Pa ne d tʋʋmã bal la d paamd fãagr ye, la yaa Wẽnd nimbãan-zoeerã yĩnga
‘Yãmb paama fãagr tẽeb yĩnga . . . La a ka tʋʋma yĩnga tɩ ned da pẽg a meng ye.’—EFƐƐZ RÃMBA 2:8, 9.
1. Wãn to la kiris-nebã yaa toor ne neb wʋsgo, sã n yaa ne bũmb nins b ned kam fãa sẽn tõog n maanã, la bõe yĩnga?
RŨNDÃ-RŨNDÃ, nebã nong n zẽkda b zut wʋsgo, b sẽn tõog n maan bũmb ninsã yĩnga, la naoor wʋsgo, b yɩta tao-tao n wuk b mens rẽ yĩnga. La kiris-nebã pa maand woto ye. B pa nong n gomd n wilgd yɛl nins bãmb ned kam fãa sẽn tõog n maan vɩɩma pʋgẽ wã, la baa Wẽnnaam tʋʋmdã pʋgẽ wã me ye. Baa ne b sẽn kɩdemd ne bũmb nins a Zeova nin-buiidã sẽn tõog n maanã, b pa wilgd bãmb ned kam fãa sẽn maan rẽ wɛɛngẽ wã tɩ nebã ges ye. B miime tɩ b sẽn tʋmd a Zeova tʋʋmdã ne yam-sõng ningã n tar yõod n yɩɩd tʋʋm nins bãmb ned kam fãa sẽn tõog n maan rẽ wɛɛngẽ wã. Ned sã n wa paam vɩɩm sẽn pa satã, pa a meng tʋʋm yĩng ye, la yaa tẽeb la Wẽnnaam nimbãan-zoeerã yĩnga.—Luk 17:10; Zã 3:16.
2, 3. A Poll zẽka a zug ne bõe, la bõe yĩnga?
2 Tʋm-tʋmd a Poll da mii rẽ sõma. A sẽn pʋʋs naoor a tãab t’a Zeova yols-a ne ‘yĩng gõaagã,’ a Zeova leok-a-la woto: “Mam barka sekda foom; tɩ bõe, yaa pãn-komsem pʋgẽ la ned bãngd mam pãnga.” A Poll saka a Zeova raabã ne sik-m-meng n yeele: “Woto, mam na n maana sũ-noog [bɩ m na n zẽka m zug, NW ] n yɩɩd m pãn-komsma pʋgẽ tɩ Kirist pãng pid maam.” Tõnd segd n datame n dɩk togs-n-taar ne a Poll n tall sik-m-mengã.—2 Korẽnt dãmba 12:7-9.
3 Baa ne a Poll sẽn da tʋm kiris-ned tʋʋmã wʋsgã, a sak n deegame tɩ pa ne yẽ meng tõog la a maan dẽ ye. A yeela woto ne sik-m-menga: “Mam sẽn yaa Wẽnnaam neba fãa yao-zʋʋgã Wẽnnaam kõo maam bark kãng tɩ m moon bu-zẽms sʋka koɛɛg ninga sẽn togsd Kirist arzɛgs sẽn ka tɛkã.” (Efɛɛz rãmba 3:8) A Poll gom-kãensã wilgdame t’a pa zẽk-m-meng bɩ tɩtaam soab ye. “Wẽnnaam kisa tɩtaam dãmba, la b ningda sik-m-mens rãmba zut barka.” (Zak 4:6; 1 Pɩɛɛr 5:5) Tõnd tũuda a Poll mak-sõngã, n get ne sik-m-meng tɩ d pa ta d saam-biisã bɩ?
‘D tẽ tɩ neba fãa yɩɩda tõndo’
