Yikãadem sẽn yaa sõma Wẽnnaam nifẽ, la nebã nifẽ
“Yikãadem n zĩnd Galile Kana. . . . La b boola a Zezi ne a karen-biisã me tɩ b wa yikãadem kibsã.”—ZÃ 2:1, 2.
1. Kibar ning sẽn gomd a Zezi sẽn kẽng Kanã wã yellã wilgda bõe?
A ZEZI ne a ma la a karen-biis kẽer ra mii sũ-noog ning Wẽnnaam sõgen dãmb yikãadem sẽn yaa sõma sẽn tõe n kõ wã. Kirist meng maana a pipi yel-solemdã yikãadem kibsẽ, n kɩt tɩ kibsã yɩ kãseng la a yɩ noog n paase. (Zã 2:1-11) Tõe tɩ y zoe n kẽnga kiris-neb yikãadmẽ hal tɩ y sũur yɩ noogo. Nin-kãensã yãka yam n na n zĩnd ne taab n balem a Zeova. Tõe tɩ yãmb me ratame tɩ y yikãadmã yɩ wa nin-kãensã rẽnda buudu, bɩ y rat n sõnga y zoa t’a yikãadem yɩ sõma. La bõe n tõe n sõng ned t’a yikãadem yɩ sõma?
2. Bõe la Biiblã yet yikãadem sẽn maand to-to wã wɛɛngẽ?
2 Kiris-nebã miime tɩ pag ne rao sã n wa magd n na n kẽ kãadem, sagls nins sẽn be Wẽnnaam Gomdã pʋgẽ wã tõe n sõng-b-la wʋsgo. (2 Tɩmote 3:16, 17) Yaa sɩd tɩ Biiblã pa wilgd kiris-ned sẽn segd n maan bũmb nins takɩ a yikãadem yĩng ye. D wʋmda rẽ võore, bala rog-m-migs la noy nins nebã sẽn tũud tẽng ne a to fãa pʋgẽ wã pa yembr ye. Sẽn paase, wakat ninga noyã la rog-n-migsã toeemdame. Wala makre, pĩnd Israɛllã soolmẽ wã, nebã ra pa tar noy takɩ sẽn wilgd yikãadem sẽn segd n maan to-to ye. Yikãadmã daare, raoã peegda pagã n tɩ kẽes a meng roogẽ bɩ a ba wã roogẽ. (Sɩngre 24:67; Ezai 61:10; Matɩe 1:24) Woto bal la b ra maand nebã fãa nifẽ n wilg tɩ b kẽe kãadem. B ra pa baood n maan yɛl a taab wa rũndã-rũndã wã ye.
3. Bõe n zĩnd Kanã t’a Zezi meng kẽes a toogo?
3 Sã n yaa ne Israɛll nebã, raoã sã n da peeg pagã n tɩ kẽes a roogẽ bɩ a ba wã roogẽ, yaa yikãadmã la rẽnda. Rẽ poore, b ra tõe n maana kibs yikãadmã yĩnga. Zã 2:1 yeta woto: ‘Yikãadem n zĩnd Galile Kana.’ La gɛrk gom-biig ning b sẽn lebg tɩ “yikãadem” ka wã võor meng yaa “yikãadem kibsa.”a (Matɩe 22:2-10; 25:10; Luk 14:8) Kibarã wilgda vẽeneg t’a Zezi zĩnda Zʋɩf a ye yikãadem kibsẽ, la t’a sõngame n kɩt tɩ kibsã yɩ noog n paase. La d segd n bãngame tɩ yikãadmã sẽn da maand to-to a Zezi wakatẽ wã pa wõnd sẽn maand rũndã-rũndã wã ye.
