kobs-yoobe la pis-yoobe la a yoobe.”—Wilgri 13:17, 18.

BIIBLÃ pa tall gom-zut wʋsg sẽn nek nebã ratem bɩ kɩt tɩ b yɛɛs wa bãngr-gomd ning sẽn tɩ loe ne ‘we-rũngã’ nimero bɩ a yʋʋr sẽn yaa yel-solgdg sẽn yaa 666 ye. Televiziõ wã la ẽntɛrnetã pʋgẽ, n paas sĩnema wã, sɛbã la zʋrno rãmbã pʋsẽ, b gomda we-rũngã nimero yell wʋsg hal tɩ yaa no-koɛɛm n pa satẽ ye.

Kẽer tagsdame tɩ 666 yaa bãnd sẽn wilgd Kirist kɩɩsda yell Biiblã sẽn goma. Neb a taab yetame tɩ yaa bũmb sẽn wilgd f sẽn ya a soab tɩlae, wala gʋlsem f yĩngã zug bɩ a pʋgẽ ne nimero sẽn wilgd tɩ ned yaa we-rũngã sõgna. La neb a taab tagsdame tɩ 666 yaa Katolik papã naam nimero. Papã naamã waoogr yʋʋr sẽn yaa Vicarius Filii Dei wã (Wẽnnaam Biriblã pʋgdga) tara sõor Rom dãmbã sõdb gʋls-biis pʋgẽ. B golma sõor kãng bilf tɩ zems ne 666. Kẽer yetame me tɩ b tõe n mag n bãnga nimero kãnga, b sã n tik Rom soolmã naab a Diokletiẽ yʋʋrã ne latẽ buud gomdã zugu, la b tik a Sezaar Nerõ yʋʋrã ne hebre goamã zugu.a

La võor-wilgr kãensã sẽn yaa mamsg la nebã meng tagsg balã yaa toor wʋsg ne Biiblã meng sẽn yet we-rũngã nimero zugã, wala d sẽn na n yã sõsg ning sẽn pʋgdã pʋgẽ wã. Biiblã sɩd wilgdame tɩ Wẽnnaam sũ-yikrã na n waa neb nins sẽn tar we-rũngã nimero wã zutu, a sã n wa na n sãam zãmaan-kãngã. (Wilgri 14:9-11; 19:20) La 666 võor-wʋmb yɩɩda bao n bãng yel-solemd võor bala. Zu-noogo, Wẽnnaam a Zeova sẽn kõt mak-sõng n tɩ yɩɩd nonglmã wɛɛngẽ wã la a leb n yaa tẽebã vẽenem yẽgrã pa bas a sõgen dãmbã zɩɩlem pʋgẽ yel-kãng sẽn tar yõodã zug ye.—2 Tɩmote 3:16; 1 Zã 1:5; 4:8.

[Tẽngr note]