4. Wakat ninga, bõe yĩng tɩ yaa toog tɩ d ges tɩ neb a taabã yɩɩda tõndo?
4 Tʋm-tʋmd a Poll sagla kiris-nebã tɩ: “Da maan-y bũmb ba a yembr ne zabr walla wilg-m-meng ye, la bɩ ned kam fãa tẽ ne sik-m-meng yam tɩ neba fãa yɩɩda yẽnda.” (Filip rãmba 2:3) Rẽ maaneg tõe n yɩɩ toog ne tõndo, sẽn yɩɩd fãa, d sã n yaa taoor soaba. Tõe me tɩ sik-m-mengã tallg yaa toog ne tõndo, wags-taab yamã sẽn wae dũniyã zugã sẽn tall pãn-tusdg tõnd zugã yĩnga. Tõe me tɩ d sẽn da wa n yaa kamba, b zãmsa tõnd tɩ d wags ne d kẽem dãmbã la d yapã bɩ ne d karen-bi-taasã. Tõe tɩ b ra sagenda yãmb wakat fãa tɩ y mao n bãng ball tãoog n paam yʋʋr y karen-bi-taasã sʋka, bɩ tɩ y mao n yɩ permie y karen-doogẽ wã. Yaa sɩd tɩ d sã n maan d sẽn tõe tɛka, yaa bũmb sẽn zems pẽgre. Kiris-nebã maanda woto, la b pa baood tɩ nebã pẽg-b ye. B ratame n dɩ b tʋʋmdã yõod sõma, tɩ sã n tõe bɩ neb a taabã rɩ a nafa me. La f sã n dat wakat fãa tɩ b pẽg-f n yeel tɩ foo n lʋɩ nebã fãa taoore, tõe n yɩɩ yelle. Wãn to?
5. Ned sã n pa zãag a meng ne wags taab yam, tõe n wa kɩtame t’a maan bõe?
5 Ned sã n pa zãag a meng ne wags taab la rat-m-yembr yam, tõe n wa kɩtame t’a pa waoogd a taabã, la a lebg tɩta-neda. A tõe n wa maanda sũ-kiir ne neb a taabã tõog la b zu-noog tʋʋma. Yelbũna 28:22 yetame: “Zoe-bõn soab rat n paama arzɛk tao-tao. A ka mi tɩ naong na n yõk-a lame ye.” A tõe n data ne tɩtaam meng n paam taoor-sobend sẽn pa segd ne-a. Sẽn na yɩl n kõ a meng bʋʋm ne a sẽn maandã, a tõe n sɩngame n yẽgemdẽ, n wɩt neb a taabã. La kiris-ned segd n zãaga a meng ne manesem a woto. (Zak 3:14-16) Vẽenega, nin-kãngã buud tõe n wa baooda sẽn nafd yẽ mengã bala.
6. Wãn to la Biiblã keoogd tõnd tɩ d gũus ne wags taab yamã?
6 La Biiblã sagenda kiris-nebã woto: “Bɩ tõnd da waoog tõnd mens zaalem n maan no-baoodem walla sũ-kiir ne taab ye.” (Galat dãmba 5:26) Tʋm-tʋmd a Zã goma kiris-ned sẽn tall yam-kãngã buud yell woto: “Mam gʋlsa koɛɛg bilfu n tʋm a Zezi tẽedbã, la a Diotrɛf sẽn nong n yɩ bãmb taoor soaba ka reegd tõnd ye. Yaa woto yĩnga mam sã n wa, mam na tẽeg bũmb nins yẽ sẽn maanã la a gom-yaalsa fãa yẽ sẽn gomd tõndã.” Kiris-ned sã n tall manesem a woto, ad sɩd yaa kaeto!—3 Zã 9, 10.
7. Rũndã-rũndã tʋʋmã sẽn tar wags taabã pʋsẽ, kiris-ned segd n laka a meng ne bõe?
7 Sɩda, yaa bũmb sẽn pa zems tɩ d tags tɩ kiris-ned tõe n laka a meng fas-fas ne wags taabã. Wala makre, kiris-ned nug tʋʋm tõe n baoodame t’a wags ne neb a taab ligdã baoob wɛɛngẽ bɩ ne neb sẽn yiisd teed sẽn yaa yembr ne yẽnda, bɩ sẽn tar tʋʋm sẽn yaa yembr ne yẽnda. La baa sã n yaa woto, kiris-ned segd n tʋma a tʋʋmdã ne waoogre, nonglem la nanebo. A pa na n tall manesem sẽn kɩɩsd laloa wã bɩ sẽn pa zems ne kiris-ned ye. Sẽn paase, a na n gũusame tɩ b ra ges-a wa ned sẽn tar wags taab yam ye. A pa na n tags tɩ lʋɩ taoor bũmb nins fãa a sẽn maandã pʋgẽ n tar yõod n yɩɩd ye. D sã n pa segd n maan woto ne dũniyã pʋgẽ tʋʋma, tẽebã pʋgẽ wã n yɩɩde.
‘D ra mak d meng ne ned a to ye’
8, 9. a) Bõe yĩng tɩ kiris-neb kãsem dãmbã pa segd n wags taaba? b) Bõe yĩng tɩ 1 Pɩɛɛr 4:10 goamã pak Wẽnnaam sõgen dãmbã fãa?