4. Kiris-neb kẽer yãka yam n na n maan b yikãadmã wãn to, la bõe yĩnga?
4 Tẽns wʋsg pʋsẽ rũndã-rũndã, kiris-neb nins sẽn dat n kẽ kãadmã segd n tũu noy nins tẽngã taoor dãmb sẽn gãnegã. Rẽ poore, bãmb n yãkd b sẽn na n maan b yikãadmã to-to, rẽ we n zems ne tẽngã taoor dãmb noyã. Wala makre, b tõeeme bal n bao kãdeng taoor soab bɩ tũudum ned laloa wã sẽn kõ sore, t’a lugl b kãadmã. Kẽer boonda b roagdb kẽer bɩ b zo-rãmb sẽn yaa kiris-neb tɩ b wa maan kaseto, bɩ n wa naag-b n kɩdme. (Zeremi 33:11; Zã 3:29) Kiris-neb kẽer me pa maand kibs kãseng ye, bala yaa tʋʋm kẽengo, leb n baoodame tɩ b yiis ligd wʋsg me. B segenda rɩɩb n bool b zo-rãmb a wãn bal tɩ b wa rɩ. Tõnd sẽn yãk yam n na n maan d yikãadmã to-to fãa, d bãng tɩ kiris-neb a taab me tõe n yãka yam n maan b yikãadmã tɩ pa yɩ wa tõnd dẽndã ye.—Rom dãmba 14:3, 4.
5. Bõe yĩng tɩ kiris-neb wʋsg rat n kelg sõsg sẽn tik Biiblã zug b yikãadmã yĩnga, la sõs-kãng gomda bõe yelle?
5 Kiris-neb wʋsg yãkda yam n na n kelg sõsg sẽn tik Biiblã zug b yikãadmã yĩnga.b B sak n deegame tɩ yaa a Zeova la kãadem lugunda, la t’a Gomdã pʋgẽ, a kõo sagls sẽn wilgd tõnd sẽn segd n maan to-to n paam sũ-noog d kãadem pʋgẽ. (Sɩngre 2:22-24; Mark 10:6-9; Efɛɛz 5:22-33) Wʋsg ratame tɩ b zo-rãmb la b roagdb sẽn yaa kiris-neb wa naag-b n kɩdem sũ-noogo. La sẽn mik tɩ tẽng fãa tara a rog-n-migs, a noy la a yel-maandɩ yikãadem yĩngã, tõnd manesem segd n yɩɩ wãn to? Sõs-kãngã pʋgẽ, d na n yãa yikãadmã sẽn maand to-to tẽns toɛy-toɛy pʋsẽ. Tõe tɩ y mik tɩ b sẽn maand to-to tẽns a taabã pʋsẽ wã pa tol n wõnd sẽn maand yãmb tẽngẽ wã ye. Baasg zãnga, y na n yãame tɩ noy la yɛl kẽer n be tɩ Wẽnnaam sõgen dãmbã fãa segd n tũ.
Yikãadem sẽn maan tɩ zems ne laloa wã n tat Wẽnnaam yam
6, 7. Bõe yĩng tɩ d segd n tũ laloa wã sẽn yet bũmb ning yikãadmã wɛɛngẽ wã, la wãn to la d tõe n wilg tɩ d sɩd tũuda noyã?
6 Baa sẽn yaa a Zeova n lugl kãadmã, ninsaalbã goosneema rãmbã tara noy tɩ neb nins sẽn dat n kẽ kãadmã segd n tũ. Woto zemsame. A Zezi yeelame tɩ: “Bɩ y kõ Sezaar bũmb nins sẽn yaa Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.” (Mark 12:17) Tʋm-tʋmd a Poll me yeelame tɩ: “Bɩ ned kam fãa sak nanambsa noyã, tɩ bõe, noor ka be a sã n ka Wẽnnaam sẽn kɩt t’a zĩnd ye. Noy nins sẽn be wã yaa Wẽnnaam n kɩt tɩ b beẽ.”—Rom dãmba 13:1; Tɩt 3:1.
7 Tẽns wʋsg pʋsẽ, yaa laloa wã n kõt ned sor t’a yaool n kẽ kãadem. Dẽnd kiris-neb a yiib sẽn tar sor Wẽnnaam nifẽ n tõe n kẽ kãadem sã n wa rat n kẽ kãadem, b segd n tũu b tẽngã taoor dãmb sẽn gãneg noy nins kãadmã wɛɛngẽ wã neere. Tõe tɩ b segd n deng n kosa sore, tɩ b sã n paam bɩ b yaool n kẽng tɩ kãdeng bɩ tũudum ned laloa wã sẽn kõ sor lugl b kãadmã, la b kɩt tɩ b gʋls b kãadmã. A Sezaar Ogust sẽn wa n kõ noor tɩ b sõd nebã fãa wã, a Maari la a Zozɛf saka noorã n kẽng Betlehɛm “tɩ b sõd-ba.”—Luk 2:1-5.