8 B wilga manesem ning kiris-nebã sẽn segd n tall ne b tẽebã tʋʋmã gom-kãensã vʋʋsem sõng sẽn vẽneg tɩ b gʋlsã pʋgẽ: “Bɩ ned kam fãa mak a meng tʋʋma, dẽ, yẽ na yaool n maan sũ-noog a meng yĩng bala, la ka ne ned a to ye.” (Galat dãmba 6:4) Tigingã kãsem dãmb sẽn mi tɩ b pa wagsd taabã yĩnga, b tʋmda zems-n-taar pʋgẽ ne taaba. B maanda sũ-noog ne bãmb ned kam fãa sẽn tõe n maan n sõng ne tigingã neerã. Rẽ wã, b lakda b mens ne wags taab yam la b kõt tigingã neb a taabã mak-sõng zems-n-taarã wɛɛngẽ.
9 Kãsem dãmb kẽer yʋʋmã, yɛl nins b sẽn yã vɩɩmã pʋgẽ wã, la b sẽn tar tõod ninsã yĩnga, b tõe n tʋmda sõma n yɩɩd b taabã, bɩ tõe tɩ b tara yam n yɩɩda. Rẽ kɩtame tɩ kãsem dãmbã tar zɩɩb toɛy-toɛy a Zeova siglgã pʋgẽ. B pa makd b mens ne taab ye, la b ningda sagl-kãngã b yamẽ: “Bɩ ned kam fãa rɩk Wẽnnaam barka kũuna yẽ sẽn deegã n yɩ tʋm-tʋmd sẽn yaa sõama n sõng a taab wa sẽn zems Wẽnnaam kũun toɛy-toɛyã.” (1 Pɩɛɛr 4:10) Sɩda, verse kãngã paka a Zeova sõgen dãmbã fãa, bala b fãa paama bãngr sẽn yaa takɩ wã, la b fãa tara zu-noog n moond koe-noogã.
10. Yaa ne manesem bʋg bal la tõnd tẽebã tʋʋm na n ta a Zeova yam?
10 Yaa tõnd sẽn na n tʋmd d tẽebã tʋʋm ne nonglem la wẽn-sakr yĩng bal la tat a Zeova yam, la pa d sẽn na n tʋmd sẽn na yɩl n wilg tɩ d yɩɩda d taabã ye. Woto yĩnga, tara yõod wʋsg tɩ d tall tagsg sẽn zems ne tʋʋm nins d sẽn tʋmd n teend tũudum hakɩkã. Baa tõnd ned baa a yembr sẽn pa tõe n kao a to bʋʋd n yeel tɩ yaa yam-wẽng n tusd-a wã, a Zeova “feesda neba fãa sũyã.” (Yelbũna 24:12; 1 Sãmwɛll 16:7) Rẽnd wakat-wakate, d segd n sokda d mens woto: ‘Yaa ne yam bʋg buud la m tʋmd tẽebã tʋʋma?’—Yɩɩl Sõamyã 24:3, 4; Matɩe 5:8.
D tall tagsg sẽn zems ne d tẽebã tʋʋma
11. Sogs-bʋs sẽn zems la d tõe n sok d meng tõnd koe-moonegã wɛɛngẽ?
11 Yam ning sẽn tusd tõndã n tar yõod n yɩɩd sẽn na yɩl n ta a Zeova yam, hal sẽn ta zĩ-bʋg masã la tõnd tẽebã tʋʋm segd n pak-do? Tõnd sã n moond koe-noogã ne yam-sõngo, sɩd yaa tɩlae masã tɩ d gʋls n wilg d sẽn tʋm tɩ ta to-to ningã bɩ? Sogs-kãensã zemsame, bala d pa rat tɩ d tẽebã tʋʋm pʋgẽ, yɩ d sẽn na n gʋls d koe-moonegã rapoor zugã n pak tõnd n yɩɩd d kiris-ned tʋʋmdã pʋgẽ ye.
12, 13. a) Yaa bʋʋm kẽer bʋs yĩng n kɩt tɩ d ket n gʋlsd d koe-moonegã rapoor n kɩtẽ? b) Bʋʋm bʋs la d tar n na n maan sũ-noogo, d sã n ne koe-moonegã fãa rapoore?