8. Bõe ne bõe la a Zeova Kaset rãmbã pa maand yikãadmã wɛɛngẽ, la bõe yĩnga?
8 Kiris-neb a yiib sã n kẽ kãadem tɩ zems ne laloa wã, Wẽnnaam nifẽ b lebga pag ne a sɩda. Rẽ n so t’a Zeova Kaset rãmbã pa lugund b kãadem n yɩlem ye. Yikãadmã yʋʋm 25 bɩ 50 poore, b sã n na n maan kibs n tẽege, b pa lebd n pʋlem taab yɛs ye. (Matɩe 5:37) Wala makre tũudum kẽer getame tɩ kãdengẽ yikãadem pa tar yõod ye. Sã n yaa ne bãmba, tũudum taoor soab sã n pa lugl kãadmã, b pa tõe n yeel tɩ neb a yiibã lebga pag ne a sɩd ye. Tẽns wʋsg pʋsẽ, laloa wã kõta a Zeova Kaset rãmbã sor tɩ b yãk b kãsem soab a ye t’a tõe n lugl kãadem. Sã n wa yaa woto, yaa kãsem soabã n kõt sõsgã la a lugl kãadmã Rĩungã Roogẽ. Woto zemsame, bala yaa Rĩungã Roogẽ la b balemd Wẽnnaam a Zeova sẽn yaa kãadem lugundã.
9. a) Sã n mik tɩ yikãadmã na n maana kãdengẽ wã, bõe la kiris-neb kẽer maanda? b) B sã n na n kõo sõsg Rĩungã Roogẽ, bõe la kãsem dãmbã segd n maane?
9 Tẽns kẽer pʋsẽ, laloa wã baoodame tɩ yikãadmã maan kãdengẽ wã. Naoor wʋsgo, kiris-nebã sã n yi kãdengẽ wã, b kẽngda Rĩungã Roogẽ baraar bal bɩ vẽk-n-beoog n tɩ kelg sõsg sẽn gomd yikãadem yelle. Sã n na n yɩ raar a to me, b pa basd tɩ kaoos wʋsg ye, bala Wẽnnaam, tigingã neb la neb a taabã nifẽ, b zoe n kẽe kãadem. Kiris-neb a yiib sã n dat tɩ b sã n yi kãdengẽ wã poor bɩ b kẽng Rĩungã Roogẽ n tɩ kelg yikãadem sõsga, b segd n deng n kosa tigingã kãsem dãmb sore. Kãsem dãmbã na n bao n bãnga kiris-neb a yiibã sã n tara zʋg-sõma, la b ges me tɩ yikãadmã sõsg sẽn na n maan wakat ningã ra wa tiis tigingã tigissi, la yɛl a taab sẽn maand Rĩungã Roogẽ wã ye. (1 Korẽnt dãmba 14:33, 40) Yaa bãmb me n na n ges yikãadmã rãmb sẽn dat tɩ b maneg Rĩungã Roog to-to wã sã n zemsame, la b ges b sã n na n yiisa koɛɛg n wilg tɩ yikãadem sõsg la b na n kõ Rĩungã Roogẽ.
10. Yikãadmã sã n maan kãdengẽ wã, bõe la b segd n yeel yikãadmã sõsg pʋgẽ?
10 Kãsem soab ning sẽn na n kõ-a sõsgã segd n kɩtame tɩ sõsgã kelgr tall yamleoogo, n keng kɛlgdbã tẽebo, la a kɩt tɩ b bãng tɩ pa reem yell ye. Sã n mik tɩ neb a yiibã maana b yikãadmã kãdengẽ wã n yaool n na n wa Rĩungã Roogẽ, kãsem soabã segd n wilga kɛlgdbã vẽeneg tɩ neb a yiibã zoe n kẽe kãadem tɩ zems ne laloa wã. Kẽed-n-taasã sã n da pa pʋlem taab kãdengẽ wã, b tõe n maana rẽ sõsgã wakate.c La kẽed-n-taasã sã n da zoe n pʋlma taab kãdengẽ wã n dat n le pʋlem taab a Zeova la b saam-biisã nifẽ, b sẽn na n yeel pʋlengã to-to wã segd n wilgame tɩ b ra zoe n ‘lagem-b-la ne taaba.’—Matɩe 19:6; 22:21.