12 Ges-y sebr ning sẽn yaa Organisés pour faire la volonté de Jéhovah wã sẽn yete: “A Zezi Kirist pipi karen-biisã ra nonga koe-moonegã sẽn kẽngd taoor to-to wã kɩbaya. (Mark 6:30) Tʋʋmã sebr sẽn be Biiblã pʋgẽ wã yeta tõnd tɩ b sẽn da wa n pʋdg vʋʋsem sõngã karen-biisã zut Pãntekotã sasa wã, sẽn zems neb 120 n da be be. Tao-tao tɩ karen-biisã sõor zẽk n taa 3 000, rẽ poore 5 000. . . . (Tʋʋma 1:15; 2:5-11, 41, 47; 4:4; 6:7) Sãmbg sẽn ka be, karen-biisã sẽn wʋm fɩɩgrã kɩba-kãensã wã kenga b raood hal sõma!” Yaa woto yĩng me n kɩt tɩ rũndã-rũndã, a Zeova Kaset rãmbã modgd n gʋlsd kɩbay sẽn zems takɩ, sẽn na yɩl n wilg tʋʋmd ning sẽn tʋmd dũniyã gill zug tɩ pidsd a Zezi gom-kãensã wã: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) Kɩba-kãensã wilgda tʋʋm nins sẽn sɩd maan dũniyã gill zugã. B leb n wilgda raabã sẽn beẽ, la sɛb buud nins b sẽn date, la b sẽn dat sɛb sõor ninsi, sẽn na yɩl tɩ koe-moonegã kẽng taoore.
13 Woto, d sã n gʋls d koe-moonegã rapoore, sõngda tõnd tɩ d moon Rĩungã koe-noogã tɩ yɩ sõma n paase. Sẽn paase, d sã n wʋm d saam-biisã sẽn be tẽns a taabã koe-mooneg kɩbaya, pa kengd d raood sɩda? Kɩbay nins sẽn wilgd fɩɩgrã sẽn maand dũniyã gill zugã kõta tõnd sũ-noog wʋsgo, n kɩtdẽ tɩ d tʋmd n paasdẽ, la wilgdẽ tɩ d sɩd tara a Zeova barka. La ad sɩd bee yamleoog tɩ d bãng tɩ tõnd mengã sẽn maanã naaga dũniyã gill koe-mooneg rapoor kãngã pʋgẽ! Tõnd mengã koe-mooneg rapoor yaa kɩdga, b sã n mak-a ne nebã fãa rẽnd sẽn fãoog taabã, la tõnd me rẽndã pa ling a Zeova ye. (Mark 12:42, 43) Tẽeg-y tɩ yãmb koe-moonegã rapoor sã n da pa naagẽ, dũni gill koe-moonegã rapoor ra pa na n pidẽ ye.
14. Tõnd sẽn balemd a Zeova wã pʋgẽ, koe-moonegã la nebã zãmsg toor sẽn ka be, bõe me n naag be?
14 Yaa sɩda, pa bũmb nins fãa a Zeova Kaset soab sẽn maand a Zeova balengã pʋgẽ wã la b ningd koe-moonegã rapoor zug ye. Wala makre, d meng Biibl zãmsgã d sẽn maand wakat fãa wã, tigissã kẽndr la kẽes-m-meng b pʋsẽ wã, tigingã tʋʋma, kiris-nin-taasã sõngre, ligdã kũun sẽn na yɩl n sõng Rĩungã tʋʋmd dũniyã gill zugã, n paas yɛl a taab pa naag koe-moonegã kɩbayẽ ye. Rẽnd baa ne tõnd koe-moonegã rapoor sẽn tar yõod n sõngd tõnd tɩ d ket n tar yẽesem koe-moonegã pʋgẽ wã, la d ra boog d tʋʋma, d pa segd n ges-a wa tẽebã permi bɩ lesepaase, sẽn kɩtd tɩ d na n paam vɩɩm sẽn pa satã ye.
‘D wɩngda ne tʋʋm sõma maanego’
15. Baa ne tʋʋmã bal sẽn pa tõe n fãag tõndã, bõe yĩng tɩ b yaa tɩlae?
15 Baa tʋʋmã bal sẽn pa tõe n fãag tõndã, b yaa tɩlae. Yaa rẽ yĩng la b sẽn boond kiris-nebã tɩ ‘yẽ neb sẽn wɩngd ne tʋʋm sõama maanego,’ la b sagend-b tɩ b “tẽeg taab yelle la b yik taab ratem tɩ maan nonglem la tʋʋm sõama” wã. (Tɩt 2:14; Hebre dãmba 10:24) La Biibl gʋlsd a Zak yeela woto koɛɛg-koɛɛga: “Yĩnga sã n ka lagem ne [vʋʋsem, NW ], a yaa kũum. Woto me, tẽeb sã n ka lagem ne tʋʋma, a yaa kũum.”—Zak 2:26.