11. Tẽns kẽer pʋsẽ, yikãadmã maanda wãn to, la yaa tɩlae tɩ b yeel bõe yikãadmã sõsg pʋgẽ?
11 Tẽns kẽer pʋsẽ, laloa wã pa baood tɩ yikãadmã maan kãdengẽ ye. Sebr bal la pagã ne raoã na n sĩyn n tɩ wilg kãdengẽ wã tɩ b gʋls b kãadmã. Yaa raar ning kãdengã rãmb sẽn na n gʋls kãadmã n yaa yikãadmã raare, la yaa wakat kãng tɛk me la b lebgd pag ne a sɩda. Wala d sẽn zoe n yã tɩ loogã, neb kẽer datame tɩ b sã n gʋls b kãadmã poor bal bɩ b kẽng Rĩungã roogẽ n tɩ kelg yikãadem sõsg sẽn tik Biiblã zugu. Kãsem soab ning sẽn na n kõ-a sõsgã na n wilga kɛlgdbã fãa tɩ neb a yiibã tɩ gʋlsa b kãadmã tɩ rẽ kɩt tɩ b lebg pag ne a sɩda. B sã n dat n pʋlem taaba, na n yɩɩ wa b sẽn wilg sull 10 pʋgẽ la vẽnegr ning sẽn pʋgd sull piigã pʋgẽ wã. Neb nins sẽn wa Rĩungã Roogẽ wã na n naaga sẽn nan kẽ-b kãadmã n kɩdme, la b rɩ Wẽnnaam Gomdã sagls yõodo.—A Salomo Yɩɩllã 3:11.
Rog-n-mik la kãdengẽ yikãadem
12. Rog-n-mik yikãadem yaa bõe, la yaa sõma tɩ b maan bõe kãadem a woto buud poore?
12 Tẽns kẽer pʋsẽ, nebã maanda b sẽn boond a soab tɩ rog-n-mik yikãadmã. Pa neb a yiib sẽn miẽ n vɩ ne taab n yaool n pa kẽ kãadmã yell la b gomd ka ye, baa neb kẽer sã n get-b wa ned ne a paga.d Yikãadem ning yell b sẽn gomd ka wã yaa a soab ning sẽn maand tɩ zemsd ne buudã rog-n-mikã. Buud wʋsg pʋsẽ, raoã kõta pagã neb ligdi. Pagã neb sã n sak n deege, woto kɩtame tɩ laloa wã la Wẽnnaam taoore, neb a yiibã lebga pag ne a sɩda. Tẽn-kãensã goosneem dãmbã sakame tɩ rog-m-mik yikãadem a woto buud sɩd yaa yikãadem. Rẽ poore, kẽed-n-taasã tõe n tɩ kɩtame tɩ b gʋls b kãadmã. B sã n maan dẽ, b tõe n paama kãadem sebre. Kãadmã gʋlsg tara yõodo, bala tõe n sõngã kẽed-n-taasã. Tõe n sõnga pagã, sɩdã sã n wa maan kaalem, la a sõng kamb nins b sẽn na n paamã me. Tigingã neb segd n sagla neb nins fãa sẽn maan rog-n-mik yikãadem a woto buudã tɩ b tɩ kɩt tɩ b gʋls-b kãadmã tao-tao. Wõnda a Moiiz Tõogã tũub wakate, sɛb n da be tɩ ned sã n da kẽ kãadem wall biig sã n da rog fãa, bɩ b gʋlsdẽ.—Matɩe 1:1-16.
13. Rog-n-mik yikãadmã poore, yaa sõma tɩ yikãadmã sõsg maan wakat bʋgo?
13 Neb a yiib sã n maan rog-n-mik yikãadem ning yell b sẽn gom zugẽ wã, b lebgda pag ne a sɩda. Tõe tɩ kiris-neb sẽn maan rog-n-mik yikãadem na n datame n kẽng Rĩungã Roogẽ n tɩ kelg yikãadem sõsg la b pʋlem taaba. Sã n yaa woto, sẽn na n kõ-a sõsgã segd n sɩd talla kaset tɩ neb a yiibã zoe n kẽe kãadem tɩ zems ne laloa wã. Sõsgã segd n yɩ a ye bala. Sẽn yaa a soab fãa, neb a yiibã yikãadem maanda vugri, tɩ kãadmã sõsg me yaa vugri. Yita sõma tɩ yikãadmã la sõsgã maan daar a yembre. La baa b wa n pa tõog tɩ fãa maan raar-n-yɛng me, bɩ b ra bas tɩ kaoos tɩ b yaool n kõ sõsgã ye. Rẽ na n kɩtame tɩ buudã la sakã rãmb waoog kiris-nebã yikãadem.
14. Sã n mik tɩ laloa wã saka rog-n-mik yikãadmã la a sak tɩ b tõe n maan yikãadem kãdengẽ wã, bõe la kiris-ned tõe n maane?
14 Tẽns kẽer pʋsẽ laloa wã sẽn sak tɩ rog-n-mik yikãadem sɩd yaa yikãadmã, b le rɩka segls tɩ sẽn dat-bã tõe n lugl b yikãadmã kãdengẽ wã. Nong n yaa kãdengã ned a ye n lugund yikãadmã, la wakat ninga neb a yiibã tõe n pʋlma taab la b sĩyn kãadem sebr me. Kiris-neb kẽer rata kãdengẽ yikãadmã n yɩɩd rog-n-mik yikãadmã. La noor ka be sẽn wilgd tɩ yaa tɩlae tɩ b maan a yiibã fãa ye, bala laloa wã taoore, fãa yaa yikãadem. B sã n dat tɩ yikãadem sõsg zĩnd la b rat me n pʋlem taaba, b segd n tũu sagls nins sẽn be sull a 9 ne 10 pʋgẽ wã. Bũmb ning sẽn tar yõod n yɩɩd yaa neb a yiibã maan b yikãadmã tɩ yɩ sõma Wẽnnaam nifẽ la nebã me nifẽ.—Luk 20:25; 1 Pɩɛɛr 2:13, 14.
Kɩt-y tɩ y yikãadmã tall waoogre
15, 16. Wãn to la d tõe n kɩt tɩ yikãadem tall waoogre?
15 Pɛrs rĩm a ye n da paam zu-loɛɛg a kãadmã pʋgẽ. A sagend a ye sẽn boond t’a Memucan sagl-a lame t’a yiis noor sẽn da tõe n kɩt tɩ ‘pagbã fãa waoog b sɩdbã.’ (Ɛstɛɛr 1:20) Kiris-nebã nengẽ, pagbã pa baood tɩ naab kõ-b noor tɩ b waoog b sɩdbã ye. Bãmb mengã maanda rẽ ne yamleoogo. Sɩdb nins sẽn yaa kiris-nebã me waoogda b pagbã la b pẽgd-ba. (Yelbũna 31:11, 30; 1 Pɩɛɛr 3:7) Pa yʋʋm wʋsg yikãadmã loogr poor la d segd n sɩng n waoogd taab ye. Yaa yikãadmã daar bal meng la sɩngda.
16 Pa yikãadmã daar bal la pagã ne a sɩdã segd n waoog taab ye. Sẽn paas me, kãsem soab ning sẽn na n kõ-a sõsgã me segd n kõ-a-la ne waoogre. A sã n wa kõt a sõsgã wakate, yaa ne raoã ne a pagã la a segd n gomda. Sõsgã sẽn segd n waoog pagã ne a sɩdã yĩngã, sẽn kõtã sõsgã pa segd n togsd goam sẽn na n kɩt tɩ kɛlgdbã tar laad bal ye. A segd n gũusame n da togs goam sẽn tõe n wa ning pagã ne a sɩdã la kɛlgdbã yãnd ye. A segd n modgame t’a sõsgã kelgr tall yamleoog la keng kɛlgdbã tẽebo, la a modg me n gom kãadem Lugundã la a saglsã sẽn ka to wã yell n yɩɩda. Vẽenega, kãsem soabã sã n kõ sõsgã sõma, rẽ na n sɩd waooga a Zeova.
17. Bõe yĩng tɩ kiris-nebã yikãadem segd n tũ tẽngã noyã?
17 Sõs-kãngã pʋgẽ, d yãa yɛl wʋsg yikãadmã sẽn maand to-to wã wɛɛngẽ. Tõe tɩ yɛl kẽer pa maand yãmb sẽn vɩẽ wã ye. La tõnd fãa segd n bãngame tɩ tara yõod t’a Zeova Kaset rãmbã sã n wa maand b yikãadmã bɩ zems ne tẽngã laloa. (Luk 20:25) A Poll sagla tõnd woto: “Bɩ y kõ neba fãa sẽn zems bãmba, bɩ y kõ yõor yaood dɛɛgdba yõor yaoodo, la y kõ tribu rɛɛgdba tribu; . . . neb nins sẽn zems waoogrã, bɩ y waoog-ba.” (Rom dãmba 13:7) Sẽn sɩng ne yikãadmã daar menga, zemsame tɩ kiris-nebã tũ segl ning a Zeova sẽn dɩk kãadmã wɛɛngẽ tɩ nan be rũndã-rũndã wã.