16. Bõe n tar yõod n yɩɩd tʋʋmã menga, la d segd n gũusa ne bõe?
16 Baa tʋʋm sõma wã yõod sẽn yaa to-to, yam ning sẽn kɩtd tɩ d maand-bã tara yõod n yɩɩda. Woto yĩnga, yaa sõma tɩ d fees d mengã wakat-wakat n ges yam ning sẽn kɩt tɩ d tʋmd tẽebã tʋʋmã. La sẽn mik tɩ ninsaal baa a yembr pa tõe n bãng yam ning sẽn kɩt tɩ neb a taabã maand tẽebã tʋʋmã, bɩ d gũus n da wa kao b bʋʋd ye. “Fo yaa ãnda n kaood ned a to tʋm-tʋmd bʋʋdo?” Woto la b sokd tõndo, la b leok vẽenega: “A sã n yalsdẽ walla a sã n lʋɩ, yõwã bee ne a zusoabã.” (Rom dãmba 14:4) A Zeova sẽn yaa nebã fãa Zusoabã, la a Zezi Kirist sẽn yaa Bʋkaood ning a sẽn yãkã, n na n kao tõnd bʋʋdo. La b pa na n tik tõnd tʋʋmã zut bal n kao d bʋʋdã ye, b na n tika yam ning sẽn kɩtd tɩ d tʋmd Wẽnnaam tʋʋmã, soay nins d sẽn tar rẽ maneg yĩngã, d nonglmã la d wẽn-sakrã zugu. Yaa a Zeova ne Kirist Zezi bal n tõe n bãng tɩ zems kɛpɩ, tõnd sã n maana bũmb nins b sẽn yet kiris-nebã tɩ b maanã, wala tʋm-tʋmd a Poll sẽn yeel woto wã: ‘Nang pãng n ta Wẽnnaam yam n yɩ tʋm-tʋmd sẽn kõn zoe yãnd ye, la sẽn togsd sɩd koɛɛga tɩrg bala.’—2 Tɩmote 2:15; 2 Pɩɛɛr 1:10; 3:14.
17. D sẽn maood ne d pãng tɛkã sasa, bõe yĩng tɩ d segd n ning Zak 3:17 goamã d yamẽ?
17 A Zeova pa baood tɩ tõnd maan sẽn yɩɩd d pãng ye. Sã n yaa ne Zak 3:17, ‘yam ninga sẽn yit yĩngra’ bee ‘sũ-bʋgsem’ me. Rẽ yĩnga pa yam tʋʋmde, la bũmb sẽn sɩd tar yõod ne tõnd tɩ d rɩk a Zeova togs-n-taar zĩ-kãnga wɛɛngẽ sɩda? Woto, tõnd mengã pa segd n bao n maan d sẽn pa tõe, bɩ n bao tɩ d saam-biisã maan b sẽn pa tõe ye.
18. Bõe la d tõe n gẽege, d sã n tar tagsg sẽn zems ne d tʋʋmã la ne a Zeova nimbãan-zoeerã?
18 D sã n ket n tar tagsg sẽn zems ne d tẽebã tʋʋm la ne a Zeova nimbãan-zoeerã, d na n talla d sũ-noogã sẽn yaa bũmb a yembr sẽn kɩt t’a Zeova sõgen dãmbã yaa toorã. (Ezai 65:13, 14) D tõe n kɩdmame, a Zeova sẽn barkd a nin-buiidã wʋsgo, baa tõnd mengã sẽn tõe n tʋm tɩ ta to-to ning fãa wã. D na n ket n wɩngda “ne bark pʋʋsgo,” n kot Wẽnnaam t’a sõng-d tɩ d maan d sẽn tõe tɛka. Rẽ, sãmbg sẽn ka be, “Wẽnnaam laafɩ sẽn yɩɩd neba bãngr fãa na gũ [tõnd] sũyã la [tõnd] tagsgo Kirist Zezi maasem yĩnga.” (Filip rãmba 4:4-7) D sẽn mi tɩ d tõe n paama fãagre, pa ne tõnd mengã tʋʋm bala, la yaa a Zeova nimbãan-zoeerã yĩngã, d tõe n paama belsg la raood kengre!
Y tõe n wilga bũmb ning sẽn kɩt tɩ kiris-nebã
• pa wukd b mense, ne bãmb ned kam fãa sẽn tõog n maan bũmb ninsã bɩ?
• pa tar wags taab yamã bɩ?
• gʋlsd b koe-moonegã rapoor n kɩtẽ wã bɩ?
• pa kaood b kiris-nin-taasã bʋʋdã bɩ?
[Foto, seb-neng 26, 27]
Kasem dãmbã maanda sũ-noogo, b ned kam fãa sẽn sõngd ne tigingã neerã yĩnga