18. Bõe la wʋsg maand b yikãadmã poore, la yɛ la d tõe n paam sagls rẽ wɛɛngẽ?
18 Kiris-neb wʋsg yikãadem poor bala, b maanda kibs yikãadmã yĩnga. D tẽeg t’a Zezi meng zĩnda yikãadem a ye kibsẽ. Sã n wa mik tɩ yikãadem kibs na n zĩndame, wãn to la sagls nins sẽn be Biiblã pʋgẽ wã tõe n sõng-d tɩ d kɩt tɩ bũmb nins fãa sẽn na n maan kibsã sasa wã me yɩ Wẽnnaam waoogr yĩnga, la a kell n zẽk pagã ne a sɩdã la tigingã yʋʋre? Sõsg ning sẽn pʋgdã na n goma rẽ yelle.
[Tẽngr not rãmbã]
a Gɛrk gom-biigã võor pa yikãadem kibs bal ye. Tõe n yɩɩ kibs a taab me.—Ɛstɛɛr 9:22, Septuagint.
b A Zeova Kaset rãmbã kelgda sõsg sẽn dɩkd minit 30 t’a gom-zugã yaa: “Yikãadem sẽn yaa sõma Wẽnnaam nifẽ.” Sõsgã tika Biiblã sagls nins sẽn be Zak pʋgẽ sũ-noogã kʋɩlen-biigã sebrẽ, la sɛb a taabẽ a Zeova Kaset rãmbã sẽn yiisã zugu. Sõsgã nafda sẽn nan kẽ-b kãadmã, la neb nins sẽn wa n na n kelgã me.
c Tẽngã laloa sã n pa wilg tɩ b segd n yeela bũmb a to n paase, d tõe n yeela pʋlems nins sẽn pʋgdã, bala waoogda Wẽnnaam. Raoã yeta woto: “Maam [a zagl] sakame n na n peeg foo [a zagl] tɩ f yɩ mam paga. M pʋlemdame tɩ m na n nong-f-la ne m sũur fãa wa Gʋlsg Sõamyã sẽn baood tɩ sɩdbã maanã, la na n kell n yɩɩ woto tõnd sẽn na n zĩnd ne taab tẽng zug ka wã sasa, wa Wẽnnaam sẽn datã.” Ad pagã sẽn yete: “Maam [a zagl] sakame tɩ foo [a zagl] yɩ mam sɩda. M pʋlemdame tɩ m na n nong-f-la ne m sũur fãa la m waoogd-f wʋsgo, wala Gʋlsg Sõamyã sẽn baood tɩ pagbã maanã, la tɩ na n kell n yɩɩ woto tõnd sẽn na n zĩnd ne taab tẽngã zug ka wã sasa, wa Wẽnnaam sẽn datã.”
d Yʋʋmd 1963 bõn-bɩʋʋng kiuug rasem 15 Gũusg Gãsgã seb-neng 575 wã gomda neb a yiib sẽn mii n vɩ ne taab n pa kẽe kãadmã yelle.
Yãmb ket n tẽrame bɩ?
• Bõe yĩng tɩ d segd n bao n bãng laloa wã la Biiblã sẽn yet bũmb ning yikãadmã wɛɛngẽ?
• Kiris-neb a yiib sã n maan b yikãadem kãdengẽ wã, bõe la b tõe n yãk yam n maan rẽ poore?
• Bõe yĩng tɩ yaa Rĩungã Roogẽ la b kõt yikãadem sõsgã?
[Foto, seb-neng 12]
Pĩnd Israɛllẽ wã, yikãadmã daare, raoã ra peegda a pagã n tɩ kẽes a roogẽ bɩ a ba wã roogẽ
[Foto, seb-neng 15]
Tõe tɩ kiris-neb sẽn maan rog-n-mik yikãadem na n datame n kẽng Rĩungã Roogẽ n tɩ kelg yikãadem sõsga